तेसलोनि सहरते पौलुसना सेवाता कबळ
2
1 मावा विस्वासि दादालोर-अक्काह्कुनिटा! मोमोट मिहगा वातद एर्तम आया हिल्ले इंचि मीक एरपाटे मंता. 2 गानि दीनकन्ना मुन्ने पिलिपि सहरते माकुन बदनाम कीसि वेल्लेन दुक्कम हीता पोल्ले मीक एरपाटे मंता. लोकुल्क माकुन बागाने विरोदम कीतुर. विरोदम किय्यिना गानि पेनदा बेसता कबुर मीक वेहालय पेन दैरनेम हीता. 3 बारित्ते मावा बोदा गलतितेनो, कराब विचाराल्कुनेनो, पसांचाना उद्देसमते वेहतद आयो. 4 गानि पेन माकुन दाना बेसता कबुरता लायक कीसि, बेसता कबुरतुन वेहालय माक अप्पाजेप्ता. अदुनहाटीं मावा मनसुन परिक्सा कियाना पेनदुन कूस कियालय वेहंतोम गानि मनकलोर्कुन कूस कियालय पेनदा पोल्ले वेहोम. 5 बारित्ते मोमोट मीकुन बस्केने बुद्दरकिच्चना पोल्लें वळ्का हिल्लोम. आनि मावा आस्तिताहाटीं मीकुन नळेह किया हिल्लोम, दीनकु पेने गवाइ मंता, इंचि मीक एरपाटे मंता. 6 इच्चोरे आयाका, मोमोट अय्ते किरिस्तुना प्रेरितुल्कुम इंचि मी पोर्रो मावा अदिकारम हूपिस्तोमे, गानि मिमेट आयि, वेरेटोर आयि, इंका बोना हेंदाले आयि पेद्दातनम दोर्किच्कुनालय मोमोट हूळा हिल्लोम. 7 तल्लुर दाना पिलाल्कुन बल्हा अवरिच्कुंतनो, अल्हाने मोमोट इंका मीकुन बेस हूळकुत्तोम. 8 अदुनहाटीं मीवापोर्रो इच्चोर पावरम मंता गदा, मोमोट मीक सिराप पेनदा बेसता कबुरे आयो, मावा जीवागुडा हियालय तयार मत्तोम. मिमेट अच्चोर पावरमतोर आसि मत्तिट. 9 विस्वासुल्कुनिटा! मावा कस्टम आनि तकलिप मीक मते मंदार. मावा बर्वु मीक बोनके आयामन्नि इंचि नर्का-पिय्यल कबळ कीतोम. अल्हा कीसेके पेनदा बेसता कबुर मीक वेहचि मत्तोम.10 मी विस्वासुल्कुना नड्डुम मोमोट बल्हा पवित्रते, सत्तेमते, दोसेम हिलाकुंटा मत्तोम, इदुना मिमेटे गवाइ मंतिट आनि पेनगुडा मंता. 11-12 पेन मीकुन दाना राज्येमते आनि दाना पेद्दातनमते कलियालय केयता, अदुनहाटीं दानकु नच्चनालायक मिमेट ताकाट इंचि वेहतोम. बाबाल बल्हा ओना पिलाल्कुन अवरिच्कुंतोर अल्हेने, मोमोट मीक हरेक मनकंक तेळियागोट्सि वेहासेके, दैरनेम हीसेके, विनंति कीसेके मत्तोम, इद मीक एरपाटे.
13 आनि बस्के अय्ते पेनदा पोल्ले मावाहेंदाल मीक दोर्कता, अदुन मिमेट केंजतिर. अस्के मिमेट अद मनकलोराहेंदाल वातद आयो, गानि पेनदाहेंदाल वातद निजम पोल्ले इंचि ओप्कुत्तिर. अदुनाहाटींगुडा मोमोट पेनदुक बस्केळ्क दन्यवाद कींतोम. आनि मीवा विस्वासुल्कुना नड्डुम पेनदा पोल्लेगुडा कबळ कीसेक मंता. 14 अद बल्हा इत्ते, मावा दादालोर-अक्काह्कुनिटा! यहुदिया राज्येमते येसु किरिस्तुना लोप्पो मत्तोर पेनदा विस्वासुल्कुनालेसिं मिमेट ताकसेक मंतिट. बारित्ते बल्हा मिमेट मीवा देसेमतोर्कुना हेंदाल तकलिप बोगांचतिरो, अल्हेने ओर ओरा यहुदिल्कुनाहेंदाले तकलिप बोगांचतुर. 15 ओरे सामि येसुन आनि पेनदा कबुतोर्कुन हव्कतुर. ओर माकुन पलाते दोबतुर. पेन ओरतोनि कूस हिल्ले. ओर अंटुर लोकुल्कुना विरोदमते मंतुर. 16 यहुदि आयवोर्कुनतोनि पेनदा पिसागोटमळ बारेमते वळ्कते, ओर माकुन आपंतुर. इल्हा कीसि बस्केळ्क ओरा पापाल्कुन निह्कुंतुर. गानि आकिरते पेनदा होंग ओरपोर्रो रेयंता.
पौलुस ओर्क मर्रा कलियंतन इनकुनमळ
17 विस्वासुल्कुनिटा! गडसेमताहाटीं मोमोट मीवागटाल लक्कु आतोम, गानि मनसुनाल लक्कु आया हिल्लोम. मर्रा मोमोट वेल्लेने आसेते मीवा मोकम हूळाना इंचि बच्चोरो कोसिस कीतोम. 18 बारित्ते माक मीहगा वायागोम इंचि मंता. नना पौलुस बच्चुंगो मल्कां कोसिसगुडा कीतन, गानि देय्यम माक अड्डम आयुंदु. 19 मावा आसे आयि, मावा कुसि आयि, मना येसु सामि मर्रा वायानस्के ओना मुन्ने मावा पेद्दातनमता किरिटम आयि, बतल आंद? मिमेट आयिरा? 20 हो, मावा पेद्दातनम, मावा कुसि मिमेटे आंदिर.