तेसलोनि सहरतोर्क पौलुस रासता मोदाटा सिट्टि
जोहर
1
1 नना पौलुसुनa, सिलवानुसb आनि तिमोति मोमोट इद सिट्टि मीक तेसलोनि सहरते मंदना विस्वासुल्कुनाहाटीं रासेके मंतोम. मिमेट पेन बाबाल आनि सामि येसु किरिस्तुनतोनि कलियसि मंतिट इंचि मीक पेनदाहेंदाल दया, सांति दोर्किकांटि.तेसलोनितोर्कुना विस्वासम
2 मोमोट पारतनाने मीवा मति कीसेक, मी अंटोराहाटीं पेनदुक बस्केळ्क दन्यवाद कींतोम. 3 मिमेट विस्वासमते कियाना कबाटुन, पावरमते कियाना मीवा कस्टमतुन आनि सामि येसु किरिस्तुना पोर्रोटा आसेते ओप्के पीसि मत्तादुन मोमोट मना पेन बाबाना मुन्ने बस्केळ्क मति कीसेके मंतोम.
4 मावा विस्वासुल्कुनिटा! पेन मीकुन पावरम कीसि पेर्ता इंचि माक एरपाटे मंता. 5 बारित्ते, मोमोट वेहता बेसता कबुर सिराप पोल्लेनतोने आयो गानि ताकतते, पवित्र आत्माते आनि पूरा गट्टि विस्वासमते मीहागा वाता. मोमोट मीवा नड्डुम मंचेके बल्हा ताकतोम मीक एरपाटे मंता. 6 मिमेट वेल्ले दुक्कमते मत्तस्केगुडा पवित्र आत्मा हियना कुसिते बेसता कबुरतुन केंजतिर आनि मिमेट मावालेसिं आनि सामिनालेसिं ताकालय सुरु कीतिर. 7 इल्हा मिमेट अकाया आनि मकिदोनिया राज्येमता विस्वासुल्क मीकुन हूळसि ताकालय, मीमेट ओर्क उंदि उदाहरनलेसिं आतिर. 8 बारित्ते मीहेंदाल सामिना पोल्ले सिराप मकिदोनिया आनि अकाया राज्येमतेने एवता इंचि आयो गानि पेनदा पोर्रोटा मीवा विस्वासमता बारेमते अन्नि जागाने तेळियसि होत्ता. अदुनहाटीं मोमोट मीक वेहाना बतल अव्सरम हिल्ले. 9 बारित्ते मोमोट मीहगा वातस्के, मिमेट माकुन दग्गेरे कीसि बल्हा बेस हूळतिर, ओरे मावा बारेमते वेहासेक मंतुर. अल्हेने मिमेट बोम्माना पेनकुन होळसिसि, जीवाता पेनदा सेवा कियालय बल्हा मलतिर इंचि वेहासेक मंतुर. 10 आनि पेन येसुन हातोरव्टेटाल तेहता. इंदके स्वर्गमताल दाना मर्रि येसु मल्सि वायानदुन एदुर हूळसेक मंतिर, इंचि इव पोल्लें अंटुर्क वेहासेक मंतुर. वायाना पेनदा होंगुनाल ओरे येसु मनाकुन पिस्सागोटंतोर.