8
1 गानि येसु जय्तुन मराकुना गुट्टतेके होत्तोर. 2 आनि हक्केरेन मर्रा गुळितगा वातोर. वेल्लेन लोकुल्क ओनगा जमा आतुर. आनि येसु उद्दिस ओर्क कराहलय दल्गतोर. 3-4 कराहनेंके, बोगमतनम कियनेंके दोर्कता उंदि मुरतटुन, दर्मसास्त्रम कराहना गुरुल्क आनि परिसिल्क ओनगा पीसि तच्चि लोकुल्कुना मुन्ने दान निल्हातुर. निल्हाचि, “गुरु, इद मुरतटुन बोगमतनम कियानेंके मोमोट दोर्का पीतोम. 5 इसंटा मुरतटुन बंडाने तंचि हव्कना इंचि मूसाना नियम मनाकु आदेस हीता. अय्ते दीना बारेमते निमे बतल इंतिन मरि?” इंचि येसुन पूसकीतुर. 6 ओर वळ्कानेंके बतलन्ना तप्पु कीते ओन दोर्का पियना उपायमते, ओर असोंटा सवाल पूसकीतुर. गानि येसु हिळु वंगिसि बूमिपोर्रो बतलो वेलुने रासालय दल्गतोर. 7-8 गानि ओर उंदे हट्टु पीताहाटीं, येसु तेदसि ओर्कुन, “सरे! बंडाने तनाटु. गानि मिहगटाल बोरय्ते बस्केने पापम किया हिल्लोर, मुन्ने ओरे दीन बंडाते तनना,” इंचि वेहतोर. आनि मर्रा वंगिसि बूमिपोर्रो वेलुने रासालय दल्गतोर. 9 दान तत्तोर अंटोर येसु इत्तदुन केंजसि, मोदाला मातरालोर आनि पजोटाल अंटोर वरोन पज्जो वरोर अगटाल पेय्सि होत्तुर. ओर अंटोर अगटाल होत्तस्के लोकुल्कुना नड्डुम सिराप येसु आनि आ मुरतळे मत्तुर. 10 पजा येसु इंकुंदि मल्का तेदसि, “बाई, नीकु सिक्साता आदेस हियानोर बेके होत्तुर? नीकु बोरे सिक्साता आदेस हिय्या हिल्लुरा?” इंचि पूसकीतोर. 11 अस्के अद मुरतळ, “नाकु बोरे सिक्साता आदेस हिय्या हिल्लुर सामि!” इंचि जवाब हीता. पजा येसु, “ननागुडा नीकु सिक्साता आदेस हिय्योन. होन, इंका बस्केन पापम कियमा,” इंचि दान्क वेहतोर.येसु दुनियातोर्क वेलगु
12 पजा येसु, “नना दुनियातोरा हाटीं वेलगु आंदुन. बोरय्ते नावा पज्जो ताकंतोर, ओर बस्केन हीकटते ताकोर. बारित्ते ओनगा पिसवरतेके ओयना वेळसी मनंता,” इंचि वेहतोर. 13 अस्के परिसिल्क, “नीवा बारेमते निमेन गवाइ वेहकुंचंतिन, अदुनहाटीं नीवा गवाइते सत्तेम हिल्ले,” इंचि येसुन इत्तुर. 14 अय्ते येसु ओर्क इल्हा जवाब हीतोर, “नावा बारेमते ननाने गवाइ वेहिनागानि, नावा गवाइ मात्रम सत्तेम आंद. बारित्ते, नना बगाटाल वातन, बगा दांतन, इत्तद नाक एरपाट मंता. गानि नना बगा वातन, बगा दांतन मीकु बतले एरपाट हिल्ले. 15 मिमेट मनकना बुद्दिते न्यायम कींतिर, गानि नना बोनदे न्यायम किय्योन. 16 ओक्कला नना न्यायम कियिनागानि नावा न्यायम निजम मनंता, बारित्ते नना वरोने हिल्लेन, नाकुन लोहचीता ना बाबाल नाक तोळ मंतोर. 17 इव्वुरा गवाइ उंदि आते, अद गवाइ निजम मनंता इंचि मीवा मूसाना नियमतेन रासि मंता. 18 दीन परकारम, नावाहाटीं नना वरोर गवाइ आनि नाकुन लोहचीता ना बाबल इंका वरोर गवाइ,” इंचि येसु इत्तोर. 19 इद केंजसि ओर, “नावा बाबाल बगा मंतोर?” इंचि पूसकीतुर. अस्के येसु, “असल नना बोन, नावा बाबाल बोर? मीकु एरपाट हिल्ले. मिमेट नाकुन एरपाट कियानय्ते, ना बाबान इंका एरपाट कींतिर,” इंचि ओर्क वेहतोर. 20 येसु इव पोल्लें, गुळिता लोप्पो कोत्ता वाटना जेगातगा नित्तिसि कराहनेंके वळ्कतोर. अय्नागानि ओन बोरे दोर्का पिया हिल्लुर. बारित्ते ओना वेला एव्वनदे मत्ता.
येसुना पोल्लें यहुदि पेद्दाल्कुंक अर्तमायों
21 पजा इंकुंदि मल्का येसु ओर्कुन, “नना अय्ते होंचंतन. मिमेट नाकुन पहककिर. मिमेट मीवा पापाल्क मापि आयका मुन्नेन हाकिर. नना बगाय्ते होंचंतन अगा मिमेट वाया परिर,” इत्तोर. 22 अस्के यहुदि पेद्दाल्क ओरद ओरे, “नना बगाय्ते होंचंतन अगा मिमेट वाया परिर, इंचि बारि इंचंतोर मरि? ओक्कला ओना जीवातुन ओरे पोळागोटकुन्नोर गदा!” इंचि वळ्कालय दल्गतुर. 23 पजा येसु ओर्कुन, “मिमेट हिळतोर आंदिर, आनि नना पोर्रोटोन आंदुन. मिमेट इद दुनियातोर आंदिर, गानि नना आयोन. 24 अदुनहाटींगें, मिमेट मीवा पापाल्क मापि आयका मुन्नेन हाकिर, इंचि नना इत्तन. ओन ननाने आंदुन इंचि विस्वासम कियाकोंटे, मिमेट मीवा पापाल्क मापि आयका मुन्नेन हाकिर,” इंचि इत्तोर. 25 अस्के ओर, “अय्ते निमे बोन आंदिन मरि? माकु वेहा,” इंचि पूस कीतस्के येसु, “नना बोन इंचि मीकु मुन्नेटाल वेहचेके वातानो, नना ओने आंदुन. 26 मीवा बारेमते वळ्कालय, मीवा न्यायम कियालय, नहगा वेल्लेन पोल्लें मंतां. गानि नाकुन लोहतोर सत्तेमंतुड आंदुर, इंचि नना सिराप ओनागटाल केंजता पोल्लेंगें लोकुल्कुंक वेहचंतन,” इंचि इत्तोर. 27 गानि येसु ओना बाबाना बारेमते वेहतोर इंचि ओर्क इंकागुडा अर्तम आया हिल्ले. 28 अदुनहाटीं येसु, “मनकना रूपमते पुटतोन नाकुन, बस्के अय्ते वेलळ वाटमळ जर्रगंतनो, अस्के, ओन ननाने आंदुन इंचि, मीकु एरपाट आयार. अचोने आयका, नना सतागा बतले कीसेक हिल्लेन, गानि बव पोल्लें अय्ते बाबाल नाकु कराहतोरो, अवे पोल्लें नना वेहतन. 29 नाकुन लोहातोर नावा तोळ मंतोर. ओर नाकुन बस्केन ओंटिगा होळसोर. बारित्ते नना बस्केळ्क ओन्क कुसि हियना कबाह्के कींतन,” इंचि वेहतोर. 30 ओना ई पोल्लें केंजतोर, वेल्लेटोरे ओन नम्मुतुर.
पापमताल पलाते अर्रना बारेमते येसुना कराहमळ
31 पजा येसु, ओनपोर्रो विस्वासम कीता यहुदिल्कुनतोनि, “मिमेट नना कराहता पोल्लें पीसि ताकानय्ते निजमे नावा सिस्युल्क आंतिर. 32 अस्के मिमेट सत्तेमतुन एरपाट कीकिर आनि आ सत्तेमे मीकुन होळसार,” इंचि इत्तोर. 33 अस्के ओर, “मोमोट अय्ते अब्राहामुना वंसंमतोरम आंदुम, इदवेरदाका मोमोट इद बूमिपोर्रो बोनदे कय हिळु दासुल्क आसि मना हिल्लोम. अय्ते, अद सत्तेम मीकुन होळसार, इंचि निमे बल्हा इंतिन?” इंचि येसुंक जवाब हीतुर.
34 अस्के येसु ओर्क इल्हा वेहतोर, “नना निजम-निजम वेहासेक, पापम कियना हरेक मनकल पापमता दासुडे. 35 वरोर दासि मनकल मालकुना लोतोरतोनि बस्केळ्क मन्नोर, गानि मालकुना मर्रि मात्रम बस्केळ्क मनांतोर. 36 अदुनहाटीं पेनदा मर्रि मीकुन पापमताल होळसीतेने, निजमते मिमेट पापमताल पलाते अर्रांतिर. 37 मिमेट अब्राहामुना वंसमतोर इंचि नाकु एरके. अय्नागानि नावा पोल्लेंक मीवा लोप्पो जेगा हिलुवाहेंका मीवा लोप्पोटाल इच्चुर नाकुन हव्कालय हूळसंतिर. 38 नना नावा बाबानतोनि मत्तस्के बतल अय्ते हूळतनो, अदे मीकु वेहचंतन. आनि मिमेटगुडा मीवा बाबान हेंदाल केंजतद कीसंतिर,” इंचि इत्तोर. 39 अस्के ओर, “अब्राहाम मावा बाबाल आंदुर,” इंचि इत्तुर. पजा येसु, “हिल्ले! मिमेट गिंटा अब्राहामुना पिलाल्क आसि मत्ते, मिमेटगुडा ओर कीतापे कीसि मन्नेर. 40 गानि नना पेनदागटाल केंजता सत्तेम पोल्लें मीकु वेहते, मिमेट नाकुने हव्कालय हूळसंतिर. अब्राहाम अय्ते अल्हा किया हिल्लोर. 41 मिमेट मीवा बाबाल कीताप कीसंतिर,” इंचि इत्तोर. अस्के ओर, “मोमोट बोगमतनम कीते पुट्टा हिल्लोम! माकु वरोरे बाबाल मंतोर, ओर पेन बाबाले,” इंचि येसुन इत्तुर.
42 अस्के येसु ओर्कुन इल्हा इत्तोर, “पेन मीवा बाबाल आसी मत्ते मिमेट नाकुन पावरम कीसि मन्नेर. बारित्ते नना पेनदागटाल वातन. इगे नावद ननेन वाया हिल्लेन. पेने नाकुन लोहता. 43 नना वेहनदुन मिमेट असल केंजिर, अदुनहाटींगे नावा पोल्लें मीकु अर्तम आयों. 44 मिमेट देय्यमता पिलाल्क आंदिर, देय्यमे मीवा बाबाल आंदुर. अदुनहाटीं मीवा बाबाल कियना तप्पुड कबाह्क कियमळ इत्ते मीकु वेल्लेन इस्टम. देय्यम मुन्नेटाले जीवां तिंचेके वाता. अद सत्तेमतुन बस्केन हय्सो. दानागा सत्तेम हिल्लेन हिल्ले. आबद्दम वळ्कमळे दाना गुनम आंदु, अदुनहाटीं अद बस्केळ्क आबद्दमे वळ्कंता, आबद्दमतुन पुट्संता. 45 अदुनहाटीं नना मीकु सत्तेम वेहिनागानि मिमेट नाकुन नम्मिर. 46 नना बतलन्ना पापम कीतन इंचि मिहागटाल बोरन्ना हुप्सा परांतिरा? नना निजम वेहचंतन, अय्ते मिमेट बारि नाकुन नमसेक हिल्लिर? 47 बोरय्ते पेनदा मनकल, ओर पेनदा पोल्लें केंजंतोर. गानि मिमेट पेनदा मनकलोर आयिर, अदुनहाटीं मिमेट अव पोल्लेन केंजसेक हिल्लिर,” इंचि येसु इत्तोर.
येसु सतता बारेमते आनि अब्राहामुना बारेमते वळ्कंतोर
48 अस्के यहुदिल्क, “निमे सामरियातोनa आंदिन, नीकुन देय्यम पीता, इंचि इनानय्ते, मोमोट इनानद निजमे गदा?” इंचि येसुन पूसकीतुर. 49 अस्के येसु ओर्क इल्हा जवाब हीतोर, “नाकुन देय्यम पिया हिल्ले. नना नावा बाबाना कदर कींतन, गानि मिमेट नावा कदर कीसेक हिल्लिर. 50 नाकु कदर दोर्कना इंचि नना बस्केन इनकुनोन, गानि नाकु कदर दोर्कना इंचि इनानोर वरोर मंतोर. ओरे न्यायम कियानोर आंदुर. 51 नना निजम-निजम वेहासेक, बोरे आयिर नना कराहता पोल्लेन पोर्रो ताकानय्ते, ओर बस्केन हामुरतुन हूळोर,” इंचि इत्तोर. 52 इदुन केंजसि यहुदिल्क, “नीकु निजमे देय्यम पीता इंचि इंदके माकु एरपाट आता. अब्राहाम आनि पेनदा कबुरतोरगुडा हातुर, आनि निमे, ‘बोर आयिर, नना वेहता पोल्लेन पोर्रो ताकानय्ते, ओर बस्केन हामुरतुन हूळोर’ इंचि वेहांतिन. 53 मावा एनकटा पेद्दा मातरल अब्राहामगुडा हातोर, निमे ओनकन्ना पेद्दोना? पेनदा कबुरतोरगुडा हातुर. निवद निमे बोन आंदिन इंचि इनकुंचंतिन?” इंचि येसुन पूसकीतुर.
54 येसु ओर्क इल्हा जवाब हीतोर, “नावद ननाने कदर कीकुत्ते, अद कदरक बतले विल्वा मन्नो. गानि बोन अय्ते मिमेट, ‘मावा पेन आंदुर’ इंचि इंतिरो, ओरे नावा बाबाल आंदुर, ओरे नाकु कदर हीसंतोर. 55 गानि मिमेट ओन एरपाट किय्यिर, नना ओन एरपाट कींतन. नना गिंटा, ‘ओन नना एरपाट किय्योन,’ इंचि इनानय्ते, ननागुडा मीलेसीं आबद्दम वळ्कानोन आंतन. गानि नना ओन एरपाट कींतन, ओना पोल्लेन पोर्रो ताकंतन. 56 नना वायना रोजुन हूळंतन इत्ता आसेते, मीवा एनकटा पेद्दा मातरल अब्राहाम, कूस मत्तोर. पजा अद रोजुन हूळसि ओर वेल्लेन कूस आतोर,” इंचि इत्तोर. 57 पजा यहुदिल्क, “निमे अब्राहामुन हूळतिना? नीकु अय्ते एबै वर्सांगुडा हिल्लें!” इंचि येसुन पूसकीतुर. 58 अस्के येसु, “नना निजम-निजम वेहासेक, अब्राहाम मातरल पुट्टका मुन्नेटाले नना मत्तन,” इंचि इत्तोर. 59 इद पोल्ले पोर्रोटाल, ओन बंडाने तंचि हव्कना इंचि अंटोर बंडां पेरतुर. गानि येसु ओर्क दिस्साकोंटा मक्किस गुळिताल पेय्सि होत्तोर.