योहान 7

येसुन ओना तम्मुह्कगुडा नम्मुर

1 इद आता पजा, येसु गालिलतेन नार-नार तिरियसेक मत्‍तोर. यहुदि पेद्‍दाल्क ओन हव्कालय पोंचा दोस्सि मत्‍ताहेंका ओर यहुदिया राज्येमते होना हूळा हिल्‍लोर. 2 गानि अद वेलाते यहुदिल्कुना डेराना पंडुगु दग्गेर्क एवसि मत्‍ता, 3 अदुनहाटीं येसुना तम्मुह्क येसुन, “निमे इगेटाल यहुदिया होन. अस्केन निमे कियना अद्बूतामाता कबाह्क नीवा सिस्युल्क हूळा परांतुर. 4 बोरय्ते ओना पोर्रोल दुनियाक तेळियगोम इंचि इंतोरो, ओर बतले कबळ मक्‍किस किय्योर. निमे निजमे इसोंटा अद्बूतामाता कबाह्क कियानय्ते, दुनियातोरा मुन्‍ने कीसि हुप्‍सा,” इंचि इत्‍तुर. 5 बारित्‍ते, ओना तम्मुह्कगुडा ओन नम्मा हिल्‍लुर.

6 अस्के येसु, “मीकु अय्ते अन्‍नि वेलां मंचिये, मिमेट बस्के इत्‍ते अस्के अगा होना परांतिर. गानि नना अगा होनना वेला इंका एव्वा हिल्‍ले. 7 दुनियातोर मीकुन हय्साकोंटा मना परुर. गानि नना दुनियातोरा कबाह्क बेसतव आयों इंचि दुनियातोरा विरोदमते गवाइ हींतन, अदुनहाटीं नाकुन दुनियातोर हय्सुर. 8 मिमेट पंडुगुंक होंटु. इद पंडुगुंक नना वासेक हिल्‍लेन, बारित्‍ते नना वायना वेला इंका एव्वा हिल्‍ले,” इंचि येसु ओर्क वेहतोर. 9 ओर्क इव पोल्‍लें वेहचि ओर गालिलतेन मत्‍तोर.

10 गानि ओना तम्मुह्क पंडुगुंक होतंका, पजोटाल येसुगुडा अंटोर्क दिस्सेक आयो, गानि चुपचाप पंडुगुंक होत्‍तोर. 11 यहुदि पेद्‍दाल्क पंडुगुनगा, “ओर बगा मंतोर?” इंचेके ओन पह्कालय दल्‍गतुर. 12 अद मंदिताल इच्‍चुर लोकुल्क बारे येसुना बारेमते, “ओर बेस मनकल आंदुर,” इंचि इनुंदुर. आनि इंकिच्‍चुर बारे, “हिल्‍ले रो! ओर लोकुल्कुन गयबेत कींतोर,” इंचि गुसा-गूसा वळ्ककुनुंदुर. 13 गानि यहुदि पेद्‍दाल्कुना वेर्रेकु बोरे लोकुल्क येसुना बारेमते कुल्‍ला-कुल्‍ला वळ्काकोंदुर.

पंडुगु जर्गनेंके येसु कराहंतोर

14 पजा पंडुगु सुरुव आसि सगम पोळ्‍द आतंका, येसु गुळिते होंचि कराहलय दल्‍गतोर. 15 ओर कराहनदुन केंजसि यहुदि पेद्‍दाल्क, “ई मनकल अय्ते बदे इस्कुलते, बोरे गुरुनगा होंचि करिया हिल्‍लोर. अयना ईन्कु इच्‍चोन वेल्‍ले तेल्वि बगाटाल वाता?” इंचेके इचंत्रमते अरतुर. 16 अस्के येसु ओर्क इल्हा जवाब हीतोर, “नना कराहना पोल्‍लें नावां आयों, नाकुन लोहचीता पेनदव आंदुं. 17 मीवा लोप्पोटाल बोरे आयिर, पेनदा इच्‍चा मत्‍ताप ताकंतन इनकुनानय्ते, नना कराहना पोल्‍लें नहगटाल वासंतंगा हिलाकोंटे पेनदागटाल वासंतंगा, इंचि ओन्क तेळियंता. 18 बोरय्ते ओना सतता पोल्‍लें कराहंतोरो, ओर ओना पोर्रोल्तुने पेद्‍दा कियालय हूळांतोर. गानि बोरय्ते ओन लोहतोन्कु कदर दोर्कना इंचि इनकुंतोरो, ओर सत्‍तेम मनकल आंदुर, ओनगा बतले आबद्‍दम हिल्‍ले. 19 मूसाल अय्ते मीकु दर्मसास्त्रमतुन एव्विचि हीतोर. गानि मिहागटाल वरोरगुडा अव्टेटा नियमकुनपोर्रो ताकसेक हिल्‍लिर. अय्ते बारि नाकुन हव्कालय हूळसंतिर?” इंचि येसु इत्‍तोर. 20 अस्के लोकुल्क, “नीकुन देय्यम पीताना बतला, अल्हा वळ्कसंतिन! बोर नीकुन हव्कालय हूळसंतुर?” इंचि येसुंक जवाब हीतुर. 21 अय्ते येसु इल्हा वळ्कालय दल्‍गतोर, “नोमकेम रोजुननाड नना उंदि अद्बूतामाता कबळ कीतदुन हूळसि, मिमेट अंटोर वेल्‍लेन इचंत्रमते अरतिर. 22 कतना कियना इंचि मीकु मूसाल वेहचि मत्‍तोर. असल निजम हूळते, ई कतना रिवाज मूसाल सुरुव किया हिल्‍लोर. अद एनकटा पेद्‍दाल्कुनगटाल वाता. आनि मिमेट अय्ते कतना कियना वेला वातस्के, नोमकेम रोजुननाडगुडा मीवा मर्कुना कतना कींतिर. 23 मूसाना नियम तप्पानायो इंचि, नोमकेम रोजुननाड बोनादन्‍ना कतना कियना वेला वायानय्ते मिमेट ओना कतना किया वच्‍चु. गानि अदे नना नोमकेम रोजुने वरोर मनकन पुरागा बेस कीते, मीकु ना पोर्रो होंग बारि वायना? 24 मोकोम हूळसि न्यायम कियमट, निजम-निजम न्यायम कीम्टु. अस्के वेहतदे निजम इंचि मीकु तेळियसि दांता,” इंचि येसु इत्‍तोर.

येसु बोर आंदुर?

25 अस्के येरुसलेमतोर इच्‍चुर लोकुल्क, “यहुदि पेद्‍दाल्क बोन अय्ते हव्कालय हूळसंतुरो, ओर ईरे अय्ते आयोर गदा! 26 हुळट, ओर लोकुल्कुना नड्‍डुम नित्‍तिसि बल्हा कुल्‍लम-कुल्‍ला वळ्कसंतोर! अय्नागानि ओन बोरे बतल इंचेक हिल्‍लुर. ईरे किरिस्तु इंचि, मना पेद्‍दाल्कगुडा एरपाट कीतुर बारे! 27 किरिस्तु वायनेंके ओर बगाटाल वांतोर, बोनके तेळियो. गानि ईर मनकल बगाटाल वातोर, मनाकु अंटोर्क एरपाटे मंता.” इंचि ओर वरोंक-वरोर वळकालय दल्‍गतुर. 28 येसु गुळितगा कराहनेंके इल्हा वळकालय दल्‍गतोर, “हो! नना बोन आंदुन, बगाटाल वातन इदंता मीकु एरपाटे मंता. गानि नावद ननेन इगे वाया हिल्‍लेन. नाकुन लोहतोर सत्‍तेमंतुड आंदुर, ओर बोर आंदुरो मीकु एरपाट हिल्‍ले. 29 गानि नना ओन एरपाट कींतन. बारित्‍ते ओरे नाकुन लोहातोर, नना ओनागटाले इगे वातन,” इंचि लगांचि वेहतोर. 30 पजा यहुदि पेद्‍दाल्क येसुन दोर्का पियालय हूळतुर. गानि वरोरगुडा ओन्क कय दोस्सा पराहिल्‍लोर. बारित्‍ते अस्केळ्क ओना वेला एव्वका मत्‍ता. 31 अयना गुळितगा मत्‍ता मंदिताल वेल्‍लेटोर येसुन नमतुर. नम्मिसि, “किरिस्तु वातस्‍के, ईनकन्‍ना एक्‍को अद्बूतमायना कबाह्क कियनुरा?” इंचि ओर वळ्कालय दल्‍गुतुर.

यहुदि पेद्‍दाल्क येसुन दोर्का पियालय हूळांतुर

32 लोकुल्क येसुना बारेमते इसोंटा पोल्‍लें गुसागुसा वळकनेंके परिसिल्क केंजतुर. केंजसि पेर्मालोर्क आनि परिसिल्क कलियसि येसुन दोर्का पियालय गुळितगा कावेल कीसेक मत्‍ता सिपाइल्कुन लोहतुर. 33 अस्के येसु ओर्क, “इंका जेर्रासेप नना मीतोनि मनंतन, पजा नाकुन लोहतोनगा नना तिरियसि दांतन. 34 मिमेट नाकुन पह्काकिर, गानि मीकु दोर्कोन. इंका नना मनना जेगातगा मिमेट वाया परिर,” इंचि वेहतोर. 35 अल्हा वेहाटेलक, यहुदि पेद्‍दाल्क ओरद-ओरे, “मनम पह्किना गानि दोर्काकोंटा ओर बगा दांतोर आयावच्‍चु? युनानि देसेमते होंचि मनना, मना लोकुल्कुंक पेनदा पोल्‍लें अय्ते करहोर गदा! हिलाकोंटे युनानि लोकुल्कुनगा दांतोरा? 36 ‘मिमेट नाकुन पहकाकिर, गानि मीकु दोर्कोन. इंका नना मनना जेगातगा मिमेट वाया परिर,’ इंचि इत्‍ता पोल्‍लेंक अर्तम बतल आयावच्‍चु?” इंचेके वळ्ककुनालय दल्‍गतुर.

येसुन नम्मुतोर्क पेनदा आत्मा दोर्कंता

37 अद पंडुगुना आकिरता रोजुंकु वेल्‍लेन विल्वा मनंता. अद रोजुने येसु नित्‍तिसि, “दूपातोर नहगा वासि उंडावच्‍चु. 38 दर्मसास्त्रमते रासि मत्‍ताप, ना पोर्रो विस्वासम कीतोना लोप्पोटाल पिसवर हियना एता बेरेह्क पोंगनूं,” इंचि येसु लगांचि वेहतोर. 39 येसुनपोर्रो विस्वासम कीतोर्क पेनदा आत्मा दोर्कनद मत्‍ता. अदे आत्माता बारेमते वेहालय येसु इव पोल्‍लें वळ्कतोर. येसु हासि इंका तेदानदे मत्‍तोर. अदुनहाटीं पेन अदवेरदाका अद आत्मातुन बोर्के हिय्या हिल्‍ले. 40 इव पोल्‍लें केंजतोर इच्‍चुर लोकुल्क, “निजमे! बोर पेनदा कबुरतोर अय्ते वायनद मत्‍तोरो, ओर ईरे आंदुर,” इंचि इत्‍तुर. 41 इंकिच्‍चुर बारे, “ओर किरिस्तु आंदुर,” इंचि इत्‍तुर. आनि इंकिच्‍चुर लोकुल्क, “अरे! गालिल एरियाताल किरिस्तु वांतोरा? 42 ‘किरिस्तु दाविद राजाना वंसंमते पुटतोर आनि दाविद राजाल पुटता बेतलहेम नाटेनाले वांतोर,’ इंचि दर्मसास्त्रमते रासि हिल्‍लेना!” इंचि इत्‍तुर. 43 येसुना बारेमते लोकुल्कुंक रकारकाल्कुना विचाराल्क मत्‍ताहेंका, लोकुल्क ओरद ओर्के अर्राकोंटा आसि वेरे-वेरे आतुर. 44 इच्‍चुर ओन दोर्का पियालय हूळतुर, गानि बोर वरोरगुडा ओनपोर्रो कय वाटा परा हिल्‍लुर.

विस्वासम कियुवा यहुदि पेद्‍दाल्क

45 गुळितगा कावेल कियानोर बोरय्ते येसुन दोर्का पियालय होत्‍तुर, ओर उत्‍ता कय्‍के मल्सि वातुर. अस्के, “मिमेट ओन बारि पीसि तराहिल्‍लिर?” इंचि पेद्‍दा पेर्मालोर आनि परिसिल्क ओर्कुन पूसकीतुर. 46 अस्के आ कावेल कियानोर, “ओर वळ्कताप बोरे मनकल बस्केन वळ्का हिल्‍लोर,” इंचि जवाब हीतुर. 47 पजा “ओर मीकुनगुडा पसांच्‍तोरा? 48 यहुदि पेद्‍दाल्कुनाल आयि, परिसिल्कुनाल आयि, बोर वरोरन्‍ना ओन नम्मुतोर मंतोरा? बोरे हिल्‍लुर. 49 गानि येसुन बोरय्ते नम्मुतुरो ओर्क मूसाना नियमकु तेळियों, ओर्क तप्पाकोंटा सापनेम दल्‍गंता,” इंचि परिसिल्क इत्‍तुर. 50 अगा निकोदेमस पोर्रोल्तोर वरोर मत्‍तोर, ओर मुन्‍ने उंदि मल्का येसुंक कलियसि मत्‍तोर. ओरगुडा आ परिसिल्कुनाल वरोर आंदुर. 51 अय्ते ओर, “वरोर मनकंक मनम ओना गवाइ केंजाकोंटेने, ओर बतल कीतोर तेल्‍पिच्‍कुनाकोंटेने मना दर्मसास्त्रमता नियमकुना परकारम, न्यायम किया परांतोमा?” इंचि ओर्कुन पूसकीतोर. 52 अय्ते ओर, “अरेय, निमेगुडा गालिल एरियातोना रो? होन! होंचि दर्मसास्त्रमते बेस पह्कीसि हद्‍वा, गालिलताल बोरे पेनदा कबुरतोर वायोर इंचि रासि मंता,” इत्‍तुर.

बोगमतनम कीता मुरतटुन येसु मापि कींतोर

53 पजा ओर अंटोर ओरा-ओरा लोह्कुने होत्‍तुर.

www.gondwana.in