Kiwālēē :pōōrpō Yēēsu
Maarkō 9:2-10; Luuka 9:28-36
17
1 Kii nēē kaakusiirtō :pērēētuus choo lēē lo, kuumut :Yēēsu Pēētērō, Chēēmis ākōō Chowaana wēēriing'waang', kupa ākōy tul aka nyoo tōrōōr wōloo kimālēēkitēē chiich. 2 Kuwala :Yēēsu kilēpēyiit nkōō taayuung'waang' kuurōōsēy :akwaaneek. Kuwala tokochtanyiin kuuryal kilēē asiis akiwāliisyō sirōōchiich kireelachiniituuy kilē tyal. 3 Kuuro :kiineetanichoochēē sōmōk *Muusa ākōō *Eliicha kung'āloolēy nkōō Yēēsu. 4 Kumwoochi :Pēētērō Yēēsu kilē, “Kiptaayaan, karaam āmu kimii yi, nēē ichāmēy, ātēēchinii yi sōpōōtwēēn choo lēē sōmōk, nyoong'uung' ākoong'o, kipō *Muusa aka, kipō *Eliicha aka.”5 Kitākung'āloolēy :Pēētērō, kuulaampuus :pooltō nyoo rēēl akwaaneek akichōōnō kuut pooltoonoonēē kilē, “Wēēriinyuun :nyi nyoo āchāmēy ākoopāypāychinii, ātēērchii kiyoo mwoorēy.”
6 Paani kateer :kiineetanichoochēē ng'aleechoochēē, kuwāriisyō nyēpō kwōng'uut akuuputi ng'wēny. 7 Kuchō :Yēēsu yi kiimii akwaaneek akutiing'. Kumwoochi kilē, “Āng'ēētyēē āmoowāriisyō.” 8 Kii nēē ng'eet :kiineetanichoochēē mētēwēy kimararta, kuurō Yēēsu ākityōōn.
9 Kii nēē mii kurēkuunēē tulwēē, kumwoochi :Yēēsu kiineetanichoochēē kilē, “Moomwoochi chiich aka tōkōl kiyoo kakung'uutwook ākōy /keeng'eeta *Wēēroo Chiich meerat.”
Kuunēētēy :Yēēsu wōloo kiilēē :chōōnātoo Eliicha
Maarkō 9:11-13
10 Kuteepa :kiineetanichiich Yēēsu kilē, “Āmu nee nyuun tākumwoorēy :koonēēt chēpō ng'ātuut kilē wārākēē *:Eliicha kupōk?” 11 Kuwālchi :Yēēsu kilē, “Ntōrōōruuy *:Eliicha kilēē nyoonēē tākusat tukun tōkōl. 12 Āmwoorwook nyuun kilē kiikuchō *Eliicha aku moosōwu :pichoochēē. Kii-irchi :pichoochēē inyeentee kir aka tōkōl kilēē wōli kiimārtooy :akwaaneek. Nyāriilēy nyuun mpō :pichoochēē *Wēēroo Chiich kilēē nyoonēē.” 13 Kusōwu nyuun :kiineetanik kilē kiimii :Yēēsu kung'āloolēē Chowaana Koopootiisāniin.
Muukēē :kir aka tōkōl nkōō chiich nyoo rānēy Iriin
Maarkō 9:14-29; Luuka 9:37-43a
14 Paani kā-it :Yēēsu ākōō kiineetanichiich wōli kiimii :piich chaa chaang', kuchō :chiich akukutung'ō taayuunyiin akilēēchi, 15 “Kiptaayaan, riiree wēēriinyuun nyoo ting'ēy mēērmēēruut nyoo nēē nam kuwiirchinii ma ntā ku pēr. 16 Koomuti kiineetanikuuk, kimaakuumuuk kuusoop.”
17 Kumwa :Yēēsu kilē, “Muutyō akwaan choo mooting'ēy kaarana akyoochuunnyō. Ātēpēē nkōō akwaan ākōy āyu? Āmurtoochinook ākōy āyu? Amutwaan wēēroonēē yi.” 18 Ku-oon :Yēēsu toomirmiiryoonoonēē ra kuwēērō wēēroonēē. Kusop :wēēroonēē kilē weel.
19 Lētuun kuteep :kiineetanik Yēēsu kimii akwaaneek ākityōōn kilē, “Āmu nee tamaakiimuuk kee-oon toomirmiiryoonoonēē ra?” 20 Kuwālchi :Yēēsu kilē, “Āmu mā-itēy ōy kaaraneeng'woong'. Āmwoorwook man kilē ntā āting'ēy kaarana nyoo mining' kilēē kōsuryoontoo *aritaali, ntā āmuukēy āmwoochi tulwooni kilē, ‘Ng'eetee yi akiiwō iinō!’ akuunaayta. Āmoomii :kir aka tōkōl nyoo tākuung'oolook. [ 21 Mēēmuukēē /kee-oon toomirmiir nyoo lēē nyoonēē nee /makusa /akeerukuut keey.]”a
King'āloolēē :Yēēsu kuureer meereenyiin ākōō ng'ēētyēēnyiin
Maarkō 9:30-32; Luuka 9:43b-45
22 Nēē mii pērēētuu nyoo kiimii :kiineetanik tōkōl Kalilaaya, kumwoochi :Yēēsu kilē, “/Pākēēnāmēy *Wēēroo Chiich /ākēētē ēēruunēpō piich. 23 Pārēy :pichoochēē *Wēēroo Chiich aku nēē mii pērēētuu nyēpō sōmōk, /keeng'eetee meerat.” Ku-ir :ng'aleechoochēē kiineetanik kuu-iim keey.
Kiitētō :Yēēsu kōōti chēpō Kōpō Iriin
24 Paani kā-it :Yēēsu ākōō kiineetanichiich Kaaparnaam, kupka :piich choo kiikwārēy *kōōti chēpō *Kōpō Iriin akuteep Pēētērō kilē, “Kwārtooy kēny :koonēētiintēēng'woong' *kōōti chēpō *Kōpō Iriin?” 25 Kuwālchi :Pēētērō kilē, “Kwārtooy.” Kii nēē chuut :Pēētērō kō, kusip kuteep :Yēēsu kilē, “Siimnyōn, ipkootitooy ānō ng'aleechu? Ng'oo nyi mārēy :pāytooy chēpō kōōrooni kukwārchi *kōōti? Laakōōkwaak ntā piich walak?”
26 Kuwālchi :Pēētērō kilē “Kwārchinii :piich walak.” Kuwālchi :Yēēsu Pēētērō kilē, “Ng'uutuuy nyoonēē nyuun kilē mākwārtooy :laakōōkwaak. 27 Aku simākulēēlchi nyuun pichu, wiyō ākōy araaray akiiwiirchi ntaawaani pēr. Paani kanam koorookwēē nyēpō taay, inam koorookwēē akiyaat kuut. Inyōōrchinii kuutii koorookwoonoonēē rōōpiyoon nyoo yāmēy *kōōti chēpō piich ārēēny. Inam akiiweekwarta *kōōti, chaachaa ākōō chookuuk.”