Kitāyēy :Parisaay ākōō Satukaay kuuran Yēēsu
Maarkō 8:11-13
16
1 Kii nēē mii pērēētuu aka, kupkoonchi Yēēsu *:Parisaay ākōō *Satukaay kimārēy kuutyam inyeentee kumwoochi ku-ir kir nyēpō kwōng'uut nyoo ng'uutuuy kilē ting'ēy :Yēēsu kaamuuka nyoo chōōnēē wōloo mii :Iriin. 2 Kuwālchi :Yēēsu pichoochēē kilē, “Nēē mii kosoliny ku āmuukēy amwaa kilē, ‘Wāsēēsēy :kōōrēē āsuun, āmu kāpiririit :wōli pō parak.’ 3 Ki nēē kutākwoorō, amwaa :akwaan kilē, ‘Rōōpēnēy kōōrēē, āmu kāpiririit :wōli pō parak aku kāruunkānoot kōōrēē.’ Nku āmuukēy āsōwu wōloo lēkuuy kōōrēē paani kaaroo parak, aku moosōwuuy kilē lēē nee pērēētuus. 4 Kipng'ōōkiin choo tāyēy Iriin :chu mārēy kilē /kēēng'uuti kir nyēpō kwōng'uut. Kwōng'uut nyoo /kung'uutinii pichoochēē ku nyoo kiipō Choona kipaat.”Kumētō :Yēēsu pichoochēē, kulaang' mēēli ākōō kiineetanichiich akupēēchi keey.
Kikirēy :Yēēsu kiineetanichiich akipō Parisaay ākōō Satukaay
Maarkō 8:14-21
5 Paani kaakutilta araarayta kupa kamasta nyiinō aka, kuupkaat :kiineetanik kilē kiiruutyēērō ku-āp makatiin. 6 Kumwoochi :Yēēsu kilē, “Āriipēē keey *kimeereepō *Parisaay ākōō *Satukaay.” 7 Kung'alaala :kiineetanichoochēē ng'aleechoochēē akumwoochi keey kilē, “Kamwa kilēē nyoonēē āmu mooku-āpu makatiin.” 8 Āmu kiinkēt :Yēēsu kiyoo kiing'āloolēē :kiineetanichiich, kilē, “Āting'ēēkwaan man kaarana nyoo mining'. Āmu nee soong'āloolchii keey kilē mooting'ēy makatiin? 9 Toomō āsōwu :akwaan ākōy paannyēēnyi ng'aleechu? Moopkootēy makatiinak chu kii lēē muut choo kii-āmēy :piich choo lēē ēlup muut? Kitaseen ata choo kiing'ētu? 10 Ki nēē lēē makatiin choo lēē tisap choo kyaam :piich choo lēē ēlup ang'wan? Kitaseen ata choo kiing'ētu? 11 Āmu nee nyuun simoosōwu kilē kāmoong'āloolwook akipō āmiisyō? Āmwoorwook kilē āriipēē keey *kimeereepō *Parisaay ākōō *Satukaay!” 12 Kusōwu nyuun :kiineetanichoochēē kilē kiimāmwoochinii :Yēēsu kilē kuriip keey *kimeera choo /kiikuutunēē makatiin. Kusōwu kilē kiimwoochinii kilē kuriip keey ātēpuut chēpō *Parisaay ākōō *Satukaay.
King'oong'chinii :Iriin Pēētērō kilē :Yēēsu ku Meesaaya
Maarkō 8:27-30; Luuka 9:18-21
13 Paani ka-it :Yēēsu kēēstoon choo kiilēēkitō Kayisareeya Pilipi, kuteep kiineetanichiich kilē, “Mwoorēy :piich kilē *Wēēroo Chiich, ku ng'oo?” 14 Kuwālchi :kiineetanichiich kilē “Mwoorēy :walak kilē inyēēn Koopootiisāniin Chowaana, kumwoorēy :walak kilē inyēēn Eliicha, ku walak kumwoorēy kilē inyēēn Cheeremiya ntā ku ākoong'o nyēpō *ōōrkooyiipō Iriin.” 15 Kuureer kuteepa :Yēēsu kiineetanichoochēē kilē, “Aa akwaan, āmwoorēy kilē anee ng'oo?” 16 Kuwālchi :Siimnyōn Pēētērō kilē, “Inyēēn *Meesaaya, Wēēroo Iriin nyoo sopēy.”
17 Kumwoochi :Yēēsu kilē, “Siimnyōn wēēroo Choona, ipēēruuroot. Maasōwuunēē ng'aleechu kimukuul mēt. Kāng'oong'uun ng'aleechu :Apoonyuun nyoo mii kipsēnkwēt. 18 Kunyuun, inyēēn Pēētērō,a nkōō raatyaani ātēēkēy kaaniiseenyuun aku mēēmuukēy mpō :meerat kuululuuk. 19 Ākōōniin kaamuuka nyēpō pāyuunātoo Iriin. Kir aka tōkōl nyoo keekar mu ng'wēny, /kēēkārēy mu kipsēnkwēt. Ku nyoo keeyaat mu ng'wēny, /kēēyootēy mu kipsēnkwēt.” 20 Paani keewaang' :Yēēsu kumwoorēy kilēē nyoonēē, kikir kiineetanichiich mamwaarta kilē *Meesaaya inyeentee.
King'āloolēē :Yēēsu meereenyiin ākōō ng'ēētyēēnyiin
Maarkō 8:31-33; Luuka 9:23-27
21 Kung'eetee paanoonēē, kutoowu :Yēēsu kumwoochi kiineetanichiich kilē, wēētii :inyeentee Chēērusālēēm akunyārilēy nkōō ēēruunēpō kāāntōōy, *tis choo ēēchēēn ākōō koonēēt chēpō ng'ātuut. /Kupārēy aku nēē mii pērēētuu nyēpō sōmōk, /keeng'eetee meerat.
22 Kuumut :Pēētērō Yēēsu tapan akukar koong' kilēēchi, “Acha, Kiptaayaan! Mā-iriisōōt :ng'aleechoochēē nkōō wōloo imii!”
23 Kuutuuchi :Yēēsu Pēētērō patar akumwoochi kilē, “Istoorēēnoon keey *:Syeetaani! Ameekarta areenyuun āmu ipkootēy kilēē wōloo pkootitooy :piich, aku ma kilēē wōloo pkootitooy :Iriin.”
Nyōōruuy :chiich nyoo tuupēy Kiriistō nyaril
Maarkō 8:34—9:1; Luuka 9:23-27
24 Kumwoochi :Yēēsu pichu kiituupēy inyeentee kilē, “Chiich aka tōkōl nyoo mārēy kutuup ng'aleechuuch, kutay kiyoo mārēy :moonyiin, akicham /keenyariil akipō aneen,b akuchō kutuupkaan. 25 Chiich aka tōkōl nyoo mārēy kusāru sopoontanyiin, kuupootēy, ku nyoo kēētētō sopoontanyiin akipō aneen, kusāruuy. 26 Kāroomin nee nyoo nyōōruuy :chiich nēē rumchi keey tukun tōkōl mu ng'wēny, akuupoot sopoontanyiin nyēpō ākōy? Ntā kir nee nyoo wālēē :chiich sopoontanyiin? 27 Chōōnēy *Wēēroo Chiich ākōō malaykeenichiich, mu lēpooyin nyēpō Paapeenyiin, akuutē chiich aka tōkōl mālāktanyiin kutuup keey ākōō pāyiisyēēnyiin. 28 Āmwoorwook man kilē mii :piich walak yi choo mamēērsōōt kutoomō kuuro *Wēēroo Chiich kuchō nkōō Pāyuunāteenyiin.”