Lōkōōy choo kāroomēēn kilēē wōloo kiisirta
:MATAAYO
Siintaaryaa Kōpō mpō Yēēsu
1
1 Siintaaryaa kōpō mpō Yēēsu *Meesaaya :nyi. Kiichōōnēē :Yēēsu kōpō Pāytooyiin Tāwuti. Kuchōōnēē :Tāwuti kōpō *Apraam.
2 *Apraam ku kii apoopō Isaka,
nyoo wēēriinyiin ku kii Chaakōp.
Chaakōp ku kii apoopō Chuuta ākōō wēēchiikwaak.
3 Chuuta ku kii apoopō Pērēēsi ākōō Seera (nyoo kii eeyeeng'waang' ku Tamar).
Pērēēsi ku kii apoopō Ēsrōōn,
nyoo kii wēēriinyiin ku Raam.
4 Raam ku kii apoopō Amiinaatap,
nyoo kii wēēriinyin ku Naasyōn.
Naasyōn ku kii apoopō Sālmōōn.
5 Sālmōōn ku kii apoopō Poowaas (nyoo kii eeyeenyiin ku Raap).
Poowaas ku kii apoopō Ōpēēt (nyoo kii eeyeenyiin ku Ruut).
Ōpēēt ku kii apoopō Chēēsi.
6 Chēēsi ku kii apoopō Pāytooyiin Tāwuti.
Tāwuti ku kii apoopō Sōlōmōōn (nyoo eeyeenyiin ku kii cheepyoosaa chiitō aka nyoo /kiikikuurēē Uriiya).
7 Sōlōmōōn ku kii apoopō Reewopaam,
nyoo kii wēēriinyin ku Apiiya.
Apiiya ku kii apoopō Aasa.
8 Aasa ku kii apoopō Choospaat,
nyoo kii wēēriinyin ku Chooram.
Chooram ku kii apoopō Usiiya.
9 Usiiya ku kii apoopō Yootam,
nyoo kii wēēriinyin ku Aas.
Aas ku kii apoopō Eesakyaa.
10 Eesakyaa ku kii apoopō Manaase,
nyoo kii wēēriinyiin ku Amōn.
Amōn ku kii apoopō Chosaaya.
11 Chosaaya ku kii apoopō Cheekoonnya ākōō wēēchiikwaak.
Pērēētuusyēchoochēē chu /kiikunama Yāwuutik /ākēē-āp kupa kilēku ōōtwook mu Pāpulōōn.
12 Kii nēē /kaakēē-āp Yāwuutik kupa Pāpulōōn,
kunyōōru :Cheekoonnya wēēriinyiin nyoo /kiikikuurēē Syēēltyēēl.
Syēēltyēēl ku kii apoopō Sērupāpēēl.
13 Sērupāpēēl ku kii apoopō Apiwuut,
nyoo kii wēēriinyiin ku Eelyaakim.
Eelyaakim ku kii apoopō Asoor.
14 Asoor ku kii apoopō Saatok,
nyoo kii wēēriinyiin ku Achiim.
Achiim ku kii apoopō Ēlyuut.
15 Ēlyuut ku kii apoopō Eelyaasar,
nyoo kii wēēriinyin ku Maatan.
Maatan ku kii apoopō Chaakōp.
16 Chaakōp ku kii apoopō Chōōsēp nyoo kii poontoo Maaryaa eeyaa Yēēsu nyoo /kiikikuurēē *Meesaaya.
17 Kunyuun, kung'eetee *Apraam ākōy Tāwuti ku kii āpēnuut taman nkōō ang'wan. Kung'eetee Tāwuti ākōy pērēētuusyēchu /kiiku-āpēy piich chēpō *Israayeel kupa Pāpulōōn ku kii āpēnuut taman nkōō ang'wan. Ku kung'eetee pērēētuusyēchu /kiiku-āpēy piich chēpō *Israayeel kupa Pāpulōōn ākōy /kēētuumēy *Meesaaya ku āpēnuut walak taman nkōō ang'wan.
/Kēētuumēy Yēēsu
18 Lēē nyi :wōloo /kiikunamta Yēēsu *Meesaaya. Kiimii :chēēto aka nyoo /kiikikuurēē :Maaryaa nyoo kiimārēy siku-āp keey ākōō chiitō aka nyoo /kiikikuurēē Chōōsēp. Kutoomō ku-āp keey, kutooku kilē kiimanakaat Maaryaa nkōō kaamuukaa Toomirmiir nyoo Tiliil. 19 Kii chiich :Chōōsēp nyoo kiicham ku-irēy ng'al chēpō man. Āmu kiimaacham :Chōōsēp kimētō Maaryaa nkōō taayuu piich, kuupkaat oor nyoo mētoorēē kimāsōwu :chiich aka tōkōl.
20 Paani tākumii kuupkootēy :Chōōsēp ng'aleechu, kuchōōnchi *:malayiika nyēpō Iriin mu ruchiināt akumwoochi kilē, “Chōōsēp, Kuukōpō Tāwuti, ameewar i-āp :Maaryaa kilēku cheepyoosēēng'uung'. Toomirmiir nyoo Tiliil nyi ka-ir inyeentee kimanak. 21 Tuumēy laakwa nyoo lēē wēērii /ākēēkuurēē wēēroonēē Yēēsu. Itē kaarinaanoonēē āmu sāruuy piichiich nkōō ng'ōōkikwaak.” (Kaarinaani lēē Yēēsu kung'uutuuy mu kuutii Kirik kilē ‘Sāruuy :Iriin piich.’)
22 Kii-iriisyō :ng'aleechu tōkōl sikuusilta :ng'aleek choo kiimwoorēy :Iriin kupunuunō *ōōrkooyoon aka kilē, 23 “Mānākēy :chēēto nyoo lēē peerkeeyaan akunam wēērii nyoo /kikuurēē Ēmānwēēl.” (Ng'uutuuy :kaarinaani kilē ‘Mii Iriin nkōō achaan.’)
24 Paani kang'eeta :Chōōsēp rwoon, ku-ir kilēē paani kiimwoochinii *:malayiikayaantaa Iriin. Kwoop Maaryaa kilēku cheepyooseenyiin. 25 Kitēpō :Chōōsēp nyoo maaru nkōō Maaryaa ākōy kutuum :Maaryaa wēēriinyiin. Kukuurō :Chōōsēp wēēroonēē Yēēsu.