/Kēē-ōōtēy Yēēsu
2
1 /Kiikunāmchi Yēēsu Peeteleem mu kōōroo Chuuteeya ku pāytooyiin *:Ērōōtē. Kii nēē kinam Yēēsu, kupka :piich walak Chēērusālēēm choo kiisōōmānchi wōloo tēptooy :kookeel. Kiipkoonēē :pichoochēē kamaspō koong'asiis. 2 Paani ka-itu :pichoochēē kuteep kilē, “Mii ānō :laakwaani /kakunam kilēku Pāytooyiintoo Yāwuutik? Kakuuroo kookeelyeenyiin nkōō koong'asiis nyoo ng'uutuuy kilē /kiikeenam, nkanyi kakupkaan kēēloosu inyeentee.”3 Kii nēē teer :Pāytooyiin *Ērōōtē ng'aleechoochēē, kuu-iim mēt ng'aleechoochēē. Kuu-iim mēt mpō :ng'aleechoochēē piich chēpō Chēērusālēēm tōkōl. 4 Kuutuuyō :Pāytooyiintoonoonēē *tisiik tōkōl choo ēēchēēn ākōō koonēēt tōkōl chēpō ng'ātuut chēpō Yāwuutik akuteepa kilē, “/Kiikutuumchi ānō *Meesaaya nyoo kiikukānyēy?” 5 Kuwālchi :pichoochēē kilē, “/Kiikutuumchi Peeteleem mu kōōroo Chuuteeya, āmu kiimwa :Iriin kupunuunō *ōōrkooyoon aka kilē,
6 ‘Aku inyēēn Peeteleem mu kōōroo Chuuteeya
mēēmining' mpō kiitēēn mu kēēstoon tōkōl chēpō Chuuteeya,
āmu chōōnēē :pāytooyiin wōloo imii
nyoo chōōnēy kupāytooy piichuuch chēpō *Israayeel.’† ”
7 Nyoo matyaan, kuuyooytō *:Ērōōtē kuut nkōō ung'oot /pākēēkuurchi pichoochēē kiipkoonēē koong'asiis sikumwoochi :inyeentee saayit nyoo /kēērōōtēy kookeelyaanoonēē. 8 Paani ka-itu :pichoochēē kumwoochi *:Ērōōtē kilē, “Apee Peeteleem akaapa awas laakwaanoonēē ku karaam. Nēē ānyōōru, apkaan āmwoorwoon soowō :mpō ākutunchi ākooloosu.” 9-10 Paani kaakuteer :pichoochēē kipkoonēē kamaspō koong'asiis ng'alēēpō *Ērōōtē, kung'ēētyō akupēēchi keey. Paani mii kupēētii, kuureer kuuro :kookeelyee. Kupāypāyiituuy nyēpō kwōng'uut, kuuntōrōōrchi :kookeelyaanoonēē ākōy Peeteleem. Kuwō kuuryoong'o parakuu koot nyoo kiimii :laakwaanoonēē.
11 Nēē mii paani kachuut :pichoochēē kō, kuurō laakwaanoonēē ākōō eeyeenyiin Maaryaa, kukutung' akuuloosu laakwaanoonēē. Nēē mii lētuun, kuutyaak tukun choo /kiikyaala rōōpiyō chaa chaang' choo kiipēētii kuutookwēēsēē laakwaanoonēē. Kiitō pichoochēē laakwaanoonēē ta-aapu ākōō tukun walak choo lēē ārēēny choo ng'uutooy choo ānyinyēēn. 12 Nēē mii paani wārākiisōōt kaaw :pichoochēē kiipkoonēē koong'asiis, kupa aree aka āmu kiichōōnchi :Iriin akwaaneek nkōō ruchiināt akumwoochi kimapa wōli mii *:Ērōōtē.
/Kēēmwērtoorēē Yēēsu kuwō Miisiri
13 Paani kikaakupēēchi keey :pichoochēē kiipkoonēē koong'asiis, kuchōōnchi Chōōsēp *:malayiikayaantaa Iriin nkōō ruchiināt akumwoochi kilē, “Mii *:Ērōōtē kuwāsēy laakwaani sikuukeet. Ng'eeta nyuun akiinam laakwaani ākōō eeyeenyiin akiiriptoorēē ākōy Miisiri ākoopootēpi wōloonēē ākōy āmwooruun kilē warakeeree Miisiri.” 14 Nēē mii lang'atuunoonēē, kung'eet :Chōōsēp akunam laakwaanoonēē ākōō eeyeenyiin akuwō ākōy Miisiri. 15 Kipa kutēpi Miisiri ākōy kima *Ērōōtē. Kuusilta nyuun :kiyoo kiimwa :Iriin kupunuunō *ōōrkooyoontēē aka kilē, “Kyookuur Wēēriinyuun kuchōōnō Miisiri.” †
16 Kiinareek *:Ērōōtē paani kāsōwu kilē koo kiimēlmēēl inyeentee :pichoochēē kiipkoonēē koong'asiis. Kuuyooytō piichiich kupa Peeteleem ākōō kēēstoon choo kiilēēkitēē yoonēē kipa kuukeet laakōōy choo ting'ēy kēnyiis ārēēny kurāku kutuup keey ākōō ng'aleechu kiimwoochi :pichu kiipkoonēē koong'asiis. 17 Kuusilta nyuun :kiyoo kiimwa *:ōōrkooyoon Cheeremiya kilē, 18 “/Kiikuteer kiinchō nyēpō ng'woonin mu Raama,
riirat nyēpō meerat nyēpō kwōng'uut.
Kiiriir :Raayeel akipō laakōōchiich akutay /keesaarsaar
āmu kiimaakumii :laakōōchiich.” †
Kiwārākēērēē :Chōōsēp ākōō Maaryaa Miisiri
19 Kii nēē ma *:Ērōōtē, kuchōōnchi *:malayiika nyēpō Iriin Chōōsēp mu Miisiri nkōō ruchiināt akumwoochi kilē, 20 “Ng'eeta akiinam laakwaani ākōō eeyeenyiin ākāāwārākiisyō kōōroo *Israayeel āmu kiikumēērō :piich choo kiimārēy kuukeet laakwaani.” 21 Kunam :Chōōsēp laakwee ākōō eeyeenyiin akupēēchi keey *Israayeel. 22 Kii nēē teer :Chōōsēp kilē kiikeer :Arkeelaawō wēēroo *Ērōōtē apoonyiin kupayta Chuuteeya, kuuwāriisyō :Chōōsēp. King'āloolchi nyuun :Iriin inyeentee nkōō ruchiināt kuwō Kalilaaya. 23 Kipa kumāng'iisyō nkōō yoo /kiikikuurēē Naasareet. Kuusilta nyuun :kiyoo kiimwa *:ōōrkooy akipō *Meesaaya kilē, “/Kukuurēē Naasarēētiin.”