KAYTAKU KUGABUTAKU KA PAWLU AŊIICUM BE BATA GRÎSIYA YATA
KÔRINTU
Pawlu nasaap grîsiya yata Kôrintu
1
Înje Pawlu jagam amakaaw ata Kristu Jesus non ma Emitay êkimmi, ûli di atiyolaal Timootiw uŋiiculom kayta'uke be bata grîsiya yata Emitay yammi di êsukay yata Kôrintu, di bukaaku peh kammi ma kuwaasoorum di bantaabu bata Akaya. 2 Moo, Emitay yagam Ampawolaal, di Ata Emit aamom Jesus Kristu, awuluul kañankiitaku di kâsuumaayaku.Emitay yoo eenenewolaam
3 Moo, usalaal Emitay yagam Ampaw Ata Emit atoolaal aamom Jesus Kristu, yaamom yañankiitewolaam, ban di yenkunenolaal 4 di hûlaam peh, ma mbi ooliyaal poop onkunenaal bukan kaaku di sembaasu sa ewulolaam, di hûlaam peh ha mbi hûlowumiil. 5 Mata non ma ôomiyaam di hûlaam hameeŋe hata Kristu, moomu poop kaŋ ma onkunenumaalim meeŋ matawool. 6 Moo, ûli ûlaam jaa, nûlaam ma mbi miwuul jeeli jenkuneni, di jibaa'poop kapakaku. Ûli onkuneni jaa poop, miwuul poop di jenkuneni, ma jiyab sembaasu ma mbi jeeli jiyetoor di hûlaamahu non ha ûli ommi di ho. 7 Mata kâynenaku ka ûli ûynenuum kâamak, ban nûmire poop kaan, non ma jêemim di hûlaamahu ha ûli ommi di ho, moomu poop kaŋ ma mbi jêemi d'ûli di jankunenaju ja Emitay ênkunenolim.
8 Moo, kutiyaay, nîkine ma jîmir mata hûlaamahu ha ûli ûlaamum di bantaabu bata Aasiya, mata hûlaama'uhu, hûlaam hâamak ha ûli ooliyitum uyetoor di ho, poopii ûli nubeño di kaan mbi uroŋ. 9 Malhegen nownu ûli nunongeene di kaan mbi uket, be wahaw uwe uga mo, ma aatuba mbi ûli ûynenooro, be nûynen Emitay yalhaalenem an di kuketaaku. 10 Mata Emitay êpakenolim di eketay. Moo, ûli nûynene di kaan, mbi yenken ma êpakenoli be nanoonan, 11 miwuul bâaneneroli ma jilhaw yo be bâtooli. Moo, Emitay mbi êñankiitoli mata ma ejammi kalhawaku ka jilhawuyom mâtooli; ma bukan kameeŋe mbi kusal yo poop mâtooli.
Pawlu nasalhen mata bûkayabu batawool be Kôrintu
12 Moo, wahaw wâgawewolim ma usalooro, mata ûyegetaw wâtooli ûyisoli jak di kaan, eroŋay yatoolaal ube di etaamay, mata kasohooraku kâtooli di miwuul, kugawe wahaw wanapaaw walhegenumaayaw, wâcaalhumulom di Emitay mata kañankiitaku kata yo, be ntuwa kûkayumul di majaalho mata ajamaat. 13 Mata wahaw wa uŋiiculuum, ntuwa wahaw wa mbi jipisen, jeetukanamulen, be mbi jinamulen wo jak. 14 Be palimo miwuul jinamulent mowme, be nîynene kaan, mbi jirees ii di jinamulen wo jak, ma mbi hukahu hata Ata Emit, aamom Jesus hûriiŋ, di jîririgen mâtooli, ûli poop nûririgen matawuul.
15 Malhegen înje nîynene kaan, wahaw wa inongum ujake, mata ma emmi mbi îkayil bi iyuugenuul kâtiyaar, ma mbi jeeli jibaj hûpiiraahu hugabutahu. 16 Mata nîkine na mbi een ikay be Masedoniya, nîŋoonul ma nki iyuugenuul, ban na mbi îlaañumuu'bô, nîŋoonul joon ma iyuugenuul, ma mbi jeenenom di wah îreesum di buruŋabu be jûdeya. 17 Moo, maama inongum soŋo pîya, ninonge kôji? Soŋo pîya banongerabu bûmbaam, bugawe poop noon banonger ajamaat, makiim ma êenumem “aawo,” nêenul poop “see” di manor? 18 Be ma Emitay egam anaw âynenaayaw, mo ma elobay yâtooli ya ulobewuum, êgawutummi “aawo,” di “see” di manor. 19 Mata Añool Emit, aamom Jesus Kristu a ûli di Silvanu, di Timootiw ulobuum matawool, alee'ma âguusoorum ma aga “aawo,” di “see” di manor, be omu ma agam “aawo” keb. 20 Mata wahaw peh wa Emitay yemmi “aawo” mbi ega, woo egam di Jesus Kristu, momakiimom ma oonumaaleyom “amiin” matawool, ma yeeli esali. 21 Mata yoo Emitay êgawolim di miwuul, ma usohooraal jak di Kristu, ban di êwojulolaal, 22 ma egawolaal êmanjumay yata yo, ban di ega Buynumabu bata yo di sîsigirasu satoolaal non ma eloom, ma yîs kaan ulaal bukanaku kata yo.
23 Moo, Emitay yoo egam ajuumaaw ûmbaam, êmire poop bûyegetabu bûmbaam; maama ikaymulootum be Kôrintu bi iyuugenuul, mata ma îkintum igawuul jîlaam. 24 Ban ûkint poop ugawuul di sembe di kâynenaku katawuul, mata miwumu ma jîlhiŋum jak di ko. Moo, nûkine ma ugorooraal di manor ma mbi jeeli jihaŋ mâririgen.