Mila jaa mbaa Yɛnŋɛlɛ
103
1 Davidi Yɛnŋɛlɛ gbɔgɔyurugo.Mi we, mi yɛn na Yawe Yɛnŋɛlɛ li sɔnni,
mi yɛn na Yawe Yɛnŋɛlɛ li mɛgɛ kpoyi* ki sɔnni na nawa pi ni fuun ni.
2 Ee, mi yɛn na Yawe Yɛnŋɛlɛ li sɔnni,
mi se fɛgɛ li kajɛŋgɛ pyege ka kpɛ na.
3 Lo li mɔɔ kajɔgɔrɔ ti ni fuun ti kala yaga ma na,
lo li mɔɔ sagala ma yama pi ni fuun pi ni.
4 Lo li mɔɔ go shɔ wetijugo ki ni,
mbe kagbaraga pye ma kan konaa mbɔɔn yinriwɛ ta fɔ jɛŋgɛ.
5 Lo li ma fɛrɛwɛ kan ma yeri ma lelɛwɛ pi ni,
mɔɔ pye lefɔnŋɔ caricari, mbe fanŋga fɔnŋgɔ kan ma yeri paa yɔn yɛn.
6 Yawe Yɛnŋɛlɛ li maa kasinŋge piin,
pe yɛn na mbele fuun jɔlɔ, li ma tanga kan pe yeri.
7 Làa li koŋgolo ke naga Moyisi wi na,
mali kagbɔgɔlɔ ke pye ma ke naga Izirayɛli* woolo pe na.
8 Yawe Yɛnŋɛlɛ li yɛn yinriwɛ tafɔ naa yuŋgbɔgɔrɔ tafɔ,
laa la nawa ŋgbanni jaga jaga.
Li kagbaraga ki yɛn ma gbɔgɔ.
9 Li se koro mbaa leele jɛrɛgi sanga pyew,
Laa si gbu tɛgɛ lere ni kudɛyi.
10 Laa we yigi mbe yala we kapere ti ni,
laa si we sara mbe yala we kajɔgɔrɔ ti ni.
11 Tara to naa naayeri wi ni ti fogo ki yɛn ma gbɔgɔ yɛgɛ ŋga na,
pa Yɛnŋɛlɛ li kagbaraga ki yɛn ma gbɔgɔ ma mbele pe maa fyɛ li yɛgɛ pe kan.
12 Yɛgɛ ŋga na yɔnlɔ yirisaga ki yɛn ma lali yɔnlɔ tosaga ki ni,
pa li ma we kajɔgɔrɔ ti laga lali we ni ma.
13 Yɛgɛ ŋga na tofɔ maa wi piile yinriwɛ taa,
ki pyelɔmɔ nuŋgba pi na fun, Yawe Yɛnŋɛlɛ li maa mbele pe maa fyɛ li yɛgɛ pe yinriwɛ taa.
14 Katugu yaraga ŋga lì tɛgɛ ma we gbegele lo yɛrɛ lìgi jɛn.
Li jatere wi yɛn ki na fɔ we yɛn taambugɔ.
15 Sɛnwee wi yinwege piliye yi yɛn paa yan yɛn;
ki ma gbɔgɔwɔ ta paa yan fyɛɛnrɛ yɛn.
16 Na tifɛlɛgɛ jɛnri ka ka gbɔn ti na, ti ma waga saw, tila yan naa.
Tìla pye laga ŋga na, ko na jɛn naa.
17 Ɛɛn fɔ Yawe Yɛnŋɛlɛ li kagbaraga ki yɛn kɔsaga fu mbele pe maa fyɛ li yɛgɛ pe kan sanga pyew naa wagati wi ni fuun;
li yaa koro sinnɛ pe piile poro naa pe piile pe ni,
18 naa mbele pe yaa koro mbeli yɔn finliwɛ* pi yigi,
mbaa nawa tuun li katɛgɛŋgɛlɛ ke na mbaa tanri ke na pe ni.
19 Yawe Yɛnŋɛlɛ lìli wunluwɔ jɔngɔ ki tɛgɛ wa yɛnŋɛlɛ na,
li yɛn wunluwɔ pi na yaraga pyew ki go na.
20 Yoro mbele Yawe Yɛnŋɛlɛ li mɛrɛgɛye*, yaa li sɔnni!
Yoro mbele fanŋga gbɔgɔ yɛn ye ni,
a yaa tanri li sɛnrɛ ti na nari yɔn finli, na nuru li yeri.
21 Yoro mbele fuun ye yɛn Yawe Yɛnŋɛlɛ li maliŋgbɔɔnlɔ, yaa li sɔnni!
Yoro mbele ye yɛn na tunŋgo piin li kan konaa nali nandanwa kala li piin we.
22 Yoro mbele fuun Yawe Yɛnŋɛlɛ lì da,
li tegere tì gbɔn laga ŋga fuun ni,
yaa li sɔnni!
Mi we, mi yɛn na Yawe Yɛnŋɛlɛ li sɔnni!