Lere ŋa wi yɛn na jɔlɔ
102
1 Jɔlɔgɔfɔ wa Yɛnŋɛlɛ yɛnrɛwɛ, mbege ta wi fanŋga kìla kɔ wi ni, a wì si yɛnri maa yuŋgbɔgɔrɔ sɛnrɛ ti yo Yawe Yɛnŋɛlɛ li kan.2 Yawe Yɛnŋɛlɛ, na yɛnrɛwɛ pi logo,
yerege ŋga mila ma yinri mala saga, ki yaga ki gbɔn wa ma na!
3 Na mi kaa jɔlɔ pilige ŋga ni, maga kɔɔn yɛɛ lara na na!
Nuŋgbolo jan ma logo na yeri!
Na mi ka gbele mbɔɔn yeri mala saga, mala yɔn sogo fyaw!
4 Katugu na yinwege piliye yi yɛn na koo na kee paa wirige yɛn.
Na fanŋga kì kɔ paa yɛgɛ ŋga na kasɔn naŋganra ma kaa sogo ma kɔ we.
5 Na jatere wì kɔ na yeri, ma koro paa yan yɛn ŋga pè kɔn kila waga.
Mi ma fɛgɛ yɛrɛ na yaakara ti na.
6 Mì koro na jɛɛn,
fɔ mì saa cɔgɔ ma koro kajeere.
7 Mi yɛn paa lɔgɔ sumbyɔ yɛn, ŋa wi ma pye wa gbinri* wi ni.
Mi yɛn paa kuwegbɔgɔ ma kaa pye ki yɛ yumbara na.
8 Wɔnlɔwɔ pì gbaanri na na.
Mi yɛn paa sannjɛlɛ nuŋgbanna yɛn, na li yɛn ma cɛn go go na.
9 Na juguye pe yɛn nala tifaga pilige pyew.
Poro mbele na winfɛnnɛ pe yɛn na tɛgɛ na na,
na leele pe daŋgi pe cɛnlɔmɔ pi pye paa na woo pi yɛn.
10 Cɔnrɔ to tì pye na yaakara wa suro ti yɔnlɔ.
Na yɛntunwɔ pi ma pinlɛ na tɔnwɔɔ pi ni.
11 Ko yɛn na piin ma, ma kɔnrɔ tandorogo naa ma naŋgbanwa gbɔɔ pi kala na,
katugu màla lɛ mala wa fɔ lege.
12 Na yinwege piliye yi yɛn na tooro paa yɔnlɔkɔgɔ yinmɛ yɛn.
Mi yɛn paa yan yɛn, ŋga ki yɛn ma waga.
13 Ɛɛn fɔ, mboro wo na Yawe Yɛnŋɛlɛ, ma yɛn wunluwɔ fɔ sanga pyew.
Wagati ŋa fuun wila paan wi woolo pe yaa lɔɔn mɛgɛ ki yinri fɔ ma yɛn Yɛnŋɛlɛ.
14 Ma yaa ka yiri mbe Siyɔn* ca ki yinriwɛ ta;
katugu wagati wì gbɔn mbe yinmɛ tirige ki na,
wagati ŋa wì kɔn ma tɛgɛ ki pyewe na wì gbɔn.
15 Woro mbele ma tunmbyeele, Siyɔn ca ki sinndɛɛrɛ ti yɛn ma we ndanla.
Ki kataga ki yinriwɛ yɛn na we taa.
16 Pa kona cɛngɛlɛ ke yaa la fyɛ Yawe Yɛnŋɛlɛ li yɛgɛ.
Tara na wunlumbolo pe ni fuun pe yaa kɔɔn gbɔgɔwɔ yanwa pi jɛn.
17 Yawe Yɛnŋɛlɛ li yaa ka Siyɔn ca ki kan naa fɔnŋgɔ,
li yaa kali yɛɛ naga wa li gbɔgɔwɔ yanwa pi ni.
18 Li ma mbele pe yɛn tege na pe yɛnrɛwɛ pi logo.
Li se je pe yɛnrɛwɛ pi na.
19 Ki wogo yege yɔnlɔgɔ yege tɛgɛ mbele pe yaa ka yiri puŋgo na pe kan.
Cɛnlɛ fɔnnɔ na li yaa ka yiri puŋgo na li ta laa Yawe Yɛnŋɛlɛ li gbogo.
20 Ma Yawe Yɛnŋɛlɛ li ta wa yɛnŋɛlɛ na, lì go sogo na wele;
mali ta wa li laga kpoyi* ki ni, lì go sogo na wele laga tara na.
21 Lì ko pye, jaŋgo kasopiile pe yɛn na jɛngɛ ŋga jɛɛn mbege logo,
konaa mbe mbele kunwɔ pi gbɛrɛ gbɔn pe na pe shɔ;
22 jaŋgo paa Yawe Yɛnŋɛlɛ li mɛgɛ ki yari wa Siyɔn ca,
paa li sɔnni yuuro ni wa ko ŋga ki yɛn Zheruzalɛmu ca ki ni;
23 ko sanga wo ni, cɛngɛlɛ naa wunlumbolo pe yaa ka pe yɛɛ gbogolo,
mbaa Yawe Yɛnŋɛlɛ li gbogo.
24 Yɛnŋɛlɛ lìlan fanŋga ki kɔ mala yaga konɔ;
lì ka kɔn na yinwege piliye yi na.
25 Ki kala na, mì yo fɔ: «Na Yɛnŋɛlɛ, mboro ŋa ma yɛn wa fɔ sanga pyew,
maga kanla lɛ mbanla yinwege ki kɔn shyɛn!»
26 Mà tara ti da maga lɛ wa fafafa.
Naayeri wi yɛn ma kɛɛ yɔnlɔ tunŋgo.
27 Ti yaa ka kɔ, ɛɛn fɔ mboro yaa koro wa fɔ sanga pyew.
Ti ni fuun ti yaa ka lɛ paa yaripɔrɔ yɛn.
Ma yaa kari kanŋga paa yɛgɛ ŋga na pe ma yaripɔrɔ kanŋga we; pa ti yaa si kanŋga.
28 Ɛɛn fɔ, mboro wo na, ma yaa koro wa ma cɛnlɔmɔ nuŋgba pi na.
Ma yɛgɛlɛ ke se kɔ†.
29 Ma tunmbyeele pe piile pe yaa ka cɛnsaga ta.
Pe setirige piile pe yaa ka yeresaga ta ma yɛgɛ sɔgɔwɔ.