Ki daga yaara nda Yɛnŋɛlɛ lì da
104
1 E, mi we, mi yɛn na Yawe Yɛnŋɛlɛ li sɔnni!Yawe Yɛnŋɛlɛ, na Yɛnŋɛlɛ, ma yɛn ma gbɔgɔ fɔ jɛŋgɛ;
gbɔgɔwɔ naa tiyɔnwɔ pi yɛn mali fere paa yaripɔrɔ yɛn.
2 Mà yanwa pi tɛgɛ mɔɔ yɛɛ fo paa derigbɔgɔ yɛn,
mà naayeri wi sanga maa jaraga paa paraga go* yɛn.
3 Mɔ̀ɔ cɛnsaga ki gbegele maga tɛgɛ wa naayeri tɔnmɔ pi go na,
kambaara to ti yɛn ma malaga gbɔnwotoro we,
ma maa tanri tifɛlɛgɛ ko na.
4 Ma ma tifɛɛrɛ ti pye ma pitunmbolo,
mbe kasɔn yinŋgele ke pye ma tunmbyeele†.
5 Mà tara ti teŋge wa ti nɔgɔna cɛnyaara ti na,
ti se ya yɛri mbe wɔ wa ti yɔnlɔ fyew.
6 Màa tara ti tɔn tɔnŋgbɔɔ pi ni paa paraga yɛn,
tɔnmɔ pìla yiri ma saa gbɔn fɔ wa yanwira ti namunjɔye pe na.
7 Ɛɛn fɔ màa gbanla pi na, a pì fe ma tigi,
màa yɛnŋɛlɛ gbaanra ti yirige sanga ŋa ni, a pì si fyɛɛlɛ ma kari pew.
8 Pìla lugu yanwira ti na ma kari, ma tigi wa yanwira gbunlundɛrɛ ti ni,
ma saa koro wa pi yeresara nda màa gbegele pi kan ti ni.
9 Mà kɔngɔlɔ gbɔn tɔnmɔ pi kan, pii daga mbe koro kaanla,
jaŋgo piga ka sɔngɔrɔ mbe tara ti tɔn naa.
10 Ma ma ti puluyo yi ma pulo, na fuun, na yiin wa laforo ti ni,
yi maa fuun na toro wa yanwira ti sɔgɔwɔ pi ni.
11 Yan woŋgaala pe ni fuun pe ma pan na woo wa yi ni,
yan sofilele pe ma pan na woo wa yi ni.
12 Naayeri sannjɛrɛ ti ma pan ma ti sere ti pɔ wa ki tɔnmɔ pi yɔn na,
ti ma koro na gbele wa tire wɛrɛ ti sɔgɔwɔ.
13 Ma ma koro wa ma cɛnsaga ki ni wa yɛnŋɛlɛ na, mbe ti tisaga ki ma pan wa yanwira ti na,
ma kɛɛ yɔnlɔ tunŋgo tɔnli wì tara ti yin.
14 Ma ma ti yan ki ma fi yaayoro ti kan,
ma ma ti yariluguro ti ma fi sɛnweele pe kan,
jaŋgo paa pe yɔn suro ti taa paa yinrigi wa tara ti ni;
15 konaa duvɛn ni, ŋa wi ma nayinmɛ kan sɛnwee wi yeri,
naa sinmɛ fawoo ni mba pi ma yɛgɛ ki kan ki maa yɛngɛlɛ,
konaa yaakara nda ti maa fanŋga kaan wi yeri.
16 Yawe Yɛnŋɛlɛ li tigbɔrɔ gbɔrɔ ti ma tɔnmɔ ta fɔ ma tin pi na,
Liban tara sɛdiri* tire nda lì sanri, ti ma tɔnmɔ ta.
17 Pa sannjɛrɛ ti ma pan mari sere ti pɔ wa,
jagapan wi maa sere ti pɔ wa sipirɛsi* tigbɔrɔ ti ni.
18 Yanwira nda ti yagara to yɛn likatɔlɔye poro cɛnsara,
waara to yɛn damaye† poro larasaga.
19 Mboro mà yeŋge ki gbegele, jaŋgo mbaa wagati wi nari mbaa wi woo wi yɛɛ ni,
yɔnlɔ fun kìgi tosanga wi jɛn.
20 Ma ma ti diwi wi ma ye, yembinɛ li ma wɔ,
ko wagati wo ni, kɔlɔgɔ woŋgaala pe ma yiri na yanri.
21 Jara yirifɔnmbɔlɔ pe maa gbele pe yaakara ti puŋgo na,
pe maa pe yaakara ti yɛnri Yɛnŋɛlɛ li yeri.
22 Ɛɛn fɔ pa yɔnlɔ kila yinrigi, pe mɛɛ sɔngɔrɔ
ma saa sinlɛ wa pe were ti ni.
23 Ko sanga wo ni, sɛnwee wi mɛɛ yiri ma kari wi tunŋgo yeri,
wi ma koro wa wi tunŋgo ki na fɔ sa gbɔn yɔnlɔkɔgɔ.
24 E, Yawe Yɛnŋɛlɛ, ma kapyegele kè lɛgɛ fɔ jɛŋgɛ,
mà ke ni fuun ke pye ma kajɛnmɛ po ni;
tara ti yɛn ma yin yaara nda mà da ti ni.
25 Kɔgɔje wi wele, pa wì gbɔgɔ ma jaraga ma kari pya!
Yaara yɛnwere nda ti yɛn wa wi ni na yanri na mari, ti yɔn ki se jɛn mbe kɔ,
ti tunmɔɔrɔ naa ti tugbɔɔrɔ.
26 Tɔnmɔkɔɔrɔ gbende ti maa yanri wa wi ni,
naa yarifɛlɛgɛ* Leviyatan ki ni, ko ŋga mà da jaŋgo kila jinrigi wa wi ni†.
27 Kì yaara ti ni fuun ti yɛn na wele mboro yeri,
jaŋgo maa ti yaakara ti kaan ti yeri ti kasanga wi na.
28 Ma mari kan ti yeri, ti mari shɔ,
ma mɔɔ kɛɛ ki sanga na kaan, ti mɔɔ yarijɛndɛ ti ta fɔ ti mari yɛnlɛ tin.
29 Ɛɛn fɔ na ma kɔɔn yɛɛ lara ti na, ti sunndo wi ma kɔn ti na,
na ma kɔɔn yinwege wɔnwɔn pi shɔ ti yeri, ti ma ku,
ti ma sɔngɔrɔ ma pye naa taambugɔ.
30 Ɛɛn fɔ na ma kɔɔn yinwege wɔnwɔn pi kan ti yeri, ta ma se naa fɔnndɔ,
kona yaraga pyew ki ma pye yarifɔnŋgɔ laga tara ti na.
31 Yawe Yɛnŋɛlɛ, ti ma gbɔgɔwɔ yanwa pi koro wa fɔ sanga pyew!
Yawe Yɛnŋɛlɛ, ta yɔgɔri ma kapyegele ke kala na!
32 Na maga tara ti wele, ti maa seri;
na maga jiri yanwira ti na, ti maa wirige yinrigi.
33 Mbanla ta yinwege na, mi yaa la yuuro koo Yawe Yɛnŋɛlɛ li kan,
mbanla ta go na, mi yaa lanla Yɛnŋɛlɛ li sɔnni!
34 Ki yaga na sɔnrimɔ pɔɔn ndanla;
mi wo na, mi yaa la yɔgɔri Yawe Yɛnŋɛlɛ li kala na!
35 Ki yaga kapere pyefɛnnɛ pe kɔ pe wɔ laga tara ti ni,
lepeele paga ka pe yan naa!
Mi we, mi yɛn na Yawe Yɛnŋɛlɛ li sɔnni!
Yaa Yawe Yɛnŋɛlɛ li sɔnni!