Yɛnŋɛlɛ, na shɔ na juguye pe kɛɛ
59
1 Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na, pe maa ki yinri: «Maga kaga tɔngɔ.» Davidi yurugo yi, wìla ki kɔ sanga ŋa ni wunlunaŋa Sawuli wìla leele torogo, a pè saa Davidi wi go ki maga, mbe ta mboo yigi mboo gbo†.2 E, Yɛnŋɛlɛ, na shɔ na juguye pe kɛɛ,
mbele pè yiri na kɔrɔgɔ, na go yirige mala shɔ pe kɛɛ!
3 Na shɔ kambasinŋge pyefɛnnɛ pe kɛɛ,
na shɔ legboleele pe kɛɛ!
4 Wele, pe saa lara nala singi mbanla gbo,
lewɛlimbɛlɛ pè gbogolo mbe to na na;
ma sigi ta, Yawe Yɛnŋɛlɛ, mi si kajɔɔgɔ kpɛ pye,
mi si kapege pye.
5 Mi si kapege kpɛ pye,
ɛɛn fɔ pe yɛn na fee na pe yɛɛ gbɛgɛlɛ mbe to na na.
Yɛn ma yiri, ma pan na kɔrɔgɔ, mala saga!
6 E, Yawe Yɛnŋɛlɛ, mboro ŋa Yɛnŋɛlɛ na yawa pi ni fuun fɔ, Izirayɛli* woolo Yɛnŋɛlɛ,
yiri ma win cɛngɛlɛ ke ni fuun ke ni,
maga ka ki javafɛnnɛ naa ki lembasinmbele wa kpɛ yinriwɛ ta.
7 Yɔnlɔkɔgɔ, pe ma sɔngɔrɔ ma pan,
pe maa wɛli paa pyɔɔnlɔ yɛn,
na ca ki mari na toro.
8 Wele, sɛnpere to ti maa yinrigi wa pe yɔn,
pe yɔn sɛnrɛ ti maa sugulo paa shɔrinaye yɛn,
pe maa yuun fɔ: «Ambɔ wi yɛn na we magala li nuru?»
9 Ɛɛn fɔ mboro wo na, Yawe Yɛnŋɛlɛ, ma yɛn na tɛgɛ pe na?
Ma yɛn naga lakoo cɛngɛlɛ ke ni fuun ke na.
10 Mboro ŋa ma yɛn na fanŋga ye, mboro mi yɛn na wele,
katugu Yɛnŋɛlɛ, mboro ma yɛn na go sigefɔ we.
11 Yɛnŋɛlɛ, lo na li yɛn na kagbaraga pyefɔ, li yaa pan na kɔrɔgɔ mbanla saga,
li yaa ti mbaa na juguye pe tolo li wele nayinmɛ ni.
12 Maga ka pe gbo fɔɔnfɔɔn ŋga na, jaŋgo cew ŋa mà ta, na woolo paga ka fɛgɛ wi na;
ɛɛn fɔ ma yawa pi tɛgɛ ma pe jaraga ma pe tɔngɔ,
konaa ma pe jaanri;
we Fɔ*, mboro ma yɛn we tugurɔn sigeyaraga* na we go singi.
13 Sɛnrɛ nda ti maa yinrigi wa pe yɔn ki ni, ti yɛn kapege,
ki yaga pe yɛɛ gbɔgɔwɔ pi pye paa pɛnɛ yɛn mbe pe yigi,
katugu daŋga sɛnrɛ naa yagbogowo sɛnrɛ to pe maa yuun!
14 Wa ma naŋgbanwa gbɔɔ pi ni, pe tɔngɔ,
pe tɔngɔ pe kɔ pe wɔ wa!
Jaŋgo pege jɛn fɔ sa gbɔn wa dunruya wi kɔsaga, fɔ mboro Yɛnŋɛlɛ, mboro ma yɛn wunluwɔ Zhakɔbu setirige piile† pe go na.
15 Yɔnlɔkɔgɔ pe ma sɔngɔrɔ ma pan,
pe maa wɛli paa pyɔɔnlɔ yɛn,
na ca ki mari na toro.
16 Pe maa yanri na toro na pe yaakara jaa,
na pee ka mbe tin, pe ma yembinɛ li pye na kɔngɔri.
17 Mi wo na, mi yaa yurugo kɔ mbɔɔn fanŋga ki wogo yo,
pinliwɛ ni, mi yaa ma kagbaraga wogo ki yari.
Katugu ma yɛn paa na malaga sigeca yɛn,
jɔlɔgɔ sanga ni, mi ma karafa ma na.
18 Mboro ŋa ma yɛn na fanŋga ye, mi yaa yurugo kɔ mbɔɔn sɔn,
katugu ma yɛn paa na malaga sigeca yɛn,
Yɛnŋɛlɛ, ma yɛn kajɛŋgɛ pyefɔ na kan.