Yɛnŋɛlɛ li mali woolo
60
1 Yurukɔɔlɔ to wi sɛwɛ yurugo, pe maa ki koo yurugo ŋga kɔlɔmɔ na, pe maa ki yinri: «Sɛrɛya masho pɔlɔ yarifyɛɛnrɛ wogo na.» Davidi yurugo.2 Wìla ki yurugo ki kɔ sanga ŋa ni, ko kìla yala wìla saa malaga ki gbɔn Siri tara fɛnnɛ mbele pàa pye wa Mezopotami tara konaa wa Zoba tara pe ni. Ko puŋgo na, wi maliŋgbɔɔnlɔ togbɔɔ Zhowabu wì si sɔngɔrɔ ma pan ma Edɔmu tara fɛnnɛ maliŋgbɔɔnlɔ waga kɛ ma yiri shyɛn (12 000) gbo pe ni wa Kɔ gbunlundɛgɛ ki ni†.
3 E, Yɛnŋɛlɛ, mà we wa, mà ti a wè gbɔn ma jaraga.
Mà nawa ŋgban we ni, ɛɛn fɔ ki yaga ma yɛnlɛ we na naa!
4 Mà tara ti yɛgɛ, ma ti a tì jɛɛnri,
ki yaga mari jɛɛnrisara ti gbegele, katugu ti yɛn na tigile!
5 Woro mbele ma woolo, mà ti a kaŋgbanga we ta,
a ki cɛn ndɛɛ mà we ŋgbanga ma duvɛn ŋa wi maa yɛgɛ kanŋgi wa kan we yeri wè wɔ.
6 Mbele paa fyɛ ma yɛgɛ, mà dirapo kan pe yeri paa kacɛn yɛn, mbe pe yɛri,
jaŋgo paa fee pe shɔ pe juguye pe wangala ke yeri. Wɔnmatigiwɛn laga.
7 We yɔn sogo, ma we shɔ ma fanŋga kɛɛ ki ni,
jaŋgo woro mbele we kala li yɛn mɔɔ ndanla, we ta we shɔ†!
8 Yɛnŋɛlɛ lì para wa li cɛnsaga kpoyi* ki ni, ma yo fɔ: «Mi yaa cew ta.
Mi yaa Sishɛmu ca ki yɛɛlɛ,
mbe Sukɔti gbunlundɛgɛ ki taanla mana ni mbege kɔɔnlɔ kɔɔnlɔ.
9 Galaadi tara ti yɛn na woro,
Manase tara ti yɛn na woro;
Efirayimu tara ti yɛn paa na tugurɔn njala yɛn mala go ki tɔn;
Zhuda tara to yɛn paa na wunluwɔ kanŋgala yɛn.
10 Mowabu tara to yɛn paa na woliyaraga yɛn, ŋga mi maa wunru wa ki ni,
Edɔmu tara tegere ti yɛn na yeri, mi mala sawira ti wɔ mberi wa wa;
mi yɛn na cew tawa kɔnnɔ waa Filisiti tara ti mɛgɛ ni.»
11 Yɛnŋɛlɛ, ambɔ wi yaa kari na ni wa ca ŋga pè malaga sigembogo kan maga maga ki ni?
Ambɔ wi yaa sanla torogo fɔ wa Edɔmu tara?
12 Kaawɔ Yɛnŋɛlɛ mboro ma mbe ya mbege pye, mboro ŋa màa we wa we.
E, Yɛnŋɛlɛ, mboro ŋa ma sila pye na pinlɛlɛ we maliŋgbɔɔnlɔ pe ni mbaa kee wa malaga.
13 Pan ma we saga, ma we shɔ we winfɛnnɛ pe kɛɛ,
katugu sɛnwee piile pe sagawa pi woro yaraga ka!
14 Na Yɛnŋɛlɛ li ka pye we ni, we yaa kagbɔgɔlɔ pye,
lo li yaa we winfɛnnɛ pe tɔngɔ.