Yɛnŋɛlɛ lo nuŋgba
58
1 Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na, pe maa ki yinri: «Maga kaga tɔngɔ.» Davidi yurugo.2 Yoro fanŋga fɛnnɛ wele, naga yɛn ma, lere mbe ya mboo jigi taga ye na kiti kɔnkala ni okɛ?
Naga yɛn ma, ye kaa sɛnwee piile pe kiti wi kɔɔn, ye maa kɔn kasinŋge ni okɛ?
3 Ayoo, ye maga siligi na kambasinŋge ki piin,
lewɛlɛwɛ kapyere to ye yɛn na piin laga tara ti ni.
4 Lepee wi ma kombele li lɛ, mbege lɛ le wi sepilige ki na,
yagboyoo wi maa yɛɛ puŋgo mbege lɛ le wi sepilige ki na.
5 Shɔnrɔ nda ti yɛn pe ni, tì pe paa wɔɔgɔ shɔnrɔ yɛn,
pe yɛn paa mɛrɛgɛ* yɛn, ŋga ki woro na nuru, ŋga kìgi nuŋgbogolo ke tɔn;
6 jaŋgo ki ka ka ta mbe wɔɔrɔ yigifɛnnɛ pe magala li logo,
ali kajɛnmɛ pyefɔ ŋa wì jilige ma wɛ, kiga ka ta mboo magala li logo†.
7 E Yɛnŋɛlɛ, ki lepeele pe ŋgangala ke kaari wa pe yɔn,
Yawe Yɛnŋɛlɛ, poro mbele pe yɛn paa jara yirifɔnmbɔlɔ yɛn, pe tugbilala pe kaari pe na.
8 Ki yaga pe kɔ pe wɔ wa paa yɛgɛ ŋga na tɔnmɔ ma kaa fo ma kari we,
na paga pe sandira ti wɔn, pe wangala ke ka ka yaraga ka yɔn!
9 Ki yaga pe pye paa ndɔŋgɔ yɛn, ŋga ki maa tanri na kee mbe sa koro wa mbe waga,
pe pye paa pyɔ yɛn, ŋa wi kugbɔ si lɛ, a pè suu se, ŋa wii sɔnlɔ ki yan.
10 Sanni pe wuuro ti sa yiri ti pye yuguyugu,
ti yɛn tipire o, nakoma tì waga o, ko yaa yala tifɛlinjolo li pan ma poro mbele lepeele pe pɛ ma kari pe ni.
11 Lesinŋɛ wi yaa yɔgɔri, katugu wi yaa kaga yan fɔ Yɛnŋɛlɛ lì kayaŋga wɔ lepeele pe ni;
wi yaa kaa tɔɔrɔ ti jogo wa lepeele pe kasanwa pi ni.
12 Kona, leele pe yaa kaa yuun fɔ: «Kaselege ko na, tɔnli yɛn lesinŋɛ wi woo.
Kaselege ko na, Yɛnŋɛlɛ li yɛn wa, lo li yɛn na kiti wi kɔɔn laga dunruya wi ni.»