Yɛnŋɛlɛ li kapyege ki yɛn ma gbɔgɔ
37
1 A Elihu wì sho naa fɔ:Na sunndo wi yɛn na kɔɔn na na ki kagala ŋgele ke kala na,
fɔ a wila suun na jaa mbe wɔ wa wi yɔnlɔ li ni.
2 Ye pyeri ye logo, ye Yɛnŋɛlɛ li gbanlaga magala li logo,
konaa gbaanra nda ti yɛn na yinrigi wa li yɔn ti ni!
3 Li yɛn na yɛnŋɛlɛ yɛngɛlɛmɛ piin naayeri wi lagapyew,
li yɛnŋɛlɛ yɛngɛlɛmɛ pi ma gbɔn fɔ wa tara ti kɔsaga ki na.
4 Ko puŋgo na, pe ma Yɛnŋɛlɛ li magala gbɔlɔ li logo,
li ma yɛnŋɛlɛ tinmɛ yirige ŋgbanga,
ko sanga wo ni li ma yɛnŋɛlɛ yɛngɛlɛmɛ pi torogo kɛɛ ki ni fuun ki na.
5 Yɛnŋɛlɛ li ma tin ŋgbanga fɔ ki ma pye kafɔnnɔ,
li maa kagbɔgɔlɔ piin, ŋgele we se ya ke kɔrɔ jɛn.
6 Li maga yo sinndɛɛrɛ tisaga ki kan ma yo fɔ ki to laga tara ti na,
li ma tisaga ki pye ki ma pan, mbe tisagbɔgɔ ki pye ki ma pan.
7 Ki pyewe pi na ma, li ma sɛnwee pyɔ pyew wi tunŋgo ki yerege,
jaŋgo pe ni fuun pege jɛn fɔ lo kɛɛ tunŋgo yi.
8 Yan yaara ti ma ye wa ti were ti ni,
ti ma koro wa ti sinlɛsara ti ni.
9 Tisaga tifɛlɛgɛ ki maa paan na yinrigi wa yɔnlɔparawa kalige kɛɛ yeri,
yɔnlɔparawa kamɛŋgɛ kɛɛ tifɛlɛgɛ ko maa paan were ni.
10 Yɛnŋɛlɛ li yɔn tifɛlɛgɛ ki ma tɔnmɔ pi simbi,
tɔnmɔ pi gona wi ma simbi paa sinndɛlɛgɛ yɛn.
11 Li ma kambaara ti yin tɔnmɔ pi ni;
yɛnŋɛlɛ yɛngɛlɛmɛ maa piin kambaara ti sɔgɔwɔ kɛɛ ki ni fuun ki na.
12 Li ma ti ti maa kee na mari na yala li nandanwa kala li ni,
jaŋgo ŋga fuun li yɛn na jaa, paa ki piin laga tara ti na.
13 Na li ka yo li yaa tara ti gbɔn li gbɛgɛ ki ni,
nakoma na li ka yo li yaa kagbaraga pye,
ko yaara to li ma torogo†.
14 Zhɔbu, nuŋgbogolo jan ki kagala ke yeri ma ke logo!
Ma yere jɛnri, ma sɔnri Yɛnŋɛlɛ li kagbɔgɔlɔ ke na.
15 Yɛnŋɛlɛ li maa ki yaara ti yɛgɛ sinni yɛgɛ ŋga na,
konaa li maa yɛnŋɛlɛ yɛngɛlɛmɛ pi piin yɛgɛ ŋga na wa kambaara ti sɔgɔwɔ, maga jɛn le?
16 Kambaara ti ma yere yɛgɛ ŋga na wa naayeri fowaga ki ni, maga jɛn le?
Ŋa wi jɛnmɛ pi yɛn ma yɔn fili wo wi ma ko kafɔnnɔ tunŋgo ko pye.
17 Na yɔnlɔparawa kalige kɛɛ tifɛlɛgɛ ki kaa gbɔɔn mbe tara ti wɛri,
mboro ŋa ma yaripɔrɔ ti maa kafugo waa ma na,
18 naga yɛn ma, mboro mbaa ya mbe Yɛnŋɛlɛ li saga mbe naayeri wi gbegele mboo jaraga le,
nakoma mboo pye wi sheli paa duwale ŋa pè tugurɔn tɛgɛ maa gbegele wi yɛn le?
19 Ŋga we daga mbe yo Yɛnŋɛlɛ li kan ki naga we na,
woro se ka jɛn mbe yo, we yɛn wa wɔwɔ pi ni.
20 Naga yɛn ma, sanni mbe sa para, ki daga pege yo li kan wi le?
Naga yɛn ma, lere daga mbe Yɛnŋɛlɛ li kɔgɔri kala la na, jaŋgo li ta li ki kala li jɛn wi le†?
21 Yɔngɔlɔ ke ni, kambaara ti ma kaa yɔnlɔ yanwa pi tɔn lere naa yan,
ɛɛn fɔ tifɛlɛgɛ ka mɛɛ kaa pan mari pɛ mari laga wa.
22 Yanwa pa na yinrigi wa yɔnlɔparawa kamɛŋgɛ kɛɛ yeri, na yɛngɛlɛ paa tɛ yɛn;
Yɛnŋɛlɛ li gbɔgɔwɔ yanwa pi yɛn fyɛrɛ ni dɛ.
23 Yɛnŋɛlɛ li yɛn yawa pi ni fuun fɔ, we se ya gbɔn li na,
lì gbɔgɔ li yawa pi fanŋga na naa li kasinŋge ki fanŋga na,
laa jɔlɔgɔ wa lesinŋɛ wi na.
24 Ki kala na sɛnwee piile pe daga mbaa fyɛ li yɛgɛ;
ɛɛn fɔ mbele pe maa pe yɛɛ jate kajɛnmbɛlɛ laa la pe jate.