Elihu wì yo Yɛnŋɛlɛ
36
1 Kona, a Elihu wì si para Zhɔbu wi ni naa, ma yo fɔ:2 Na sige naa jɛnri, mi yaa ma yɛgɛ naga,
katugu sɛnrɛ yɛn na yeri bere mbe yo ma kan Yɛnŋɛlɛ li wogo na.
3 Mi yaa na jɛnmɛ pi lagaja mbe yiri fɔ lege,
mi yaa para mbe tanga kan na Dafɔ wi yeri.
4 Kaselege ko na, na sɛnrɛ ti woro yagbogowo sɛnrɛ;
lere ŋa wi jɛnmɛ pi yɛn jɛmbɛ ma yɔn fili, wo wi yɛn na ma yɛgɛ sɔgɔwɔ yɛɛn.
5 Wele, Yɛnŋɛlɛ li yɛn yafɔ, laa lere tifaga;
li yawa pì gbɔgɔ li tijinliwɛ gbɔɔ pi fanŋga na.
6 Laa yere ki na lepee wi yinwege ta;
ɛɛn fɔ mbele pe yɛn tege ni, li ma pe tanga ki kan pe yeri.
7 Laa li yɛgɛ ki laga lesinmbele pe na mbe puŋgo le pe ni,
li ma pe teŋge wunluwɔ jɔngɔ na paa wunlumbolo yɛn;
li ma pe tɛgɛ wunluwɔ pi na fɔ sanga pyew,
jaŋgo mbe pe yirige.
8 Na paga yɔngɔwɔ le pe na,
nakoma na jɔlɔgɔ ka to pe na,
9 kona Yɛnŋɛlɛ li ma pe kapyere ti yirige funwa na mari naga pe na,
mbe taga wa ko na, naa pè yiri ma je pe yɛɛ gbɔgɔwɔ pi kala na we.
10 Li ma ti pe ma nuŋgbolo jan nali yɛrɛwɛ sɛnrɛ ti nuru,
li maga yo pe kan fɔ pe kambasinnde ti yaga.
11 Na paga logo li yeri mbe yere li wogo ki na,
pa pe yaa pe yinwege ki pye ki sa kɔ wa fɛrɛwɛ pi ni,
pe yɛgɛlɛ yɔn ki yaa sa kɔ wa yɔgɔrimɔ pi ni.
12 Ɛɛn fɔ na pee logo li yeri, li yaa ti pe pe gbo sɔgbɔ ni,
pe yaa ku wa pe kambajɛnmɛ pi ni.
13 Mbele pe woro na fyɛ Yɛnŋɛlɛ li yɛgɛ, pe ma nawa ŋgban li ni,
ali na Yɛnŋɛlɛ li ka pe pɔ li yɔngɔwɔ pi ni, paa gbele mbeli yeri li pe saga.
14 Ki kala na, pe ma ku wa pe lefɔnrɔ sanga wi ni,
pe ma ku paa nambala jajara pyefɛnnɛ yɛn†.
15 Ɛɛn fɔ Yɛnŋɛlɛ li ma ŋa wi yɛn tege ni wi tege ki tɛgɛ mboo shɔ,
li ma jɔlɔgɔ ki tɛgɛ mboo yɛri.
16 Mboro fun, li yaa ma tile mbɔɔn wɔ wa jɔlɔgɔ ki ni,
mbɔɔn kɛɛ yaara ti lɛgɛ, yaraga ka sɔɔn yanra,
mbe ti yaakara tanra ti lɛgɛ le ma tanla.
17 Ɛɛn fɔ koni, jɔlɔgɔ ŋga ki daga mbe to lepeele pe na, ko kì to ma na;
kiti wo naa jɔlɔgɔ ki ni, tì to ma na.
18 Ɛɛn fɔ maga ka ti naŋgbanwa pɔɔn kan ma yiri ma je;
maga kaa ma yɛɛ fanla mbaa ki sɔnri ndɛɛ ma yaa Yɛnŋɛlɛ li go jɔgɔ yarikanra lɛgɛrɛ ni.
19 Naga yɛn ma, gbelege ŋga maa gbele na sagafɔ jaa ki mbe ya mbɔɔn shɔ jɔlɔgɔ ki ni wi le?
Ma yɛɛra fanŋga ki ni fuun ki se ya mbɔɔn shɔ ki ni†.
20 Ma kaa ki yegeri yembinɛ li wɔ,
ki yembinɛ na cɛngɛlɛ ke yaa ka yiri wa ke cɛnsara ti ni.
21 Ma yɛɛ yingiwɛ jɛn, maga kɔɔn yɛɛ kan kapege pyege ki yeri;
katugu ko kì ti ma yɛn na jɔlɔ.
22 Wele, Yɛnŋɛlɛ li yɛn fanŋga fɔ li yawa pi fanŋga na;
ambɔ wi mbe ya mbe lere naga paa lo yɛn?
23 Ambɔ wi mbe ya mbe konɔ na li daga mbe tanga li naga li na?
Ambɔ wi mbe ya mbege yo li kan fɔ li kambasinŋge pye?
24 Ma jatere wi tɛgɛ ki na, maa Yɛnŋɛlɛ li gbogo li kapyege ki kala na,
ko ŋga sɛnwee piile pe maa ki sɔnni yuuro ni.
25 Sɛnwee pyɔ pyew wi yɛn naga yaan,
lere pyew wi ma koro lege naga wele jɛŋgɛ.
26 Yɛnŋɛlɛ li yɛn ma gbɔgɔ, li gbemɛ pì toro we jatere wi kɔsaga ki na;
lere se ya mbeli yɛgɛlɛ yɔn ki jiri mbege jɛn.
27 Li ma tɔnmɔ pi tile jɛɛnnjɛnri ma kari pi ni wa naayeri,
mbe suu kanŋga mboo pye tisaga wa kambaara ti ni.
28 Kona kambaara ti mɛɛ tisaga ki yaga ki ma tigi,
ki ma to sɛnwee piile janwa lɛgɛlɛ li na.
29 Ambɔ wi mbe ya mbe kambaara ti torolɔmɔ pi jɛn
konaa yɛnŋɛlɛ gbanlaga ki ma tin yɛgɛ ŋga na wa yɛnŋɛlɛ na ki ni?
30 Wele, Yɛnŋɛlɛ li ma yɛnŋɛlɛ yɛngɛlɛmɛ pye li kɛɛ ki ni fuun ki na wa naayeri,
mbe kɔgɔje wi latijuro ti tɔn diwi ni.
31 Li ma ki kagala ke tɛgɛ ma kiti kɔn cɛngɛlɛ ke na,
li ma yaakara lɛgɛrɛ kan ke yeri.
32 Li ma yɛnŋɛlɛ yɛngɛlɛmɛ pi yigi wa li kɛyɛn yi ni,
mbe suu torogo wa pi karisaga.
33 Li ma li yɛɛ naga wa yɛnŋɛlɛ gbaanra ti ni,
yaayoro ti ma pye li panga ki jɛnmɛ.