Yesu nì Pilato njìó
(Mat 27:1-2; 11–14; Mk 15:1-5; Yoh 18:28-38; Nji 4:25-28)
23
1 Fúrò, njúwní ì njûw ì-tsò nì ndrǔ wá ngbî tdè ì ro, ndrǔ kâ Yesu mbà Pilato njìò. 2 Fú nga ó ndrǔ dêy à bbǒw, dey tdrà ǐchú: “Mà chùw í kpatss̀ nì màdhí ndrǔ-tsi viy víyní: À nì tdrǎ nzǐ ndrǔ bbú pey-ddúw djú drǒngó ní Pey, Kayisari mí mùsórò, à nì tdrǎ ndèy ndèyníddò nì Kristo, Drà ngá chì nà ka vìy nì, Pey ní li.” 3 Chú, Pilato kâ nga dhiy à-tsò ró í lò-kpà òluw: “Nyi ní Yahuddi-ddúw dhí Pey?” Yesu kâ lò ngù à dhò: “Nyi nì tdrǎ ndey.” 4 Chú, Pilato kâ tdrà dyǎdjí mà, bíy nì ndrǔ mànà dhò: “Íli djò ka tdey lò, mí lò rò ma chùw nzá.” 5 Chú, ndrǔ kâ tdrà kpǔkpǔ klôw nà: “À nì bíy nì ndrǔ gwiy mí lò òluw, fú li nì bíy nì ndrǔ chǒ, ndaní ndrǔ-tsi tsá tsání. À lòw tsò nì Galilaya mí ngòw óddù, à dà Yuddeya mí ngòw òluw wá, nja-nja à shì pbǔw ingá.”Yesu nì Herodde njìó ddiy
6 Chú, fú lò-kpà Pilato kâ rr̀ ro, à kâ dhiy: “Fúli ná Galilaya mí ngòw ó li?” 7 Yesu shì Herodde nì Pey nyǔ mí ngòw-là óddù ddiy Pilato rr̀ ro, à chô Yesu Herodde nì mí nga ò; ddiydhò, fú ddu ó Herodde ddí tdè Yerusalemu mí drǒngó ní bba djú kpá-kpánga nà. 8 Chú, Herodde-ónga kì hwî nà Yesu ndèy njà ddiy mí lò dhò. À kâ Yesu ɦuwdjò rr̀ ro, à dêy jǐ ndèy njúw ndèy Yesu nà nji nga djúddù. À tdè ddeydha nà ndèy njǎ, ꞌwìyní li-ónga ꞌwíy nì ji à njey ndèy njǎ ddiy. 9 Herodde dhîy tdè bíy nì lò-kpà Yesu-tsò ró; chú, Yesu ngù tdè ddì nì lò rò ddí nzá. 10 Ndrǔ ró dho nà ì nì shǐ Drà njìò nì kpa djú drò-dró ní kpa mà, Drà mí yǎdha ì nì ndíy nì kpa ndèymí ddiy-ónga túwdha-djá mànà ddí tdè fú nga ó; kpa dêy Yesu bbǒw klôw nà. 11 Chú, Herodde mà nděyngá la-dzàdha mí kpa mànà dêy Yesu gbu gbúní mǎ, à dja djánì mǎ. Ndrǔ thô tdè drǒ ndèy là nì rù Yesu ró ro, kpa kâ à ngù ví Pilato nì mí nga ò. 12 Chú, nji Herodde mà Pilato nà tdè ndrò-djá ní ì kàó; fú itsś ś djú, kpa ngû tdè jǐ-djá ní.
Yesu djú lò ka tdèy dhi dhò ddiy
(Mat 27:15-30; Mk 15:6-19; Yoh 18:39–19:16)
13 Pilato njûw tdè dyǎdjí mà, ndrǔ-djùkpa ì dda nì nì kpa mà, ndrǔ-tsi mànà ro, 14 à kâ tdrà kpa dhò: “Nyì mbà í kpatss̀ ma dè, yà nyì nì tdrǎ ma dhò ǐchú: ‘Í kpatss̀ nì ley ndrǔ-tsi viy víyní.’ Chú, ma dhîy à nyì-nyú djú, ma chùw tàní à tà ndèy ǒmá nì lò rò, bbòw ní nyìnì à bbǒw djǒmá nì ddrǎní ddiy ddí nzá. 15 Herodde ddí chùw tdè tàní Yesu tà ndèy ǒmá nì lò ddí nzá; fú ddiydhò chú, Herodde ngù tdè à ma dè. Ddiy nì ddí fǔchú, í kpatss̀ njèy ddrǎ ní ddiy nzá li hwìdha nà ddiy kâ nì. 16 Ma ddí nì ley ka dhěy à dhèyní shí nà; fú ddiy dzzdjú, ma rà à bbà bbàní.” 17 [Pasaka mí drǒngó ní ddu ró chú wá, ddiy kâ tdè Pilato kló ngiy-dzà ó ddì li rò Yahuddi-ddúw dhòa.] 18 Chú, bíy nì ndrǔ-kpà wá dêy wu ddǐ nga ó: “Léy ka hwî fú li! Kló Baraba mà dhò!” 19 Baraba ka lêy tdè ngiy-dzà ò tsání ndèy lêy tdè bíy nì ndrǔ tsá drǒngó ní bba ó ndèymí bíy nì ndrǔ ndèy hwì ddiy màdhí lò djú. 20 Chú, gbè Pilato jì tdè ndèy kló Yesu klóní ddiy mí lò dhò, à kâ ngu lò tdrà ndrǔ dhò ddíyàchú. 21 Chú, ndrǔ kâ swa à djú: “Chó à tàdha ní tsúw djò! Chó à tàdha ní tsúw djò!” 22 Pilato tdrà gbow ngà nà mí lò ro, à dhîy bíy nì ndrǔ-tsò ró: “À njèy ná ŋá lò ngǎjìní nì? Ma chùw tàní à tà ndèy ǒmá nì lò rò, bbòw ní nyìnì à bbǒw djǒmá nì ddrǎ ní lò ddí nzá. Ma nì ley ka dhěy à dhèyní shí nà; fú ddiy dzzdjú chú, ma rà à kló klóní.”
23 Chú, ndrǔ dêy lò tǒw nú sûw wúdha nà, ddiy kà ka chó Yesu tàdha ní tsúw djò. Bbalè chuw mí klǒw shì tdè nga djòluw. 24 Fúnga nà, Pilato tdèy tdè lò ndèy-thíy ó, ndèy bbú kó ní ndrǔ jì nì ddiy ndrǔ-thokpa ò. 25 Chú, à klô tdè ndrǔ nì jǐ nì li, à bbû ndrǔ-thokpa ò: ngiy-dzà ò ka bblà nì, tsání ndèy lêy ndrǔ tsá nì ndèymí hwìní ndèy hwì bíy nì ndrǔ nì fú li. Chú, à bbû Yesu ndrǔ-thokpa ò, ndaní ndrǔ njěy ì jì nì ddiy à ró.
Ka chô Yesu tàdha ní tsúw djò ddiy
(Mat 27:31-56; Mk 15:20-41; Yoh 19:16-37)
26 Yesu ndrǔ dêy mbǎ ro, ndrǔ shì ì njuw Simoni nà, Kurene ó nì kpatss̀, nza óddù ndèy tdè ngu ro. La-dzàdha mí kpa lòw tdè à ro, kpa tdûw tàdha ní tsúw Simoni djò à tdúw, à rǎ ndanà Yesu kodjú. 27 Chú, drǒ nì bíy nì ndrǔ-tsi-kpà dêy rǎ Yesu kodjú. Dhì ní ndrǔ-kpà ddí dêy rǎ dzz̀ nà ndèymí ì hòwdha nà àmí lò dhò. 28 Yesu lî ndèy-rónga fú dhì dè ro, à kâ tdrà: “Yerusalemu mí drǒngó ní bba ó dhì, nzǐ nyì dzz màtsá lò djú! Nyì dzz nyì, nyìníddù mà, ndèymí nyìdhí nzòw mànà dhí lò dhò! 29 Ddiydhò, nga shì ney, ǐchú ka rà tdrà ǒmá nì ddu: ‘Hwî nà ì nì nì dhì nì, nzá kâ ì chûw nzòw nì, nzá ì gòw nzòw rò dziylíy djú, nzá ì bbû dja rò nzòw njǔ nì dhì dhò!’ 30 Fúrò, ndrǔ rà tdrà drò-dró ní ngòw-kpá-kpá ní: ‘Nyì tdriy nyì mà djò,’ ndèymí dù-dú ní ngòw ní: ‘Nyì ru mà.’ 31 Ddiydhò, ya ddiy tdě fǔchú ndrǔ nì njěy jǔw ní tsúw ró ro, ꞌwìyní ndèy ꞌwìy nì tsúw ró ddu rá ndey ndèy njèy?”
32 Chú, ndrǔ mbà tdè njàddí rwo nì kpa ddí, ngǎjìní lò ì njèy nì, ndaní ka chǐ ndrǔ Yesu mànà ddǐ nga ó. 33 Cha, “Li-djùkpa-kpalá” ní nga ka tdè iy nì nga ó ka shì ro, la-dzàdha mí kpa kâ Yesu cho tàdha ní tsúw djò fú nga ó. Fúrò, kpa lêy tdè ngǎjìní lò ì njèy tdè nì rwo nì kpa ddí, ddì li àmí ví djòluw, njàddí li àmí gûw djòluw. 34 Chú, Yesu kâ tdrà, “Bàbá, sa fú ndrǔ dhò; ddiydhò, kpa njà nzá ya ddu ì nì njěy ddiy.” Kpa ndò à ró rù-kpà-ónga ì kàòluw, dyâ pèydha òluw. 35 Ndrǔ-tsi tdè dey fú nga ó, dey fú ddiy njà. Yahuddi-ddúw djú drò-dró ní kpa dêy Yesu gbu gbúní, yà ì nì tdrǎ ǐchú: “À pâ tdè njàddí ndrǔ ddí, à kà à pá ndèy ndèyníddò, ya à nì Kristo, Drà vû nì li ro!” 36 La-dzàdha mí kpa màddí dêy à gbu gbúní; kpa ndrîy tdè ì chow-chow, kpa bbû dìyváyìy-ngìy-tsi mí ngbángbá ní wa à dhò. 37 Kpa kâ tdrà: “Ya nyi nì Yahuddi-ddúw dhí Pey ro, pá nyi nyiníddò!” 38 Chú, à djùkpa-djúnga ó ka lêy tdè ndíyní ka ndîy tdè nì í lò: “Íli nì Yahuddi-ddúw dhí Pey.”
39 Ngǎjìní lò ì njèy nì kpadhí ddì li, tàdha ní tsúw djú ka chô tdè nì, à dêy Yesu dhûw yà ndèy nì tdrǎ ǐchú: “Nyi ná ngǎ Kristo, Drà ngá chì nà ka vìy nì li? Pá nyi nyiníddò ndèymí mànà ddí ddǐ nga ó!” 40 Chú, njàddí li kâ à mblòw mblòwdha ní ngǎjìní lò djú, à kâ tdrà: “Nyi ná Drà-dò njěy nzǐ; nyi, cha nyi nì nyi, njèy nì lò-ko-bì chûw nì li? 41 Mà dhò fú mà-koko-bì kâ ŋà; ddiydhò, mànì chûw nì ddiy nì mà njèy nì lò nà kâ nì ddiy; chú, íli njèy ngǎjìní lò rò nzá!” 42 Fú ddiy dzzdjú, à tdrà ddíyàchú: “Yesu, ddéy ma ngà ddí, cha nyi rà shì nyǐngá Pey mí nga ò ro.” 43 Yesu ngù lò à dhò: “Ma nì tdrǎ nyi dhò kpǔkpǔ, dìychú ní lò nà: Ndu, nyi rà tdè ma nà pàràdísò ó.”
Yesu mí dhìdha
(Mat 27:45-56; Mk 15:33-41; Yoh 19:28-30)
44 À tdè chow-chow sâ za, itsś ś bbà tdè nga tdyídha-tsò ro, nga têy tdè dziylíy-djúnga gbûw ro, fú ddiy dêy tdè itsś ónga mí sâ drrdhiy djò chú pbǔw. 45 Drà mí ddiy ní nú, ndèy nì ngǎ ndèy ó cherr rò nà nì dza-ónga-nyú-djúnga-tsò ka dzâ ndanà nì rù-ónga thà ndèy kpǔ chǐykàò luw. 46 Fúnga nà, Yesu swâ rí ní ndèy chuw nà: “Bàbá, manì ma-thíy bbu nyi-thokpa ò.” Fú lò-kpà ndèy tdrà ddiy dzzdjú, àmí djiy kâ ndèy si ndùw.
47 Chú, la-dzàdha mí hó-djùkpa-tsò ndèy dêy ddǎ nì, Roma mí drǒngó ní bba ó nì li kâ fú ddiy njà ro, à mâ Drà ro, à kâ tdrà: “Dìchú, íli tdè chǒw ní lò ndèy nì njěy nì li!” 48 Fú ddiy njadha dhò ì shì tdè nì bíy nì ndrǔ wá njà tdè ndèy njèy tdè ndèy nì fú lò. Fú ddiy dzzdjú, ndrǔ ngû tdè, yà ì nì ì-ngò-tsò pbey ì-thíy chùw zòw ddiy mí lò dhò. 49 Chú, Yesǔ ngá jǐ-djá mà wá, ndèymí Galilaya mí ngòw óddù ì mbà tdè à djòtey nì dhì dêy děy ndì, ndaní ì njǎ ya ddu mànì dǎ ddiy.
Yesu ka tdòw ddiy
(Mat 27:57-61; Mk 15:42-47; Yoh 19:38-42)
50 Ddì li cha ndèy ró dho tdè Yusufu nì, tdè lǎní ndèymí chǒw ní lò ndèy nì njěy nì li. À tdè Drà mí Pey mí nga rà shì nì ddiy pbǒ. 51 À tdè drǒngó ní nga ó ndèy nì lò tděy nì ddì li, Yahuddi-ddúw dhí ngòw ó, Arimateya mí bba ó nì li, cha ndèy tdè Pey mí nga pbǒ nì. À ùw tdè lò ì nì tděy nì ndrǔdhí lò ndèymí ndrǔ njèy nì lò nà nzá. 52 Yusufu rà tdè Pilato dè ro, à kô Yesu mí bu.b 53 Fú ddiy dzzdjú, à kâ Yesu mí bu thu tàdha ní tsúw djúddù. À pbì tdè à-rónga tsó-kòw tsúw ó sárŕ ní ngiy nà ka dyà nì rù nà. Yusufu lêy tdè àmí bu djuw ó ka bbì nì tdôw-dzì, nzá děy ka vè li tdòw ò mànì ò. 54 Ddiy tdè mb njí-dyì ó, Sabato tsò tdè ra ndèy ngǎ mî. 55 Chú, Galilaya mí ngòw óddù ì mbà tdè Yesu djòtey nì dhì mà, shì tdè Yusufu mànà; fú dhì njà tdè tdôw-dzì ro, ndrǔ njà tdè ya ŋǎchú ka lêy tdè Yesu mí bu òmà ddiy njàní. 56 Chú, fú ddiy dzzdjú, ndrǔ kâ rà, ka ngu drǒngó ní bba ò ro, ndrǔ kâ chì mà kpà thì, rǐy ndèy dzìy nì ngǒw nì tsó nà ka thi nì nì chì bu dhò. Sabato ddù ó, ndrǔ kâ ì-rónga shù, cha Drà mí yǎdha dêy jǐ níchú.