Yesu hwìdha mí lò-tsò ndrǔ gbâ ddiy
(Mat 26:14-16; Mk 14:10-11)
22
1 Pasaka mí drǒngó ní ddu mí nyû, cha ka nyu nì ngǎ ndèy ó thiy nà nì mùkátì mí ddu shì chow-chow. 2 Ndrǔ ró dho nà ì nì shǐ Drà njìò nì drò-dró ní kpa ndèymí Musǎ ngá yǎdha ì nì ndíy nì kpa mànà, dêy tuw měy ì hwî ndanà Yesu; chú, ndrǔ dêy bíy nì ndrǔ-kpà dò njěy.Yudda ùw ndèy bbú Yesu-thotèy drò-dró ní kpa-thokpa ò ddiy
(Mat 26:14-16; Mk 14:10-11)
3 Fúrò, Setani tsùw tdè Yudda Iskariyota ní ka tdè íy nì li ò, fú li tdè ddri ndèy djú rwo nà nì kpa kàó ddì li, cha à nì rǎ Yesu kodjú nì. 4 Yudda rà tdè lò tèy ndrǔ ró dhò nà ì nì shǐ Drà njìò nì kpa djú drò-dró ní kpa mà, Drà mí dza-rónga ì nì pbǒ nì drò-dró ní kpa mànà, ya ŋǎchú ndèy kà ndèy bbú Yesu-thotèy kpa-thokpa ò ddiy. 5 Fú ddiy mí hwî njèy tdè kpa drǒ ro, kpa ùw tdè ì bbú mb-ho à dhò nì ddiy-tsò. 6 Yudda ùw fú lò-tsò ro, à lòw dey tuw měy ndèy bbú ndanà Yesu-thotèy kpa-thokpa ò nzá djòtey bíy nì ndrǔ pbò ní.
Yesu lêy ka thǐ Pasaka mí nyû ddiy
(Mat 26:17-29; Mk 14:12-25; Yoh 13:21-30; 1Ko 11:23-26)
7 Chú, ngǎ ndèy ó thiy na nì mùkátì mí ddu shì tdè, Pasaka mí jìdha ní ka ji nì towmbù bbúdha mí ddu. 8 Fúrò, Yesu cho Petro mà Yohana nà, ǐchú ndèy nì tdrǎ kpa dhò ro: “Nyì ra Pasaka mí drǒngó ní ddu mí nyû thì, ndaní mà nyǔ.” 9 Chú, ndrǔ dhîy Yesu-tsò ró: “Nyi jì ná mà thǐ fú nyù ŋangá?” 10 Chú, Yesu ngù lò kpa dhò: “Nyì rr̀: Drǒngó ní bba ò nyì rà shì ro, nyì rà shì nyì njuw dda mí ddow ndèy tdûw nì li nà. Nyì rǎ à kodjú pbǔw à rà tsùw mì dza ò. 11 Fúnga nà, nyì ká tdrà fú dza-dja dhò: ‘Li gwíydha-dja nì dhiy nyi-tsò ró: Ma kodjú ì nì rǎ nì kpa nà mà rà Pasaka mí drǒngó ní ddu mí nyû nyù mí gìy ní ŋangá?’ 12 Fúli rà dza mí rusángónga dhò, drǒngó ní gìy, ndèy ó ŋà kâ nì ddiy nà wá. Ddiy nì fu nga ó chú nyì rà nyû thì.” 13 Fúkpa rà tdè ro, kpa shì tdè wánì ddiy ró, gbè Yesu tdrà tdè ì dhò níchú. Fúrò, kpa kâ Pasaka mí nyû thì.
Pey mí mězà
(Mat 26:26-30; Mk 14:22-26; 1Ko 11:23-25)
14 Sâ kâ ro, Yesu mà kâ dòw mêzà tsò ró, nděyngá dyòw-djá mànà. 15 À kâ tdrà kpa dhò: “Ma jì tdè drǒ mà nyǔ í Pasaka mí nyû nyì nà ddǐ nga ó, màtsá nzádha njìó! 16 Ddiydhò, manì tdrǎ nyì dhò kpǔkpǔ: Ma rà í Pásśkà kíyddà nyù ddíyà nzǐ, kpòw ǒmá lò rà ndèy njèy, pbǔw Drà ngá Pey mí nga ò mí nga djò.” 17 Fúrò, Yesu zìy kǒpò; à bbû madha Drà dhò, à kâ tdrà: “Nyì kó í kǒpò, nyì ndǒ ǒmá ddiy-ónga nyì kàòluw; 18 ddiydhò, manì tdrǎ nyì dhò kpǔkpǔ: Nja-nja nga djúddù, ma rà í dìyváyìy-ngìy-tsi wà mí mbù nzǐ, kpòw Drà mí Pey mí nga rà shì mí nga djò.” 19 Fú nga dzzdjú, à zìy mùkátì, madha à ngù ddiy dzzdjú, à pbrù mùkátì ónga, à bbû ndrǔ-thokpa òluw, yà ndèy nì tdrǎ ǐchú: “Ínì ma-rónga nyì dhò ka bbû nì. Nyì njey fú ddiy ma ddéydha dhò.” 20 Nyû dzzdjú, à zìy kǒpò ddí, à bbû ndrǔ-thokpa òluw, yà ndèy nì tdrǎ ǐchú: “Í kǒpò nì tdey nì ní Drà ngá yǎdha, nyìdhí lò dhò ndèy tdîy ndèy nì ma ró jǔw òluw. 21 Chú, nyì nja, ma-dhotèy ndèy nì bbu nì li nì mànà ingá mêzà tsò ró. 22 Ddiy nì dìychú, Ndrǔ-Ddùw rà dhì, gbè Drà tdèy tdè ndèy-thíy óddù ndèy njěy níchú. Chú, drǒngó ní zòw rà tdè, cha ndèy bbû à dhotèy ndrǔ-thokpa ò nì li dhò.” 23 Fúnga nà, Yesu kodjú ì nì rǎ nì kpa lòw dey ì-tsò-rónga dhiy ì kàòluw: “Mà kà-óddù áyìy dhó ndey fú lò njèy?”
Áyì ná ndey drǒngó ní li?
(Mat 18:1-4; Mk 10:35-45; Yoh 13:2-17)
24 Chú, Yesu kodjú ì nì rǎ nì kpa dêy ì ndrř kpá-kpá ní nga nà ì kàòluw, ndaní ì tsǐ ì kà-óddù ya áyìy chú ka kà ná ka njǎ bba-dja ní? 25 Chú, Yesu kâ tdrà kpa dhò: “Ndrǔ-bbúw-kpà dhí pey-ddúw déy nì yǎdha bbu ndrǔ dhò, kpa djú bba-djá léy nì ka íy ì: ‘Lǎní lò ì njěy nì kpa ní.’ 26 Yàkě, ddiy nì ngǎ fǔchú ní nyì dhò. Ddiy nì ngéy fú lò róddù, nyì kàó dàní ndèy dà nì drǒngó ní li, ddiy jì à ngǔ ndèy, gbè yàdda níchú, lò ndèy nì tdrǎ ndrǔ dhò nì li déy, gbè ndèy nì ndrǔ tso-tso ko nì li níchú. 27 Ddiydhò, áyìy ná ndey drǒngó ní li, ddiy ná mêzà tsò ró li, ǐngí njí ndèy nì njěy nì li? Ddiy ná ngǎ mêzà tsò ró nì li? Chú, manì nyì kàó, gbè nyì-tso-tso ndèy nì ko nì li níchú. 28 Nyì dêy tdè ma nà nzá nyì bbà ma bbàní, màtsá mbùdha-kpà kàó; 29 Gbè màtsá djǎnì lêy tdè Pey mí nga ma dhò níchú, ddiy nì ddí fǔchú, ma lêy Pey mí nga nyì dhò. 30 Nyì rà nga nyù; nyì rà nga mbù màtsá mězà djú, màtsá Pey mí nga ó; nyì rà dey Pey mí thìynga djòluw Israeli mí ddri ndèy djú rwo nà nì bbúw-kpàmí lò-tdèydha dhò.”
Yesu nì Petro rà ndèy gù ddiy-ɦéy tdrǎ ddiy
(Mat 26:31-35; Mk 14:27-31; Yoh 13:36-38)
31 Drǒngóli kâ tdrà, “Simoni, Simoni! Rr gò: Setani dhîy ndèy jǎ nyì ónga wá jàní, gbè nyû-tsi rónga ka nì dhǎ, cha ka dha nì ngǎnò tsi, ngǎnò tsi ró bbùnì óddù níchú. 32 Chú, ma nzz̀ Drà nyi dhò; ndaní nzǐ nyìmí ùwdha chěy. Ya nyi rà ngu ma dè ro, bbú klǒw djúnyí-thíy dhò.” 33 Chú, Petro kâ tdrà Yesu dhò: “Drǒngóli, ma ùw úwní ma rà tdè nyi nà ddìnga ó bi-dzǎ ndèymí nyìmí dhi ó.” 34 Chú, Yesu ngù lò à dhò: “Petro, manì tdrǎ nyi dhò kpǔkpǔ: Ndu, děy nzá ǒw-kpà ngò mí nga njí, fúnì rà tdè ŋà nyi gù ma gbow ngà nà, gbè nzá nyi tsì nì li níchú.”
Mb-ho nì ǒmá nì kpǔ ndèymí la-dzàdha mí rwo ndèy-kuwdjò nà nì lùpángà mànà
35 Fú nga dzzdjú, Yesu kâ dhiy kpa-tsò ró: “Cha, ma chô tdè nyì ngǎ mb-ho mí kpǔ ní, ngǎ kpǔ ní, ndèymí ngǎ nyì ko ró shí-kpà ní, nyì rìy ná tdè ddiy rò ró ddí?” Fúrò, kpa kâ lò ngù à dhò: “Nzá.” 36 Chú, à kâ tdrà kpa dhò: “Nja-njanga nà, ndèy nì mb-ho nì ǒmá nì kpǔ na nì li, à kà ndèy zǐy fú kpǔ, ddiy nì ddí fǔchú, kpǔ nà nì li dhò. Ngǎ ndèy nì la-dzàdha mí rwo ndèy-kuwdjò nà nì lùpángà nà nì li, ddiy kà à dzíy ndèy ró rù-ónga, ndaní ndèy dzǐy la-dzàdha mí rwo ndèy-kuwdjò nà nì lùpángà. 37 Ddiydhò, manì tdrǎ nyì dhò kpǔkpǔ: ‘Ddiy kâ Drà mí bǔkù ó ndíyní ka ndîy nì lò njěy ndèy ma ró pbǔw: À ka lêy tdè ngǎjìní lò ì njèy nì ndrǔ kàó.’ Ddiydhò, ma-djú ka ndîy nì lò rà ndèy njèy pbǔw.” 38 Chú, Yesu kodjú ì nì rǎ nì kpa kâ tdrà: “Drǒngóli, nja la-dzàdha mí rwo ndèy-kuwdjò nà nì lùpángà nì i.” À kâ lò ngù kpa dhò: “Fúnì kâ ŋà.”
Yesu nì Drà nzǐ òlívè-tsúw mí ngòw djú ddiy
(Mat 26:36-46; Mk 14:32-42; Yoh 18:1-2)
39 Yesu ngbî ndèy ddiy dzzdjú, à rà òlívè-tsúw mí ngòw djò, cha à dêy njěy níchú. Yesu kodjú ì nì rǎ nì kpa kâ rà à kodjú ddí. 40 Chú, òlívè-tsúw mí ngòw djú à kâ shì ro, à kâ tdrà kpa dhò: “Nyì nziy, nzánà nyì chěy mbùdha ò.” 41 Fúrò, à ddâ ndèy ndì kpa kuwtsóddù, chow-chow li-thokpa nà ka bu nì djuw chey òmàmí nga dyâsi ní; à kâ ndèy kò ndèy-tdyòw-tey djú, à nzz̀ Drà: 42 “Bàbá, ya nyi jì ro, ddá nzadha mí í kǒpò ma róddù ndì. Chú, nyìmí jìdha njěy ndèy ndey, ngǎ màtsâ.” 43 Chú, fú nga dzzdjú, ddì nì malayika kâ ndè dhò à dhò rakpa óddù, ndaní ndèy ngǔ klôw à-thíy ò. 44 Tdòní ndèy-thíy-ónga nì tdǒ ro, Yesu dêy Drà nzz̀rí ní ndèy chuw nà. À ró dyo ngû tdè, gbè tděy tděy ndèy nì chey nì jǔw níchú.
45 Ŋà à nzz̀ Drà ddiy dzzdjú, à ngbî tdè ndèy; à ngû tdè ndèy kodjú ì nì rǎ nì kpa dè ro, à chùw fúkpa nì ddù nà zòw nì ì-thíy njěy ddiy mí lò dhò. 46 Fúnga nà, à kâ tdrà kpa dhò: “Nyì ná ddǔ ddudhò? Nyì ngbí nyì, nyì nzǐ Drà, nzánà nyì chěy mbùdha ò.”
Yesu ka lòw ddiy
(Mat 26:47-56; Mk 14:43-50; Yoh 18:3-12)
47 Děy à tdè lò těy ro, bíy nì ndrǔ-kpà kâ shì. Yudda, Yesu kodjú ì nì rǎ nì ddri ndèy djú rwo nà nì kpa kàó ddì li, dêy tuw-tsò dda fú ndrǔ-kpà dhò. Yudda ndrîy ndèy Yesu kuwtsò, à mbû Yesu, Yesu-rónga dhíydha nà. 48 Chú, Yesu kâ tdrà à dhò: “Yudda, ddiy ní ma-rónga dhíydha òluw chú, nyi nì Ndrǔ-Ddùw thotèy bbu bbalè-thokpa ò ddiy?” 49 Chú, Yesu mà tdè ndanà nì kpa njà ndèy kà ndèy shǐ nì lò ro, kpa kâ dhiy Yesu-tsò ró: “Drǒngóli, mà kaná ŋà mà chǐ íkpa la-dzàdha mí rwo ndèy-kuwdjò nà nì lùpángà nà?” 50 Fúrò, kpa kàó ddì li pò tdè ndrǔ ró dho nà ì nì shǐ Drà njìò nì kpa djú drǒngó lǐ ngá dhǐy mí li-gi ví djòluw nì. 51 Chú, Yesu kâ tdrà: “Nyì bba, ddiy kâ ŋà!” Yesu kâ fú kpatss̀-gi-rónga lòw, kâ à pa. 52 Chú, fú ddiy dzzdjú, Yesu kâ tdrà fu ì shì tdè ndèy lòw nì dyǎdjá mà, Drà-dzà rónga ì pbo nì nì kpa djú drò-dró ní kpa mà, drò-dró ní njàddí kpa mànà dhò: “Ddiy kâ ná nyì dhò, nyì shǐ la-dzàdha mí rwo ndèy-kuwdjò nà nì lùpángà-kpà mà, tsúw mà kpà nà nyì-thokpa òluw; gbè dhùní ndèy dhù nì nga, klôw nà ndèy njeynì gbu ní li níchú? 53 Wánì ddu nà mà tdè nyì nà Drà mí dza ó, nyì mèy tdè nzá nyì low ma ddiy. Chú, ínì nyìdhí sâ ndèymí kúw-ónga djú bba-dja mí kpá-kpánga mí sâ nà.”
Petro gù Yesu ddiy
(Mat 26:57; Mk 14:53-54; Yoh 18:12-18)
54 Fú nga dzzdjú, ndrǔ kâ Yesu lòw, ndrǔ kâ à mbà, ndrǔ kâ à bbu ndrǔ ró dho nà ì nì shǐ Drà njìò nì kpa djú drǒngó lǐ ngá dza ò. Petro dêy ra fúkpa-kodjú kpa róddù ndì. 55 Chú, ndrǔ chô tdè kàss bbayiy djúnga mí chǐykàó, Petro ddí dòw tdè kàss-tsò ró ì dòw tdè nì kpa kàò. 56 Chú, kàss-tsò ró Petro dòw ro, dhǐy mí ddì nì sǐngba ní li njà Petro chǒw, à kâ tdrà: “Í kpatss̀ ddí tdè fú li nà!” 57 Chú, Petro kâ Yesu gù, ya ndèy nì tdrǎ kpǔkpǔ: “Í sǐngba, ma tsì fú li nzá!” 58 Sêy ní nga dzzdjú, njàddí ngéy ní kpatss̀ njà Petro, à kâ tdrà: “Nyi ddí nì fúkpadhí ddì nì li!” Chú, Petro kâ lò ngù: “Í kpatss̀, ngǎ, manì ngǎ fúkpa kàó ddì li.” 59 Ŋà sâ dà ddì ddiy dzzdjú, njàddí ngéy ní kpatss̀ kâ tdrà: “Ddiy nì dìychú ní lò, fú kpatss̀ tdè ddí Yesu nà ney; ddiydhò, à nì Galilaya mí ngòw ó li.” 60 Chú, Petro kâ lò ngù: “Í kpatss̀, ma tsì nzá ya ddu nyi nì tdrǎ ddiy!” À dêy fú lò tdrǎ ro chú déy, ǒw-kpà kâ ngò. 61 Yesu lî ndèy-rónga ro, à kâ Petro njà chǒw. Fúnga nà, Petro ddêy tdè ndèy dhò Drǒngóli tdrà tdè nì lò: “Ndu, děy nzá ǒw-kpà vè ngò mí nga njí, nyi rà ma gù gbow ngà nà.” 62 Petro kâ shì rútsò, à kâ dzìy drǒngó ní zòw nà.
Yesu ka dhùw, ka dhèy ddiy mà
(Mat 26:57-68; Mk 14:53-65; Yoh 18:12-24)
63 Yesu-rónga ì dêy pbǒ nì kpa dêy Yesu gbu gbúní mǎ, dhèyní mǎ. 64 Kpa dêy à nyú-djúnga tsǐy ro, kpa dêy dhiy à-tsò ró: “Nyi áyìy pěy ndey? Ddéy nyi thíy-ónga nà.” 65 Kpa dêy njàddí bíy ní dhúwdha mí lò-kpà tdrǎ à ní.
Yesu nì lò-tdèydha mí drǒngó ní nga njìó ddiy
(Mat 26:59-66; Mk 14:55-64; Yoh 18:19-24)
66 Ŋà nga bbû ro, Yahuddi-ddúw dhí ndrǔ-tsi djú drò-dró ní kpa mà, dyǎdjí mà, Drà mí yǎdha ì nì ndíy nì kpa ndèymí ddiy-ónga túwdha-djá mànà njûw tdè ì-tsò. Kpa lêy ndrǔ mbǎ Yesu lò-tdèydha mí drǒngó ní nga njìò. 67 Kpa kâ tdrà: “Nyi ní Kristo, Drà mí chì nà ka vìy nì li? Tdra mà dhò.”
Yesu kâ lò ngù kpa dhò: “Kpechú ma tdrǎ nyì dhò tdràní mǎ ro, nyì rà ma uw nzǐ. 68 Chú, yakpe ma dhíy nga mà nyì-tsò ró ro, nyì rà lò ngù ma dhò nzǐ. 69 Chú, nja-nja nga djúddù, Ndrǔ-Ddùw rà dey kpá-kpánga nà nì, Drà mí ví mí nga là djòluw.” 70 Chú, wánì ndrǔ kâ swa: “Nyi chú ná Drà-ddùw?” Yesu kâ lò ngù kpa dhò: “Nyì tdrà ndey: ‘Ma nì Drà-ddùw.’” 71 Fúrò, kpa kâ tdrà: “Mà jì nzá fú lò-djò ka tdrǎ ngéy ní lò! Mà rr̀ à-tsò djú lò-ngàngà màníddù!”