Dhìní kpatss̀ dhì nì, ngǎ ndèy-thokpa ó ddiy nà nì ɦìytss ní li, bbû nì bbudha
21
1 Chú, Yesu njà tdè nga ndèy ròluw gbrǔ ro, à njà tdè ì-thokpa nà nì ndrǔ dêy ìdhí ddiy-kpà bbu, Drà-dzà ó ndrǔ dêy bbudha ley mí nò ò ddiy. 2 À njà ddì nì, dhìní kpatss̀ dhì nì, ngǎ ndèy-thokpa ó ddiy nà nì ɦìytss ní li, fú li ddí tdè ndèymí mb-ho tá-kpà rwo nì ley fú nò ò. 3 Fúnga nà, Yesu kâ tdrà ndrǔ dhò: “Ma nì tdrǎ nyì dhò kpǔkpǔ, à nì dìychú ní lò: ‘Dhìní ndèymí kpatss̀ dhì nì í ɦìytss ní li bbû ddiy wánì njàddí ndrǔ djòluw tǐ. 4 Ddiydhò, njàddí ndrǔ wá bbû, bbudha ní nì ddiy nì ngǎ ndèymí njí tdè ndrǔ dè nì mb; chú, ngǎ ndèy-thokpa ó ddiy nà nì fú ɦìytss ní li bbû ndèymí djiy-tso-tso ndèy kà tdè ndèy kó mí ddiy wá.’”Yesu nì sàní Drà mí dza rà ndèy sà ddiy-ɦuwdjò tdrǎ ddiy
(Mat 24:1-14; Mk 13:1-13)
5 Njàddí ndrǔ rò dêy lò těy Drà mí dza djú ro, ndrǔ dêy tdrǎ, fú dza ròluw drǒ lànì nì djuw-kpà ka thì tdè Drà dhò ndrǔ dêy bbu bbudha ní nì ddiy-kpà nà. Chú, Yesu kâ tdrà kpǔkpǔ: 6 “Ddu rò kpa rà shì ney, nzǐ ó ddì nì djuw rò ddí rà mà njàddí djuw djú, njàní nyì nì njǎ nì ddiy róddù; wánì ddiy-rónga ka rà li gbě.”
Zòw kpà ndèymí li nzádha-kpà mànà
(Mat 24:3-14; Mk 13:3-13)
7 Chú, kpa kâ dhiy: “Li gwíydha-dja, fú lò rá ndèy njèy ŋá nga nà? Fú lò-kpà rà ndèy njèy ro, lò ndèy rà dhonì ŋá ji rá ndey ndèy dhò?” 8 Chú, Yesu ngù lò ndrǔ dhò: “Nyì léy nyì-thíy lò-djò, nzǐ nyì bbǎ ka tsǎ nyì-nyú. Ddiydhò, bíy nì ndrǔ rà shì ma ró dho nà ro, ndrǔ rà tdrà: ‘Ma nì Drà mí li ní ka vìy chì nà nì li ro, fú nga shì ŋà.’ Chú, nzǐ nyì rǎ kpa-kodjú. 9 Nyì rà la-dzàdha mà, ngbùwní nga nì ndèy ngbûw ddiy djò ndrǔ nì těy nì lò mà kpà rr̀ ro, nzǐ nyì rr̀ nyǐ nga. Ddiy kâ fú lò-kpà njěy ndèy nji; chú, fúnì rà tdè děy ngǎ í dziylíy-tsò tdôw ddiy.” 10 Fú ddiy dzzdjú, à tdrà ndrǔ dhò: “Njàddí ndrǔ-tsi rà la dzà njàddí ndrǔ bbúw-tsò ró, Njàddí Pey rà la ta njàddí Pey-tsò ró; 11 Drǒngó ní chìychìy, ndrù mà, ndèy rà chèy bíy nì ndrǔ kàó nì ngǎjìní dhi-kpà mànà, rà tdè ngéy-ngéy ní nga òluw. Wá dhò mà li-rr̀ nyi nga mí do mà, wá dhò mà li-ónga ꞌwíy nì lò ndèy nì dhǒ nì ji, rakpa óddù ndèy nì shǐ nì màddí rà tdè ney. 12 Chú, fú lò njìó wá, ka rà nyì chèy, ka rà nyì dhò nzadha bbu, ka rà nyì thotèy bbu ndaní ka tděy lò nyì-djú Yahuddi-ddúw dhí ddǐnì-dzà òluw, ka rà nyì ley ngiy-dzà ò. Ndrǔ rà ley ka mbǎ nyì pey-ddúw, gǎvènà mànà njìòluw ma ró dho mí lò dhò. 13 Fú lò rà shì nyì dhò, ndaní nyì tsǐ nyìdhí uwdha mí lò. 14 Nyì léy í lò lǎní nyì-thíy òluw, nzǐ à tdǒ nyì ónga njitsś ò djú, ya ŋá lò mà nyì rà sò bbòwní ka bbòw nyì djǒmá nì lò dhò. 15 Ddiydhò, ma maníddù rà nyì dhò lò mà kpà, lò-ónga ndòdha mí nyǔꞌwiy mà bbu; nzá nyì-tsò ró ì nì nì ndrǔ kàó ddì li ddí rà kà nzǐ ndèy děy fú lò mà kpà-tsò ró, ǐngí ì gǔ gùní. 16 Chú, nyì djá mà, nyì ɦíy mà, djúnyí mà, nyìdhí gòw mí ndrǔ mà, nyìdhí jǐ-djá mànà, chú déy rà nyì thotèy bbu; nyì kàó bíy nì ndrǔ djò ka rà lò tdèy chìdha dhò. 17 Màtsá lò dhò, wánì ndrǔ rà nyì ndrò ndròní. 18 Nyì djùkpa ró ddì nì ɦěy-ho ddí rà viy nzǐ. 19 Nyìdhí lò-tsò vìdha nà, nyì rà nyìdhí djiy pa.”
Yesu nì Yerusalemu mí drǒngó ní bba rà ndèy sà ddiy-ɦéy tdrǎ
(Mat 24:15-21; Mk 13:14-19)
20 “Cha, Yerusalemu mí drǒngó ní bba rónga-tsò, la-dzàdha mí hó rà luw ro; fú nga nà, nyì rà tsì ddiy rà ndèy sàmí nga nì chow-chow. 21 Fǔchú ro, ddiy rà jì Yuddeya mí ngòw ó ndrǔ nyǐ nga drò-dró ní ngòw-là djò chě ní; ddiy rà jì Yerusalemu mí drǒngó ní bba ó nì ndrǔ lí ì-rónga ndì, ddiy rà ji nzǐ tsó òluw nì bba ó ndrǔ tsûw drǒngó ní bba ò. 22 Ddiydho, ddiy rà tdè drǒngó ní lò-tdèydha mí ddu-kpà, Drà mí bǔkù tdrà kpǔkpǔ nì wánì lò rà ndèy njèy ǒmá nì ddu-kpà. 23 Fú ddu nà, ddiy rá tdè ŋàbù ní nzadha, tǔwtǔw ní nga nà ì rà tdè nì dhì mà, ì-djà nzòw nì njǔ nì dhì mànà dhò! Ddiydhò, í dziylíy djú li-thíy ró ka nì li nzá ddiy rà tdè drǒngó ro, Drà ó thǒw rà ndèy dhò í ndrǔ-tsi djú. 24 Ndrǔ, ka rà chì la-dzàdha mí rwo ndèy-kuwdjò nà nì lùpángà nà; ndrǔ ka rà mbà ngiy-tsò rò, wánì ndrǔ-bbúw-kpà kàòluw cha ì nì Yunani-ddúw nì ndrǔ rà Yerusalemu mí drǒngó ní bba ónga chìy ì-ko tsìytò pbǔw ì dhò ka bbû nì ddu rà ndèy si mí nga djò.”
Ndrǔ-Ddùw mí shìdha
(Mat 24:29-31; Mk 13:24-27)
25 Lò ndèy nì dhǒ nì nzá ka vè njànì ji-kpà rà ì dhò; itsś ś mà, bǐy mà, lùlú mà òluw. Í dziylíy djú ndrǔ-bbúw-kpà rà tdè tdótdò ó, ndrǔ rà tdè zòw nà drǒngó ní ju-ddà mà, dda mí ngòngò mà kpà mànà nì wu rí ddiy mí lò dhò. 26 Zěy ndèy rà dà nì drǒngó ní do rà ndrǔ chì, ngòw djú wá ndèy rà shì nì lò ì nì ddey nì mí lò dhò; ddiydhò, rakpa ó kpá-kpá ní nga-kpà rà ja jání. 27 Fúrò, ka rà Ndrǔ-Ddùw njà à shi nduw-nduw djú drǒngó ní kpá-kpánga nà ndèymí drǒngó ní madha nà. 28 Chú, fú lò-kpà rà dey ndèy njèy ro, nyì ngbí nyì ro, nyì tdúw nyì djùkpa ru; ddiydhò, nyìdhí klodha mí nga shì chow-chow.
Fígì-tsúw nì bbu nì lò ngà ddéydha
29 Fú ddiy dzzdjú, Yesu bbû tdè í lò-ngbòdha ndrǔ dhò: “Nyì nja fígì-tsúw, a ndèymí wánì njàddí tsúw mànà. 30 Ya nyì njà ginì-kpà lòw dey ta ro, nyì nja nì lǎnínga shì ŋà chow-chow. 31 À nì ddí fǔchú, ya nyì rà njà fú lò-kpà lòw dey shì ro, nyì njǎ Drà mí Pey mí nga shì ŋà chow-chow. 32 Ma nì tdrǎ nyì dhò kpǔkpǔ, à nì dìychú ní lò: ‘Ndu nì í cho ó ndrǔ ó gòw rà dà nzǐ, wá fú lò rà ndèy njèy mí nga njí. 33 Rakpa mà dziylíy nà, rà dà dàní; chú, màtsá lò rò rà dà ddrǎ ddí kpe nzǐ.’”
Kerebbú-kpà ní déydha
34 Chú, nyì pbo nyì rónga nyìníddù! Nzǐ nyì bba nyìdhí nga nyùdha mà, nga mbùdha mànà, í dziylíy djú djiy ní ka déy mí tdótdò mà kpà ndrř nyì-thíy drǒ. Ya ddiy tdě ngǎ fǔchú ro, lò-tdèydha mí ddu rà shì nyì djò chǔ, 35 gbè nga kídha mí njǒw níchú; ddiydhò, fú ddu rà chèy chǔ dziylíy dzò nì djú ì nì dey nì wánì ndrǔ djò. 36 Chú, nzǐ nyì ddǔ, nyì nzǐ Drà wánì nga nà; fú ddiydhò chú, nyì rà klôw chùw, nyì shǐ ndanà wá ndèy rà shì nì lò-djòluw, ndaní nyì ká dèy Ndrǔ-Ddùw nyú djú.