Yesu ngû djiy ní dhìní ndèy dhì ddiy óddù ddiy
(Mat 28:1-10; Mk 16:1-11; Yoh 20:1-10)
24
1 Yahuddi-ddúw dhí yěngà mí ddì njí-dyì ó, bbǔbbú prǐy, dhì kâ rà tdôw-dzì djò, ì thokpa ó rǐy ndèy dzìy nì ngǒw nì tsó nà ka thì nì chì nà. 2 Chú, ndrǔ shì chùw tdôw-dzì-tsò ka dzà mí djuw ka nglùw nga gitèy ò. 3 Ndrǔ tsùw dzi ò ro, ndrǔ chùw tdè bba-dja, Yesu mí bu nì ngǎ. 4 Sárŕ ní rù ì thô tdè nì ndrǔ rwo nì dhò ì ndrǔ dhò ro, ndrǔ tsì tdè nzá ya ddu ì ddéy fú ddiy djò ddiy. 5 Chú, do lòw ndrǔ ro, ndrǔ dèy dey nga njà dziylíy djò ro, fú kpa kâ tdrà ndrǔ dhò: “Ddudhò nyì ná djiy ní li měy dhìní ì dhì nì bíy nì ndrǔ-kpà kàòluw? 6 À nì ngǎ ingá; chú, à ngû dhi óddù djiy ní. Nyì ddéy nyì dhò à tdrà tdè nì lò, děy ndèy tdè Galilaya mí ngòw ó ro: 7 ‘Ddiy kà ka bbú Ndrǔ-Ddùw thotèy cherr-djá-thokpa ò; ka chó à tàdha ní tsúw djò; fú ddiy dzzdjú, à ngbí ndèy dhìní ndèy dhì ddiy óddù ddu gbow nì djú.’”8 Fúnga nà, ndrǔ ddêy Yesu tdrà tdè ì dhò nì lò-kpà. 9 Ndrǔ ngû tdè tdôw-dzì djúddù ro, ndrǔ kâ rà fú lò-tey klo wá Yesu kodjú ì nì rǎ nì ddri ndèy djú ddì nà nì kpa dhò, ndèymí víní ka vû nì njàddí ndrǔ dhò ddí. 10 Chú, Magaddalena mí bba ó Mariya mà, Jane mà, Mariya Yakobbo mì yâ-nì mànà, fú ndrǔ tdè ndanà nì njàddí dhì tdrà fú lò dyòw-djá dhò. 11 Chú, fúkpa dêy fú ndrǔ dêy tdrǎ nì lò ddey nzá kà ka úw nì lò ní ro, fú lò kpa ùw nzá. 12 Chú, Petro kâ ndèy ngbi, à kâ kòw tdôw-dzì djò, à kâ ndèy-ónga lù, à njà tdè tsó-kòw tsúw ó sárŕ ní ngiy nà ka dyà nì rù-kpà chúddì. Fú ddiy dzzdjú, Petro kâ ngu nú ndèy bbâ, yà ndèy-ónga ꞌwìy wá, ndèy njà ndèy njèy ndèy nì fú lò dhò.
Emawu mí bba ó nì tuw ó Yesu dhò ndèy ddiy
(Mk 16:12-13)
13 Fú ddu ó chú déy, Yesu kodjú ì dêy rǎ nì rwo nì kpa dêy rǎ Emawu ní ka dêy ndèy ró dho iy nì bba ò. Fú bba tdè chow-chow kìlòmítà ddri ndèy djú ddì nà Yerusalemu mí drǒngó ní bba óddù. 14 Fú kpa dêy lò těy dàní ndèy dà tdè nì wánì lò djúddù. 15 Fú lò-kpà ndrǔ tdè těy ro, kpa dêy ì ddǎ ì kàó ro, Yesu kâ ndèy ndrr ndèyníddò kpa dè ro, à lòw dey bbiy kpa nà ddìnga ó. 16 Chú, kpa dêy à njǎ ro; njàddí ddiy rò dêy kpa-nyú-tsò chǒ nzánà kpa njǎ à jì. 17 Yesu kâ dhiy kpa-tsò ró: “Nyì ná lò těy ddu djú nyì kàòluw fu nyì nì bbiy ro?” Fúnga nà, kpa kâ dèy, ì-thíy chùw zòw ddiy nà. 18 Chú, kpa kàó ddì li, ndèy-ró dho nà Kliyopa nî, kâ dhîy Yesu-tsò ró: “Nyi ná ddì li, ì nì dey Yerusalemu mí bba ó nì, cha nzá ndèy tsì í ddu-kpà kàó ndèy njèy ndèy nì lò?” 19 Fúnga nà, Yesu kâ dhiy kpa-tsò ró: “Ddiy ní ŋá lò?” Kpa kâ lò ngù à dhò: “Nazareti mí drǒngó ní bba ó li, Yesu ró ndèy njèy ndèy nì lò! À tdè Drà ró dho nà ndèy nì lò těy ndrǔ dhò děy ndèy rà shì nì lò-djò nì klǒw ní li; à dhò tdè fú ddiy, njèyní ndèy njèy tdè nì ddiy-kpà kàòluw ndèymí lò mà kpà nà, Drà nyú djú ndèymí wánì ndrǔ-tsi nyú djúddù. 20 Fúddiy dhò chú, dyǎdjí mà, ndrǔ-djùkpa ì nì ddǎ nì kpa mànà bbû tdè Yesu-thotèy, ndaní ka tděy à djú lò à dhǐ dhìní ro, kpa kâ à cho tàdha ní tsúw djò. 21 Chú, mà tdè nga ddéydha nà, à chú rà ndey Israeli klo. Chú, ndu nì ddu gbow nì mî, fú lò njèy ndèy ddiy dzzdjú. 22 Chú, ddiy nì dìychú, mà kàó njúwní mà njûw mà-tsò ndanà nì njàddí dhì rò, lêy tdè mà-ónga ꞌwìy wá. Ndrǔ rà tdè bbǔbbú prǐy tdôw-dzì djò; 23 ndrǔ shì tdè àmí bu ró nzá. Ndrǔ ngû rà fú lò tdrà mà dhò, malayika dhò ndèy ì dhò ro, ka tdrà kpǔkpǔ: Yesu nì djiy ní. 24 Mà kàó njàddí kpa rò rà tdè tdôw-dzì djò ro, ndrǔ shì chùw ddiy nì, gbè fu dhì tdrà ì dhò níchú; chú, kpa njà tdè à nzá.” 25 Fúnga nà, Yesu kâ tdrà kpa ní: “Ngǎ ì nì lò-tsìdha mí nyǔꞌwiy nà nì kpa; nyì-thíy nì tǔwtǔw, nyì ùw Drà ró dho nà ì nì lò těy ndrǔ dhò děy ndèy rà shì nì lò-djò nì kpa tdrà nì lò-ɦéy wánì nzá! 26 Kristo, Drà mí li ní ka vìy chì nà ni li dhò, ddiy kâ ná nzá, à nzá ndèy ddí fǔchú, ndèymí madha mí nga ò ndèy nì tsûw mí nga njìó?” 27 Fú ddiy dzzdjú, à tûw tdè Drà mí bǔkù ó ndíyní ka ndîy tdè ndèy djú nì lò-ónga fú ndrǔ dhò. Ddiy ngà ndèy Musǎ ngá yǎdha mí bǔkù óddù pbǔw Drà ró dho nà ì nì lò těy ndrǔ dhò děy ndèy rà shì nì lò-djò nì kpadhí bǔkù òluw wá.
28 Chowchow kpa shì ì nì rǎ nì bba kuwtsò ro, Yesu njèy tdè ddiy, gbè ndèymí tuw òluw ndèy jì ndèy rǎ níchú. 29 Chú, kpa kâ à-tsò chò yà ì nì tdrǎ: “Déy mà nà; itsś ś nì chěy, nga ddí nì tey!” Fúnga nà, à kâ tsùw, ndaní ndèy déy kpa nà. 30 Cha mêzà tsò ró à dêy tdè fúkpa nà ro, à tdûw tdè mùkátì ro, à kâ madha ngù Drà dhò. Fú ddiy dzzdjú, à pbrù mùkátì ónga ro, à kâ bbu kpa dhò. 31 Ndùw, kpa-nyú kâ ndèy pù, kpa kâ Yesu ró ji njà; chú, à kâ viy kpa njíddù. 32 Fúrò, kpa kâ lòw dey tdrà ì kàòluw ddì li njàddí li dhò: “Mà-thíy-ónga dêy ná gbi nzǐ mà òluw, mà dhò à dêy lò těy tuw òluw, cha à dêy Drà mí bǔkù ó ndíyní ka ndîy nì lò-ónga tuw mà dhò ro?”
33 Kpa kâ ì ngbi, ndùw ka ngu Yerusalemu ò. Fúlè kpa chùw tdè Yesu kodjú ì nì rǎ nì ddri ndèy djú ddì nà nì kpa mà ndèymí ì-làyiy ní njàddí kpa mànà, yà njúwní ì njûw ì-tsò. 34 Kpa dêy tdrǎ: “Drǒngóli ngû djiy ní dhìní ndèy dhì ddiy óddù dìychú! À dhò ndèy Simoni dhò!” 35 Kpa ìníddù ddí kâ tuw ó ndèy dà tdè ní lò tdrà ndrǔ dhò, ya ŋǎchú ì njà tdè Yesu nì mùkátì ónga pbrǔ ro ddiy.
Yesu dhò ndèy, ndèy kodjú ì nì rǎ nì kpa dhò ddiy
(Mat 28:16-20; Mk 16:14-18; Yoh 20:19-29; Nji 1:1-8)
36 Chú, Yesu kâ ndèy dhò ndèyníddò kpa kàò, děy kpa dêy lò těy ì kàó ro, à kâ tdrà: “Nyì-thíy-tsò djow!” 37 Chú, do ndèymí drǒngó ní do mànà kâ kpa lòw; ddiydhò, kpa dêy ddey ì njà rr̀ ddiy ní. 38 Chú, Yesu kâ tdrà kpa ní: “Nyi djùkpa-ónga sà ná ndèy ddu dhò? Nyì-thíy ò fǔchú nì ddeydha-kpà ná shǐ ddu dhò? 39 Nyì nja ma-thokpa ndèymí ma-koko mànà: À nì nú ma! Nyì lów ma-rónga, nyì nja; ddiydhò, rr̀ ró zǎ ndèymí kpalá ddí tde nì ngǎ, fu nyì nì njǎ, gbè manì ndanà níchú. 40 À tdrà tdè fú lò-kpà ro, à kâ ndèy-thokpa mà, ndèy-koko nà dhò kpa dhò. 41 Chú, děy kpa kâ tdè ì ùw nzá ddiy, drǒ ì-ónga kì hwî nà ndèymí wá li-ónga ꞌwíy ddiy mànàro, Yesu kâ dhiy kpa-tsò ró: ‘Nyì ná nyù ní ka kà ka nyǔ nì ddiy rò nà ingá ney?’” 42 Chú, kpa kâ kùwní ka kúw nì bbì ngbluw bbu à thokpa ò. 43 À kâ ddiy ko, à kâ nyù kpa-nyú-ddà djú. 44 Chú, fú nga dzzdjú, à kâ tdrà fú ndrǔ dhò: “Ínì, cha ma tdrà nyì dhò děy ma tdè nyì nà ddìnga ó ro nì lò: ‘Ddiy wánì, cha ka ndîy ma ró dho nà Musǎ ngá yǎdha mà, Drà ró dho nà ì nì lò těy ndrǔ dhò děy ndèy rà shì nì lò-djò nì kpadhí bǔkù ndèymí Dyì-kpà ó nì kà ndèy njěy ndèy.’” 45 Fúrò, à klô kpadhí lò-tsìdha mí nyǔꞌwiy-tsò, ndaní Drà mí ndíyní ka ndîy nì lò-kpà lǒw kpa-djùkpa lòwní ro, 46 à kâ tdrà kpa dhò: “Nyì nja ndíyní ka ndîy ndèy nì ddiy: Kristo, Drà mí li ní ka vìy chì nà ni li, ddiy kà tdè à nzá ndèy; fú ddiy dzzdjú, à ngú djiy ní chìní ì chì ì nì ndrǔ kà-óddù, ddu gbow nì dyì ó ro, 47 ddiy kà ka tdrǎ lò à ró dho nà wánì ndrǔ bbúw-kpà nyú djú, tsò nì lǒw ndèy Yerusalemu mí drǒngó ní bba óddù; ndrǔ li ì ìdhí ngǎjìní lò óddù wá, ndaní ndrǔ chûw cherr-kpà sàdha. 48 Ddiy kà nyì tdrǎ lò wá, cha nyì njà nì. Nyì nì fú lò ì tsì nì kpa. 49 Ma rà màtsá djǎnì tdèy nì li cho nyì djò maníddù. Chú nyì, nyì déy drǒngó ní bba ó, nyì ónga rà kì věy rakpa óddù ndèy rà shì nì kpá-kpánga nà mí nga djò chú pbǔw.”
Yesu djî rakpa ò ddiy
(Mk 16:19-20; Nji 1:9-12)
50 Chú, fú ddiy dzzdjú, Yesu kâ kpa mbà drǒngó ní bba óddù rúgò, Betaniya mí bba kuwtsò ro, à kâ ndèy-thokpa ngbi ru ro, à kâ bû ley kpa djò. 51 Bû à dêy ley kpa djò ro, à kâ ndèy dda kpa kuwtsóddù ro, ka kâ à tduw rakpa ò. 52 Chú, kpa-là djúddù, kpa kâ madha bbu à dhò, kpa kâ ngu Yerusalemu mí drǒngó ní bba ò, yà ì-ónga kì věy drǒngó ní hwî nà. 53 Kpa dêy dey Drà mí dza ó wánì ddu ró ro, kpa dêy madha bbu Drà dhò.