Li-dhà-rónga lídha, ǐngí dhìdha
13
1 Fúnga nà, njàddí bbalè rò shì tdè, Galilaya mí ngòw ó kpa Pilato lêy tdè ka chǐ Drà dhò ì nì měyá bbu ro, mí lò-ɦéy tdrà Yesu dhò; 2 fú nga nà, Yesu kâ lò ngù kpa dhò: “Nyì ná nzǐ, Galilaya mí ngòw ó fúkpa bíy nì ndrǔ chì ddiy ná tdrǎ, fúkpa gò chú tdè ná cherr njěy drǒ Galilaya ó wánì njàddí ndrǔ djòluw? 3 Nzá, manì tdrǎ nyì dhò! Chú, ya nyì lî nyì dhà rónga nzá ro, nyì tey rà kò wá, gbè fúkpa níchú. 4 Silowe ó ru ndèy ngbî ndèy nì dza tdè ndèy-ónga pbrǔ, ndèy nì chěy ddri ndèy djú rù nà nì kpa djò ro, nyì tdè ná nzǐ fúkpa chú tà tdè ì drǒ Yerusalemu mí drǒngó ní bba ó njàddí wánì ndrǔ djòluw? 5 Nzá, manì tdrǎ nyì dhò! Chú, ya nyì lî nyì dhà rónga nzá ro, nyì tey rà kò ddí wá, gbè fúkpa níchú.”Ngǎ djǒmá fígì-tsúw-tsi nì, fígì-tsúw djú lò-ngbòdha
6 Fú ddiy dzzdjú, Yesu kâ í lò-ngbòdha tdrà ndrǔ dhò: “Ddì nì li tdè fígì-tsúw nà, nděyngá dìyváyìy-ngìy-nzà ó ndèy tdòw tdè nì, à chùw tdè tsúw-tsi rò nzá djǒmá. 7 Chú, à kâ tdrà dìyváyìy-ngìy-nzà ndèy nì bbǐ nì li dhò: ‘Ddiy nì cho gbow, manì shǐ fígì-tsúw-tsi mèy í fígì-tsúw djò ddiy, manì tsúw-tsi rò chûw nzǐ. Tdey fú tsúw gudjò, ddiy nì dziylíy-rónga-tsò chǒ ddu ró?’ 8 Chú, dìyváyìy-ngìy-nzà ndèy dêy bbǐ nì li kâ tdrà: ‘Drǒngóli, bba í cho chúddì nì dǎ djòmàluw; ma rà rǒ-nga bbì ro, mà rà víní ndèy léy nì dziylíy vú nì ddiy ley ròmàluw. 9 Ddiy nì ddí fǔchú, njǎddiyko, à rà ley fígì-tsúw-tsi ǒ ney luwtéy cho nà; chú, ya ngǎ ddiy nì fǔchú ro, nyi rà ley ka tděy fú tsúw gudjò.’”
Sabato mí ddu ó, Yesu pâ ddì nì ɦìytss ní li ddiy
10 Chú Sabato ddù ó, Yesu dêy li gwiy ddì nì Yahuddi-ddúw dhí ddǐnì-dzà ó. 11 Dhi nà nì ddì nì ɦìytss ní li tdè fú nga ó, cho ddri ndèy djú rù nì nà che thíy lêy tdè ndèy ró nì dhi dhò, ndèy-dziykpà ónga tdò tdè ndèy nì, fú ɦìytss nì li kâ tdè nzá ndèy-ónga dá ndèy. 12 Chú, Yesu njà tdè fú ɦìytss ní li ro, Yesu îy à ro, Yesu kâ tdrà à dhò: “Nyi pâ pání nyìmí dhi óddù.” 13 Yesu lêy ndèy-thokpa fú ɦìytss ní li djò ro, à ónga dâ ndèy ndùw, à dêy Drà ma. 14 Chú, Sabato ddù ó, Yesu pâ tdè fú ɦìytss ní li ddiy, kà tdè ndèy Yahuddi-ddúw dhí ddǐnì-dzà ó drǒngó ní li ró. Fúnga nà, à kâ tdrà bíy nì ndrǔ dhò: “Dhǐy ka kà ka njěy ǒmá nì ddu nì za. Nyì shi nyì ró dhi pádha dhò fú ddu-kpà ó, chú ngǎ Sabato ddù ó!” 15 Chú, Drǒngóli, Yesu kâ lò ngù: “Rwo ndèy kuwdjò nà nì dyi níchú nì kpa! Sabato ddù ó, nyì kàó ddì li dho ná nděyngá ndrìytsíy-kpà, ǐngí kànà-kpà, pu kaley óddù ndèy mbǎ dda mbùdha dhò nzǐ? 16 Chú, Abrahamu ó í ddèy, cho ddri ndèy djú rù nì nà setani chèy tdè nì í ɦìytss ní li, ddiy kà ná tdè nzá ka kló fú ɦìytss ní li ndèymí nyòrò óddù Sabato ddù ó?”
17 Yesu ngù fú lò ǒmá nì lò pâ tdè do à-tsò ró wánì bíy nì ndrǔ ò. Chú, bíy nì ndrǔ-kpà dêy madha bbú Yesu dêy njěy nì fú ddùw mí lò-kpà dhò.
Mùtárdì mí tsúw-tsi djú lò-ngbòdha
(Mat 13:31-32; Mk 4:30-32)
18 Fúnga nà, Yesu kâ tdrà: “Drà mí Pey mí nga ná, gbè ddu níchú? Ma kà ná ma ddéy ddiy ddu ró? 19 Ddiy nì, gbè mùtárdì mí tsúw-tsi tá ddì li zìy ro, à tdòw ddiy-tá nděyngá íytey djú níchú. Ddiy-tá rà ngà, ddiy rà ngu tsúw ní ro, rakpa-chuwtey rì-kpà rà dey ì-dzàkí-kpà ss̀ fú tsúw-gi-kpà tsìytéy òluw.”
Thiy djú lò-ngbòdha
(Mat 13:33)
20 Fúnga nà, Yesu kâ tdrà ddíyàchú: “Drà mí Pey mí nga ma dho ná ddey ddu ró? 21 Ddiy nì, gbè ddì nì ɦìytss nì li zìy thiy ro, à rà fú thiy ngbuw mùkátì mí drǒngó ní zz̀-rà ò, mùkátì zz̀ chú wá rà kì mí nga djò.”
Tdrŕ ka tdrŕ ndèy-ónga nà nì dzá-tsò
(Mat 7:13-14; 21–23)
22 Yesu dêy dǎ, drò-dró ní bba mà, dù-dú ní bba mànà nì òluw, lò ndèy tdè ddey, Yerusalemu mí drǒngó ní bba ò ndèy dêy rǎ ro. 23 Fúnga nà, ddì li rò kâ dhiy Yesu-tsò ró: “Drǒngóli, pání ì rà pa nì ndrǔ, ná nú gbè ní bbalè?” Chú, Yesu kâ lò ngù, à kâ tdrà: 24 “Nyì ngríy nyì rónga, nyì tsûw tdrŕtdrŕ nì dzá-tsò òluw; ddiydhò, manì tdrǎ nyì dhò, bíy nì ndrǔ rà mbù ì tsûw ro, tsùwní kpa tsûw ddiy rà ka kpa dhò nzǐ.”
25 “Dza-dja rà ndèy ngbi dzá-tsò tàro, dzá-tsò dzzdjò fú ddiy chùw nì ndrǔ, rà dey dzá-tso tdodha ro, ndrǔ rà dey tdrà: ‘Drǒngóli! Pu dzá-tsò mà dhò!’ Fúnga nà, dza-dja rà lò ngù ndrǔ dhò: ‘Ma njà nzá ya ŋá ngáddù nyì shì ddiy!’ 26 Fúnga nà, nyì rà tdrà à dhò: ‘Mà nyù tdè nga mà, mà mbù tdè mbùdha ní ddiy mà nyi nà ddìnga ó ro, nyi ddêy tdè lò ngà kpà mà dhò màdhí tuw-rá-kpà ó.’ 27 Chú, à rà tdrà ddíyàchú: ‘Ma njà nzá ya ŋa ngáddù nyì shì ddiy. Nyì ddá nyì ma-nyú djúddù; nyì, nzǐ ì nì chǒw ní lò njěy nì bíy nì ndrǔ!’ 28 Ddiy nì fú nga ó chú, dzz̀ní ndrǔ nì dzž ddiy mà kpà, ì-kuw-djò ndrǔ nì kǎ ddiy mà rà tdè; Abrahamu mà, Isaka mà, Yakobbo mà ndèymí Drà ró dho nà ì nì lò těy ndrǔ dhò děy ndèy rà shì nì lò-djò nì kpa mànà, nyì rà njà Drà mí Pey mí nga ò ro, nyì ka rà bu rútsò! 29 Fúnga nà, ndrǔ rà ì nyà, rr̀thà mà, ngítsśyà mà, dràwà mà, ndrûwà mànà òluwddù, kpa rà dey mésà tsò ró Drà mì Pey mí nga ó. 30 Fúnga nà, luwtéy ngiy djú ì nì nja-nja nì ndrǔ rà ngu njitsś ò djú nì ngiy djú ndrǔ ní. Njitsś ò djú nì ngiy djú ì nì nì ndrǔ rà ngu luwtéy ngiy djú ndrǔ ní.”
Yesu mà, Yerusalemu mí drǒngó ní bba nà
(Mat 23:37-39)
31 Fúnga nà, Farisayó ní kpa rò kâ ì ndrr Yesu dè ro, kpa kâ tdrà à ní: “Ra ingáddù, ra nyi dhò ngéy ní nga ò; ddiydhò, Herodde nì jǐ ndèy hwî nyi hwì ní.”
32 Fúnga nà, Yesu kâ lò ngù, à kâ tdrà kpa dhò: “Nyì ra tdrà, gbè ꞌwǎ níchú ndèy dêy nì ddrǎní zǎ dhò: ‘Ma nì dàyìmónì-kpà dǐy, dhi nà nì bíy nì ndrǔ-kpà pa, ndu mǎ, bbǔtss̀ s̀djú mǎ ro, gbow nì ddu djú chú, ma rà màtsá njí-tsò si.’ 33 Chú, ddiy kâ ma rǎ màtsá njí nà njitsś ò; ndu, bbǔtss̀ s̀djú, bbǔtss̀ s̀djúnga dzzdjú; ddiydhò, ddiy kâ nzá Drà ró dho nà ndèy nì lò těy ndrǔ dhò děy ndèy rà shì nì lò-djò ní li dhò, à rǎ dhì Yerusalemu mí drǒngó ní bba óddù njàddí ngéy ní nga ò.
34 “Yerusalemu mí drǒngó ní bba! Yerusalemu mí drǒngó ní bba! Nyi bú nì djuw nà chóní Drà chô nyi ò nì Drà ró dho nà ì nì lò těy ndrǔ dhò děy ndèy rà shì nì lò-djò nì kpa! Ma jì ná tdè ŋàbù ma njúw nyìmí ní, ì nì nì bíy nì ndrǔ-tsò ma kuwtsó, cha gbè ǒw-ɦíy déy nì nzòw tsò njuw ndèy-prú tsìytò níchú. Chú, nyì jì tdè ddí nzá! 35 Fú ddiy mí lò dhò, nyìdhí dza ka rà bbà bbàní. Chú, manì tdrǎ nyì dhò, nyì rà ma-rónga njà ddíyà nzǐ, í lò nyì rà tdràmí ddu djò chú kpòw: ‘Bû Drǒngóli ró dho nà ì nì shǐ nì li djò!’”