Rwo ndèy kuwdjò nà nì dyi ní ka nì ddiy ró ka pbo li-rónga ddiy
(Mat 10:26-27)
12
1 Fúnga nà, bíy nì ndrǔ-kpà njûw tdè ì-tsò pèy-péy nga bíy; ndrǔ tdè chow-chow ì chǐy ì-ónga ì-koko-kpà nà chìyní. Fúnga nà, Yesu kâ tdrà ndèy kodjú ì nì rǎ nì kpa dhò chú nji: “Nyì ru nyì ró, Farisayó dhí thiy-kpà róddù; fúnì chú nì kpadhí lò rwo ndèy-kuwdjò nà nì dyi níchú ndèy nì nì lò. 2 Chú, rùní ndèy rù ndèy nì wánì ddiy, rà ndèy dhò tende; nzá ndèy ngà njà ndèy nì wánì lò-djúnga rà ndèy nya. 3 Fú lò dhò chú, kúw ní nga ó nyì tèy nì wánì lò rà ndèy rr̀ itsś ś mí nga tdyídha ó. Bbòlólò nà nyì tèy kùsèngè ò nì lò, ka rà tdrà ru dza-djùkpa djúddù.Njèy ní ndèy dò, ka kà ka njěy nì li
(Mat 10:28-31)
4 “Ma nì tdrǎ nyì dhò, màtsá jǐ-djá: Nzǐ nyì njey, li-rónga ì hwi nì nì ndrǔdhí do; chú, fú ddiy dzzdjú, ì kà ì njěy fú ddiy djòluw ndèy rà dà nì ddiy rò nì ngǎ. 5 Chú, ma rà ya áyìy dò nyì kà nyì njěy ddiy mí lò dhò nyì dhò. Nyì njey Drà, dhìní ka dhi ddiy dzzdjú ndèy nì kpá-kpánga nà ndèy ngbǒ nyì nzǐ ndèy nì dhi dhíní nì kàss ò nì li-dò. Òní, manì tdrǎ nyì dhò, ddiy nì àmí do chú nyì kà nyì njěy ddiy!
6 “Mbu nì, kíríyà ní ka nì iy nì rì-ónga ka dho ná dziy mb-ho rwo nì ró nzǐ? Chú, Drà nì ddì nì ddiy ngà rò ddí viy nzǐ. 7 Nyì djùkpa ró ɦěy-ónga màddí, Drà zòw wá. Nzǐ nyì njey do, Drà nyú djú, nyì ró dzìy dà dàní kíríyà ní ka nì iy nì bíy nì rì-kpa djòluw!”
Yesu Kristo ka nì uw ǐngí ka nì gǔ ddiy
(Mat 10:32-33; 12:32; 10:19-20)
8 “Ma nì tdrǎ nyì dhò: Ya ddì li ŋá nì kpe ndèy jì ndèy rǎ ma kodjú nì, bíy nì ndrǔ nyú djúddù ro, Ndrǔ-Ddùw ddí rà ndeyli jì Drà ngá malayika nyú djú. 9 Chú, ya ddì li tdrǎ bíy nì ndrǔ nyú djúddù ndèy njà ma nzá ro, Ndrǔ-Ddùw ddí rà tdrà ndèy njà ndeyli nzá Drà ngá malayika nyú djú. 10 Ddì nì áyìy kpe rà ngǎjìní lò tdrà Ndrǔ-Ddùw djò ro, ndeyli mí cherr Drà rà sà sàní; chú, ndèy rà Drà mí Bblǒ Thíy dhuw nì li, rà cherr sàdha chùw nzǐ.”
11 “Nyì ka rà mbà, ndaní ka tděy nyì-djú lò Yahuddi-ddúw dhí ddǐnì-dzà mà òluw, ǐngí ndrǔ-djùkpa ì nì ddǎ nì kpa njìòluw mǎ, drò-dró ní kpa mànà njìòluw nì kpadhí kpá-kpánga nà ro, nzǐ nyì ónga tdǒ, nyi djú la nyi rà njèy ddiy mí lò dhò, ǐngí tdràní nyi rà tdrà nì ddiy mà djò; 12 Ddiydhò, Drà mí Bblǒ Thíy rà fú nga nà nyì rà tdrà nì lò-ngà dhò nyì dhò fungáfungá.”
Věy ndèy nì ddiy nà nì, vǐy ní li djú lò-ngbòdha
13 Bíy nì ndrǔ kà-óddù, ddì li kâ tdrà Yesu dhò: “Li gwíydha-dja, tdra màtsá djûnì dhò, mà ndǒ à nà màdhí djǎnì bbà tdè mà dhò nì ddiy-ónga.” 14 Yesu kâ lò ngù à dhò: “Màtsá lu-dja, ma áyìy lêy ná ndey, nyì kàó lò-kpà tdèydha dhò, ǐngí nyìdhí věy nyì nì ndanà nì ddiy-kpà-ónga ndòdha dhò?” 15 Fú ddiy dzzdjú, Yesu kâ tdrà wánì bíy nì ndrǔ dhò: “Nyì ru nyì ró, léy ní nyì lêy nyì-thíy lò djú ddiy nà, věy ka nì ddiy-kpà nà nì wánì jǐ ró; ddiydhò, bíy nì ndrǔ mí djiy nì dey nzǐ věy kà nì ddiy-kpà nà ddiy mí lò dhò, věy ka nì ddiy-kpà nà nì ddiy nì víní.”
16 Fúnga nà, Yesu kâ í lò-ngbòdha tdrà kpa dhò: “Věy ndèy nì ddiy nà nì ddì li tdè lǎní nyû nì ǒ mí dziylíy-kpà nà. 17 Fúli dêy nga ddey ro, à dêy nga dhiy ndèy-tsò ró: ‘Ma rá ddiy njèy ŋǎchú? Ma nì màtsá nyû-tsò ma njúw ǒmá nì nga rò nà ngǎ!’ 18 Fú ddiy dzzdjú, à kâ tdrà: ‘Ma rà njèy ǐchú: Ma rà màtsá ddèrr̀-kpà drr̀, ma rà drǒngó ní nì ss̀, fú ddèrr̀-kpà òluw, ma rà màtsá ngǎnò tsi mà, màtsá věy manì ndanà nì lǎní ddiy mà kpà-tsò njûw. 19 Fú ddiy dzzdjú, ma rà tdrà maníddù: Nyi nì lǎní ddiy-kpà nà věy, věy ní cho dhò. Shu nyìmí djiy-rónga, nyu nga, mb mbùdha ní ddiy; fú ddiy dzzdjú, nyi njěy hwî!’ 20 Chú, Drà kâ tdrà fú li ní: ‘Vǐy ní li! Ndu nì kúw nà, nyìmí djiy rà viy víyní. Fúnga nà, fu ndèy-tsò nyi njûw tdè nyi dhò nì fú ddiy-kpà wá rà ná mà áyìy dhò?’”
21 Fúnga nà, Yesu kâ lò-kíyddà ndrr: “Ddiy nì ddí fǔchú, věy ndèy nì ddiy-tsò-kpà njuw ndèy dhò nì li dhò; chú, fú li nì ngǎ ddiy ní Drà nyú djú.”
Drà ò ka nì li dhí uwdha ley ddiy.
(Mat 6:25-34)
22 Yesu kâ tdrà ndèy kodjú ì nì rǎ nì kpa dhò: “Ddiy nì fú lò dhò chú, manì tdrǎ nyì dhò: ‘Nzǐ nyì ónga tdǒ nyìdhí djiy dhò, nyì kà nyì nyǔ nì ddiy djú, ǐngí rù-kpà djú, nyì rà tho nyì ró nì.’ 23 Ddiydhò, djiy ní nyì nì ddiy dà nyû djòluw, li-rónga ddí dà rù djòluw. 24 Nyì nja, wakpà mà: Tdow nì nyû nzǐ, nyû-tsò-kpà màddí njuw nzǐ; wakpà mànì ìdhí nyû ì léy ò mànì nga nà ngǎ, ddèrr̀ rò mànà ddí ngǎ. Chú, Drà nì kpa ngûw ngùwní! Nyì ró dzẑ dà rì-kpà ró dzẑ djòluw. 25 Chú, nyì kàó áyìy dho ná ndey ddu ndrr ndèymí djiy ró? 26 Ya nyì kà nyì njěy ddu ddí kpe nzá ddrǎ drǒ nì ddiy mí lò dhò ro, ddudhò nyì ónga ddiy ná tdǒ njàddí ddiy djò? 27 Nyì nja ya ŋǎchú, tsó ó ì nì nì tsó-zà-kpà nì dhǐy lǎní ddiy: Ddiy-kpà nì njí njěy nzǐ, rù mà kpà ddí tdyǎ nzǐ. Chú, manì tdrǎ nyì dhò: Ddrǒ Solomono ngá ddiy-kpà nì ro, Solomono ddí ndèyníddò, věy ndèy nì ddiy-kpà nà wánì ddiy nà, à tdè madha nà ddí, gbè fú tsó-zà-kpà kàó ddì nì tsó-zà níchú ndèy lànì rù rò nà ngǎ. 28 Ya Drà déy nì tsó-kpà rónga njǒw fǔchú, yà bbǔtss̀ s̀djú kà rà ngbò ɦòw-bbùw ó kàss ò ro: nyì rónga gò Drà rà ná njòw ŋàbù, ngǎ nyìdhí ùwdha nì Drà ó nì ndrǔ? 29 Nzǐ nyì nzá nyì víní, ngǎ bbàdha ní, nyùní nyì rà nyù nì ddiy mà ndèymí mbù ní nyì rà mbù nì ddiy mànà nyì nì měy ddiy nà. 30 Ddiydhò, í dziylíy djú nzá ì njà Drà nì ndrǔ-bbúw nì fú ddiy měy nzá ì bbà tsò nì bbàní ddiy nà. Chú, nyìdhí djǎnì tsì ŋà nyì nì rǐy rǒmá nì ddiy. 31 Chú, nyì mey Drà mí Pey mí nga; fú nga nà, Drà rà njàddí ddiy-kpà-gò bbu wá nyì dhò.”
Věy ka nì ddiy-kpà nà rakpa ò ddiy
(Mat 6:19-21)
32 “Nyi déy ngǎ do ní, ngǎ ndèy nì bíyní měyá mí hó; ddiydhò, à thò nyìdhí djǎnì-nyú thò ní ndèy bbú Pey mí nga nyì dhò. 33 Nyì dzíy nyì nì ndanà nì ddiy-ónga, nyì bbú mí mb-ho zòw ní ndrǔ dhò. Nyì tów nzǐ ndèy nì ko nì mb-ho mí kpǔ nyì dhò; nyì njúw, ddiy-kpà-tsò věy nyì dhò rakpa ò, nzǐ ddiy rà viy ddì ddí kpe mí nga ò: Fungá, gbu-djá kà ì shǐ rǒmá nzá, kǎkà ddí kà ì sǎ ddiy-kpà nzá. 34 Ddiydhò, nyì-thíy rà tdè, wánì ddu ró, věy nyìdhí ddiy-kpà nì mí nga ó.”
Vìní ì nì nga vǐy nì dhǐy mí kpa
(Mat 24:45-51)
35 “Nyì déy glǒ njí dhò, nyì bbutsò nyì shû shí-ngìy nà ddiy nà, tòwní nyì tòw kass nyìdhí nga tdyídha, mí nò-kpà djòluw ro. 36 Nyì nyì déy, gbè pbòní ì nì ìdhí bba-dja pbǒ ków mí bba óddù ndèy nì ngu nì njí mí li níchú; ndaní, ì pǔ dzá-tsò à dhò, à rà shì ro, à rà dzá-tsò tdo ro ndùw. 37 Hwî nà ndèy nì nì li nì, Drǒngóli, shìní ndèy nì shǐ ro, ndèy rà chùw kekere ndèy nì dey nì dhǐy mí li! Ma nì tdrǎ nyì dhò, à nì dìychú ní lò: À rà ley kpa déy mésà tsò ró, ndaní ndèy kó kpa-tso-tso nyû bbúdha nà. 38 Ya kě, à ngû kúw-chiyrr̀ nà ro, ǐngí kúw rà ndì mǎ ro, à chûw kpa kekere ì nì dey ro, kpa rà tdè hwî nà nì kpa!” 39 “Chú, nyì tsǐ fú ddiy lǎní: Cha dza-dja njǎ tdè ŋá nga nà gbu-djá kà ndèy shǐ mí sâ ro, à kà tdè ndèy bbǎ fú gbu-djá tsûw nděyngá dza ò nzá. 40 Nyì déy glǒ; ddiydhò, Ndrǔ-Ddùw rà shì, nzá nyì-thíy ddêy ro.”
Nzǐ ndèy nì ndèy li Yesu mí dhǐy róddù nì li ndèymí lí ní ndèy nì ndèy li Yesu mí dhǐy róddù nì li nà
(Mat 24:45-51)
41 Fúnga nà, Petro dhîy Yesu-tsò ró: “Drǒngóli, nyi ní fú lò-ngbòdha tdrǎ mà dhò, ǐngí njàddí bbalè mànà dhò wá?”
42 Fúnga nà, Drǒngóli ngù lò à dhò: “Áyìy ní ùw ndey nzǐ ndèy li ndèy Drà róddù nì, lò-tsìdha mí nyǔ ꞌwíy nà nì li? À nì ndeyli, cha bba-dja rà nděyngá dza-rónga pbòdha mí njí bbu ndèy dhò nì li, à ká dey nyû bbu ndèymí njàddí dhǐy mí kpa dhò ddí nyû mí nga kâ ro. 43 Hwî nà ndèy nì nì li nì, ya bba-dja ngû ndèy bbâ ro, à shǐ à chùw nú dhǐy-tsò ró ndèy nì ro, nì dhǐy mí li dhò! 44 Ma nì nyì dhò dìychú ní lò tdrǎ: ‘Drǒngóli rà à ley nděyngá věy ndèy nì ndanà nì wánì ddiy-kpà djú.’ 45 Ya fú dhǐy mí li tdrǎ ndèy thíy óddù: ‘Drǒngóli rà shì děy nzǐ!’ Fúnga nà, à lǒw dey kpa ní dhǐy mí ndrǔ ndèymí dhǐy mí dhì mà dhèy dhèyní, nga mà nyǔ, mbùdha ní ddiy mà mbǔ, wa mà rǐy. 46 Fú dhǐy mí li mí bba-dja rà shì nzá à ddêy mí ddu nà ro ndèymí nzá ndèy tsì ro; à rà fú dhǐy mí li dìy ro, à rà njèy fú li ró ddí, gbè ngǎ ì dhí ùwdha nà nì ndrǔ ró níchú. 47 Chú, njàní dhǐy mí li njà ndèymí bba-dja jì nì ddiy, ya ndèy nì nzǐ ndèymí bba-dja jì nì ddiy njěy ro, ka rà à dhèy lèy. 48 Chú, nzá ndèy njà ndèymí bba-dja jì nì ddiy; chú, à njěy dhèyní ka kà ka dhěy à djǒmá nì ddiy-kpà ro, à ka rà dhèy gbè. Chú, věy ndèy dhò ka bbû ddiy nì ddì li ŋá nì kpe tsò ró, ka rà ddiy ko ddí věy; věy ndèy dhò ka bbû ddiy nì li, à dèddò ddí, ka rà ddiy ko věy.”
Yesu nì ndòní ndèy léy ka ndǒ li nì li
(Mat 10:34-36)
49 “Ma rà kàss mbà dziylíy djò; chú, ma jì tdè fú kàss tdě ŋà ka tòw ndèy! 50 Chú, manì dzadha mí bàtízò nà mà chûw njitsś ò djú, fú ná ŋàbù nà nì tdótdò mí lò ma-thíy dhò, pbǔw fú lò njèydha tsò rà tdow mí nga djò! 51 Nyì ná nzǐ, ma shì li-thíy-tsò djówdha bbu dziylíy djò? Nzá! Ma nì tdrǎ nyì dhò; chú, ma shì li-ónga ndòdha dhò. 52 Ddiydhò, nja-nja nga djúddù, mb ndrǔ nì ǒmá nì dza ó ndrǔ ónga rà ndèy ndò; gbow ì nì nì ndrǔ, rwo ì nì nì ndrǔ-tsò ró, rwo ì nì ndrǔ, gbow ì nì ndrǔ-tsò ró. 53 Djǎnì rà tdè ddùw-nì-tsò ró; ddùw-nì rà tdè djǎnì-tsò ró: Yânì rà tdè dhànì-tsò ró, dhànì rà tdè yânì-tsò ró; djǎnì rà tdè ddùw-nì-dhi-tsò ró, ddùw-nì-dhi rà tdè djanì-tsò ró.”
Ngéyngéy ní ddu-kpà òluw nì lò nì li-djùkpa lǒw ddiy
(Mat 16:2-3)
54 Chú, Yesu dêy tdrǎ bíy nì ndrǔ-kpà dhò: “Ya nyì njǎ nduw-nduw chèy ndèy ngítsśyà mí nga-là djúddù ro, ‘nyì tdra nì ndùw, dji nì ra ko,’ dji kó nì ndùw. 55 Ya vi shǐ ndrûwà mí nga-là djúddù ro: ‘nyì tdra nì nga rà ka líy-líy,’ nga ká nì nú líy-líy. 56 Gbè rwo ndèy kuwdjò nà nì dyi níchú nì kpa! Nyì nì lò-ónga ì nì njǎ nì, dziylíy djòluw mǎ, rakpa ròluw mǎ, ndèy nì ndèy njěy nì ddiy ì tsi nì kpa. Ddudhò, ndu nì ddu ó ndèy nì ndèy njěy nì ddiy ná nyì djùkpa lǒw nzǐ?”
Li-tsò ró li nà li-kàónga thìdha
(Mat 5:25-26)
57 “Kě ddudhò chú, nyì ná nyìdhí lò tděy nyìníddù nzǐ chǒw ní lò nyì nì njěy ddiy nà? 58 Cha, nyi shì rǎ nyi-tsò ró li nà bíy nì ndrǔ djú lò ndèy nì tděy nì li-nyú djò ro, mb nyi thǐ nyì kàónga à nà děy nyì nì tuw ó ro, nzánà à mbǎ nyi bíy nì ndrǔ djú lò ndèy nì tděy nì li njìò. Bbalè djú lò ndèy nì tděy nì li ká nyi bb ngiy-dzà ò. 59 Ma nì tdrǎ nyi dhò, Nyi rà shì nzǐ fulèddù, ya děy nzá nyi kpì nyi djú bi wá, pbǔw lùmíyàmí mb-ho djò ro.”