Yesu nì Roma ó la-dzàdha mí kpa djú drǒngó lǐ ngá dhǐy mí li pa ddiy
(Mat 8:5-13)
7
1 Ŋà Yesu dyâ ndèy dêy těy nì lò-tsò-kpà wá, ndèy ì dêy rř nì ndrǔ-tsi dhò ro, à kâ tsùw Kapernawumu mí drǒngó ní bba ò. 2 Fú bba ó, la-dzàdha mí kpa djú drǒngó ní ddì nì li tdè nděyngá drǒ ndèy jì nì dhǐy mí li nà. Fú dhǐy mí li tdè dhi nà. À tdè chow-chow dhìdha mí nga djò. 3 Chú, la-dzàdha mí kpa djú drǒngó ní fú li rr̀ tdè Yesu djú lò ka nì těy ro, à chô tdè Yahuddi-ddúw dhí drò-dró ní kpa rò Yesu dè, ndaní kpa íy à, à shǐ nděyngá dhǐy mí li pa. 4 Chú, kpa kâ shì Yesu kuwtsò ro, kpa dêy ì na Yesu ró, yà ì nì tdrǎ ǐchú: “Fúli kâ kání nyi kó ndèy-tso-tso; 5 ddiydhò, à jì màdhí ndrǔ-bbúw jìdha ní, à chú lêy ka ss̀ mà Yahuddi-ddúw dhí ddǐnì-dzà ddí.” 6 Chú, Yesu mà kâ rà kpa nà: Chowchow à shì tdè dza kuwtsò ro, la-dzàdha mí kpa djú drǒngó ní li kâ nděyngá lu-djá rò cho Yesu dè, ndaní ì tdrǎ à dhò: “Drǒngóli, nzǐ nzá nyi víní; ddiydhò, ma dhò à kâ nzá nyi tsûw màtsá dza ò. 7 À nì ddí fú lò dhò chú, ma ùw tdè nzá ma rǎ maníddù nyi dè. Chú, tdra ddì nì lò rò, ndaní màtsá dhǐy mí li pá. 8 Ddiydhò, ma ddí djów nì ma djówní drò-dró ní kpa dhò, manì la-dzàdha mí kpa nà màtsá kpá-kpánga tsìytéy. Ya ma tdrǎ ddì li dhò: ‘Ra!’ À ra nì ndùw; Ya ma ngú tdrà njàddí li dhò: ‘Ra ma dè!’ Fúli rà rà ma dè. Ya ma tdrǎ màtsá dhǐy mí li dhò, ‘Njey í dhǐy!’ Chú, fú li rà fú ddiy njèy.” 9 Chú, fú lò-kpà Yesu kâ rr̀ ro, à ónga ꞌwìy la-dzàdha mí kpa djú drǒngó ní fú li mí lò dhò. À lî ndèy-nyú ndèy kodjú ì tdè rǎ nì bíy nì ndrǔ dè ro, à kâ tdrà: “Ma nì tdrǎ nyì dhò kpǔkpǔ: ‘Ma vè děy ǐchú nì drǒngó ní ùwdha rò chùw Israeli mí dziylíy ó ddí nzá.’” 10 Chóní la-dzàdha mí kpa djú bba-dja kâ cho nì kpa ngû à bbâ ro, kpa shì chùw fú dhi nà nì dhǐy mí li pâ ŋà.Yesu nì dhìní ndèymí kpatss̀ dhì nì ɦìytss ní lǐ ngá kpatss̀ ní ngba ngǔ djiy ní ddiy
11 Fú ddiy dzzdjú ndùw, Yesu mà dêy rǎ ndèy kodjú ì nì rǎ nì kpa ndèymí bíy nì ndrǔ-kpà mànà Nayini ní ka tdè iy nì drǒngó nì bba ò. 12 Chú, chow-chow à shì tdè fú bba ó kaley-tsò ró ro, ndrǔ dêy dhìní ndèy dhì nì li mbǎ tdôw-dzìy djò: À tdè dhìní kpatss̀ dhìnì ɦìytss ní lǐ ngá ddì kpala nú ndèy tdè nì kpatss̀ ní ngba, fú drǒngó ní bba ó ì dêy dey nì bíy nì ndrǔ-kpà tdè fú ɦìytss ní li mànà ddǐ nga ó. 13 Drǒngóli, Yesu kâ fú ɦìytss ní li njà ro, fú li mí zòw kâ Yesu njèy ro, Yesu kâ tdrà à dhò: “Nzǐ dzz!” 14 Fú ddiy dzzdjú, Yesu ndrîy ndèy chow-chow ro, à kâ bu nì ǒmá nì sòndrú-rónga lòw. Bu ì tdè tduw nì kpa kâ dèy grǐy. Fúnga nà, Yesu kâ tdrà: “Yàddá ngba, manì tdrǎ nyi dhò: ‘Ngbí nyi!’” 15 Fúnga nà, bu ngbî ndèy, à kâ dòw ndèy-tey-tdúw djú, à kâ lòw dey lò tèy. Fú ddiy dzzdjú, Yesu kâ à ngù yânì thokpa ò. 16 Chú, wánì ndrǔ do kâ lòw ro, ndrǔ dêy Drà ma, yà ì nì tdrǎ ǐchú: “Drà ró dho nà ndèy nì lò těy ndrǔ dhò, děy ndèy rà shì nì lò-djò nì, ddì nì drǒngó ní li, dhò ndèy mà kàó! Drà shì nděyngá ndrǔ tso-tso ko!” 17 Yesu ɦuwdjò drr̀ Yuddeya mí ngòw òluw wá, ndèymí fú dziylíy kuwtsò nì nga-kpà òluw ddí.
Bàtízò ndèy nì bbu nì Yohana chô nì kpa
(Mat 11:2-19)
18 Yohana kodjú ì nì rǎ nì kpa kâ fú ddiy wánì tdrà ìdhí bba-dja dhò. Fúnga nà, Yohana kâ kpa kàó rwo nì kpa rò iy ro, 19 à kâ ndèy kodjú kpa cho Drǒngóli, Yesu dè, ndaní ndrǔdhí y à-tsò ró: “Nyi chú ná, cha ndèy nì ra shì nì li, ǐngí à kâ ná mà pbǒ njàddí li?” 20 Chú, Yesu kuwtsó ì shì ro, kpa kâ tdrà à dhò, “Yohana Batista chô mà nyi dè, ndaní màdhí y nyi-tsò ró: ‘Nyi chú ná, cha ndèy tdè ra shì nì li, ǐngí à kâ ná mà pbǒ njàddí li?’” 21 Fúnga nà, chú déy, Yesu kâ bíy nì ndrǔ ró dhi pa, ì-rónga-là rò dhì nì ndrǔ mànà, à kâ che thíy-kpà dìy ndrǔ óddù, à lêy nzǐ ì-nyú nì nga njǎ nì bíy nì ndrǔ njà nga. 22 Fú ddiy dzzdjú, Yesu kâ lò ngù Yohana chô nì kpa dhò: “Nyì ra, njàní nyì njànì lò mà, rr̀ní nyì rr̀ nì lò mànà tdrà Yohana dhò: ‘Nzǐ ì-nyú nì nga njǎ nì ndrǔ, nyú nì nga njǎ; tsùwní ì-koko tsûw nì ndrǔ, nì bbiy; tsátsá mí dhi nà ì tdè nì ndrǔ ngû thí; nzǐ ì-gi nì nga rř nì ndrǔ, nì nga rř; dhìní ì dhì nì ndrǔ ngû djiy ní; zòw nà ì nì nì ndrǔ dhò, ka nì hwî mí lò-ɦéy tdrǎ.’ 23 Hwî nà ndèy nì nì li nì, nzǐ ndèy rà ma ó ndèy nì ndanà nì uwdha bbà nì li.”
24 Chú, chóní Yohana chô nì kpa rà tdè ro, Yesu lòw dey Yohana djú lò tdrà bíy nì ndrǔ-kpà dhò: Nyì rà ná tdè ddu njà ɦiynínga ò? À tdě gbè víní ndèy nì vu nì vi níchú? 25 Chú, nyì rà ná tdè ddu njà ndèy nì? À ná lǎní rù ndèy thô nì madha mí li? Ddrǒ ndèy ró dzìy nà nì rù ì thô nì kpa, věy ka nì ddiy nà ddiy kàó ì nì dey nì ndrǔ nì Pey ní kpadhí dza òluw. 26 Chú, nyì rà ná tdè ddu njà ndeynì? À ná Drà ró dho nà ndèy nì lò těy ndrǔ dhò děy ndèy rà shì nì lò-djò ní li? Ónì, manì tdrǎ nyì dhò: “Nyì njà Drà ró dho nà ndèy nì lò těy ndrǔ dhò děy ndèy rà shì nì lò-djò ní li djòluw ndèy dà tǐ nì li. 27 À nì Yohana djú chú ka ndîy tdè í lò:
‘Ma nì màtsá lò-ɦéy ndèy nì mbǎ nì li cho nyi njí, ndaní à thǐ nyìmí tuw ónga.’”
28 Yesu kâ lò kíyddà ndrr: “Ma nì tdrǎ nyì dhò: ‘Dhì ní ndrǔ gòw nì ndrǔ kàó, Yohana djòluw ndèy dà nì li rò nì ddì kpe ngǎ. Chú, drǎ tǐ ndèy nì Drà mí Pey mí nga ó nì li nì drǒngó, dàní dà Yohana djòluw.’”
29 Ndèymí nò-tsò-kpà ɦówdha mí kpa mànà, cha ì rr̀ tdè Yesu tèy ní lò nì, tsì tdè Drà nì chǒw ní lò ndèy nì njěy nì li ro, kpa kâ lêy Yohana bbú bàtízò ì dhò. 30 Chú, Farisayó ndèymí yǎdha-ónga túwdha mí kpa mànà, gù tdè Drà jì tdè ì dhò nì lò gùní ro, kpa kâ Yohana nì bbu ì dhò nì bàtízò ddí gù gùní.
31 Fúnga nà, Yesu kâ tdrà ddíyàchú: “Ma dho ná ndu nì ndrǔ ó gòw ddey áyìy ró? Ndrǔ ná, gbè ŋá ndrǔ níchú? 32 Ndrǔ nì, gbè nzòw níchú, lálá ní nga ó ì dòw nì, ì kàòluw ì nì lò těy, yà ì nì tdrǎ ǐchú: ‘Mà mèy tdè dyì mí lǐy nyì dhò ro, nyì bì tdè dyì nza! Mà jòw tdè nyì dhò dzìy-ngò, nyì dzìy tdè ddí nzá!’ 33 Ddiydhò, Yohana Batista shì tdè, nzǐ ndèy nì mùkátì nyǔ, nzǐ ndèy nì dìyváyìy-ngìy-tsi wà mí mbǔ ro, nyì tdrà: ‘À ó nì dàyìmónì mí che thíy.’ 34 Chú, Ndrǔ-Ddùw shì tdè, yà ndèy nì nyùdha ní ddiy nyǔ, mbùdha ní ddiy mbǔ ro, nyì tdrà: à nì nga nyùdha-dja ndèymí nga mbùdha-dja nì li! À nì nò-tsò-kpà ɦówdha mí kpa ndèymí cherr ì nì njěy nì ndrǔ mànà dyasi ní.” 35 Chú, lò-ónga ndòdha mí nyǔꞌwiy tdè ndèy dhǒ chǒw ní lò ní, úwní ì ùw ddiy nì wánì ndrǔ dhò.
Yesu nì Farisayo ní li, Simoni bbá ddiy
36 Ddì nì Farisayo ní li îy tdè Yesu, nga nyùdha dhò ndèy bbâ. Yesu kâ tsùw fú Farisayo ní lǐ ngà dzá, à kâ dòw mésà tsò ró. 37 Fú bba ó tdè cherr ndèy dêy njěy nì ddì nì ɦìytss ní li. Yesu nì nga nyǔ Farisayo ní lǐ ngà dzá ndèy rr̀ ro, fú ɦìytss ní li kâ shì ndèy-thokpa ó àlùbǎtrò mí djuw nà ka thì nì chǔwpà, věy ndèy ó rǐy ndèy dzìy nì ngǒw nì tsó nà ka thì chì nà ro, 38 à shì ndèy kò luwtéyddù Yesu kotéy, yà ndèy nì dzž dzz̀ní. À nyú téy dzz̀-ddà dêy ndèy tdiy Yesu-koko djò; fú ddiy dzzdjú, à dêy Yesu-koko-rónga nju ndèy djùkpa ró ɦěy nà; à mbû Yesu-koko ro, à kâ Yesu-koko-rónga vìy rǐy ndèy dzìy nì ngǒw nì tsó nà ka thì nì chì nà. 39 Chú, Yesu ndèy îy tdè nì Farisayo ní li kâ fú ddiy njà ro, à kâ ddey ndèy-thíy ó: “Cha í li tdě yà Drà ró dho nà ndèy nì lò těy ndrǔ dhò děy ndèy rà shì nì lò-djò ní li ro, à kà tdè ndèy tsǐ ŋà ya áyìy, ndèy-rónga ndèy nì low nì ɦìytss ní li nì ddiy, à kà tdè ndèy tsǐ, fúnì cherr ndèy njeynì nì ɦìytss ní li nì ndey ddiy.” 40 Fúnga nà, Yesu kâ lò lòw ro, à kâ tdrà Farisayo ní li dhò: “Simoni, manì lò rò nà ma tdrǎ nyi dhò.” Simoni kâ lò ngù à dhò: “Li gwíydha-dja, tey lò.” 41 Fúnga nà, Yesu kâ tdrà: “Rwo nì kpa dhò à kâ tdè ì ngǔ mb-hoa ì kô tdè bi ndèy dè nì li dhò. Ddì nì li kà tdè ndèy ngǔ mb-ho ngiy mb; njàddí li, drì-drí nga mb. 42 Cha kpa kà tdè ì ngǔ nì ddiy tdè ngǎ ro, à kâ fúkpa rwo nì òluw nì bi mí nga bbà víní. Rwo nì fúkpa kà-óddù, áyìy ká ná ndey, fu ndèy bbà ì dhò bi víní nì li jì tǐ?” 43 Fúnga nà, Simoni kâ lò ngù Yesu dhò: “Ma ddéy, à nì ndèy ò bi tdè tǐ nì li.” Fúnga nà, Yesu kâ tdrà Simoni dhò: “Nyi tdèy lò déy!”
44 Fú ddiy dzzdjú, Yesu kâ ndèy-nyú li fú ɦìytss ní li dè ro, à kâ tdrà Simoni dhò: “Nyi ná í ɦìytss ní li njǎ ney? Nyǐngá dzá ma tsùw ro, nyi bbû dda ma-koko dhò nzá; chú, í ɦìytss ní li gbû ma-koko ndèy-nyú téy dzz̀-ddà nà ro, à njû ma-koko-rónga ndèy djò ró ɦěy nà. 45 Nyi kô tdè ma nzá, nyi mbû ma mbúní ro; chú, tsùwní ma tsùw mí nga djúddù, í ɦìytss ní li bbà ma-koko ndèy mbû ddiy-tsò nzá. 46 Nyi vìy chì rò ma-djùkpa rò nzá; chú, í ɦìytss ní li vìy rǐy ndèy dzìy nì ngǒw nì tsó nà ka thì nì chì ma-koko djò. 47 À nì fú lò dhò chú, manì tdrǎ nyi dhò kpǔkpǔ: ‘Àmí drǒngó jǐ à dhò ddiy nì tdrǎ, àmí bíy nì cherr-kpà Drà sà sàní. Chú, ddrǎní ddiy ka sà ndèy dhò nì li, à nì ddí ddrǎní jǐ dhǒ.’” 48 Chú, Yesu kâ tdrà fú ɦìytss li dhò: “Nyi njèy nì cherr Drà sà ŋà.” 49 Fúnga nà, Yesu mà tdè mêzà tsò ro ndanà nì kpa kâ lòw dey ddey ì-thíy òluw: “Í ná ŋá li, cha ndèy nì ndrǔ njèy nì cherr-kpà sǎ?” 50 Chú, Yesu kâ tdrà fú ɦìytss ní li dhò: “Nyìmí ùwdha pâ nyi ŋà, ra djòwní nyi thíy-tsò djòw ddiy nà.”