Sɛbɛn niì kau Saridzì wɔ̀ɔ̀ ɲɛynamoo kur'là rè
3
1 Àyìwà, ɲɛynamoo kur'lìi ni Saridzì wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Ŋaablà re dzi ɲɛɛ̀nuàn ko swɛyn ɲɛ̀ɛ̀nuàn ni mòò riì rè, tɔ nìi dèe, tɔ̀ rii siin: Mun wo faadziɛ tɔ̀. Wo tsoò boo ci wo jaama, tɔ̀ to y'à tàrà wo saɔn rìì. 2 A jaara tsiì, kàjàà dzyee riì ni tɔ̀ sa yeè bà gaa san, e fààn wɔ tɔ̀ ɲan. M'a jaɔ̀ wo faadziɛ dzii na tsyɛɔ̀n mun ne Ŋaablà jaa dzuun waa. 3 Wo nìi tàrau, tà ko w'a myɛ̀n, a taa to tɔ̀ re, a màrà. Nimisa, e làkere taki dɔn a re jaamabee doùn. Wo m'a a jaara tsiì, mun nà nà a ci shɔn, min nà bàràma wo ɲan. Wo fa mun nà bwey tɔ̀ waa. 4 Ŋà, tà ko e sa ra, mòkun danman ni wo re mɔn Saridzì, twɛy na e raa vya rèè noo ŋe waa. Twɛy nà jìì mun ka, mɛ̀yɛ̀ fyɛ ì ka e ma, kàtsu è dàaŋnà tɔ̀ ka.5 Àwà, mòò riì ye ba dzibaa, tɔ̀ sa nà vya fyɛ ì wɔ tɔ̀ tsuru. Mun fa à tsoò tsùsa bo jaamabee sɛbɛɛn doùn waa, mun to nà n tsiì à ra n Fa Ŋaablà ko e re mɛ̀rɛ̀kɛ rèè jaa ra, ci m'a tsìfa tɔ̀. 6 Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè è bà è ka myɛ̀yn faa, è toro wɔ cɛyn, à y'à myɛ̀n.»
Sɛbɛn niì kau Filadɛlifì wɔ̀ɔ̀ ɲɛynamoo kur'là rè
7 Àwà, ɲɛynamoo kur'lìi ni Filadɛlifì wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Nìi fɛnɛɔ̀, è bà taki takià, màsà kpiri Dawudà rè nèèdzian ni nìi suun, à ye dziɛ̀ san mòò pɛn na dzia à tsyee, à to y'a tsyee, mòò pɛn na dzia à san, tɔ nìi dèe, tɔ̀ rii siin: 8 Mun wo faadziɛ tɔ̀. À siin, mun dzii san jiɔ̀ wo re, mòò fa dzi nìi tsyee waa. Wo ɲan dzibaabee kpɛ̀yn dzyɛ̀n, ŋà wo mun ne goomaa màrau. Wo na a dziira tsɛ mun na waa. 9 Sùtan'naa waajibi fa gbaà mòdzin niì reè doò dèe ci ye Dzyèèsìbee mòdzin ì, à to na tà tsuru waa, mun nà nìi fa twɛy rà, tɔ̀ rii siin: mun nà à to yè wo blàbe, y'à tɔ̀ tɔ̀ tsuru ci mun wo kɛ̀niɔ̀n. 10 Wo y'à mɔɲɔn niì fau w'e to mun ne goomaa tsɛ, mun sa nà wo màrà dzɔ̀nxɔɔ̀ tsɛ byɛnbe nakɔɔn jɔɔn, tɔ̀ niì nà dziɲaan ko e kur'la mòdzian sapɛ tarà, è dzuun bo. 11 Sani dɛyn, mun nà nà. Nìi ni a suun, tɔ̀ kun gban, mòo mà nà to a re màsà baanflaa tsi a ra. 12 Mòò riì ye ba dzibaa, mun nà tɔ̀ bà n ne Ŋaablà re gbà blàa doùn tsindzin, à fa bo jà min niì dɛ. Mun nà n ne Ŋaablà tsoò sɛbɛn à tsìfa tsɛ, min Yerusalɛmun yee tsoò sɛbɛn à tsɛ, tɔ̀ niì mun ne Ŋaablàa rè wɔ̀, nìi nà jàà bo na à tɛyn jìrànxɔɔ̀ doùn, min tsoo ye sa sɛbɛn à tsìfa tsɛ. 13 Ŋaablà re Dzia nìi dèe ɲɛynamoo kur'èè rà, toro ì ye ba ni mòò riì rè è bà è ka myɛ̀yn faa, è toro wɔ cɛyn, à y'à myɛ̀n.»
Sɛbɛn niì kau Lawodzisè wɔ̀ɔ̀ ɲɛynamoo kur'la rè
14 Àwà, ɲɛynamoo kur'lìi ni Lawodzisè wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Nìi kir'là Àmiinà, shɛɛrɛ vusootsi taki takìà, Ŋaablà re gè ɲɛunma rèè sapɛ dzunbomaà, tɔ nìi dèe, tɔ̀ rii siin: 15 Mun wo fadziɛ tɔ̀. M'a tɔ̀ wo na cin, wo to na ta. Wo yɛ̀rɛ̀ to ye ba na cin tàmafa wo yè bà na ta, tɔ̀ na fyan. 16 Wo ni niì fa dùdùù, wo na ta wo to na cin, mun nàkɔɔn ni yɛ wo fɔnɔn bo n dzii ra. 17 Wo ci wo gètsi, ci wo nàforo taraɔ̀, ci wo màgoo na ni gèsɔn pɛn na waa. Wo to na à tɔ̀, ci wo màtsùrùkɔɔn, byɛnkɔɔn, gbakɔɔn, jaana, ko màxɔ̀ɔ̀ma waa. 18 Tɔ̀ kamà, mun nà nìi dè a ra, tɔ̀ rii yɛ, ci sàà ka sɛnu niì noo boo, tɔ̀ sɛn'na fì n ne, e bà ni ba gètsi. Vya fyɛ ì fì n ne, e twɛy ji a ma. Tà tsuru, wo màà nà dzii tsyee, wo fa seey tàrà a maxɔ̀ɔ̀maa ka dɛ. E jaaɲinin jan fi n ne, e tɔ̀ ji a jaa tsɛ, e bà ni jɛ̀y fa. 19 Mun nìì reè sapɛ kɛniɔ̀n, mun twɛy latsia, min è koron. Tà doùn, fààn wɔ a yɛrɛ ɲan, e nimisa, e làkere dɔn a re jaamabee doùn. 20 Mun tsìiŋma siin dziɛ̀ rà, mun y'à mà baan, mòò riì ye mun vuà myɛ̀n è dziɛ̀ san mun ne, mun nà dɔ̀n tɔ̀ tsìfa re, à ko min ɲwɛɛ̀n ɲɔn esire. 21 Mòò riì ye ba dzibaa, mun nà tɔ̀ tsùù n ka n ne màsà gbaaniɛn tsɛ, a ci mun sa bàu dzibaa nìi tsuru, min bè n tsuù n Fa Ŋaablà ka e re màsà gbaaniɛn tsɛ. 22 Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè è bà è ka myɛ̀yn faa, è toro wɔ cɛyn, à y'à myɛ̀n !»