Actes 15

Sɔ̀swɛy nìi tàrau shimangoo raa goò tsɛ

1 Àyìwà, mòdzin swey yè bo Yude mar'la ɲàn, yè nà Antsiyɔshì, Siiri jamaan nɔn. Twɛy yè nà dzin kàràndzin neè rà, ci kun kpɛrɛ mòdzin neè ma shɛn a ci Musà rè sàrìyaa ci è fa nìi tsuru, ci è fa dzi tsi waa.

2 Pɔlì ko Barinabasì na e tsiì tɔ̀ goomaa nà waa. À goò yè bà sɔ̀swɛy brìsi è ko twɛy mòdzin neè fi. À bàu tà tsuru, yè byɛ̀n à mà, ci Pɔlì ko Barinabasì ko mɔn kàràndzin neè swey nà bè Yerusalɛmùn, yè b'a goomaa kpàdè Kɛɛradzin neè ko Yerusalɛmùn kàràndzìn kur'là bɔɔ rèè rà.

3 Àyìwà, Antsiyɔshì kàràndzìn kur'là mòdzin neè yè è dzwɛ̀ma jìɛ̀ doùn. È bèkɔɔn, yè Fenisi mar'la ko Samari mar'la fi shɛn dɔ̀n. Nìì reè kun kpɛrɛ mòdzin ì, twɛy ɲɛun Ŋaablà ra nìi tsuru yè e tsiì à ra, yè tɔ̀ lakɛɛy beè tɔ̀ gàne rèè kàràndzin neè rà, yè bèe. Tà goomaa myɛ̀unmaà na taamadzibe brìsi rìì twɛy rè.

4 È bèu wɔ Yerusalɛmùn, kàràndzìn kur'là mòdzin neè, ko è re bɔɔ rèè, ko kɛɛradzin neè yè è kùùntsi. Àwà, Ŋaablà baraka rɔ̀n, Pɔlì ko Barinabasì dziu goo o goo rìì fa jìɛ̀ doùn, yè tɔ̀ lakɛɛ̀y è ra.

5 Tɔ̀ y'a tàrà, kàràndzin neè swey na ni kàràndzìn kur'là mòdzin neè ɲàn, twɛy yè bà na bà dɔɔ̀n Faridziɲɛn. Tɔ̀un, twɛy mòdzin neè yè dzin, ci kàràndzin niì reè kun kpɛrɛ mòdzin ì, fɔ twɛy yè shɛn n dzi, yè kɛɛra Musà rè sàrìyaa shia jìì.

È byɛ̀un nìi mà shimangoo raa goò tsɛ Yerusalɛmùn

6 Tà doùn, kɛɛradzin neè, ko kàràndzìn kur'là bɔɔ rèè yè e si ladzyeè, ci ye nà à goò ɲan gaa cɛyn.

7 Yè e si sɔ̀swɛy fur'lu, Piyɛrì yè kòmànà fù, tɔ̀ yeè dzin è ra ci: «N neema ì, ye y'à tɔ̀, ci fɔ watsi gbaan, Ŋaabla mun bou ye fi, ci nìì reè kun kpɛrɛ mòdzin ì, ci mun yè twɛy toro kɔ̀ Kùnàgoo Dziɔ̀ rà, yè ɲɛn Ŋaablà ra.

8 Tà doùn, Ŋaablà riì mòdzin sapɛ duùn tɔ̀, tɔ̀ y'a kpàdèu, ci wò yeè e tsiiŋ è ra, à yɛ̀r'la yè e re Dzi Fɛnɛɛ sìn è ra, a ci à y'à sìun ɲe sa ra nìi tsuru.

9 À ɲe ko twɛy sa bau soo, kàtsu twɛy ɲɛn niì fau à ra, à yè è duùn fyɛu tɔ̀ kamà.

10 Fèe to boo dòònun, ye sàò ni à re, ye yè Ŋaablà dzuun bo ? Ɲe fàbɔɔ rèè ko ɲe yɛ̀r'leè tsu na dzi sàrìyaa seyn niì dzuun waa, fèe kamà ye sào ni à re, ye yè tà seen tsùù kàràndzin neè kùùn ?

11 Àwà, ɲe dzyèèsìbee mòdzin neè y'à jàa ci ɲe tsià Tsìfa Yesù baraka rɔ̀n nìi tsuru, kun kpɛrɛ mòdzin neè sa tsià tɔ̀ tsiu'n kuru soo rìì là.»

12 Tà doùn jàmaà sapɛ yeè e mɛshɛ̀n, yè e toro wɔ tsùù Pɔlì ko Barinabasì rè. Mòdzin niì reè kun kpɛrɛ mòdzin ì, Ŋaablà baraka rɔ̀n, è dziu goo blà bla niì reè, ko kabagoo goo niì reè fa, è to twɛy mòdzin neè fi, yè tɔ̀ lakɛɛ.

13 Àwà, Pɔlì ko Barinabasì nàu dò goomaa nà watsi riì bwèy, Yàkubà yè goomaa sen tɔ̀un. À ci: «N neema ì, dòònun ye e toro wɔ n ne !

14 Àwà, Shimɔ̀n dzii wɔu à tsɛ ye ra, è ye taa to, ci fɔ goo rèè dzun jɔn bwèy rɔ̀n, a bàu Ŋaablà sao è mòdzin ì bo kun kpɛrɛ mòdzin neè fi, à yè è bà e tsoo ra modzin ì.

15 Tɔ̀ goomaa ko kɛɛra reè raa goomaa sa tsiɔ rìì, kàtsu à sɛbɛɔ̀n Ŋaablà re goomaa kàjaa sɔn ɲan, nìi doùn mùn Tsìfaà ci:

16 Mun nà sèè na sii sɔn see,

min nà màsà kpiri Dawudà rè gbà mɛrɔnmaà sèè ji kɔn yeu.

Mun nà à re gbàkuru barauma rèe lamɔnɔ̀n,

mun y'à fù tsìì e shɔùn.

17 Tɔ̀un, mun Tsìfaà,

mòdzìn dzyee reè sapɛ nà mun gàne gaa.

Ɔ̀ɔn, kun niì reè sapɛ wù yè bà mun naa.

Tɔ mun Tsìfaà rìì dèvu tɔ̀ tsuru.

18 Fɔ watsi gbaan, mun y'à tou twɛy goo rèè yè tɔ̀.»

19 Tɔ̀ goomaa shɔ̀ùn, Yàkubà yè dzin kɔn ci: «Mun kpɛ̀yn nìi jàa à goò jaa, nìì reè kun kpɛrɛ mòdzin neè, twɛy tsìiŋmaà shɔ̀ùn mùn Tsìfaà rà nòn, mùn mà dzin ci mùn goo xɔu kpɛrɛ jia è jɔɔn dɛ waa.

20 Ŋà, mùn yeè sɛbɛn ni ka è re, mùn y'a dè è ra tà doùn, ci è mà ɲɔ̀n kɔɔ shu tàà waa. Ci yè dzi e re saaniin fɛɛ̀ rà. Ci è mà shu còrò vuuma tàà waa, è to mà shu tsiin ɲɔn waa.

21 Tà doùn, fɔ watsi gbaan, mòdzin ì ni wɔ̀ rèè soo sookɔɔn sapɛ ɲan, twɛy yè bà waajibia faa, yè mòdzian kàr'na kɛɛra Musà rè sàrìyaa rà. Twɛy goo rèè kàr'na ɲanwɔ sii sapɛ waajibi fa gba rèè doùn.»

22 Yàkubà rè goomaa shɔ̀ùn, Kɛɛradzin neè, ko kàràndzìn kur'là jɔɔndzin neè ko kàràndzìn kur'là mòdzian sapɛ, yè byɛ̀n à mà, ci ye nà mòdzin ì bo e ɲan, twɛy yè bà Pɔlì ko Barinabasì tɛ̀y, ye yè è ka bè Antsiyɔshì. Tɔ̀un, yè Yudè bo, à tsoò sɔn ci Barisabasì, tà ko kpiri sɔn, ci Silasì. È fiɛ̀ sa na mòdzin bla ì kàràndzin neè rè.

23 È sɛbɛn niì wɔu è suun, tɔ̀ doùn goomaa nì siin nèe ci: Àwà, mùn neema karàndzin ì, ye nìì reè kun kpɛrɛ mòdzin ì, ye yè bà tsùuŋnà Antsiyɔshì wɔ̀ rɔ̀n ko Siiri jamaan ko Silisi jamaan ɲàn, ɲe kɛɛradzin neè ko mìin kàràndzìn kur'là jɔɔndzin neè, mùn ne tswɛy ni e re.

24 Ɲe y'à myɛ̀un, ci ɲe kòòsi kàràndzin neè swey bou ɲe re mìin nɔn, yè bè gooma ì dè ye ra, nìi ye akir'lèè gbiimaun, è ye bo e taa tsɛ. Tà to y'à tàrà, ɲe naà è kaɔ waa.

25 Tɔ̀ rii kamà, ɲe sapɛ yeè byɛ̀n à mà, ɲe yè mòdzin ì bo, sànko ɲe yè è ka bè ye re, yè bà mùn neema jaawuen fiɛ̀ tɛ̀y, Pɔlì ko Barinabasì,

26 twɛy nìì reè na gaa fɔn e xɔn nɔn mùn Tsìfa Yesù kamà, Ŋaablà Jaara Modzìàn.

27 Àyìwà, ɲe yɛ gooma niì jiɔ̀ sɛbɛn nee doùn nèe, ɲe Yudè ko Silasì kaà ye re, sànko ye yè tà gooma soo myɛ̀n twɛy sa dzu.

28 Àwà, Ŋaablà re Dzi Fɛnɛɛ nìi kpàdeò ɲe ra à goò tsɛ, tɔ̀ rii yɛ, ci ɲe mà goo xɔù kpɛrɛ ji ye jɔɔn waa, fɔ nìì reè farama takì ì.

29 E maà ɲɔ̀n kɔɔ shu tàà waa, e maà shu còrò vuuma tàà waa, e to mà shu tsiin ɲɔn waa, ye dzi e re saaniin fɛɛ̀ rà. E ye dzi tɔ̀ sapɛ jɔɔn bo, tɔ wù. Ŋaa yè e cɛrɛma to.

30 Tɔ̀un, yè shia sìn kɛɛra reè rà, yè dɔ̀n be Antsiyɔshì. È bèu wɔ mɔn, yè kàràndzin neè sapɛ ladzyèè, yè sɛbɛɛn sìn è ra.

31 Àwà, twɛy sa yeè sɛbɛɛn kàràn tɔ̀un. Sɛbɛɛn kàraunmaà, y'à jà, ci è ye màxɔɔ̀n gooma ì ka, tɔ̀ yeè è taama dzibe, fɔ è bè geren.

32 Mòdzin niì reè na ni, Ŋaablà re goomaa jaa dèè yè ba ni twɛy suun, Yudè ko Silasì sa na tɔ̀ tsuru mòdzin ì nì. Tà doùn, twɛy yè gooma giri dè kàràndzin neè rà, tɔ̀ yeè è màxɔ̀n, è fààn sa wɔ è ɲan, è ɲɛunmaà doùn Ŋaablà ra.

33 Tɔ̀un, yè to Antsiyɔshì mɔn, yè watsi danman fa. Tà shɔ̀ùn, kàràndzin neè yè kòmànà shi sin è ra, sànko yè sèè be e kabaa rèè kpà. Yè dzwɛ ji è ra, ci Ŋaa yè è wùù wɔ. [

34 Silasì y'à jà tɔ̀un, ci à wù wò yeè to Antsiyɔshì. Tɔ̀un, Yudè soo yeè dɔ̀n na Yerusalɛmùn.]

35 Nìi Pɔlì ko Barinabasì, twɛy sa yeè to Antsiyɔshì. È ko mòò giri kpɛ̀rɛ̀kuru ì na ni, yè bà mòdzian kàr'na, yè è toro kɔ̀ɔ Tsìfaà rè Kùnàgoo Dziɔ̀ rà.

Pɔlì ko Barinabasì jeeŋ e si ra min niì

36 Bwèy dànman tà shɔ̀ùn, Pɔlì yè dzin Barinabasì rà ci: «Ɲe dɔ̀n bou wɔ̀ o wɔ ɲàn, ɲe yè mòdzian toro kɔ̀ Tsìfaà rè Kùnàgoo Dziɔ̀ rà, à wa, mùn yeè e kpɛyn sèè, mìn bo bè twɛy gàne rèè kàràndzin neè sapɛ kpa, m'a siin yè ba baɔ̀ nìi tsuru.»

37 Awà, nìi Barinabasì, tɔ̀ sàò na n'a re, Yùxanà sa yeè bè ye ka, nìi tsoò sɔn ci Marikì.

38 Ŋà, Pɔlì y'à jà, ci à na wù tɔ̀ yeè fa waa, kàtsu Marikì sèè bou ye kpɛyn Panfili jamaan nɔn, à na faagoò gban vyɛ̀ ye ka dɛ waa.

39 À goò yè bà sɔ̀swɛy brìsi Pɔlì ko Barinabasì fi, fɔ è bè wɔ, yè jee e si ra. Tɔ̀un, Barinabasì yè Marikì sen gban e ra, yè bè dɔ̀n konkoron bla sɔn doùn, yè geren Shipùrù.

40 Nìi Pɔlì, tɔ̀ sa yeè Silasì bà e tɛy. Tɔ̀un, kàràndzin neè yè dzwɛ ji è ra, yè è kɛ̀ɛ̀yfa Tsìfaà mà. Tà shɔ̀ùn, yè kòmànà dɔ̀n be.

41 Tà doùn, yè bè Siiri jamaan nɔn. È bou mɔn, yè bè Silisi jamaan nɔn, tɔ̀ sapɛ ɲan, è fààn wɔ bèe kàràndzìn kur'là mòdzin neè ɲàn, twɛy ɲɛunmaà doùn Ŋaablà ra.