Actes 6

È mòkun ɲɛɛ̀nun bou min niì, ci yè wɔ kɛɛradzin neè rà

1 Àwà, tɔ̀ jisee kamà, Yesù rè kàràndzin neè na giribe beè vu rìi mà, è na giribe beè tɔ̀ vuà rìì mà. È na kuru fii, è sa yeè bà na dzyèèsìbee mòdzin ì. Kuru soo dzin neè na kungoòmà sɔn deè, nìi kir'là, ci gɛ̀rɛ̀kì goòmàà. Kuru fiira dzin neè yè bà na dzyèèsìbee mòdzin neè raa goomaa dèe. Gɛ̀rɛ̀kì gòòmà de reè, yè nà e maa yè jàa kuru fiira dzin neè rà, yè è tsoo dèe, ci è na ɲwɛyn tar'na faa e shi tsɛ yè raa fùnshɔ̀ùntaan rèè ka waa.

2 Kɛɛradzin teeŋ fiɛ̀ tɔ̀ goomaa myɛ̀un min niì, yè kàràndzin neè sapɛ dzyeèmaa kiri, yè dzin è ra ci: «Ɲe mòdzian toro kɔ̀ nìi faa Ŋaablà re goomaa nà, ɲe yè bà ni tɔ̀ dzii bà, ɲe yè e san ji ɲwɛyn tar'na ɲàn, tɔ̀ na ni e shi tsɛ waa.

3 Tɔ̀ kamà, mùn kòòsi kàràndzin ì, mùn nà à gaa e re, ye mòkun ɲɛɛ̀nun bo e ɲan, e ɲɛɔ̀n nìi reè rà, Ŋaablà re Dzia yè bà ni è ɲan, è akiri yè bà blà. Tɔ̀ tsuru, mùn nà ɲwɛɛ̀n raa faagoò to twɛy suun.

4 Tɔ nà à to, ɲe sa yeè dzi e shi Ŋaabla mafyɛɛ̀n ko kàr'nà raa goo rèè rà.»

5 Àwà, tɔ̀ goomaa yè bà kàràndzin dzyee reè sapɛ saò, yè byɛ̀n tɔ̀ mà. Tɔ̀un, yè Etsiyɛnì bo, tɔ̀ kpir'la na e shiɔ̀ Ŋaablà ra, à ɲan ye bà tsyɛɔ̀n Ŋaablà re Dzi Fɛnɛɛ rà. Fìlipù yè bà tɔ̀ tɛ̀y, ko Porokolì, ko Nikanɔrì, ko Tsimɔ̀n, ko Parimenasì, ko Nikola. Nikola, tɔ̀ na boò wɔ̀ sɔn ɲan, ci Antsiyɔshì. À na dɔ̀ɔn dzyèèsìbee mòdzin neè rè dzinɛɛ ɲàn dan, è kòmànà e ba Yesù rè kàràndzin neè kur'la tɛ̀y.

6 Àwà, è twɛy mòkun ɲɛɛ̀nuàn bou, yè nà è kpàdè kɛɛradzin neè rà. Tɔ̀un, twɛy sa yeè Ŋaablà mafyɛ̀n è re, yè e si rèè tsùù è tsɛ, yè dzwɛ ji è ra.

7 Ŋaablà re goomaa kpɛ̀yn na jee ji beè vu rìi mà, à na jee ji beè tɔ̀ vuà rìì mà. Kàràndzin neè sa yeè giribe beè Yerusalɛmùn wɔ̀ɔ̀ doùn. Saaka goojaa bo reè giri sa yeè e tsiì Yesù rè Kùnàgoo Dziɔ̀ rà.

È Etsiyɛnì kuùn min niì

8 Àwà, Ŋaablà na xɛɛrɛ blà faɔ̀ Etsiyɛnì nè, dzi yeè bà ni à ɲan, è bà kabagoo goo bla bla reè faa tɔ̀ ka.

9 Tɔ̀un, waajibi fa gba sɔn na ni, yè bà tɔ̀ kir'là, ci "Jòn bàjiuma rèè rè waajibi fa gbaà". È mòdzin neè ɲàn, swey na boo Sirɛnì wɔ̀ɔ̀ ɲàn, swey boo wɔ̀ sɔn ɲan, ci Alɛkisandziri, swey boo Silisi jamaan ɲàn, swey yè bà boo Azhi jaaman ɲàn. Àwà, twɛy mòdzin neè yè e maa, yè Etsiyɛnì sɔ̀swɛɛ̀.

10 Ŋà, Ŋaablà re Dzia baraka rɔ̀n, akiri goòmà nìi na ni Etsiyɛnì dzu, è re goomaa na dzi à raà dɔn mɛɛy waa.

11 Y'à goò jàu tà tsuru, yè mòdzin ì sàrà, ci twɛy yè doò wɔ Etsiyɛnì nà ci: «Ɲe yɛ̀r'leè Ŋaablà re kɛɛra Musà ko Ŋaablà yɛr'la tsoo bara goòmà ì dèkɔɔn myɛun à dzu.»

12 Tɔ dèu tɔ̀ tsuru, yè mòdzian, ko bɔɔ rèè ko sàrìyà kaamoo reè sa pi son ji Etsiyɛnì kpɛyn. Yè bè e mɛɛy à tsɛ tɔ̀un, y'à kun dɔ̀n be fààn na kitsi kunun kuru blàa mòdzin neè rè.

13 Yè nà shɛɛrɛ dodebaa swey sa ka, twɛy yè nà doò wɔ à ra ci: «Kudɛyn, nèe kpir'lee rìì yè e dzii ɲaan ker'la Ŋaablà re gbà blà fɛnɛɛ ko kɛɛra Musà rè sàrìyaa rà.

14 Ɲe y'à myɛ̀un à dzu, ci Nazarɛtsika kpiri Yesù rèe nà Ŋaablà re gbà blàa ci, è sèè kɔn, kɛɛra Musà sàrìya niì reè wɔu ɲe suun, è twɛy sa lakere.»

15 Tɔ̀un, kitsi kunun kur'là mòdzin neè sapɛ jaà gban touma yè to Etsiyɛnì nà. Etsiyɛnì jaakɔɔ doòn siinkɔɔn è re, à na ni, à ci è jaa ni mɛ̀rɛ̀kɛ rìì là.