Jean 15

Gɔ̀ɔ nìi kir'là ɛ̀rɛ̀zhɛ̀nku, Yesù nìi dèu tɔ̀ tsɛ

1 Àyìwà, Yesù yè dzin kɔn ci: «Gɔ̀ɔ nìi kir'là ɛ̀rɛ̀zhɛ̀nku, mun nì tɔ̀ kuna takia, mun Fà Ŋaablà, tɔ̀ yeè bà à tsìfaà.

2 Sààn ge o ge ni mun na, è mà bà dzin wɔɔ̀, à twɛy sapɛ kunùn boò. Nìì reè to dzin wɔɔ̀, è twɛy kùùn baran, sànko yè dzin cɛyn.

3 Min dzugooma niì dèu ye ra, tɔ̀ baraka rɔ̀n, ye sa raa sààn ɲaan neè baran bou nòn, ye yè fɛnɛbe.

4 Ye to mun ɲan, mun sa yeè bà ni ye ɲan. Sàan mà bà ni kunaà nà fyeu, à na dzia to e yɛrɛ ma, è dzin wɔ waa. Ye sa raà ni tɔ̀ rii tsuru, ye ma ba ni mun ɲan fyeu, ye na dzia dzin wɔ waa.

5 Mun nì ɛ̀rɛ̀zhɛ̀nkuà, ye yè bà à sààn neè. Mòò riì to tsùuŋnà mun ɲan, min bà ni à tsìfa ɲan, tɔ nà dzin cɛyn, kàtsu ye na dzia gèsɔn pɛn fa mun shɔ̀ùn waa.

6 Mòò riì ma to tsùù mun ɲan, tɔ nà maa da rɔ̀n, a ci sààn neè. Sààn neè gɔ̀rɔuma shɔ̀ùn mɔn, è tsɛ̀ jia sa rɔ̀n, yè dzu.

7 Ye ye to tsùù mun ɲan, mun ne gooma reè yè to tsùù ye ɲan, gè o ge ye e dzibe, y'a gaa, tɔ nà fa e re.

8 Ye ye dzin cɛyn, ye y'à kpàdè tɔ̀ tsuru, ci ye mun ne kàràndzin ì taki, mun Fà Ŋaablà blabee nà kpàdè mòdzian sapɛ jaa ra.

9 Mun Fà Ŋaabla mun kɛ̀niun nìi tsuru, mun sa ye kɛ̀ɛn tɔ̀ tsuru. Ye to tsùù n ne kɛ̀nbààbee doùn.

10 Ye ye mun dzugooma xɔù rèè to e duùn, ye nà to tsùù mun ne kɛ̀nbààbee doùn, a ci mun yè n Fa Ŋaablà dzugooma xɔù rèè tou n duùn nìi tsuru, min bà ni tsuù à re kɛ̀nbààbee doùn.

11 Mun tɔ̀ sapɛ deu ye ra, sànko mun ɲan taamadzibee yè ye sa ɲan tsyɛn, tɔ̀ tsuru, ye re taamadzibeè yè bà taamadzibe dzii tsyɛunma.

Yesù ci wò re kàràndzin neè yè e si kɛ̀n

12 Mun nà n dzugooma xɔù nìì reè dè ye ra, tɔ̀ rii siin: mun ye kɛ̀niun nìi tsuru, e sa yeè e si kɛ̀n tɔ̀ tsuru.

13 A xɔɔn sìn a dzunwɛynsi reè kamà, kɛ̀nbààbe pɛn na ni tɔ̀ rii jɔɔn waa.

14 Mun ci ye yè nìi fa, e kpɛynto ye tɔ̀ shi jiì, e mun dzunwɛynsi ì.

15 Mun na ye kir'là faagoofadzin ì dɛ, kàtsu nìi faagoofadzian, tɔ̀ na sɔn tɔɔ̀ e kuntsiɛ̀ rè goo rèè ɲàn waa. Ŋà, mun ye kir'là n dzunwɛynsi ì, kàtsu, mun goo o goo myɛ̀un n Fa Ŋaablà re, mun y'à tou ye yè tɔ̀ sapɛ tɔ.

16 E maà à ji e duùn, ci ye rìì mun boo e jaa ra dɛ. À na tɔ̀ tsuru waa, ŋà, mun nì ye boo n jaa ra. Mun tɔ̀ fau nì, sànko, min ye ka bè Ŋaablà re faagoò rà, faagoo nìi nàfa na do jàa waa. Tà tsuru, ye nà gè o ge gaa Fà Ŋaablà re mun tsoo ka, à nà tɔ̀ fa ye re.

17 Tà doùn, mun ci ye yè nìi fa, tɔ̀ rii yɛ, ye e si kɛ̀n.

Yesù ko e re kàràndzin neè goò xɔ dziɲan ma

18 Dziɲan ye ba ye goo xɔbee e yɛrɛ ma, ye ɲɛn à ra, ci à mun goo xɔbe dɔun e ma ye jɔɔn.

19 Ye yè bà na dziɲan raa, ye goo na nà dzibe dziɲan na, kàtsu ye y'à raa. Ŋà, ye na dziɲan raa nìi fa waa, mun to ye ɲankɛrɛn bou à ɲan n jaa ra, tɔ̀ rii kamà, ye goo yè bà xɔ dziɲan ma.

20 Mun gooma niì dèu ye ra, ye e taa to tɔ̀ re, mun dziun ye ra ci: <Faagoofadzian na blà e kuntsiɛ̀ mà waa>. Yè ba byɛnbe ɲɛun mun tsɛ, è nà byɛnbe ɲɛn ye sa tsɛ. Yè ba mun ne goomaa tou e duùn, è nà ye raà sa to e duùn.

21 Àwà, è nà twɛy goo rèè sapɛ faa ye ra mun kamà, kàtsu mòò riì mun ka naɔ, è na tɔ̀ tsìfa tɔ̀ waa.

22 Mun ma ba na nàu, mun to mà bà na goomau è ka, gooɲaan tsii goo fa ni siin è vu ra waa. Dòònun, mun to nàu min gooma è ka do, yɛ̀rɛ̀ tò goòmà na ni à ɲan è re gooɲaan tsiɛ kamà dɛ.

23 Mòò riì mun goo xɔbee e yɛrɛ ma, tɔ̀ tsìfa mun Fà Ŋaablà sa goo xɔbee e yɛrɛ ma.

24 Mun ma ba na goo ì fau è fi, mòò na nìì reè tsuru fa ja ŋe fyeu, gooɲaan tsii goo fa ni siin è vu ra waa. Dòònun, è twɛy goo rèè jàu. Ŋà, è jàumaà ko e raà sa, arì she, è mun ko n Fa Ŋaablà sa goo xɔbee e yɛrɛ ma.

25 Àwà, tɔ fau nì, sànko, gooma niì sɛbɛɔ̀n è re Sàrìyaa kìtaabuà doùn, tɔ̀ yeè bo e shi tsɛ, nìi yɛ ci:

È mun goo xɔbeu e yɛrɛ ma kùn bɛy.

Yesù ci Dzwɛ̀mabaà nà nà

26 Mun nà Dzwɛ̀mabaa nìi ka na ye re, è bo Fà Ŋaablà re, nìi Ŋaablà re Dzi saàbèntsià, tɔ̀ ye na nà watsi riì bwèy, à nà mun shɛɛrɛbe fa.

27 Tà tsuru nìi ye, ye sa nà mun shɛɛrɛbe fa, kàtsu, fɔ goo rèè dzii kun bwèy, ye na ni mun ka.