Jean 5

Yesù mùrùkù kpir'là cɛrɛmabeu ɲànwɔ siɛ̀ mà min niì

1 Ayìwà tà shɔ̀ùn, sɛrɛ sɔn na ni dzyèèsìbee mòdzin neè rè. Tɔ̀ sɛr'là jaaravià doùn, Yesù yè tèyn dɔ̀n be Yerusalɛmùn.

2 Yerusalɛmùn wɔ̀ɔ̀ raa dɔ̀nmà dzii sɔn na ni, è tɔ̀ kir'là, Sàà rèè raa Dɔ̀nmà dziɛ. Tɔ̀ dɔ̀nmà dziɛ tààkuùn kɔ̀ɔ̀ sɔn na ni, yuà ni tɔ̀ doùn. Mòdzian yè e foo mɔn, è bè làndà shià tsɛ. Tɔ̀ kɔ̀ɔ̀ kir'là dzyèèsìbee mòdzin neè rè kungoòmàà ɲàn, ci Betɛsidà. Fààkɔ̀r'la nùn na ni tɔ̀ kɔ̀ɔ̀ dziɛ kpɛyn y'à laguru.

3 Awà, ɲìnìnkɔɔn giri na ɲɛn ɲɛn beò twɛy fààkɔ̀r'la rèè dzuun. Jaana ì ni, sànsɔn ì ni, mùrùku ì yè bà ni. [Twɛy na e ɲɛɔ̀n mɔn, yè kɔ̀ɔ̀ doùn yua bùùbuu watsia rìì màshua.

4 È na tɔ̀ màshua, kàtsu, Tsìfaà rè mɛ̀rɛ̀kɛ sɔn na ni, tɔ jàa yu rɔ̀n watsi reè swey ɲàn, à y'à bùùbuɔ̀. Yuà bùùbuuŋmaà shɔ̀ùn, ɲìnìnkɔɔn niì jɔ̀na ye jaà à ɲan, ɲìnìn kun o kun ni n'a na, tɔ̀ y'a cɛrɛmabeuma.]

5 Twɛy ɲìnìnkɔɔn reè ɲàn, kpiri sɔn na ni, tɔ ɲìniɔ̀n, tɔ̀ y'a jii moò tsyeùn ko dzin ŋaalòn.

6 Yesù tɔ̀ kpir'la ɲɛunma jàu min niì, à y'à tɔ̀u nìi fa, ci à watsi gbaan faɔ̀ ɲìn'nà nà, à y'à tey ci: «Wo n'a re w'e cɛrɛmabe o ?»

7 Ɲìnìnkɔɔn yè dzin Yesù rà ci: «Tsìfaà, yuà ye buùbuu min niì, mòò na ni mun ne, nìi nà mun sen ji à ɲan waa. Mun nà dzin ci mun jàaŋ min niì, tɔ mòò kpɛrɛ jàaŋma mun jɔɔn.»

8 Yesù yè dzin à ra ci: «Fù, a re boò sen, e jìì.»

9 Tɔ̀ nɔ̀nkɔɔ rɔn, kpir'la yè cɛrɛmabe, è re boò sen, è maa è jìì beè.

Tɔ̀ goò fau jisee riì mà, tɔ̀ na ɲànwɔ sii.

10 Dzyèèsìbee mòdzin neè jɔɔndzin neè tɔ̀ kpiri cɛrɛmabeumaà jàu min niì, yè dzin à ra ci: «She ɲànwɔ sii rìì, à na dàaŋnà, wo y'à re boò sen waa.»

11 Kpir'la yè dzin è ra ci: «Mòò riì mun cɛrɛmabeu, tɔ dziun ci mun yè n ne boò sen, min jìì.»

12 Y'à tey kɔn ci: «Tsì rii soo dziun wo ra, ci wo y'à re boò sen, wo yè jìì ?»

13 Ŋà, mòò riì soo kpir'la cɛrɛmabeu, à naà tɔ̀ tsìfa tɔ̀ dɛ, kàtsu jàmaà giri nìi fa, Yesù na boo mɔn nòn è geren.

14 Tà shɔ̀ùn, Yesù nàu tsi kpir'la ka Ŋaablà re gbà blàa rà, è dzin à ra ci: «A kpɛyn cɛrɛmabeu, ŋà, a yɛrɛ kun, a maà nà fa bɛy fa, nìi dzia nà goo xɔù kpɛrɛ ka a ma, è geren nèe tsɛ waa.»

15 Kpir'la tɔ̀ myɛ̀un, è bè dzin dzyèèsìbee mòdzin neè jɔɔndzin neè rà, ci Yesù rìì wò cɛrɛmabeu.

16 Twɛy yè e shi Yesù rà, yè jaa gaa, ci ye nà gooɲaan fa à ra, ci à dzùrùma mòò cɛrɛmabeò ɲànwɔ siɛ̀ mà.

17 Àwà, Yesù yè dzin è ra ci: «Mun Fàà ni tsuù faagoò rà fɔ è bè suu dòònun dzu, mun sa to ni faagoò rà.»

18 Tɔ̀ goomaa kamà, Yesù gaa yè cèè dzyèèsìbee mòdzin neè jɔɔndzin neè rè, ci fɔ y'a vu. È ci à na ɲànwɔ siɛ̀ latsuuŋnà e raa goo rèè ka waa, è bà e gɔɔ̀n Ŋaablà ka, ci tɔ wò Fà.

19 Yesù yè goomaa sèè sen tɔ̀un, è dzin è ra ci: «Sààben na, mun nì ci e ra, Dzin Kpirimaa na dzia goo sɔn pɛn fa e yɛrɛ waa, è nìi fakɔɔn ja e Faà rè boshɔ̀ùn. Fàmaa nà goo o goo rìì fa, Dzin Kpirimaa sa tɔ̀ soo rìì faa,

20 kàtsu, Dzin Kpirimaa goò dzi Fàà rà, à yɛ̀r'la to goo o goo faa, à tɔ̀ kpàdèe Dzin Kpirimaa nà. À nà goo kpɛrɛ ì kpàdè à ra, ci à y'à fa, nìì reè blà nèe mà, twɛy nà ji ye dzii tsɛ fɔ è bè geren.

21 Àwà, Fàmaa fùn nèè sèè kpunaàn, è jaamabee sìn è ra nìi tsuru, tɔ̀ fau'n kuru soo rà, Dzin Kpirimaa n'a re è jaamabee sìn nìì reè rà, à sìan twɛy rìì là.

22 Fàà na mòò pɛn kitsia waa. A kitsia goò sapɛ wɔɔ Dzin Kpirimaa nì suun,

23 sànko mòdzian sapɛ yeè Dzin Kpirimaa blàbe, a ci è Fàmaa blàbee nìi tsuru. Mòò riì ma Dzin Kpirimaa blàbe, Fà rìi y'à ka nau, à tsìfa na tɔ̀ rii blàbe waa.

24 Sààben na, mun nì ci e ra, mòò o moò yè e toro wɔɔ mun ne gooma reè rè, Fà rìi mun ka naɔ è ɲɛn tɔ̀ ra, tɔ̀ tsìfa jaamabe dziù dòbɛɛ tàrau. Kitsi fa kùnùn à tsìfa tsɛ dɛ, à to bou saàn ɲàn, è dɔ̀n jaamabee ɲàn nòn.

25 Sààben na, mun nì ci e ra, watsi nàa watsi ra, à yɛ̀rɛ̀ to yè bà wɔɔ nòn sa, mòdzin saunma rèè nà Ŋaablà Dzin Kpir'la vuà myɛ̀n, nìì reè to nà à myɛ̀n yè ɲɛn à ra, twɛy nà jaamabee fa.

26 Jaamabee ni Fàà ɲàn nìi tsuru, à y'à sìun Dzin Kpirimaa nà, è bà ni tà sa ɲan tɔ̀ tsuru.

27 Awà, à kitsi kun'na dzi siun Dzin Kpirimaa nà, kàtsu, à Adamà dziàn.

28 Tɔ mà ji e dzii tsɛ waa, kàtsu watsi nàa watsi ra, mòdzin saunma nìì reè sapɛ ni kɔ̀ɔ̀ doùn, twɛy nà à vuà myɛ̀n,

29 yè bo. Tà doùn, nìì reè goowùɔ fau, twɛy nà sèè kpunan bo saàn ɲàn, yè jaamabee tàrà, nìì reè to gooɲaan fau, twɛy nà sèè kpunan bo saàn ɲàn, kitsia yè mɛɛy è tsɛ.

Yesù ci goo nìì reè wò shɛɛrɛbe faa

30 Mun yɛ̀r'la na dzia goo sɔn pɛn fa n yɛrɛ ma waa. Fà Ŋaablà ye nìi dè mun na, mun naa kitsia kùn'na tɔ̀ rii tsɛ, mun ne kitsia to tereòn. À tereòn, kàtsu mun na n yɛr'la raa sàɔ gaa dɛ, ŋà, mòò riì mun ka naɔ, mun tɔ̀ raa sàɔ rìì gaa.

31 Mun nì ye ba n yɛrɛ shɛɛrɛbe faa, mun ne shɛɛrɛbee na ni fààn ka waa.

32 Ŋà, mòò kpɛr'lì mun shɛɛrɛbe faa, mun to y'à tɔ̀, ci à mun shɛɛrɛbe riì faa, tɔ sààben ni.

33 Nìi ye, ye kɛɛra ì ka bèu Mòdzìn Jààràfoobaa Yùxanà rè, à to sààbeen shɛɛrɛbe fau.

34 Mòdzin yeè bà ni mun shɛɛrɛbe fa, mun màgoo na ni tɔ̀ ra waa. A y'a jà min Yùxanà raa goò dè, mun tɔ̀ fau nì, sànko ye yè tsi bo e re gooɲaan tsiɛ ɲàn.

35 Yùxanà kpɛ̀yn, tɔ bàu a ci fìtsina, à dzu wɔɔ̀, è vyevyeè bo ji. Ŋà, ye yè e tsiiŋ, ye yè e taama dzibe à vyevyeè rà, watsi dɛɛnin bàsɔùn nì doùn.

36 Àwà, nìi mun, shɛɛrɛbe ni mun ne, nìi vùn Yùxanà raà mà. Tà doùn, Fà Ŋaabla goo nìì reè dzi siun mun na, ci mun yè è faa, twɛy goo rèè yɛ̀r'la mun shɛɛrɛbe faa. Y'à kpàdèe, ci Fà Ŋaablà rii mun ka naɔ.

37 Fà Ŋaablà riì to mun ka nau, tɔ mun shɛɛrɛbe fau. Ye na e toro wɔ jà à vuà rè ŋe, ye to na à jaakɔrɔn jà jà ŋe.

38 Nìi to y'à re goomaa, tɔ̀ na ni ye ɲan waa, kàtsu à nìi ka nau ye na ɲɛɔ̀n tɔ̀ ra waa.

39 Ye Kìtaabuà doùn gooma reè kàr'na, y'a ɲan siin cɛyn, kàtsu y'a siɛ̀n ci ye nà jaamabe dziù dòbɛɛ tàrà twɛy rìì ɲàn, tɔ̀ to y'à tàrà, twɛy rìì mun ne goò shɛɛrɛbe faa.

40 Tà ko e sa ra, ye sàò na ni ye yè nà mun na, ye yè bà ni jaamabe takia tàrà waa.

41 Mun na gaa modzin ì yè blàbe ɲɛn mun tsɛ waa,

42 kàtsu mun ye tɔ̀. Mun y'à tɔ̀ ci Ŋaablà kɛnbààbee na ni ye ɲan waa.

43 Mun naɔ̀ n Fa Ŋaablà rii tsoo ra, ye to na e tsiì mun na waa. Ŋà, mòò kpɛrɛkuru ye na e yɛr'la tsoo ra, ye nà e tsiì tɔ̀ ra.

44 Ye dzia ɲɛn mun na dzùrù ! Ye ko e si fi blàbee, ye tɔ̀ rii gaa, blàbe riì to boo Ŋaablà soo pe re, ye na tɔ̀ gaa waa.

45 E maà à siin, ci mun nì nà jàà ye ra n Faà jaa ra waa. Mòò riì nà jàà ye ra, tɔ kɛɛra Musà rìì. Ɔ̀ɔn, ye yè e si ɲɛun tɔ̀ Musà nìi tsɛ, tɔ̀ rii nà jàà ye ra.

46 Ye ye ba na ɲɛɔ̀n Musà rà taki, ye na nà ɲɛn mun sa ra, kàtsu, tɔ mun naa goò rìì dèu e re Kìtaabuà doùn.

47 Ŋà, kɛɛra Musà nìi sɛbɛun mun ne goò ɲàn, ye ma ba dziu ɲɛn tɔ̀ ra, ye nà dzi ɲɛn mun ne gooma reè rà dzùrù ?»