Yesù nìi dèu furu saan tsɛ
10
1 Àyìwà Yesù yè bo mɔn tà shɔ̀ùn, è dɔ̀n bè Yude mar'la ɲàn, Yuridɛn baa kɛ̀yn nɔn. Jàma brìsi yè bè e ladzyèè à tɛyn mɔn kɔn yeu. Tɔ̀un à yè è kàr'na, a ci à dɛ̀rɔɔ̀n à y'à faa nìi tsuru bɔrɔɔ.
2 Faridziɲɛn rèè yè nà e kpɛrɛ̀, twɛy y'à tey, è ba dàaŋnà kpir'la yè e re tààn furu san. È na à dzuun bomà nì gaa tɔ̀ goomaa ka.
3 Yesù ci e ye è latsi, è tey ci: «Kɛɛra Musà fee rìì dèu ye ra, ci y'a fa ?»
4 È ci: «Musà y'à shi siun, ci e ba taàn bàjia, e furu san sɛbɛ̀n fa, a bàji tɔ̀ ka.»
5 Ŋà Yesù yè dzin è ra ci: «A y'a jà Musà yè tɔ̀ dzugooma xɔɔ̀ dè tsùù, à tɔ̀ fau ye re tantaama xɔbeè rìì kamà.
6 Tà boshɔ̀ùn, fɔ dziɲaan jɔ̀n bwey, Ŋaablà yeè ɲɛun kpiri ko tàan.
7 Tɔ̀ kamà, è dè ci: "Kpir'la nà e faà ko e naà bàto, [è shi e re tààn nà.]
8 Tɔ̀ tsuru è fiɛ̀ nà bà gɔn kungɔ soo." È na fii dɛ, ŋà è bàu soo.
9 Tà doùn, Ŋaabla nìi bàu soo, moo mà tɔ̀ bo e si ra waa.»
10 Àwà, Yesù ko e re kàràndzin neè nàu e kpɛyn sèè tsii rɔ̀n watsi riì bwèy, kàràndzin neè y'à tey tɔ̀ goò mà kɔn.
11 È dzin è ra ci: «Mòò riì yè e re tààn bàjia è kpɛrɛ furu, jɔ̀naà kamà, tɔ ɲànmɔ̀ɔ̀be rii faa.
12 Taàn to ye bo kpir'la rè è bè furu kpɛr'le, à sa ɲànmɔ̀ɔ̀be rii faa.»
Yesù dzwɛ jiu dziin nèè rà min niì
13 Àyìwà, tà shɔ̀ùn, swey yè nà dziin nèè swey ka Yesù rè, è bà ni e sià tsùù è tsɛ, è dzwɛ ji è ra. Kàràndzin neè yè fù fù twɛy mòdzin neè kpɛyn.
14 Yesù tɔ̀ goò jàu min niì, è dɔ̀n à kpɛyn. È dzin kàràndzin neè rà ci: «Y'a to dziin nèè yè nà n na, e maà è jɔɔn kunùn nàà tsɛ waa. Nìì reè ni è tsuru, Ŋaablà re Màsàbee twɛy rìì laa.
15 Sààben na, mun nì ci e ra, mòò o moò ma e tsiì Ŋaablà re màsàbee rà a ci dziin kòòmɛ̀yn, tɔ̀ tsìfa fa dɔ̀n à doùn byɛ.»
16 Yesù yè dziin nèè sen kuàn e suun tɔ̀un, è sià tsùɔ è tsɛ, è dzwɛ jia è ra.
Yesù ci gètsià dɔn ɲan Ŋaablà re màsàbee doùn
17 Àyìwà, twɛy goo rèè sapɛ shɔùn, Yesù ko e re kàràndzin neè yè shia kun kɔn. À yè è to shia tsɛ, kpiri sɔn yeè vwɛ̀ɛ̀y na, è nà e kunun gban Yesù bììn, à y'à tey ci: «Kàrànfa wùù, mun wù min fee rìì fa, min dzi jaamabe dziù dò bɛɛ tàrà ?»
18 Yesù ci à ra ci: «Feera wo yè bà mun kir'là kàrànfa wùù ? Ŋaablà soo boshɔ̀ùn, mòò pɛn na wù waa.
19 Wo Ŋaablà dzugooma xɔù rèè tɔ̀: "Maà mòò vu, maà ɲànmɔ̀ɔ̀be fa, maa shɔnbe fa, maà doò wɔ mòò rà, maà mɛɛy mòò tsɛ, a faà ko a naà blàbe."»
20 È dzin Yesù rà ci: «Kàrànfaà, fɔ mun dziin koomɛynkɔɔn nà, mun nèe sapɛ shi jiɛ.»
21 Yesù y'à siin to kɛ̀nbààbe ka tɔ̀un, è dzin à ra ci: «Goo soo wo fɔɔn ŋe. B'à suun ge reè sapɛ gɔɔ, a ɲɛɛn sìn gbakɔɔn reè rà. Tɔ̀ tsuru, nàforo bla nà bà màraɔ̀ wo re jìrànxɔ rɔ̀n. Tà shɔ̀ùn, e nà a gban n kpɛyn.»
22 Kpir'la tɔ̀ goomaa myɛ̀un min niì, tɔ̀ y'a jaakɔrɔn kùùn. À taama ŋununbeuma yè geren, kàtsu à na gètsi blà.
23 Àwà Yesù yè siin fa e lagur'la ɲàn tɔ̀un, è dzin e re kàràndzin neè rà ci: «Gè ni nìì reè suun, twɛy dɔn ɲan Ŋaablà re màsàbee doùn dɛ !»
24 Yesù twɛy gooma niì reè dèu, tɔ̀ yeè kàràndzin neè shi. Yesù yè sèè kɔn, è dzin è ra ci: «N dzin ì, Ŋaablà re Màsàbee doùn dɔ̀ɔ̀n ɲan dɛ !
25 Ɲɔ̀ɔ̀nmɛɛ̀n yè dɔ̀n mɔnsɛyn kɔɔ rè, tɔ̀ fa dzi gètsià dɔ̀ɔ̀n mà Ŋaablà re Màsàbee doùn.»
26 Tɔ̀ goò yè ji kàràndzin neè dzii tsɛ fɔ è bè geren. Yè dziàn e si ra ci: «Tsì rii soo to dzia tsi sa ?»
27 Yesù yè è siin to, è dzin ci: «Mòdzian rè à fa dzi fa waa, ŋà Ŋaablà re, à dzia fa, kàtsu, goo sɔn pɛn na Ŋaablà jaan waa.»
28 Tɔ̀un, Piyɛrì yè dzin à ra ci: «Ɲe do ? Ɲe gèè sapɛ batou, ɲe yè e gban wo kpɛyn.»
29 Yesù yè dzin ci: «Sààben na, mun nì ci e ra, mòò riì nà e re gbàà bàto, tàmafa e tseyn nèè, ko e tsinà rèè, tàmafa e naà, tàmafa e faà, tàmafa e dzin nèè, tàmafa e re dzù rèè, mun ko Kùnàgoo Dziɔ̀ kamà,
30 tɔ̀ tsìfa nà twɛy gè rèè tsuru càànmoò mòò tàrà mìin dziɲan ree doùn. À nà gba ì tàrà, è tseyn ko tsina ì tàrà, è na ì tàrà, è dzin ì tàrà, è dzu ì tàrà, è byɛnbe ì sa tarà. Watsi nakɔɔn doùn, è jaamabe dziù dò bɛɛ tàrà.
31 Àwà jɔɔndzin giri nà bà bònèdzin, bònèdzin giri yè bà jɔɔndzin.»
Yesù yè e saàn ko e seè kpunaàn gooma deu min niì kɔn
32 Àyìwà, è Yesù ko e re kàràndzin neè to shia tsɛ, yè bà tèyn beè Yerusalɛmùn, Yesù na e jiɔ̀ è jɔɔn. Kàràndzin neè duungoo na dòoŋnà, è kpɛyn jììbaa rèè sa yeè bà shiɔ̀. Yesù yè kàràndzin teeŋ fiɛ̀ kiri bo e si kɔn yeu, goo nìì reè nà à tàrà, è bè e maa, è twɛy jaa dèe è ra.
33 À ci è ra ci: «Mùn tèyn bekɔɔn yɛ Yerusalɛmùn nèe. Mìn be dzi mɔn, mòo nà Adamà dziàn wɔ saaka jɔɔndzin neè ko sàrìyà kaamoo reè suun, twɛy yè kitsi mɛɛy à tsɛ, ci è vu. E to nà à wɔ kun kpɛrɛ mòdzin neè suun.
34 È nà à ɲanŋmɛn, yè dzweeyuà fyɛ à tsɛ, y'à dɔrɔ sɛyn ka, y'à vu. Bwèy zhììgi à saunmaà shɔ̀ùn, à nà sèè kpunan bo saàn ɲàn.»
Zhebedè dzin kpiri fiɛ̀ nìi gaaŋ Yesù rè
35 Tà shɔ̀ùn, Yàkubà ko Yùxanà, Zhebedè dzin kpiri fiɛ̀, twɛy yè nà e kpɛrɛ̀ Yesù rà, yè dzin à ra ci: «Kàrànfaà ɲe nà nìi gaa wo re, ɲe sào ni w'e tɔ̀ fa ɲe re.»
36 Tɔ̀ yeè è tey ci: «Ye sào ni min fee rìì fa ye re ?»
37 È ci: «Kàrànfaà, e na bà ni a blabee doùn watsi riì bwèy màsàbee tsɛ, à to ɲe mòò sɔn yè e tsuù a sirama si jaa rè, soo yè e tsuù a ɲɔnmà sì jaa rè.»
38 Yesù yè dzin è ra ci: «Ye nìi gaa, ye na tɔ̀ tɔ̀ dɛ ! Byɛnbe niì nà mun tàrà, tɔ̀ ni dzi ku ye ɲan ɔn ? Mun jaara to nà fòò fòòŋ'n kur'liì rà, ye raà ni dzi foò tɔ̀ tsuru ɔ ?»
39 È ci à ra ci: «Ɲe nà dzi.» Ŋà, Yesù yè dzin è ra ci: «Byɛnbe niì nà mun tàrà, ye kpɛ̀yn nà dzi tɔ̀ ku e ɲan, ye jaara yeè dzi foò mun naà fòòŋ'n kur'la rà.
40 Ŋà mòò yè bà ni e tsuù mun sirama si jaa, tàmafa mun ɲɔ̀nmà sì jaa rè, tɔ̀ sìàn na ni mun suun waa. À mabyɛ̀n tsùuŋnà nìì reè rè, twɛy rìì nà e tsuù mɔn.»
41 Kàràndzin neè dzyee tsyeòn tɔ̀ goomaa myɛ̀un min niì, tɔ̀ yeè è vunun ta Yàkubà ko Yùxanà kpɛyn.
42 Yesù yè è kiri kpɛ̀rɛ̀ e ra tɔ̀un, è dzin è ra ci: «Y'a tɔ̀, ci nìì reè tsùuŋnà jàmàan rèè kùùn, twɛy yè è màraɔ̀ kùntsììbe ka, jàmaàn mòdzin bla reè yè bà e faan ɲinaɔn jàmààndzin neè tsɛ.
43 Ŋà ye fi, à na wù è bà tɔ̀ tsuru waa. Mòò riì ci wò yeè bà blà dzyee rèè mà ye ɲan, fɔ tɔ̀ yeè e ba è re faagoofadzin.
44 Mòò riì to ni à re wò yeè bà jɔɔndzin ye ɲan, fɔ tɔ̀ yeè e ba è sapɛ re jòn.
45 Àwà, Adamà dziàn na naɔ̀ ci mòò yè faagoo fa à re dɛ, ŋà à naɔ̀ nì, ci è faagoo fa mòdzian rè, tà ko è xɔɔn sìn, à y'à ka mòò giri kùngɔ màbo.»
Yesù jaana kpiri Baritsimè cɛrɛmabeu min niì
46 Àyìwà, Yesù ko e re kàràndzin neè yè bè dzi Yerikò wɔ̀ rɔ̀n tɔ̀un. È bokɔɔn wɔ̀ɔ̀ doùn, jàma brìsi na gbaɔn è kpɛyn. Tɔ̀ y'a tàrà jaana kpiri sɔn sa na tsùuŋnà mɔn shi dziɛ rè, tɔ̀ yeè bà fyɛ̀yn faa. Tɔ̀ tsoo Baritsimè, à fàà tsoo yè bà Timè.
47 Àwà, tɔ̀ jaana kpir'là toro jiu à ɲan min niì ci à Nazarɛtsika kpiri Yesù rìì dɔ̀nkɔɔn, è maa, è dziàn fààn na ci: «Màsà kpiri Dawudà tsua dzin Yesù, a yɛrɛ to e màtsuru n na.»
48 Ŋà mòò giri yè fù à kpɛyn, sànko è bà ni e mɛnshɛ̀n. À sa yeè sɔn ba e vuà tɛ̀y arì she ci: «Màsà kpiri Dawudà tsua dzin Yesù, a yɛrɛ to e màtsuru n na.»
49 Yesù yè e tsiì tɔ̀un è dzin ci: «Y'a kiri na.» Y'à kiri, yè dzin à ra ci: «A akiri tsùù, e fù, à wo kir'là.»
50 Jaana kpir'là yè e re mɛ̀yɛ blaa bo maa tɔ̀un, è tsyɛn fù, è bè Yesù rà.
51 Yesù y'à tey ci: «Wo sào ni min fee rìì fa wo re ?» À ci: «Kàrànfaà, min jɛ̀y fa !»
52 Yesù yè dzin à ra ci: «Bèe, wo ɲɛunmaà mun na, tɔ wo cɛrɛmabeu.» Kpir'la yè jɛ̀y fa tɔ̀ nɔ̀nkɔɔrɔn, è shia kun Yesù ka.