Matthieu 14

Yùxanà vuu kùn nìi nà

1 Àyìwà tɔ̀ watsi rɔn, màsà kpir'lìi na ni Galile mar'la tsɛ, tɔ̀ tsoo yè bà Erodzì Antipasì, Yesù goomaa yè dzi tɔ̀ tsɛ.

2 Tɔ̀un, è dzin e re faagoofadzin neè rà ci: «Nèe Mòdzìn Jààràfoobaa Yùxanà nì. Wò rii kpunan boo fùn nèè fi. Tɔ̀ rii kamà, è bà dzia kabagoo goo reè faa.»

3-4 Ayìwà, Erɔdzi keresi riì tsoo na Fìlipù, tɔ̀ re tààn Erodiyadzì, Erodzì na tɔ̀ tsiɔ, à y'à bà e re tààn. Tɔ̀ faumaà kamà, Yùxanà na dziàn à ra ci: «Tàan rèe na dàaŋnà è bà wo re tààn waa.» Àwà tɔ̀ goomaa kamà, Erodzì na Yùxanà kuɔn à y'à shì, a y'à ji kàsoò doùn.

5 À sàò na ni à re, wò yeè Yùxanà vu. Ŋà, à na shiɔ̀ jàmaà jɔɔn, kàtsu è sapɛ na ci à Ŋaablà re kɛɛra.

6 Àwà, Erodzì kere jisee jii laker'la sii sèè, Erodiyadzì dzin taan yè ɲɔɔ̀n ji jiu'n kur'la, mòdzin kiriuma rèè jaa ra, nìi dzibeu Erodzì rà,

7 fɔ è bè wɔ è kɛɛ̀y, ci è gè o ge gaa wò re, wo nà tɔ̀ sìn à ra.

8 Àwà à naà rè duunwɛyn doùn, è dzin Erodzì rà ci: «Mòdzìn jààràfoobaa Yùxanà kùngɔɔ̀ sìn n na mìin tasa doùn.»

9 Tɔ̀ goò na màsà kpir'là taama dzibe waa. Ŋà à kɛ̀rɔumaà kamà, ko mòdzin kiriuma rèè sa kamà, è dzin ci è sìn à ra.

10 È mòò ka tɔ̀un, tɔ̀ yeè bè Yùxanà kùngɔɔ̀ kùnùn kasoò doùn.

11 Tɔ̀ yeè nà à ka tasa doùn è sìn cangur'la rà, tɔ̀ sa yeè b'a sìn e naà nà.

12 Yùxanà rè kàràndzin neè yè b'a fuàn sen tɔ̀un, yè b'a wɔ. Tà shɔ̀ùn, yè b'a dè Yesù rà.

Yesù ɲwɛɛ̀n sìun kpiri gbaa nùn nà min niì

13 Yesù tɔ̀ goomaa myɛ̀un min niì, è konkoron sen è bo mɔn, è dɔ̀n bè jènjàà koron sɔn doùn, à dan nà bà gbàn min niì. Tɔ̀ tɔ̀umaà jàmaà rè, yè bo wɔ̀ rèè ɲàn, yè dɔ̀n be à kpɛyn e san nà.

14 À bèu bo konkor'na doùn min niì, è jàma brìsi jà. Àwà è màtsuru y'a kun fɔ è bè geren. Tɔ̀un è ɲan ɲìnìnkɔɔn reè, è twɛy cɛrɛmabe.

15 Ɲɛ̀rɛɛ̀rà wɔu, à re kàràndzin neè yè e kpɛrɛ à ra, yè dzin à ra ci: «Mùn ni gàne rìi ɲàn, à jènjàà kor'nì, dzɔɔ̀n to gaa tsì nòn. Jàmaà bàji be mùn dzii re wɔ rèè ɲàn, yè ɲwɛyn fì ɲɔn.»

16 À ci è ra ci: «È bè kun na ni jeenà waa. Ye yɛ̀r'leè yè è kɔ̀ ɲwɛyn y'à ɲɔn.»

17 È ci: «Gèsɔn na ni ɲe re mìin, buru kunun nun, ko ji dzin fii tɛ̀y waa.»

18 À ci: «Ye twɛy sìn mìin.»

19 Tɔ̀un, à y'à gaa jàmaà rè, ci yè e tsuù vuàn tsɛ. Tà shɔ̀ùn, è buru kunun nuàn ko ji dzin fii rèe tsi, è jaà ɲansen jiran kèrè, è baraka sìn Ŋaablà ra. È bur'leè tara tara tɔ̀un, à y'à wɔ e re kàràndzin neè suun, twɛy y'à sìn jàmaà nà.

20 È sapɛ y'a ɲɔn yè cɛn. À dzyee kùnkwììn touma rèè, yè sèè teeŋ fii tsyɛn twɛy rà.

21 Nìì reè tɔ̀ ɲwɛɛ̀n ɲɔun, kpir'leè na gbaa koron nùn boò, tàan rèè ko dziin nèè na daɔn waa.

Yesù jìiŋ yuà tsɛ min niì

22 Tɔ̀ nɔ̀nkɔɔrɔn, Yesù y'à ji e re kàràndzin neè jɔɔn, ci yè dɔ̀n konkor'na doùn, yè maa be wò jɔɔn yu blàa kɛ̀yn nɔn, sani wò yeè shi sin dò jàmaà nà.

23 À re shia sìn dòumaà shɔ̀ùn jàmaà nà, è tèyn be jèn sɔn tsɛ e soone, è be Ŋaablà mafyɛ̀n. Dzɔɔ̀n yè tsì, à soo yeè bà ni mɔn ŋe.

24 Tɔ̀ y'a tàrà, konkor'na dàn na gbàn kpee rà nòn, è bà tsià fyɛɛn mà. Tɔ̀un, yuà pàngòpangokɔɔn yè konkor'na fìfaa min niì sapɛ.

25 Feèn ci e ye wɔ tsɛ̀kèn ben bwey mà, Yesù yè fù, è jìì beè yuà tsɛ, kàràndzin neè kpàkèrè.

26 Y'à jìì nakɔɔn jau yuà tsɛ min niì, è akiri yè fù. È ci à ɲɛyn. È shi ɲaanfaa suun, yè gɛɛ boò.

27 Tɔ̀ nɔ̀nkɔɔrɔn, Yesù yè gooma è ka ci: «Ye e akir'là tsùù, à mun nì. E maà shi waa.»

28 Piyɛrì y'à latsi ci: «Tsìfaà, è ba wo rìì taki, dzin min b'à kpa yuà tsɛ.»

29 Yesù ci: «Nà.» Piyɛrì yè jàà bo konkor'na doùn tɔ̀un, è maa, è jìì beè yuà tsɛ Yesù kpà.

30 À nàu à jà fyɛɛn blà geren, è shi. À shiu min niì, è maa, è jàà beè yu rɔ̀n. Tɔ̀un è gɛɛ bo ci: «Tsìfaà n tsi !»

31 Tɔ̀ nɔ̀nkɔɔrɔn, Yesù yè e sia foro, à y'à kun, è dzin à ra ci: «Wo ɲan ɲɛynaà dzyɛ̀n dɛ, feera wo y'à ciri ?»

32 È fiɛ̀ sa yeè dɔ̀n konkor'na doùn tɔ̀un. È dɔ̀un min niì, fyɛɛn yè e tsiì.

33 Nìì reè ni konkor'na doùn, yè kunun gban à bììn, yè dzin à ra ci: «Sààben na, wo rìì Ŋaablà Dzin Kpir'la taki.»

Yesù ɲìnìnkɔɔn reè cɛrɛmabeu min niì Genezarɛtsì

34 Àyìwà Yesù ko e re kàràndzin neè yu blàa fuuŋ tɔ̀un, yè dzi Genɛzarɛtsi mar'la ɲàn.

35 Twɛy mòdzin neè y'à tɔ̀u min niì ci à Yesù rìì nàuma, y'à dè be e si ra tɔ̀ gàneè min niì sapɛ. Tɔ̀un ɲìnìnkɔɔn ge o ge ni mɔn, yè nà è sapɛ ka à re.

36 Yè Yesù màfyɛ̀ɛn, ci à y'à to ye yè e dzyɛn à re vyaà dziikuan bàsɔùn nà. Nìì reè sapɛ yeè e dzyɛun à ra, twɛy sapɛ yeè cɛrɛmabe.