Matthieu 12

Yesù ci wò rii ɲànwɔ siɛ̀ tsìfaà

1 Àyìwà tɔ̀ watsia ɲàn, ɲànwɔ sii sɔn ma, Yesù ko e re kàràndzin neè na dɔ̀n boò shìmàn dzu swey ɲàn. È dɔ̀nkɔɔn, dzu na ni kàràndzin neè rà. Tɔ̀un, yè e maa, yè shìmàndzin neè swey kɛɛ̀, y'à tàa.

2 Faridziɲɛn rèè tɔ̀ jàu, yè dzin Yesù rà ci: «Nìi na dàaŋnà è fa ɲànwɔ siɛ̀ mà waa, wo re kàràndzin neè yɛ tɔ̀ faa.»

3 Yesù ci è ra ci: «Dzuà màsà kpiri Dawudà ko e dzyeèsi rèè kuun sii rìi sèè o, à nìi fau ye na tɔ̀ kàràn kɛɛra reè rè goomaa doùn gbɛ ?

4 Buru niì reè sìan Ŋaablà ra kɔ̀ì ge, à na dɔn Ŋaablà re gbàà doùn yè twɛy sen ɲɔn ɔn ? Tɔ̀ to y'à tàrà, saaka goojaa bo reè boshɔ̀ùn, à naà dàaŋnà mòò pɛn yè twɛy bur'leè ɲɔn waa. Tà doùn, Dawudà ko e dzyeèsi rèè pɛn naà wù y'à ɲɔn waa.

5 Tɔ̀ nìn yè bo à ra, ye na à kàràn Tàworataà doùn, ci saaka goojaabobaa nìì reè faagoò faa Ŋaablà re gbà blàa doùn, ci twɛy na ɲànwɔ siɛ̀ tsùùra ɔ ? Tɔ̀ sɔn to twɛy bàa fìrìgòòtsi ɔ ?

6 Àwà mun nì ci e ra, moo ni mìin, nìi blà Ŋaablà re gbà blàa mà.

7 Gooma niì yɛ nèe ci:

Sani ye saaka bo mun ne, ye màtsuru. Mun gaa tɔ̀ rii là,

ye ye ba na tɔ̀ dzuɔn tɔ̀, ye fa ni kitsi mɛɛy fìrìgòò bɛy reè tsɛ.

8 Àwà ɲànwɔ siɛ̀ Tsìfaà, tɔ Adamà dziàn nì.»

Yesù kpiri si sɔn saunma sɔn cɛrɛmabeu min niì

9 Tà shɔ̀ùn, Yesù yè bo mɔn, è dɔ̀n be è re Ŋaa blabe gbaà doùn.

10 Kpiri sɔn na ni mɔn, tɔ̀ raa si sɔɔ̀n saɔn. Yè Yesù tey tɔ̀un ci: «A dàaŋnà e mòò cɛrɛmabe ɲànwɔ siɛ̀ mà ɔ̀ ?» È tɔ̀ teè fau nì, sànko yè jààma jà à ra.

11 È dzin è ra ci: «Sàà dzin soo pe yeè bà ni ye sɔn ne, è mɛɛy kɔ̀ɔ̀ doùn ɲànwɔ siɛ̀ mà, à tsìfa fa à sɔ̀ɔ̀n bo o ?

12 Mòdzian ko sàà do, mòdzian na fyan sàà mà peu ɔ ? Tà doùn, goowùɔ dàaŋnà è fa ɲànwɔ siɛ̀ mà.»

13 Tɔ̀un, è dzin kpiri si sɔn saunmaà nà ci: «A sià foro !» Kpir'la yè e sià foro. Tɔ fau, sià yè cɛrɛmabe soo tsuru.

14 Faridziɲɛn rèè yè bo tɔ̀un, yè bè e si jà, sànko ye nà dzi Yesù dɔ̀n dzii ra nìi tsuru, ye yè tɔ̀ jaa gaa.

Kɛɛra Esayì Yesù gooma deu

15 Yesù y'à goò jaa tɔ̀u tɔ̀ tsuru, è bo mɔn, è dɔ̀n be. Tɔ̀un, jàma brìsi yè e gban à kpɛyn. Gè o ge na ɲìniɔ̀n, è twɛy sapɛ cɛrɛmabe.

16 Ŋà à y'à dè màxɔbe è ra, ci è mà à to è tɔ̀ wo mòò riì waa.

17 Tɔ fau, sànko kɛɛra Esayì na nìi deò, tɔ̀ yeè bo e shi tsɛ, nìi yɛ ci:

18 «Min n ne faagoofadzin niì boo n jaa ra, nèe wò rii yɛ nèe.

M'a kɛ̀niɔ̀n fɔ è bè geren, è bà dzi mun xɔɔn nà.

Mun nà n ne Dzia jàà à tsɛ, è terenbee gooma de kun kpɛrɛ mòdzin neè rà.

19 A fa dziira sɔswɛy fa, à sɛ̀ɛ̀y vu fa bo, mòò to fa à vu myɛ̀n shi reè tsɛ.

20 A fa kaan kungɔ sùùruuma kɛɛy waa, à to fa fìtsina màjààkɔɔn dzi waa.

A nà tɔ̀ fa, fɔ goo tereonmaà yè bè bà dzibaa.

21 A tsoò baraka rɔ̀n, kun kpɛrɛ mòdzin neè nà e si ɲɛn à tsɛ.»

Yesù kwey rèè kaa bou bobo kpiri jaana sɔn kpɛyn min niì

22 Tà doùn, yè nà kpiri sɔn ka Yesù rè, tɔ̀ kpir'la kweykɔɔn, à jaana, è bà bobo. Yesù yè kpir'la cɛrɛmabe, è dzi gooma, è jɛ̀y fa.

23 À na jiɔ̀ jàmaà sapɛ dzii tsɛ, yè dziàn ci: «Nèe na màsà kpiri Dawudà tsua dziàn nì fyeu ɔ ?

24 Tɔ̀ goomaa myɛ̀unmaà Faridziɲɛn rèè rè, yè dzin ci: «À ye nèe jà à kwey rèè kaa boò mòdzian kpɛyn, à y'à faa kwey rèè kùntsii blàa rìì baraka ɲan, tɔ̀ niì kir'là Baalizhebulì.

25 Yesù yè è duungoo tɔ̀ nìi fa, è dzin è ra ci màsàbee gè o ge, è dzi tara nòn, à xɔ rìì toò. Wɔ̀ o wɔ, tàmafa fɔɔn o fɔɔn to ye dzi tara nòn, tɔ barau nì.

26 Awà Sùtana to ye fu Sùtana kpɛyn yè e si kaa bo o, Sùtana to na tara fyeu ɔ ? À re màsàbee to dzia e san gban dzùrù ?

27 Min ba kwey rèè kaa boò mòdzian kpɛyn, Baalizhebulì baraka ɲan, ye raa mòò nìì reè yè kaà do ? twɛy yè è kaa boò tsì baraka ɲan ? Tɔ̀ kamà, twɛy yɛ̀r'leè rìì nà bà ye kitsibaa.

28 Mun to ye ba kwey rèè kaa boò mòdzian kpɛyn Ŋaablà re Dzia rìì baraka ɲan, tɔ̀ y'a kpàdèe, ci Ŋaablà re Màsàbee dziu ye tsɛ.

29 Fàan ni mòò riì ɲàn, mòo dzia bè dɔ̀n tɔ̀ re gbàà doùn dzùrù, à y'à suun ge reè sen, à mà bà à kun shiɔ̀ ŋe ? À y'à shìa rìì ŋe, è kòmànà à re gbà dòùn ge reè tsɛ̀.

30 Mòò riì na ni mun ka fyeu, tɔ mun kaasi rìì. Mòò riì to na wɔɔ̀ mun na mìn goò lamɔnɔ̀n, tɔ̀ y'a jeè rìì.

31 Tɔ̀ kamà, mun nà à dè ye ra, ci gooɲaan tsiɛ gò o ge, ko Ŋaablà tsoo bara goòmà gè o ge, Ŋaabla nà e yɛrɛ to mòdzian rè tɔ̀ ra. Ŋà nìi Ŋaablà re Dzia tsoo bara goòmà rèè, Ŋaablà fa e yɛrɛ to mòò rè tɔ̀ ra waa.

32 Mòò o moò ye de dɔ̀n Adamà dziàn ɲàn, Ŋaablà nà e yɛrɛ to tɔ̀ tsìfa re tɔ̀ ra. Ŋà mòò o moò ye de dɔ̀n Ŋaablà re Dzi Fɛnɛɛ ɲàn Ŋaablà fa e yɛrɛ to tɔ̀ tsìfa re she, à fa e yɛrɛ to à re gbee.

Yesù ci gɔɔ̀ tɔ̀ɔ e dzian nì kpɛyn

33 Ye dzin gɔɔ̀ wù, ye dzin à dziàn sa wù. E to ye dzin gɔɔ̀ ɲaan, ye dzin à dziàn sa ɲaan. Gɔɔ̀ sapɛ tɔ̀ɔ e dziàn nì kpɛyn.

34 È fɔnfwɛyn kur'là jà ! Ye dzia gooma wuu ì dè dzùrù, ye to na gè ɲànbè san ! Goo nìì reè duɔ̀n tsyɛɔ̀n, dziɛ̀ twɛy rìì dèe.

35 Mòdzin wuɔ, tɔ gè wùu ì rìì boò e raa nàfòrò marama wùɔ doùn, nìi y'à duɔ̀n. Mòdzìn ɲaan, tɔ̀ yeè bà gè ɲaan ì boò e raa nàfòrò marama ɲaan doùn, à duɔ̀n.

36 Àwà, mun nì ci e ra, tsìɛ̀ sii sèè, mòdzian gooma dɔn tsɔ̀ bɛy ge o ge dèu, è nà tey à sapɛ ma.

37 A y'a jà a dzi tàrau, à y'à dzugooma reè rìì. A to y'a jà kitsia mɛrɔn a tsɛ, à y'à dzugooma reè rìì.»

Yesù yè e nɔun min niì ci wò fa tàànmàshɛn kabagooma fa waa

38 Tɔ̀un sàrìyà kaamoo reè swey, ko Faridziɲɛn rèè swey yè dzin Yesù rà ci: «Kàrànfaà, ɲe sào ni wo yè tàànmàshɛn kabagoomaa sɔn fa ɲe jaa ra.»

39 Yesù yè dzin è ra ci: «Nèe she mòdzìn ɲan ree reè, è na tereòn Ŋaablà ka, è ci tàànmàshɛn kabagoomaa sɔn yeè fa ye jaa ra. Ŋà, kɛɛra Yonasì raà boshɔ̀ùn, tàànmàshɛn kabagooma pɛn fa fa è jaa ra waa.

40 Kɛɛra Yonasì bwèy zhììgi ko fen zhììgi fau ji blàa duùn nìi tsuru, Adamà dziàn sa nà bwèy zhììgi ko fen zhììgi fa dzɔ̀nxɔ rɔ̀n tɔ̀ tsuru.

41 Tsìɛ̀ sii sèè, Ninivuka reè nà fù, yè kitsi mɛɛy ɲe re she raa mòdzian tsɛ. Tɔ nà fa, kàtsu kɛɛra Yonasì rè waajibia kamà, Ninivuka reè yè e tsiiŋ yè sèè bo gooɲaan kpɛyn, yè e re jaamabee fau'n kur'la lakere. Tɔ̀ to y'à tàrà mòo ni mìin, nìi blà kɛɛra Yonasì mà.

42 Tsìɛ̀ sii sèè, Sàbà jamaan màsà taàn sa nà fù, è kitsi mɛɛy ɲe re she raa mòdzian tsɛ. Tɔ nà fa, kàtsu, tɔ̀ taàn bou fɔ dziɲaan dàn sɔɔ̀n rà, è nà e toro wɔ màsa Sɔ̀ɔ̀mɛyn ne akiribla goòmà rèè rè. Tɔ̀ to y'à tàrà, mòo ni mìin, nìi blà màsa Sɔ̀ɔ̀mɛyn ma.»

Yesù ci kweè sèè naà nìi tsuru mòdzian kpɛyn

43 Yesù yè geren goomaa rè ci: «Kweè ye bo mòdzian kpɛyn, à bèe yu bɛy gane rɔn, è bè e ɲantsyeere beè è ɲɔ̀ɔ̀nkininma gaa. À ma tɔ̀ gàne tàrà,

44 à dziàn tɔ̀un ci: «Mun bou min nìi mun nà n kpɛyn sèè mɔn.» È na wɔ tɔ̀un à y'à jàa tɔ̀ tsìfa ni a ci gbà nìi xɔ ni, à flaɔ, à lamɔnɔunma yè bà wù.

45 È na à jà tɔ̀ tsuru, è kpɛyn sèe è bè kwey ɲɛ̀ɛ̀nun kpɛrɛ sen ba e tɛy, nìì reè ɲan à yɛ̀r'la mà, yè nà dɔ̀n yè e tsuù mɔn. Tɔ̀ ye fa, tɔ̀ tsìfa re goo rèè ɲanbee rìì, è geren jɔ̀naà tsɛ. Àwà tɔ̀ soo rìì nà fa ɲe re she raa bwèy mòdzìn ɲan reè sa ka fɔ è bè xɔbe.»

Yesù ci nìì reè wò tseyn ko wò na

46 Àyìwà, è Yesù to goomaa nà ko jàmaà ka, à naà ko à tseyn nèè yè nà e tsiì da rɔ̀n, yè bà na ni à re yè gooma à ka.

47 (Tɔ̀un, sɔn yeè dzin à ra ci: «Wo naà ko wo tseyn nèè tsìiŋma yɛ da rɔ̀n, è sào ni yè gooma wo ka.»)

48 Yesù yè dzin tɔ̀ ra ci: «Tsì rii mun naà, tsi ì yè bà mun tseyn nèè ?»

49 È si foro e re kàràndzin neè kpàkèrè tɔ̀un, è dzin ci: «Mun naà ko mun tseyn nèè rìì yɛ nèe rèè.

50 Àwà mun Fà rìi ni jìrànxɔ rɔ̀n, mòò riì tɔ̀ sàɔ faa, tɔ rii mun tseyn kpiri, mun tseyn taan, ko mun na.»