Fiə wu Nyɔ se
4
Bə ŋkanə bəŋgwɨŋ, kə na nende bəŋ, kə kuchi kaŋ nɨ bənɨ bə naji Baba Jisɔs ntɨŋ, lə nɨ bə nə̀ fɨyə kɨjimiɛ kɨ Nyɔ na se lə bə kɨ ji nə bɨ lɨ, chi bə na ji chiŋ fɛŋ, bə kɨ ji kwa manɨ bə gɨntɨ fiəfiə. 2 Bə na kkɨ bitɨfiɛ bi kə nə̀ nya bəŋ bə buŋga bu Baba Jisɔs lə. 3 Fiɔŋ fi Nyɔ na se na lə bə kɨ ji ntsaaŋ. Bə kə kɨ dzenɛ. 4 Miɨ chi nə bəŋ ntɨŋ naji lə yu kɨ kkɨ nchiŋfi gwɨ yihi dzə́ yi ntsaaŋ ntɨŋ yi na ji bə kɨŋkuntə.ª 5 Gwɨ yi miɨ kə kɨ ji kwa yi shi nɨ yi bənɨ bə ji ba kə kkə Nyɔ lə. 6 Miɨ kə kɨ fɨtɨ bubiə makə lə yu fu wəmɛni tsukɔ biɔŋ biŋ wɨ. Kə nə̀ chanyɛ ba loso bəŋ nə ndɛŋkəlɨ lə Baba jiwa ɨ yu li ŋgə bənɨ bɨŋ bə na fɨtɨ biɔŋ biŋ. 7 Bə kɨ kkɨ lə Nyɔ nə̀ kə bəndəhə bɨ lə kə kɨ ji fiə wu kɨnyənə lə ntɨŋ. Yu nə̀ bəndɨ bɨ lə kə kɨ ji fiə wu ntsaaŋ ntɨŋ. 8 Fi kɨ ji lə, ma yəŋ wu nɨŋŋə ŋ'wɔ bitɨfiɛ biŋ, yu kə nɨŋŋkəhə ŋ'wɔ ji bə miɨbəwəŋ, yu nɨŋŋ ŋ'wɔ ji bə Nyɔ wu nya wa bəŋ kɨn'yɨntɨ kɨhɨ kɨ ntsaaŋ.9 Fi na tsukɔ kɨnse kɨ bə na keŋkɛ bəwəma bɛnɨ bə kɨmbɨŋ'ə wɨ, mbɨ wudɔ na sɨŋ wu naji lə kə bɔndu kɨsu bə bəŋ. Fiŋ na fiɔŋ fi Nyɔ kɨbɛɛ nə̀ tɨfiə bəŋ lə bə kɨ laŋkɨ gwɨ́ yənɨ. 10 Yɛyi lɨ, bə na laŋkɨ bəwəma bɛnɨ bəchi bə na ji sha yi Mɛsɛdɔnia ntɨŋ. Bə fiŋ bəŋgwɨŋ, kə nende bəŋ lə bə kɨ fɨtɨ kwa manɨ bə gɨntɨ fiə. 11 Kɨgaŋ kɛnɨ kɨtso kɨ ji ji lə bə kɨ ji mɔɔŋ, bə jikə kɨ chɛsɛ bifuŋ biɔŋ bi bənɨ lə ntɨŋ. Bə kɨ nɨntɨ bə kaŋ yɛnɨ nɨ kə nə̀ tɨfiə bəŋ. 12 Bəma, ɨ bənɨ bə binchi kɨ nya bəŋ kɨŋkuntə, ɨ bə jikə kɨ nɨkɨ miɨ wudɔ wɨ.
Tsa yi Baba ná ba
13 Bəŋgwɨŋ, kə na sɛhɛ lə bə kɨ kkpɨ maa tsukɔ bəŋkkpə wɨ. Kə na se lə bə kkə ndzɨ bə jɛkə kɨ dzudi gwɨ nɨ bənɨ bə na jikə jiŋgə buni bu sa fiə wɨ. 14 Kə' bɨŋ lə Jisɔs nə̀ kkpə ba dzakɔ nə kkpə lɨ, na tɨ diəŋ nɨ Nyɔ ná tsɔ bə Jisɔs ma bə bənɨ bə nə̀ kkpə bɔ ji Jisɔs ntɨŋ. 15 Kə na chanyɛ kə biəlɨ diɛ yi Baba Jisɔs lə bɨ bə ná shə ba bəwəŋ bə ná kɨ bambi su tsa yi yu ná kɨ ba wɨ, naji ɨ kə ná saa fiə nə bənɨ bə nə̀ kkpəyɛ ba lɨ kə. 16 Bə kɨ kkɨ lə Baba Jisɔs kɨbɛɛ ná kɨ shichi nə bɔ́, yu wɛnti bə buŋga, nsafiə wu bənchinda bə Nyɔ lə wunə tɨ, ɨ kɨmbu kɨ Nyɔ lə də. Ɨ bənɨ bə nə̀ kkpə ɨji bɔ ji Klistu ntɨŋ sa ba dzakɔ lɨ. 17 Tsa ya wɨ, bɨ bəwəŋ, bə shə ba, ɨ kə tɛshɛ bə bɔ kɨku ntɨŋ bɔ́ ba bɨkənɨ bə yu ba kɨ ji bə yu tsá chi. 18 Bəma, bə kɨ dɨshə shəŋ yɛnɨ bə nchanyɛ nyi.