3
Bəma nɨ kə nə̀ ŋəŋə lə fi ya bɨ bə njiŋ bəŋ sɨŋ, kə bɨchɛ lə kə shə sɛŋ Atɛn bɨ bɨ 2 ba faŋ ŋgwɨŋ waha Timɔti, wu kə na nɨntɨ Nyɔ lɨ, kə tɨdi shɔŋ yi ndzeŋe tsukɔ Klistu wɨ. Kə nə̀ faŋ lə yu ba koso bəŋ kɨmbɨŋ kɛnɨ ntɨŋ ba tɛse shəŋ yənɨ 3 lə bəŋgə bɛŋ kə nɨkə miɨ wudɔ nə bəŋ ntɨŋ. Bəŋ kɨbɛɛ bə na kkɨ lɨ lə bəŋgə na fiɔŋ fiaha. 4 Bə na kkɨ tɨ lə tsa yi kə nə̀ ji bə bəŋ, kə nə̀ tə bə bəŋ nə ndɛŋkəlɨ lə kə ná woko lɨ ŋgə. Fi na ji diəŋ nɨ fi tɨchə bə kkɨ. 5 Fiŋ na fiɔŋ fi nə̀ fəə ntə ŋŋəŋ lə fi ya ba faŋ Timɔti lə ŋkkə nɨ kɨmbɨŋ kɛnɨ na ji, ndzɨ nyiŋ nə̀ kwete mɨ lə naji ɨ kɨ ji miɨ wu na moŋko wa bənɨ sə mɔŋ bəŋ ba fə nɨŋ chi yi kə nɨŋə bəŋ'ɨ tsu yi kɨlɔlɔ.Timɔti nya shɔŋ tsukɔ kɨmbɨŋ kɨ bənɨ bə Tɛsalɔnika lə wɨ
6 Bəmanɨ fɛŋ, Timɔti sə ba bəŋ'ɨ ba fichə tsu jiŋ bɨ lɨ, ba tə shɔŋ yi ndzeŋe tsukɔ shəŋ yi bə galə Klistu wɨ, bə nɨ bə na donchɛ kɨnse bə bənɨ. Yu tə tɨ nɨ bə na gɔmbiə bɨ kɨtso, bə ji bə shəŋ lə bə ŋəŋ bɨ nɨ kə na ji tɨ bə shəŋ lə kə ŋəŋ bəŋ. 7 Ndzɨ mɛ bəŋgwɨŋ, mɛfə kə na ji funyi bə bəŋgə kɨyɛŋ ntɨŋ, shəŋ na dɨ bɨ tsukɔ bəŋ wɨ kɨtso ndzɨ shəŋ yi bə galə Klistu wɨ. 8 Kə yɨntɨ fɛŋ buni ndzɨ bə ləŋ ŋkɨɨŋ Baba wɨ. 9 Bəma, kə kɨ nya kɨmbafə bə Nyɔ kɨtso ndzɨ bəŋ. Kə na nya kɨmbafə bə Nyɔ ndzɨ buni bu kə na woko yu nəfiə ndzɨ bəŋ. 10 Kə na tsɨsə bə shəŋ yaha chi butsu bə bushə lə ma kə ŋɨntɨ bəŋ wɨ, fə kə nya bəŋ fiɔŋ fi bə na fiəŋkə kɨmbɨŋ kɛnɨ ntɨŋ.
11 Kə na tsɨsə lə Nyɔ kɨbɛɛ wu na ji Taa waha bə Baba waha Jisɔs gu dzə kə ba fɔ bəŋ wɨ. 12 Kə na tsɨsə tɨ lə Baba fə kɨnse kɛnɨ kɔ ba gəŋ fiə, bə kɨ laŋkɨ gwɨ́ yɛnɨ bə bənɨ bəchi diəŋ nɨ kə na laŋkɨ bəŋ. 13 Kə na tsɨsə manɨ fə yu fəə shəŋ yɛnɨ kɨ ji ŋkɨɨŋ yu wɨ, ɨ bə kɨ ji ŋgbɔ sɨŋ, bə tsalə Taa waha Nyɔ nəfiə tsa yi Baba waha Jisɔs ná ba bə bənɨ buhu bəchi bə ntsaaŋ.