Nchanyɛ yi Pɔl tsukɔ nɨŋ yihi wɨ Tɛsalɔnika
2
Bəŋgwɨŋ baha, bəŋ kɨbɛɛ bə na kkɨ lɨ lə jii wu kə nə̀ lɛɛ wa bəŋ nə̀ jimiɛhɛ kɨlɔlɔ. 2 Bə na kkɨ lə bənɨ nə̀ nya bɨ ŋgə ba nya bɨ yaa kɨtuŋ kɨ Filipi ntɨŋ, kə nə̀ kansɨ shəŋ bə buŋga bu Nyɔ waha lə, lə kə tɨfiə bəŋ shɔŋ yi ndzeŋe yi Nyɔ, mɛfə bənɨ nə̀ diɔnɔ dzə́ chi lə bɔ baŋ bɨ. 3 Shɔŋ yi kə ba ya kə kɨ tɨfiə kə nende bəŋ bə yi na jimiɛhɛ yi fətsutsu. Kə ba kə jikə kɨ tɨfiə bə kɨŋgɔmbiɛ kɨdɔ kɨbiə makə lə kə kɨ fukiɛ bəŋ. 4 Bəmanɨ, nɨ Nyɔ nə̀ bɨmiə bɨ lə kə kwətsə bənɨ bə yu nya shɔŋ yi ndzeŋe nyi bɨ kaŋ, kə na tɨfiə fɛŋ nɨ ŋgwe yi bənɨ ba. Kə na tɨfiɛhɛ fə gwɨ kɨ ndzeŋe bənɨ, kə na tɨfiə fə Nyɔ wu kkɨ shəŋ yaha laŋə. 5 Bə na kkɨ lə kə kə saa ba fukiɛ bəŋ bə díɛ yi ndzəŋgə makə lə kə kɨ ji bə kɨshəntə. Nyɔ lɨmi wa nsa yaha nəjiŋ. 6 Kə nə̀ kə nɔŋkɔhɔ lə kə keŋkɛ bubəŋ nə miɨbəwəŋ'ɨ, makə nə bəŋ'ɨ, makə nə bənɨ bədɔ lɨ. 7 Mɛfə nə̀ shi yaha nɨ beŋ bə faŋə bə Klistu lə bə mbi yi biɔŋ lə bə kɨ fɨtɨ bɨ lɨ, kə nə̀ ji bəŋ ntɨŋ kə lənshə bəŋ nɨ mə beŋ ba kɨ lənshə beŋ buhu. 8 Bəma, kə nə̀ dze bəŋ bɨ gwɨ bə kɨnse ba nya bəŋ shɔŋ yi Nyɔ yi ndzeŋe, kə jikə kpɨyə ma, kə nya gwɨ́ yaha bəŋ'ɨ ndzɨ bə nə̀ ji shəŋ yaha.9 Bəŋgwɨŋ baha, bə na kkɨ nɨŋ yaha bə funyi waha. Kə nə̀ nɨntɨ bbutsu bə bbushə fə kə jɛkə galə ntə miɨ wudɔ fi nə bəŋ ntɨŋ nɨ kə nə̀ tɨdi shɔŋ yi ndzeŋe yi Nyɔ bə bəŋ. 10 Bəŋ kɨbɛɛ ma Nyɔ naji ɨ bə ləŋ nsa yaha lə kə nə̀ fɨtɨ biɔŋ bə bəŋ bənɨ bə kɨmbɨŋ'ə dzə́ yi ntsaaŋ ntɨŋ, bi ji diəŋ, ŋkweŋ yidɔ su sɨŋ. 11 Bə na kkɨ lə kə nə̀ fɨtɨ bə miɨ chi nə bəŋ ntɨŋ diəŋ chi chɛ beŋ ba yu kɨ fɨtɨ bə beŋ buhu. 12 Kə nə̀ tɨfiə kə kosɔ bəŋ, kə tɨdi bə bəŋ lə bə kɨ ji bə kɨjimiɛ kɨ Nyɔ na se. Na yu wu bəndə bəŋ lə bə bê buŋkuŋ buhu ntɨŋ ba keŋkɛ nə bubəŋ buhu wɨ.
13 Kə chisə bafə Nyɔ tsá chi ndzɨ tsa yi kə nə̀ ba bə diɛ yi Nyɔ bəŋ ntɨŋ, bə nə̀ wɔ ba ləkə yi, jikə jimiɛ chi yi miɨ, bəmanɨ, bə nə̀ ləkə yi chi diɛ yi Nyɔ kɨbɛɛ, na yi yi na nɨntɨ bəŋ ntɨŋ, bəŋ bə na ji bənɨ bə kɨmbɨŋ'ə. 14 Bəŋgwɨŋ, bə kkə lə fiɔŋ fi nə̀ tɨchə bə bəntɛshɛ bə bənɨ bə kɨmbɨŋ'ə bə Nyɔ lə bə na ji klistu ntɨŋ sha yi Judɛya ntɨŋ, na tɨ fi fi tɨchɛ bəŋ. Bə nə wɔ ŋgə nə bənɨ bɛnɨ kaŋ, diəŋ nɨ bɔ nə̀ wɔɔ ŋgə nə Bəju kaŋ ɨji bənɨ bəbɔlə. 15 Na Bəju bɛŋ bə nə̀ kkpɨsə Baba Jisɔs. Na bɔ bə nə̀ kpɨshɛ bənɨ bə shɔŋ yi Nyɔ lə. Na bɔ bə nə̀ kɔŋɔ bɨ nə bɔ ntɨŋ. Bɔ na fɨtɨ manɨ Nyɔ jikə wɔkɔhɔ buni bə bɔ. Bɔ na fotɔhɔ buni bə miɨ chi, 16 bɔ baŋkɨ bɨ dzə, kə tə kə chanyɛ bə bənɨ bə na jimiɛhɛ Bəju fə bɔ fɔɔfo. Bɔ fɨtɨ manɨ tsá chi, bubiə bubɔlə yisə bu ba. Nəjiŋ wusu bulo bu Nyɔ lə bwa bɔ fi.
Pɔl kɨ se lə yu chi ŋəŋə bənɨ bə kɨmbɨŋ'ə bə Tɛsalɔnika
17 Bəŋgwɨŋ, nɨ bə́ nə̀ fəə kə jɛ gwɨ bə bəŋ tsa yidɔ yidzulu bɨŋ, mɛfə kə nə̀ jɛɛ gwɨ, kə nə̀ kə jɛkɛ nə shəŋ yaha ntɨŋ, kə nə̀ shəntə kɨtso lə kə chi ŋəŋə bəŋ wɨ bə yəsɨ yaha. 18 Kə nə̀ se lə kə tsu ba ŋəŋ bəŋ, mɨ Pɔl kɨbɛɛ ndio tsá chi lə mba, bəmanɨ Satan fuku bɨ dzə. 19 Kə na keŋkɛ kɨgaŋ manɨ ndzɨ tsa yi Baba waha Jisɔs ná fichə ba ba lɨ, na bəŋ bə kə ná kɨ bobi fiə bəŋ wɨ makə bə ná kɨ ji buni bwaha makə kpandɨ waha wu kə ná kuntsɔ gulu bə wu bə kɨnlaŋ yu nəfiə. 20 Yɛyi lɨ, na bəŋ bubəŋ bwaha bə kɨnlaŋ kaha.