Kɨŋwatɨ kɨ fiəfiə kɨ Pɔl nə̀ bɔndɔ bə ntɛshɛ yi
Tɛsalɔnika
1
Na mɨ Pɔl, nji bɨ bə Silas bə Timɔti. Nna mbondo kɨŋwatɨ kɨŋ bə ntɛshɛ yi bənɨ bə kɨmbɨŋ'ə bə na ji kɨtuŋ kɨ Tɛsalɔnika ntɨŋ bə na ji Taa waha Nyɔ bə Baba Jisɔs Klistu ntɨŋ.Nyɔ dônchə bəŋ shəŋ yihi yi ndzeŋe ba nya bəŋ budə.
Pɔl bafə Nyɔ ndzɨ ntɛshɛ yi bənɨ bə kɨmbɨŋ'ə yi Tɛsalɔnika
2 Kə na ba kə kɨ nya kɨmbafə bə Nyɔ tsá chi tsukɔ bəŋ wɨ bəchi, kə chanyɛ tsukɔ bəŋ wɨ tsá chi kɨntsɨsɨ kaha ntɨŋ. 3 Tsa yi kə na ji Baba Nyɔ waha nəfiə, kə na ba kə kɨ gɔmbiə fiə wɛnɨ wu na ba nə shəŋ yi bə galə Klistu wɨ, bə nɨŋ yɛnɨ yi na ba nə kɨnse kənɨ ntɨŋ ma shəŋ yi bə na kansɨ yi na ba nə kɨmbɨŋ kɨ bə na keŋkɛ Baba waha Jisɔs Klistu wɨ.
4 Bəŋgwɨŋ bə Nyɔ na se, kə na kkɨ lɨ lə Nyɔ chiŋ bəŋ lə bə kɨ ji buhu. 5 Kə na kkɨ manɨ ndzɨ shɔŋ yi ndzeŋe yi kə nə̀ ba bə yi bəŋ'ɨ nə̀ kə baha ji bə nchanyɛ kwa. Yi nə̀ ba tɨ bə buŋga bu na foto nə Kɨn'yɨntɨ kɨ Ntsaaŋ wɨ, kə kkɨ ŋgbooŋ lə shɔŋ ya na yɛyi. Bə na kkɨ ŋgwe yi bənɨ bə kə nə̀ ji tsa yi kə nə̀ ji bəŋ ntɨŋ lə fə bə keŋkɛ mbɨ nə fiə waha wɨ. 6 Bə nə̀ tsu kɨ ji nɨ bɨ bə nɨ Baba, ndzɨ bə nə̀ ləkə shɔŋ ya bə kɨnlaŋ kɨ na foto nə Kɨn'yɨntɨ kɨ Ntsaaŋ ntɨŋ mɛfə bə nə̀ ji tɨmo ŋgə wuntaŋ ntɨŋ. 7 Bəma bə tsu bənɨ bə bənɨ bə kɨmbɨŋ'ə bəchi sha yi Mɛsɛdɔnia bə yi Akɛya na dze mfɨkə nə bɔ wɨ. 8 Nna nchanyɛ mɛ ndzɨ diɛ yi Baba' tsaŋ nə bəŋ wɨ ba gəndə gəŋ sha yi Mɛsɛdɔnia bə yi Akɛya ntɨŋ. Na kwa manɨ kə, shɔŋ yi na tsukɔ shəŋ yɛnɨ yi bə galə Nyɔ wɨ gəndə ya bidɨ bichi ntɨŋ. Bəma fi na jimiɛhɛ lə kə tsu kɨ chanyɛ tsukɔ kɨmbɨŋ kɛnɨ wɨ 9 ndzɨ bənɨ ba bəchi ba bə chanyɛ chi bə nə̀ ləkə bɨ bəŋ ntɨŋ, ma nɨ bə nə shə munyɔ ba tsu Nyɔ wɨ, lə bə nɨ̂ŋ ji Nyɔ wu kɨyɛyi wu buwəŋ'ɨ. 10 Bɔ na tɨdi tɨ nɨ bə na wokɔ wene wu ná fɔɔ nə bɔ́ ba ba lɨ. Wene no ji wu nə̀ dzakɔ nə kkpə lɨ, ɨji na Jisɔs wu na foshɛ bɨ nə bulo bu Nyɔ lə ntɨŋ, bu yu ná kɨ donchɛ bənɨ.