Ŋ'wokɔ yi mba yi Baba
5
Bəŋgwɨŋ, mbɨ wudɔ na sɨŋ wu naji lə kə bɔndu bə bəŋ kɨ tsa ya lə bə butsu bu mba yi Baba Jisɔs lə. 2 Bə na kkɨ lɨ buni lə butsu bu mba yi Baba lə ná kɨ ji nɨ wuu ba bbutsu. 3 Bənɨ ná kɨ tɨdi lə, “Budə bwa su, fiɔŋ na sɨŋ fi naji lə miɨ kɨ lete,” ɨ ŋgə tə butə ba gbɔ bɔ wɨ nɨ fi ba fi kɨ ji tsa yi kpansɨ sə gbosɔ, ɨ dzə yi lətə kɨ ji sɨŋ. 4 Bəmanɨ bəŋgwɨŋ, bə na jimiɛhɛ kɨjuwɔ ntɨŋ chi naji ɨ butsu bwa butə bəŋ waa nɨ wuu ba bbutsu. 5 Nna nchanyɛ mɛ ndzɨ bəŋ bəchi bə na ji bənɨ bə kɨŋgbooŋ'ə, bə ji bənɨ bə na fɨtɨ biɔŋ bbushə. Kə na jimiɛhɛ bənɨ bə na fɨtɨ biɔŋ bbutsu makə bə kɨjuwɔ lə. 6 Bəma kə kə kɨ me nɨ bənɨ bədɔ na me. Kə kɨ bichə bə bufɨ bwaha buchi. 7 Bənɨ bə na me ba bɔ kɨ me ji bbutsu, bənɨ bə mbiŋ na kwete bɔ, mɔ ba mɔ kɨ kwete bɔ ji bbutsu. 8 Bəmanɨ nɨ kə na ji fiaha ji bənɨ bə na fɨtɨ biɔŋ bbushə, kə kɨ ji bə bufɨ bwaha buchi. Kə dzê kɨmbɨŋ bə kɨnse ə kɨ ji nɨ kɨtsu kɨ dzoŋ'ə kɨ kusə gulu waha su, kə dzê njiŋgə yi kə na jiŋgə fiə mfɔ yi fo wɨ yi kɨ ji nɨ kɨfulɔ kɨ dzoŋ'ə kɨ kə chisə. 9 Bə kɨ kkɨ lə Nyɔ nə̀ kə sabiɛ bɨ lə yu kɨ donchɛ bɨ bulo buhu. Yu nə̀ sa bɨ lə kə keŋkɛ ji mfɔ yi fo yi na ba nə Baba waha Jisɔs Klistu wɨ. 10 Jisɔs Klistu nə̀ kkpə ndzɨ bɨ, lə mɛ kə kɨ ji bəwəŋ makə bəŋkkpə lɛ, ɨ kə kɨ ji bə yu. 11 Bəma, bə kɨ dɨshə shəŋ yi bənɨ bəchi lə, bə kosɔ shəŋ yibɔlə, nɨ bə na fɨtɨ chiŋ.Bitɨfiɛ bi fəŋgbɨŋ
12 Bəŋgwɨŋ, kə na nende bəŋ lə bə kɨ kuntə bənɨ bə na nɨntɨ bəŋ ntɨŋ, bɔ lɨmə bəŋ tsukɔ Baba wɨ, bɔ tɨfiə bəŋ. 13 Bə kɨ donchɛ kɨŋkuntə bə kɨnse bə bɔ buni ndzɨ nɨŋ yi bɔ. Bə kɨ ji bə budə bəŋ ntɨŋ. 14 Bəŋgwɨŋ, kə na chisə nendɛ bəŋ lə bə nyâ bitɨfiə bə bənɨ bə na shɨ kɨlɔlɔ. Bə kôso shəŋ yi bənɨ lə bə na ji bə nyiŋ. Bə kɨ chitə bənɨ bə n'yelɛ, bə kânsɨ shəŋ bə miɨ chi. 15 Bə kɨ dze tsa. Miɨ kə̂ chisə bubiə bə bubiə. Bə kɨ shəntə tsá chi bə mfə yi biɔŋ bi ndzeŋe bə gwɨ́ yənɨ ma bə miɨ chi. 16 Bə kɨ ji bə kɨnlaŋ tsá chi, 17 bə tsɨsə tsá chi, 18 bə nyaa kɨmbafə bə Nyɔ fiɔŋ fichi ntɨŋ fi na tɨchə. Fiŋ na fiɔŋ fi Nyɔ na se nə bəŋ'ɨ bə na ji bənɨ bə Jisɔs Klistu lə. 19 Bə kə̂ chichə Kɨn'yɨntɨ kɨ Ntsaaŋ. 20 Bə kə̂ nɨŋŋkəhə bənchanyɛ bə bənɨ bə shɔŋ yi Nyɔ lə na ba bə bɔ. 21 Bə kɨ foko biɔŋ bichi, bə dze bi ndzeŋe bia, bə lɨmi bi bɨŋ. 22 Bə fôso kaŋ yɛnɨ nə biɔŋ bibiə ntɨŋ bichi.
23 Kə na nende lə Nyɔ kɨbɛɛ wu na ji Nyɔ wu budə, yu tsâləsɨ bəŋ fiɔŋ fichi ntɨŋ. Yu gâ kɨn'yɨntɨ kɛnɨ bə shəŋ yənɨ ma gwɨ́ yɛnɨ ŋkweŋ yidɔ kə kɨ ji bəŋ wɨ tsa yi Baba waha Jisɔs Klistu ná ba. 24 Nyɔ wu nə̀ bəndə wa bəŋ, yu na ji bə kɨyɛyi, yu jiwa yu fə manɨ.
25 Bəŋgwɨŋ, bə nênde Nyɔ bɨ lɨ.
26 Bə tsɨ̂sɨ bəŋgwɨŋ baha bəchi, bə kûkɔ bɔ ŋkukɔ yi bənɨ bə Nyɔ lə.
27 Nna nchanyɛ ntɨdi bə bəŋ bə buŋga bu Baba lə lə bə tânchɛ kɨŋwatɨ kɨŋ bəŋgwɨŋ baha bəchi wɔ.
28 Shəŋ yi ndzeŋe yi Baba waha Jisɔs Klistu lə kɨ ji bə bəŋ.