Pita tə fiɔŋ fi nə̀ dzɛɛ dɨ Kɔnelus tsɔŋ
11
Beŋ bə faŋə bə Jisɔs lə bə bənɨ bə kɨmbɨŋ'ə bə Judɛya ntɨŋ chi wɔ lə bənɨ bə na jimiɛhɛ Bəju' ləkə diɛ yi Nyɔ tɨ. 2 Lə Pita bəndɨ ba tsu Jɛlosalɛm, bənɨ bə kɨmbɨŋ'ə bədɔ gbɔ kɨ sakɨ yu. Bənɨ bɛŋ nə̀ bə nə̀ ji bɔ tɨdi kwa lə bə́ naji lə bə́ sɔmbu dzɔ yi miɨ wu na jimiɛhɛ Miɨbəju, fə miɨ wa kɨ ji miɨ wu Nyɔ. 3 Bɔ kɨ sakɨ yu bɔ bishɛ lə, “Wə fə nəŋ tə lɛ bənɨ bə na bambi dzɔ́ yintsu jii sɨŋsɨŋ ba kɨ diɨ bə bɔ?”4 Pita dze tsa ba nachɛ fiɔŋ fichi fi nə̀ tɨchə ba tə bə bɔ lə, 5 “Nnə̀ nji kɨtuŋ kɨ Jɔpa ntɨŋ ntsɨsə, budəŋfɨ kwe mɨ. Ŋŋəŋ budəŋfɨ bwa ntɨŋ, fiɔŋ fidɔ shichi nə bɔ́, fi ji nɨ kɨndzu kɨbəŋ, bə́' chiŋfiɛ kɨ bo nna wɨ. Fi shi ba ba mɨ wɨ. 6 Lə mbo, ŋŋəŋ nyɛ́ŋ chichi chichi, yidɔ ji yi binchi, yidɔ yi kpa, yidɔ ji yi na kpa tɔ, ma munyinyi mu dimbi bɔ́. 7 Ntə ŋ'wɔ diɛ chanyɛ bə mɨ lə, ‘Pita, dzâ wə, kkpɨsɨ wə diə.’ 8 Nchi lə, ‘Baba, naji mmɔŋ kə. Fiɔŋ fi sɔkə makə fi na tsaləhə kə saa be mɨ dze.’ 9 Diɛ ya chi chanyɛ nə bɔ́ lə, ‘Wə kə̂ nyənə fiɔŋ fi Nyɔ' fəə fi kɨ ji ntsaaŋ.’ 10 Fi tɨchə manɨ fɔ tsá tiɛ, bə́ tə chi kpa fiɔŋ fia fichi fi bəndɨ bɔ́.
11 Mɨ kɨsɨkɨ, bənɨ bətɛ lafu tsɔŋ yi nnə̀ nji ya ntɨŋ, bɔ' fɔ nə Kasaliya, ɨji bə́' faŋ lə bɔ ba bəndɨ mɨ. 12 Kɨn'yɨntɨ kɨ Ntsaaŋ tə bə mɨ lə ŋkə ŋkpaha gwɨ bə ŋgəŋ bɨ bə bənɨ ba. Bəŋgwɨŋ bə Jɔpa bə buse bɛŋ biə mɨ, bɨ bə bɔ bəchi gəŋ ba be tsɔŋ yi miɨ wa ntɨŋ. 13 Lə kə be, yu tə bə bɨ nɨ yu nə̀ ŋəŋə nchinda wu Nyɔ wɨ yu tsɔŋ, nchinda wa tə lə, ‘Fâŋ miɨ Jɔpa yu gəŋ bəndɨ miɨ wudɔ wu bə́ na tsɨsə lə Semon Pita. 14 Miɨ wa jiwa yu ba wə bə shɔŋ yi wə bə bənɨ bəchi bə wə tsɔŋ jiba ɨ bɔ fɔfo nə yi wɨ.’ 15 Chi nnə̀ ŋgbɔɔ nchanyɛ, Kɨn'yɨntɨ kɨ Ntsaaŋ shi ba ba bənɨ ba wɨ tɨ diəŋ nɨ kɨ nə̀ ba bɨ wɨ fiəfiə. 16 Lə ŋŋəŋ manɨ, ntə nse fiɔŋ fi Baba nə̀ chanyɛ lə, ‘Jɔŋ nə̀ chɛsɛ bənɨ biɔ, bəmanɨ, Nyɔ jiwa yu chɛse bəŋ ji Kɨn'yɨntɨ kɨ Ntsaaŋ ntɨŋ.’ 17 Nɨ Nyɔ nə̀ nya bənɨ ba kɨnya kɨ na ji tɨ diəŋ bə kɨ yu nə̀ nya bɨ tsa yi kə nə̀ galə shəŋ Baba Jisɔs Klistu wɨ, mɨ ŋkɨ nji yəŋ wu naji nnɨŋŋ fiɔŋ fi na ji lə ə fə Nyɔ fi?”
18 Lə bənɨ ba wɔ nɨ Pita chanyɛ manɨ, bɔ tsukə sakəhə yu. Bɔ kɨ sɛnti Nyɔ bɔ tɨdi lə, “Jilə fi na ji manɨ, kɨjilə Nyɔ' nya tɨ dzə bə bənɨ bə na jimiɛhɛ Bəju lə bɔ fichə shəŋ yibɔlə ba keŋkɛ buwəŋ bu kəkaha.”
Bənɨ kɨyɛŋ bə na jimiɛhɛ Bəju ga shəŋ Baba Jisɔs wɨ Antiɔk
19 Bənɨ bə nə̀ tsaŋə nɨ ŋgə nə̀ gbɔɔ tsa yi bə́ nə̀ kkpɨsə Tefen nə̀ gəŋ kɨ ji bidɨ lɨ bidɨ lɨ, gəŋ fɔ Fɔnisha, bədɔ gəŋ Saiplus, bədɔ Antiɔk. Nɨ bɔ gəŋə manɨ, bɔ kɨ tɨfiə diɛ yi Nyɔ ji bə Bəju kwa. 20 Bəmanɨ, bədɔ bənɨ bə kɨmbɨŋ'ə bə nə̀ fɔɔ nə Saiplus bə Silin, gəŋ Antiɔk kɨ tɨfiə tɨ shɔŋ yi ndzeŋe tsukɔ Baba Jisɔs wɨ bə bənɨ bə na jimiɛhɛ Bəju. 21 Bə buŋga bu Baba Nyɔ lə, bɔ fə bənɨ kɨyɛŋ ga shəŋ Baba Jisɔs wɨ ba yashənɨ tsu bə yu.
22 Shɔŋ nyi fɔ ntɛshɛ yi bənɨ bə kɨmbɨŋ'ə wɨ Jɛlosalɛm. Bɔ tə faŋ Banabas sɔ Antiɔk. 23 Lə yu gəŋ fɔ sɔ, yu ŋəŋ nɨ Nyɔ donchə bɔ shəŋ yihi yi ndzeŋe ba fə lə bɔ fɔfo, yu wɔ buni ba kɨ nya bɔ bitɨfiə lə bɔ kɨ biəlɨ Baba bə shəŋ yibɔlə chi. 24 Banabas no nə̀ miɨ wu ndzeŋe, yu nə̀ yi bə Kɨn'yɨntɨ kɨ Ntsaaŋ, yu keŋkɛɛ tɨ kɨmbɨŋ kɨbəŋ. Bəma, yu fə bənɨ kɨyɛŋ sɔ ga shəŋ Baba wɨ.
25 Banabas tə dza ba gəŋ Tasɔs lə yu gəŋ nɔŋ Sɔl. 26 Lə yu nɔŋ ba ŋəŋ yu wɨ, yu dze yu, bɔ bə yu tsu Antiɔk. Bɔ bə yu jiŋ sɔ kɨya kɨchidi bə ntɛshɛ yi bənɨ bə kɨmbɨŋ'ə, bɔ tɨfiəə bənɨ kɨyɛŋ. Nə̀ sɔ Antiɔk wu bə́ nə̀ gbɔɔ kɨ tsɨsə ntɛshɛ yi bənɨ bə kɨmbɨŋ'ə lə bənɨ bə Klistu lə.
27 Lə kɨ ji tsa ya wɨ, bənɨ bədɔ bə na ba bɔ kɨ tɨdi biɔŋ bi bɔ na woko Nyɔ chanyɛ dza nə Jɛlosalɛm ba shi gəŋ Antiɔk wa ntɨŋ. 28 Kɨn'yɨntɨ kɨ Ntsaaŋ fə wudɔ nə bɔ ntɨŋ wu yɨ wuhu nə̀ ji lə Agabus dza ba ləŋ wə ba laŋə lə dzɔŋ yintaŋ jiya yi kwe bituŋ bichi. Fi nə̀ tɨchə ma tsa yi Klawdius nə̀ ji Ŋkuŋ wu Lom. 29 Ntɛshɛ yi bənɨ bə kɨmbɨŋ'ə bə Antiɔk wɔ manɨ ba nachɛ lə miɨ chi tsufiɛ kpə nɨ yu na keŋkɛ, bɔ chitə bəwəmɛni bə na ji Judɛya. 30 Bɔ tsufiɛ ba faŋ Banabas bɔ bə Sɔl bə kpə wa lə bɔ gəŋ nya bə fó yi ntɛshɛ yi bənɨ bə kɨmbɨŋ'ə.