Ɗerewel ngə Pol a
Filemon
Pol aa ɗen mbeli a Filemon
1
Kat Pol, kata awan am jik jaw makavay kat taa ɗiyen kəzəɗ a Yesu Kristu, yikwan mə ɗəɗef ɗerewel nhi avə galmay ngiykwan Timote, yikwan mə ɗəɗefen a hoh Filemon, cal mə ɗiy kəzəɗ mana yikwan yikwan taa may tik. 2 Ɗerewel nhi təm, aa Afiya galmay ngiykwan werti, za aa Arkipus cal ngiykwan yikwan taa jəgəm makavay kəzəɗ ngə Yesu. Aa mgbəw ngə hidiy ngə Kristu mə njə kə mgbəwiy a de koh təm. 3 Vay ngiykwan Bayzlav avə Məmar yikwan Yesu Kristu mə ɗiyiy hin malaw, za mə vəliy hin zoy.Pol aa luwen soko a Bayzlav makavay Filemon
4 Filemon, hoyhoy mandal kata tar Bayzlav, tə njə nəf kə zlimi koh, za tə njə kə luwen soko makavay koh, 5 kadaban kata zlim hidiy taa ceɗta mana hoh taa may hidiy ngə Bayzlav, ɓəw mana hoh mə vəl nəv koh a Yesu Məmar hidi. 6 Ta tar Bayzlav kə jan vəl nəv ngəkoh a Yesu mana yikwan təm kə mənoh kə ɗiy kəzəɗ malaw. Anhi hidiy cike wayza av kə səniy zay ngə kəzəɗ yikwan taa ɗiy tik makavay Kristu. 7 Galmay ɗa, kat zlim mana hoh mə may hidigi, ɓəw hoh mə vəl gədan a hidiy ngə Kristu, nəv ngaɗ tu fet, za tu vəlak gədan dayday təm.
Pol aa tar Filemon kə yək Onesimus baha
8 Asəna acin, ko kata awana mozlokotuf ngə luwoh hoh kə ɗiy təkən makavay kat məzlənzlən ngə Kristu, 9 amma kat təv kə pəloh kə ɗiy tik makavay hoh njə kə may hidigi. Yaw, kat Pol, mbusur hidi acin taa zləgamoh, kata awan tanjinhi am jik jaw makavay kat taa ɗiy kəzəɗ ngə Yesu Kristu. 10 Kata coh ngəra makavay Onesimus.ª Am zlim ngə Kristu, sin mə mbaɗa kə kərti ɗa am jik jaw awənhi. 11 Amicek, zay tik a hoh ko gwedek ɗahkwən. Amma tanjinhi, zay tik ɗaha a hoh ɓəw a kata.
12 Kata zlənay kaɗ angər koh, sin wa kat talan ɗa. 13 Kat kwəl kə geɗ tik angər ɗa awənhi, kə jan sin kə ɗiyak kəzəɗ am lay koh awənhi am jik jaw mə jawakta makavay Ləbar Malaw. 14 Amma, taa may kə ɗiy tik mətak nehe zagway kwən. Kata may kə takoh wəla hoh kə ɗiy kəzəɗ malaw nhi kwən, may ngaɗ wər hoh kə ɗiy tik avə may ngəkoh dap.
15 Kwəl kə ɗiy Onesimus a pətar a hoh ngə wan gwedek dap, za hav kə jan tik baha, hin kə ɗewey kin hoy hoy. 16 Hoh kə yək tik, kadaban tanjinhi sin bahlam dap kwən, sin law day kə bahlam. Sin mə mbaɗa kə galmay koh ngə may a nəv takan. Kata may tik godokwən, amma hoh acin ngə may tik day ɗər, kadaban sin hid membəlen ɓəw sin hid mə vəl nəv ngetik a Kristu.
17 Asəna acin, kadaban kat golmocoh am zlim ngə Yesu, ma yəku ngər səsaray wa hoh taa yəkakku. 18 Za ko a ngavoh ma ngemi, asənkwən ko dəwa koh awan angər tik, ma neh angər ɗa. 19 Kat Pol, taa ɗəɗef zləgamiy nhi avə ngər ngaɗa: Kata acin ngə wərək dəwa koh səna. Taa may kə zləroh zlimi kwən, hoh təm kata səboh a dəwa. Dəwa səna, micin ngəkoh. 20 Mbu dap galmay ɗa! A ɗiy mana kat mə pəloh, makavay Məmar yikwan. A bacak nəv ɗa, kadaban yikwan saray tik tu lap avə Kristu.
21 Kat tə ɗəɗefeh ɗerewel nhi, kadaban kat mə sən za, mindiwin hav kə ɗiy təkən kat mə taroh səna. Za kat mə sən za, hav kə ɗiy tik bah day kə kat mə taroh. 22 Kata pəloh təm, a sləsləɓak lay ngə wan, ɓən ngaɗ wər, Bayzlav av kə zlaw tar ngəkin. A kibik nhi, av kə fəkakta kaɗ, təv kə vay angər kin baha.
Ɗə mbeli way tik
23 Epafras a ɗoh mbeli. Yikwan mawana avə sin am jik jaw awənhi makavay kəzəɗ ngə Yesu Kristu. 24 Markus ɓəw Aristarkus ɓəw Demas ɓəw Luka, cal mə ɗiyiy kəzəɗ avə kata, a ɗiyiy mbeli təm.
25 Məmar yikwan Yesu Kristu mə ɗiye hin malaw.