इफिसियों 6

ओइ जामालाइ,प्रभु भोका भाइका,ताइको आमाइ -आबाको दोअ्का मानिसु | इङ्को खानतेङ ,पालि गोइका रेम्का काथा इदोइदोङ हि: 2 धर्म सास्तर दोअ्खे,''नेलाइताइको आमाइ- आबाको आदार पालि गोइखे |''इदोइ लाङ आग्यादोङ हि, इदोइता प्रतिग्याबुङ हि | 3 इङ्को प्रतिग्या हि: ''कालाउ नाङ्को गोताङ काथा थिक जेङ्खे कालाउ सुमिङ्ता ना र्हिङ्का आयु सिन्चाना |'' 4 आबागेलाइ,ताइको जामालाइहेङ चेरमाताम्पापि ,इम्बालाइहेङ प्रभुको ग्यान, सिकस्या कालाउ इलिमता (तालीम) बारापा | 5 ओइ चाकारियागेलाइ प्रिथिबिता, ताइको पार्थिक मालिकगेलाइको आग्या कालाउ मानिलि गोइका आदारसुधाङ गोतेङ काथा ह्रदयसोङ पालन पासु जेसाङ कि ख्रिस्तको आग्या मानिसुखेना | 6 इम्बालाइ खाङ्तेङ हिका बेला इम्बालाइको मन जितिलि इम्बालाइको भेर्पा खिनीङ नेलाइ आग्या पालन पालि माको भरु इम्बालाइ ख्रीस्टको आग्या पालन पाका भाइपाङ माने | 7 ताइको कर्तब्य ना खु:सिसो पा (लेङ्चातेङ पा) ,प्रभुको भाअ्सिङ कर्तब्य पाना कोनिङ पा कालाउ द्याङ्गेलाइको भाअ्सिङ पाका भाइपा माको | 8 फम पासु ,वा बानधाइतिलाबुङ कि त मुक्ति ज्याको केलाइको कामपाका गोताङ्हेङ पुरुस्कार पिका प्रभुदोङ हि | 9 कालाउ माझनगेलाइ,नेलाइबुङ ताइको बानधाइतिगेलाइ दोफा इन्सिकाङ व्यबहार पासु | इम्बालाइहेङ मादानाइ | मनता ताअ्सु कालाउ कि नेलाइको माझन कालाउ इम्बालाइको माझन वा एनोङ्दोङ हि, कालाउ वा स्वर्गता हि |वा झाराङ द्याङ्गेलाइहेङ ए, सामान जाचिखे | 10 काङ्को पाताराको ओताकाता का दोअ्खा, प्रभुता कालाउ वाको माहान सरबुङ्ता बलियाका जेङ्तेङ हिसु | 11 परमेस्वरको पिका ''गोतेङ हात- हतियार लागाइसु कालाउ कि नेलाइ साइतानको मारेम्का चालसो सामाना पाल़ी दोस्वाना | 12 केलाइको धुम प्रिथिबिको द्याङ्गेलाइ दोफा माको, केलाइ ते इदोइ सुमिङ्को कितिकितिकाको सासक,आधिकारि कालाउ सरबुङ्गेलाइ दोफा दोअ्खा जुधेतेङ हिनाहि | केलाइको धुम ते स्वर्गको थामेको दुस्त आत्मिक सरबुङ्गेलाइको बिरोधता हि | 13 अदोङ भाअ्सिङ नेलाइ परमेस्वरको गोताङ हात-हतियार निङ्लि आवस्यक हि | कालाउ खिनिङ इङ्को खाराब दिनाको सामाना बलियायाका पातेङ पालि द्वाङ | गोतेङ धुमगेलाइ म्होपालि दोतेङ बुङ आरुङ जातेङ हिलिद्याङ | 14 एसापा, केङ्खेनेता सत्येको तेपाना तेतेङ धार्मिकताको तुम्ताता कवच लागाइतेङ कालाउ, 15 बानालको भाअ्सिङ तियार जेङ्लि सान्तिको ये:बानालको जुत्ता भाइपा नाङ्को खोकोइता सुङ | 16 कालाउ इदोइ दोफाङ खन्धुरिको ढाल प्रयोग पासु ज्याइ दुस्त आत्माको गोतेङ अग्निबानहेङ खेराइखे | 17 परमेस्वरको मुक्तिको तोप तुसु , कालाउ पबित्तरो आत्माको तरवार चुम जेदोङ चाहि परमेस्वरको वचन हि| 18 हेलाउबुङ पबित्तरो आत्माता दोमचाकाइसु ,गोतेङ किसिमको दोमचाकासुधाङ, दोमचाकाइसु ,कालाउ ताइमिङ गोइका गोताङ आनेमाने र्-हेसु एसापालि | ना जेलाउबुङ तियार हि, दोमचाकाइ पालि हेलाउबुङ माअ्लासु | जेलालाउबुङ परमेस्वरको गोतेङ द्याङ गेलाइको भाअ्सिङ्बुङ दोम चाकाइसु | 19 काङ्को भाअ्सिङ्बुङ दोमचाकाइपिसु कि जेलाउ का धुइखा परमेस्वर कासेहेङ सब्दगेलाइ प्याको कालाउ ये:बानानको म्होनाका सत्येहेङ का मनता माथिसिङ दोअ्लि द्वाको | 20 ये: बानालको पक्स्यता धुइका काम कासेहेङ पिअ्का हिघाहि | इदोइ का एलाङ इता झयाल्खानाता हितेङ्बुङ पाङ्का | दोमचाकाइसु कि जेलाउ का ये: बानालको बानाल पाङ्का का धुइलि गोइनु जिस्काङ काथाताबुङ माथिसि धुककोसो धुइलि द्वाको | 21 केलाइको मायारू ओने ताइकिकासहेङ नेलाइकोता दिङ्गिल्का हि, वा काङ्को बारेता गोतेङ काथा दोअ्प्याङ | का वा प्रभुको कामता एलोङ खान्धुरि सेवक हि, कालाउ का हिसिकाहिघा,हाइपादोङ्खा इङ्को वादोङ दोअ्प्याङ | 22 याको भाअ्सिङ का वासेहेङ दिङ्गिल्खा , केलाइको सन्चो-सुबिस्ता काथा बुझेदोअ्का का भोअ्खा | नेलाइको मन खुसिको भाअ्लि भोखा | नेलाइको मन हाउसाइ पालिको भाअ्सिङ का वासेहेङ दिङ्गिल्खा | 23 नेलाइहेङ आबा परमेस्वर कालाउ प्रभु येसु: ख्रिस्त सान्ति कालाउ गोताङ प्रेमको खान्धुरि प्याको | 24 नेलाइ झाराङ केलाइको प्रभु येसु: ख्रिस्तहेङ अनन्त माया पासुखेना,नेलाइता परमेस्वरको अनुग्रह ह्याको |