येसु सिकासो सिन्हुका
(मति 28:1-8; लुक 24:1-12; युहा 20:1-10)
16
परमेस्वरको पबित्तरो दिना दोलि दोतेङ न्हु दिना बेल्हाका पहर, मग्दल देरासो मरियम, याकुब कालाउ योसेसको आमाइ मरियम, कालाउ सलोमि, यहुदि आन्सार येसुको सिका जिउता लागाइपिलिको भाअ्सिङ आत्तरको चुइति चोल्तेङ चुमाहि। a 2 आइताबार एह्रिमाङ सान्हे लोलाउ उङको बेबालाइ येसुहेङ लिका तोमता हानिहि। 3 इम्बालाइता-ताइमिता दोअ्हि, “केलाइको भाअ्सिङ हासु तोमको उन्ठुइ लाअ्पा प्यावा वाला?” 4 इम्बालाइ दाहे तोमभारि खाङलाउ इङको उन्ठुइ भेनेङ थामे हिका तिङहि, इङको उन्ठुइ बार्का हिघाहि। 5 जेलाउ तोम लिता जेका धाबा होङतेङ हिका एमि वाजान द्याङहेङ वाको दाम्पाहा योम्तेङ हिका तिङहि। कालाउ इम्बालाइ झाराङ आवाइतुहि। 6 इम्बालाइहेङ उङको द्याङ दोअ्हि, माआवाइ तुसु, येसु जेदोङ नासरत देराको येसुहेङ नेलाइ भोसुखेना। वा क्रुसटा ताराइन्हाका हिघाहि। वाते सिन्हुतेङ ल्होतेङ हानिहोइ। वा इता मान्थु, माकुनु वासेहेङ ताअ्का थामे खाङसु। 7 एला नेलाइ हानिसु, बिसेस पतरुसहेङ कालाउ येसुको आरोङ चात्यागेलाइहेङ दोपिसु, “येसु नेलाइको आगा-आगा गालिल जिल्लाता हानिदोङखे, वा नेलाइहेङ दोअ्का भाइपाङ नेलाइ वासेहेङ इङको थामेता तिङस्वाना दोअ्पिसु!” 8 इदोइ हिङतेङ ओबालाइ येसुको तोमसो बाहार धाअ्हि। हाइपालिपानु इम्बालाइ थितेङ ओबालाइको जिउ फिर्तेङ हिघाहि। कालाउ इम्बालाइ दामाता हासुहेङ बुङ मादोअ्हि। हाइपालिपानु ओबालाइ थिका हिघाहि।प्रभु येसुको चात्यागेलाइहेङ दर्सन पिहि
(मति 28:9-20; लुक 24:13-53; युहा 20:11-23; प्रे 1:4-11)
9 आइताबार एह्रिमाङ जेलाउ येसु सिन्हुतेङ ल्होलाउ वा झाराङ खान्तेङ लाम्फा मग्दल देरासो मरियम देखाल जेङहि। हानिका सोमोइता इदोइ बेबालसो येसु न्हिलोङ भुत-आत्मा ओल्ले पापिका हिघाहि। 10 येसुको चात्यागेलाइहेङ इदोइ काथा मरियम हिङपाहि। जेलाउ वा इम्बालाइहेङ दुसुहि, इम्बालाइ येसुको सिका काथाको बारेता मन ओकलाइतेङ खार्तेङ हिघाहि। 11 मरियमको काथासो येसु सिन्हुका हि कालाउ का तिङघा दोअ्का काथा इम्बालाइहेङ हिङपाहि, कालाउबुङ इदोइ काथाहेङ ओबालाइ मासाअ्हि।
12 जेलाउ यरुसेलेम सहरसो भेरपाङको देरा भारि न्हेमि चात्यागेलाइ हानिकाताङ पालाउ ओबालाइकोता येसु तिङचाहाहि। ओबालाइ येसुहेङ नाल्लि मादोहि हाइपालिपानु वा भेनेङ खालको जेङतेङ देखाल जेङहि। 13 कालाउ जेलाउ ओबालाइ नाल्हि कि वा हासु, यरुसेलेम सहरता बाकि हिका चात्यागेलाइ दोअ्लि हानिहि, कालाउबुङ हासु बुङ ओबालाइ हुता खाङधुरि मापाहि।
14 कालाउ न्हुसो चात्यागेलाइ उम चाकाताङ पालाउ तेन्हे झनाको माझाताङ येसु देखा जेङहि कालाउ इम्बालाइहेङ चेरहि हाइपालिपानु वा सिकासो सिन्हुतेङ ल्होलाउ वासेहेङ तिङकालाइको दोअ्का काथाता ओबालाइ मासाअ्का हिघाहि। 15 कालाउ येसु इम्बालाइहेङ दोअ्हि, “सुमिङ भरि गोताङ थामेगेलाइता हानेसु कालाउ झाराङ द्याङगेलाइहेङ सुसमाचार हिङपासु। 16 काङको सुसमाचार हुता खाङधुरि पाका कालाउ एनोङ चिन्हाको रुपता बप्तिस्ता ह्रुकालाइ परमेस्वरसो ताइ-हुता लोका पापगेलाइको साजाइसो बान्चि पावा, कालाउ जाइ हासु बुङ का हुता खाङधुरि पालिसो इन्कार पावा वा परमेस्वरसो ताइको पापको साजाइ निनावा। 17 का हुता खाङधुरि पाकालाइ इदोइ चिन्हगेलाइ पालि द्वाङ: इम्बालाइ काङको मिङता भुत-आत्माहेङ दिकावा, कालाउ का इम्बालाइहेङ नावा भासा धुइका बानाइ याङका। 18 इम्बालाइ बिस हिका पुय्याँ रिमलाउबुङ पुय्याँ हाइदोङ हान्ति पालि मादावा, कालाउ हिदोइ बुङ बिस हिका आमेने आमलाउबुङ हिदोइ बुङ खाल्को हान्ति पालि मादावा। इम्बालाइ मिसा लोकालाइको हुता ताइको खुर ताअ्तावा कालाउ इम्बालाइको मिसा एलावा।”
19 जेलाउ येसु ताइको चात्यागेलाइहेङ इदोइ काथा दोअ्लि दोलाउ परमेस्वरसो वासेहेङ स्वर्ग तोल्हेपुहि कालाउ वा परमेस्वरको दाम्पाहा खुरपाहा सासन पालि भाअ्सिङ योम्हि। 20 जेलाउ चात्यागेलाइ गोताङ थामेता द्याङगेलाइको माझाता हानितेङ सुसमाचार पाहि। प्रभु दोङ चात्यागेलाइहेङ साघाइहि कालाउ वाको सान्देस सत्ये हिघाहि इङको काथा साबित पालिको भाअ्सिङ, एसापा वाको पाहासो सरबुङ साइका चिन्हगेलाइको काम पाहि। आमेन।