मर्कुस 15

पिलातसको आगाता येसु

(मति 27:11-31; लुक 23:2-3; 18-25; युहा 18:28-40; 19:1-16)

एह्रिमाङ मुलि पुजारिगेलाइ, यहुदिगेलाइको आगुवा, व्यवस्था धिरपाका द्याङगेलाइ कालाउ यहुदि माहासभाको झाराङ सदस्यगेलाइ बोइथोक योम्हि कालाउ येसुहेङ रिम्तेङ झिनन्झिरिहोइ धेउतेङ इम्बालाइ न्यायको भाअ्सिङ यहुदिया इलाकाको रोमि सारकार पिलातसको साअ्ता पिपुहि। 2 पिलातस येसुहेङ हिअ्हि, “हाइ नाअ् यहुदिगेलाइको राजा दोङ?” येसु दोअ्हि, “नाअ् ताइमिङ दोअ्खेना कि नादोङ दोअ्तेङ।” 3 मुलि पुजारिगेलाइ येसुहेङ हेन्जा काथागेलाइहोइ दुसिहि। 4 पिलातस येसुहेङ आरुङ हिअ्हि, “हाइ नासेहेङ ताइको बारेता हाइबुङ दोअ्लि मान्थु? खाङ त इम्बालाइ नासेहेङ वथे हेन्जा दुसितेङ हि?” 5 येसु सिकापा हि, या तिङतेङ इता थेकापाकि पिलातस सक्क परिहि।

6 बासार किपाङ निस्तार पार्बाको सोमोइता द्याङगेलाइको माग एमि कैदिहेङ लाअ्पिका चलन हिघाहि। 7 ओदोङ सोमोइता बारब्बा मिङ हिका द्याङ हेन्जाङ बिद्रोहि पानाङ झ्यालखाना ह्वावाका हिघाहि, इम्बालाइ रोमि सारकारको बिद्रोहता हेन्जा द्याङगेलाइहेङ सेअ्का हिघाहि। 8 कालाउ द्याङगेलाइको जेर पिलातसकोता लोतेङ दोअ्हि, लाम्फाको बासार भाइपाङ इदोइ बासारबुङ एमि कैदिहेङ लाअ्पि। 9 पिलातस दोअ्हि, “नेलाइ हाइ भोसुखेना, कि का नेलाइको भाअ्सिङ यहुदिगेलाइको राजाहेङ लाअ्पिया कुनु?” 10 हाइपालिपानु वासेहेङ थाहा हिघाहि कि मुलि पुजारिगेलाइ डाहा पातेङ येसुहेङ रिम्का हिघाहि। 11 कालाउ मुलि पुजारिगेलाइ जेरहेङ तोम्पाहि कि येसुको बाद्लाता बारब्बाहेङ लाअ्पिलिको भाअ्सिङ पिलातसहेङ दोअ्हि। 12 पिलातस आरोङ द्याङगेलाइहेङ हिअ्हि, “एन्सापानु जाइ नेलाइ यहुदिगेलाइको राजा दोसुखेना, वासेहेङ चाहि का हाइ पालि कुनु?” 13 द्याङगेलाइको जेर आरोङ र्ह्रिकाइतेङ दोअ्हि, “वासेहेङ क्रुसटा तोइतेङ सेअ्सु।” 14 पिलातस इम्बालाइहेङ हिअ्हि, “वा हाइ आपाराध पाका हि रो?” कालाउ झन इम्बालाइ पिलातसहेङ ह्रिकाइतेङ दोअ्हि, “वासेहेङ क्रुसटा तोइतेङ सेअ्सु।” 15 कालाउ पिलातस जेरहेङ लेङचापालिको भाअ्सिङ कालाउ ओबालाइको भाअ्सिङ बारब्बाहेङ लाअ्पिहि, कालाउ येसुहेङ द्वालिहोइ म्हेतेङ क्रुसटा तोइलि रोमि सिपालाइहेङ सुम्पिपिहि।

16 कालाउ पिलातसको सिपालाइ येसुहेङ गर्बनरको दरबारको सालेङता चुम्पुहि, (जाइहेङ प्रेटोरियन दोअ्खे) कालाउ गोताङ सिपालाइहेङ जोम्पाहि। 17 सिपालाइ येसुहेङ राजाको भाइपा गाङगाउरा रङको धाबा होङपाहि, कालाउ चुइको मुकुट पुइतेङ पुरिङता तुअ्पातेङ, आभिनाय पातेङ खुजालाइलि। 18 कालाउ इम्बालाइ साम्मान तिङपातेङ पाका हि दोअ्तेङ सेउपालि तेङहि कालाउ चेरतेङ दोअ्हि, “यहुदिगेलाइको राजाको जय ज्याको!” 19 इम्बालाइ बाराम्बार निगालोको लाठिहोइ वाको पुरिङता दान्हाइघाखे, इम्बालाइ वासेहेङ आपमान पालिको भाअ्सिङ हेथेते वाको हुता थोअ्हि, कालाउ इम्बालाइ साम्मान पिलि आभिनाय पातेङ वासेहेङ तुघुरतेङ सेउपालि तेङहि। 20 कालाउ येसुहेङ खुजालाइलि दोअ्तेङ इम्बालाइ नेल्पा धाबा खाइपिहि, कालाउ वाको ताइकोङ धाबा होङपाहि। इन्तासो इम्बालाइ वासेहेङ क्रुसटा तोइलि येसुहेङ बाहार ओल्लेपाहि।

येसुहेङ क्रुसता तोइका

(मति 27:32-44; लुक 23:33-43; युहा 19:17-27)

21 सहरसो बाहार हानिकाताङ पालाउ सिमोन मिङ पाका एमि द्याङ देरासो यरुसेलेम सहरता लोका हिघाहि, सिमोन कुरेनि सहरसो लोका हिघाहि कालाउ उङको आलेक्जेन्डर कालाउ रुफसको आबा हिघाहि, सिपालाइ वासेहेङ येसुको क्रुस फालि कर लागाइहि जेता ओबालाइ येसुहेङ क्रुसता तोयाङ। 22 कालाउ येसुहेङ इम्बालाइ गलगथा दोअ्का थामेता चुमाहि। हिब्रु भासाता गलगथा दोअ्का चाहि “खप्परे” थामे। 23 इन्ता थुकातेङ सिपालाइ येसुहेङ म्हाका मुर्र मिस्लाइका दाखरस पिहि, ताकि वासेहेङ आतुइसा साघाइ मिलियाको। कालाउ येसु इङको माआम्हि। 24 कालाउ न्हुसो इम्बालाइ येसुहेङ काटि ताराइतेङ क्रुसटा तोइहि। वाको धाबागेलाइ हासु-हासु को भागता परियाङ दोअ्तेङ इम्बालाइ चिट्ठा ताअ्तेङ बाख्राइहि। 25 येसुहेङ क्रुसटा तोइलाउ ह्रिमाको क्वाहा बजिका हिघाहि। 26 सिपालाइ येसुको पुरिङ हुता एनोङ दुसिका पात्तारा लेखेतेङ ताराइका हिघाहि, इन्ता वासेहेङ क्रुस हुता तोइका कारान लेखेका हिघाहि कालाउ वाको हुता इदोइ सब्दगेलाइ लेखेका हिघाहि, “यहुदिगेलाइको राजा।” 27 येसुहेङ क्रुसटा तोइलाउ इम्बालाइ न्हेमि डाकागेलाइहेङ बुङ क्रुसटा येसुको दाम्पाहा कालाउ केपाहा तोइहि। 28 एसापा धर्मसास्तरता ख्रिस्टको बारेता लेखेका काथा सत्ये जेङहि कि “वा आपाराधिगेलाइदोफा गान्धिन्हाहि।” 29 इङको दामा पाहासो तेकालाइ लोकालाइ-हानिकालाइ निर्घा मेतेङ-मेतेङ येसुहेङ इसिका दोअ्तेङ खुजालाइहि, “ते दोअ्, मुन्दिरहेङ ह्राअ्तेङ सुम्निता धाम्लि खाङका द्याङ नाआङ माको?! 30 एला ताइमिहेङ बान्चिपातेङ क्रुससो खुअ्तेङ लोउ!” 31 मुलि पुजारिगेलाइ, कालाउ व्यवस्था धिरपाका द्याङगेलाइ कालाउ यहुदिगेलाइको आगुवा इन्ताङ हिघाहि। उङको द्याङगेलाइ बुङ येसुहेङ खुजालाइहि दोअ्हि “या आरुहेङ बान्चिपालि दोहि, कालाउ एला ताइमिहेङ बान्चिपालि माद्वाङ। 32 ओइ इस्राएल सारभिको राजा ख्रिस्ट एला क्रुससो लेता खुअ्तेङ लोउ, ताकि केलाइ बुङ खानाङ! कालाउ कि खाङधुरि पाङ” कि इदोइ केलाइको राजा हि। वाको दोफाङ क्रुसटा तोइन्हाका एमि बुङ वासेहेङ खुजालाइहि,

33 नितिमा तेन्हे बजेसो सुम बजे थेकापा इदोइ प्रिथिबि भरिदोङ कितिकितिहि। 34 ह्रिमाको सुम बजे येसु इसिका दोअ्तेङ बार्का गालाहोइ ह्रिकाइतेङ दोअ्हि, “इलोइ-इलोइ लामा सबखथानि?” इदोइ दोअ्का आर्थ चाहि, “हे काङको परमेस्वर, कासेहेङ हाइ पालि लाअ्न्हा?” 35 इन्ता जाअ्कालाइ मध्ये हिङतेङ आधिमि गलत सम्झिहि कालाउ दोअ्लि तेङहि, “हिङसु, याते आगमबक्ता एलियाहेङ ताइमिहेङ साघाइलिको भाअ्सिङ काइदोङखे!” 36 इम्बालाइ मध्येसो एमि लोतेङ चेन्थ्रा चुकता चोबितेङ निगालोको लागासिता खोइतेङ चुमाहि कालाउ उङको चेन्थ्रा येसुको नुइता युपितेङ वा दोअ्हि, “ह्रुमसु-ह्रुमसु खानाइने वासेहेङ एलिया क्रुससो खुअ्पालि ल्वाङ बे।” 37 कालाउ ओदोङ घुरि येसु बार्का गाला ओल्लापातेङ ह्रिकाइतेङ प्रान लाअ्हि। 38 ओदोङ सोमोइता मुन्दिरको लिता तोइका पर्दा हुतासो लेता थेकापा न्हे पाना जेङतेङ थेअ्हि, कालाउ इदोइ होइदोङ झाराङहेङ परमेस्वरको उपस्थितिसो दुल्लि रोकिहि। 39 येसु एसापा ताइको प्रान लाअ्का तिङतेङ क्रुसको भेरपा जाअ्तेङ हिका रोमि कप्तान दोअ्हि, “जातिङको या द्याङते परमेस्वरको चान दोङ हिघाहि भाने।”

40 आधे बेबालाइ बुङ दुरेसोङ जाअ्तेङ खाङतेङ हिघाहि। इम्बालाइ मध्येसो मग्दल देराको मरियम हिघाहि, म्हुइका याकुब कालाउ योसेसको आमाइ कालाउ मरियम कालाउ सलोमि हिघाहि। 41 लाम्फा जेलाउ येसु गालिल जिल्लाको द्यापाहाङ हिगिल्हि कालाउ वासेहेङ सुमि बेबालाइ वाको चात्यागेलाइ भाइपाङ सामाराइहि, वासेहेङ जेदोङ गोइघाहि पुरा पापिघाहि। आरोङ हेन्जाङ बेबालाइ बुङ गालिल जिल्लाता वाको दोफा हिघाहि कालाउ वाको दोफाङ यरुसेलेम सहरता लोका हिघाहि।

येसुहेङ तोम्ता लिका

(मति 27:57-61; लुक 23:50-56; युहा 19:38-42)

42-43 योसेफ मिङ हिका एमि द्याङ हिघाहि जाइ आरिमाथिया सहरसो हिघाहि। वा माहा चाउघारा साअ्को एमि मुलि सदस्य हिघाहि कालाउ वा ताइमिङ परमेस्वरको सासनको आस पातेङ हिघाहि। वा बाहादुरिसो पिलातसको दोफा हानितेङ कालाउ येसुको सिका जिउ ह्रेहि ताकि वासेहेङ लिइलि। वा एसा पाहि हाइपालिपानु इङको दिना चाहि तियार पाका दिना हिघाहि कालाउ बेल्हाका हिघाहि। इदोइ यहुदिगेलाइको परमेस्वरको पबित्तरो दिनाको लाङ दिना हिघाहि जेलाउ ओबालाइहेङ सिका जिउ लिइलि मापिका हिघाहि। 44 जेलाउ पिलातस दोङ हिङहि कि येसु आन्चाङ सिलि दोअ्का हि, वा भाङ-भाङहि कालाउ वा रोमि कप्तानहेङ हिअ्हि, “हाइ येसु आन्चाङ सिहोइ?” 45 कप्तानदोङ जातिङको येसु सिका हि दोअ्तेङ पिलातसहेङ दोअ्हि कालाउ पिलातस योसेफहेङ येसुको सिका जिउ चुम्पुलि आनुमति पिहि। 46 जेलाउ योसेफ मेनाङ जाङका जाहाँका धाबा चोल्तेङ चुमाहि, कालाउ येसुको सिका जिउ क्रुससो लेता खुअ्पाहि कालाउ वासेहेङ यहुदि मुन्धुम आन्सार मानचाउलिहोइ सिका जिउहेङ लुन्धाइहि कालाउ येसुको जिउहेङ एनोङ आरधाङता बानाइका उन्ठुइको तोमता ताअ्हि। कालाउ वाको हुता बार्का उन्ठुइ गुम्बाराइतेङ थुम्हि। 47 मग्दल देरासो मरियम लोका हिघाहि कालाउ योसेसको आमाइ मरियम येसुहेङ तोमता ताअ्का खाङतेङ हिघाहि।