आन्तिम दिनाको चिन्हगेलाइ
(मति 24:1-51; लुक 21:5-36)
13
येसु मुन्दिरसो ओल्ले काताङ पालाउ वाको एमि चात्या दोअ्हि, “गुरुज्यु खाङ, हेथे बार्का साअ्गेलाइ! इदोइगेलाइ हेथे बार्का उन्ठुइगेलाइहोइ बानाइका हि!” 2 येसु इम्बालाइहेङ दोअ्हि, “इदोइ बार्का साअ्गेलाइ जेदोङ नेलाइ एला खाङसुखेना, जातिङ भारि का नेलाइहेङ दोअ्खा एनोङ उन्ठुइ हुता भेनेङ उन्ठुइ बुङ बाकि माह्याङ गोताङ ह्राप्यावा।”3 कालाउ येसु मुन्दिरसो जैतुनको तिकारता हानितेङ योम्हि। जेलाउ पतरुस, याकुब, आन्द्रियास कालाउ युहान्ना येसुको दोफा एक्लाङ हिघाहि, इम्बालाइ वासेहेङ हिअ्हि, 4 “केलाइहेङ दोअ्पि इदोइ गोताङ काथागेलाइ हेलाउ जेनाङ? कालाउ जेलाउ इदोइ गोताङ काथागेलाइ जेनावा इङको सोमोइ हिदोइ चिन्ह जेनावा हेलाउ जेनावा?” 5 येसु इम्बालाइहेङ दोअ्हि, “चङख हिसु! हासु बुङ नेलाइहेङ धाताइलि मानिनाको।” 6 हेन्जा द्याङगेलाइ काङको मिङ पातेङ ल्वावा। इम्बालाइ द्वावा, “का ख्रिस्ट दोङ” इम्बालाइ हेन्जा द्याङगेलाइहेङ ताइमिता खाङधुरि पापालिको भाअ्सिङ धोखा प्यावा। 7 जेलाउ नेलाइ धुम कालाउ धुमगेलाइको जोग्रेकालाइ हिङस्वाना कालाउ इङको बेला माअ्थिसु, इङको गोताङ घाटानागेलाइ जेङलि आवस्यकदोङ हि कालाउ सुमिङको आन्त चाहि एन्सालाउ दोङ माजेनाङ। 8 एनोङ जातिको बिरोधता भेनेङ जातिको द्याङगेलाइता बिरोध पावा कालाउ एनोङ सारभि भेनेङ सारभिको बिरोध पावा। जोसो-ओसोङ भुइचाल हानावा कालाउ लालाइगिल्लावा इदोइते कस्टको सुरुआत खिनिङ, जेसा कि चानको जोलोम जेङलि खाङलाउ लाम्फा तु निन्चालाउ जिसिका जेङखे इन्सिकाङ जेनावा। कालाउ या खान्तेङ बुङ हेन्जाङ कस्टगेलाइ लोलि बाकि हि।
9 नेलाइ चङख जेङतेङ हिसु हाइपालिपानु नेलाइको दुस्मनगेलाइ नेलाइहेङ स्थानिय आदालता चुम्पुतेङ कालाउ नेलाइहेङ यहुदिगेलाइको चाउघारा साअ्ता दानाइयावा, नेलाइहेङ बार्का हाकिम कालाउ सासकगेलाइको आगाता न्यायको भाअ्सिङ जापावा। परिनाम स्वरुप नेलाइ काङको बारेता सुसमाचार हिङपालि दोस्वाना। 10 इदोइ सुमिङको आन्त जेङलि खान्तेङ लाम्फा काङको बारेता सुसमाचार गोताङ सारभिगेलाइको द्याङगेलाइहेङ हिम्पालि दोका हिलिदोङ गोयाङ। 11 नेलाइहेङ इम्बालाइ रिम्तेङ आदालत चुम्पुलाउ हाइ दोअ्लि दोअ्तेङ लाम्फा दोङ पिर मापासु। इङको सोमोइ लोतेङ परमेस्वरदोङ जेदोङ दोअ्लि लागाइयावा इङको दोअ्सु, हाइपालिपानु नेलाइ ओदोङ सब्द दोस्वाना जेदोङ पबित्तरो आत्मा पियाङ। इङको सब्द नेलाइसो माल्वाङ। 12 एमि ओने भेनेङ-ओनेहेङ सेअ्लि भाअ्सिङ सुमपियावा। आबा आमाइ बुङ ताइको चान चामिन्दिहेङ, चान चामिन्दि ताइकोङ आमाइ आबाहेङ सेअ्लि लागाइयावा। हाइपालिपानु इम्बालाइ कासेहेङ खाङधुरि पानाङ। 13 हाइपालिपानु नेलाइ काङको मिङ हुता खाङधुरि पानाङ नेलाइहेङ झाराङ थोअ्तावा। कालाउ जाइ का हुता खाङधुरि पातेङ हि कालाउ जाइ चाहि ताइको जिबन लास्ता थेकापादोङ का हुता खाङधुरि पातेङ हिकालाइहेङ चाहि बान्चि पावा।
14 “एनि नेलाइ दोङ घ्रिनित द्याङहेङ तिङस्वाना। जाइको कारन मुन्दिरहेङ लाअ्तावा। वा इङको थामेता जाअ्तावा जेता वासेहेङ जाअ्लि हिदोइ बुङ खाबारा मान्थु। जाइ दोङ यासेहेङ पढेयावा बुझिलि कोसिस पालि गोइखे! जेलाउ इङको सोमोइ ल्वावा, यहुदिया जिल्लाता हिकालाइ सुरुक्स्याको भाअ्सिङ रा भारि खाअ्ताको। 15 चाङघा साअ्ता हिकालाइ लेता खुतेङ ताइको सम्पति नानि साअ् लिता मादुलाको।” 16 मिलिङता हिकालाइ होङका ताइको धाबाबुङ नानि साअ् लिता मादुलाको। 17 इङको सोमोइ उङको बेबालाइको भाअ्सिङ थिलि गोइका सोमोइ जेनाङ जाइ गान्धि तेअ्का हि कालाउ ओबालाइको भाअ्सिङ जाइ दोङ जामालहेङ दुदु चुपाका हि! ओबालाइ खाअ्लि हेन्जा मुसकिल जेनावा। 18-19 प्रार्थाना पासु कि इसिका चुङ दिनाको बेलाता द्याङगेलाइ हेन्जा गम्भिर रुपहोइ दुखित जेनावा। परमेस्वर लाङ पल्ति सुमिङ सिरजाइका सोमोइसोङ एला थेकापा हेलाउ बुङ इन्सिका दुख माल्वाङ। 20 परमेस्वर इङको थिलि गोइका सोमोइ पोतो पालि निर्नय पाका हि। माकुनुते हासु बुङ बान्चितेङ हिलि मादोधावा। कालाउ ताइमिदोङ साल्का द्याङगेलाइको कारनहोइ वा दोङ इङको दिना पोतो पावा। 21 इङको सोमोइ जेसापा हासु बुङ नेलाइहेङ दोअ्हेपानु, “खाङ, ख्रिस्ट इन्ता हि माकुनु उता हि उसो हि दोनु” नेलाइ इङको काथाता खाङधुरि मापासु। 22 हाइपालिपानु धाताइका ख्रिस्टगेलाइ कालाउ धाताइका बक्तागेलाइ ल्वावा, चिन्हागेलाइ कालाउ भारबुसाइका कामगेलाइ परमेस्वरको साल्का द्याङगेलाइहेङ धोका पिलिको भाअ्सिङ पावा। 23 नेलाइ चाहि चङख हिसु। खाङसु घाताना जेङलि खाङतेङ लाम्फा दोङ का नेलाइहेङ गोताङ घाटानाको बारेता दोअ्का हिघा।
24 “इङको दिनागेलाइता, न्हुसो माहा दु:खको सोमोइ दोलि दोतेङ तालि कालाउ जोन्जो कालाउ तालिबुङ ताइको फाइसालाम्का माप्याङ। 25 फुरुगेलाइ आकाससो लेता हुलावा कालाउ आकासता हिका गोताङ आमेनेगेलाइ सरबुङगेलाइहोइ हेङगालाइन्हावा। 26 जेलाउ का द्याङको चान, आकासको द्यापाहाङसो सुमिङता ल्वाङका। का ताइको माहान सरबुङ कालाउ महिमा तिङपाङका। 27 कालाउ का ताइको स्वर्गदुतगेलाहेङ काङको दोफा साल्कालाइहेङ जोम्पालि दिङगिल्लाङका। इम्बालाइ सुमिङको एनोङ थामेसो भेनेङ थामे भारिसो जोम्पातेङ चुमावा।”
आन्जिरको सिङसो सिक्स्या
28 कालाउ आन्जिरको सिङसो नेलाइ सिक्स्या धिरसु जेलाउ सिङको डालेङगेलाइ ल्हे भार्लि तोमावा कालाउ दोरका तिङतेङ नेलाइ गिस्वाना भेम्का सोमोइ भेरपाङ लोका हि। 29 एन्साङ पातेङ जेलाउ नेलाइ इदोइ काथागेलाइ जेङका तिङस्वाना, कालाउ नेलाइहेङ या थाहा जेनाको कि इदोइ सुमिङको आन्त भेरपाङ हि। कालाउ इदोइ धेमाङ जेनाङ। 30 का नेलाइहेङ जातिङ भारि दोअ्खा, इदोइ पुस्ताको द्याङगेलाइ जेलाउ थेकापा बान्चितेङ ह्यावा कालाउ इदोइ गोताङ घाटानागेलाइ घतियावा। 31 आकास कालाउ प्रिथिबि माअ्तेङ हानावा, जेलालाउको भाअ्सिङ माह्याङ कालाउ का जेदोङ दोअ्का हिघा इङको जेलालाउको भाअ्सिङ ह्यावा।
32 “इङको काथागेलाइ हिदोइ सोमोइ कालाउ हिदोइ दिना जेनाङ या हासुहेङ बुङ थाहा मान्थु, नाते स्वर्गदुतगेलाइहेङ का चानहेङ बुङ थाहा मान्थु, आबाहेङ खिनिङ इङको दिना कालाउ सोमोइ थाहा हि। 33 होसियार हिसु, जागवान हिसु कालाउ प्रार्थाना पासु। हाइपालिपानु नेलाइ इङको मागिस्वाना इङको हेलाउ जेनावा। 34 का द्याङको चान आरोङ ल्वाङका, एनोङ दुरेको दामा तेअ्का द्याङको काहानिसो बाताइलि दोअ्खे: एमि द्याङ ह्रिङका दामा हानिलिको भाअ्सिङ ताइको साअ् लाअ्पिधिखे। हानिलि खान्तेङ लाम्फा वा चाकारियागेलाइहेङ पालि गोइका काम पिखे। कालाउ वा पालेहेङ दोअ्खे कि वाको घुरिका दिनाता तियार जेङतेङ हिसु। 35 ओदोङ भाअ्सिङ येसु ताइको चात्यागेलाइहेङ दोअ्हि, नेलाइहेङ थाहा मान्थु कि, साअ्को गिह्रि हिदोइ बेला घुरितेङ ल्वाङ वाला। ओदोङ भाअ्सिङ नेलाइ होसियार हिसु। साअ्को गिह्रि बेल्लाका पहर माकुनु न्हिसिन्ता माकुनु ह्रिमा माकुनु झेङका पहर घुरिलि द्वाङ। 36 वा दोङ निसित रुप चेताउनि मापिसिङ ल्वाङ, ओदोङ भाअ्सिङ चङख हिसु। वा दोङ खानावा कि नेलाइ वाको भाअ्सिङ तियार जेङसु।” 37 नेलाइहेङ दोअ्का भाइपा का झाराङहेङ दोअ्का हिघा, का लोलि तोम्काता हेलाउलाउबुङ तियार जेङतेङ हिसु।