सुद्द कालाउ आसुद्द
(मति 15:1-20)
7
एनि यरुसेलेम सहरसो लोका फारिसिगेलाइ कालाउ मोसाको व्यवस्था धिरपाका द्याङगेलाइ येसुकोता परमेस्वरको बचन हिङलि वाको कोरपाहाङ योम्हि। 2 कालाउ येसुको कोइ-कोइ चात्यागेलाइ खुर माझासिङ तोले चाकाताङ पाका इम्बालाइ तिङहि जब कि ओबालाइको खुर मुन्धुम आन्सार जाहाँका मान्थुघाहि। याको माने इदोइ दोङ कि ओबालाइ ताइको खुर यहुदि मुन्धुमको आन्सार झाका मान्थुघाहि। 3 हाइपालिपानु गोताङ यहुदिगेलाइ मध्ये बिसेस पातेङ फारिसिगेलाइ इम्बालाइको पुर्खागेलाइको-आजाइगेलाइको पिका मुन्धुम आन्सार खुर माझासिङ तोले माचाघाहि। 4 हाते बाजारसो लोलाउ मुन्धुम आन्सार चिउतेङ सुद्द माजेम्पा इम्बालाइ माचाघाखे, इदोइ झोको खिनिङ माको, इम्बालाइ इसिका आरोङ हेन्जाङ मुन्धुमगेलाइ मानिखे, कालाउ थालि, बात्ति, कालाउ गोताङ कासको ताखाला भान्डा झाका चलन हि। 5 ओदोङ भाअ्सिङ फारिसिगेलाइ कालाउ व्यवस्था धिरपाका द्याङगेलाइ येसुहेङ हिअ्हि, “नाङको चात्यागेलाइ पुर्खासो लोका मुन्धुम हाइ पालि माकेम्खे! इम्बालाइ उचित तरिकासो ताइको खुर माझासिङ तोले चाखे!” 6 कालाउ येसु इम्बालाइहेङ जोबाफ पिहि,यासाइया परमेस्वरको बक्ता नाअ् कपटिगेलाइको बिसोइता पबित्तरो धर्मसास्तर थिक आगमबानि पाहि। काङको बारेता सभ्य धुइसुखेना,
कालाउ बास्ताबिक का दोफा प्रेम मापाखे।
7 इम्बालाइ व्यर्थाता काङको बाखिन पाखे,
हाइपालिपानु इम्बालाइ द्याङगेलाइको बानाइका आग्यागेलाइ केमलि धिरपाखे जेदोङ कि काङको आग्यागेलाइ दोङ हि।
8 नेलाइ परमेस्वरको आग्याहेङ लाअ्तेङ आजाइ पुर्खासोङ पातेङ लोका मुन्धुमहेङ मानिसुखेना। 9 येसु इम्बालाइहेङ दोअ्हि, “नेलाइ ताइको मुन्धुम मापालिको भाअ्सिङ, परमेस्वरको आग्यागेलाइहेङ लाअ्लि दामा भोसुखेना।” 10 उधारनको भाअ्सिङ मोसाको व्यवस्था धिरपाका द्याङगेलाइ दोअ्का हि, “ताइको आमाइ आबाको आदर पासु, कालाउ जाइ आमाइ-आबाको बिरोधता मारेम्का काथा दोअ्खे, उङकोहेङ सेअ्लिदोङ गोयाङ।” 11-12 कालाउ आधिमि दोअ्खे कि, “का ताइको आमाइ-आबाहेङ साघाइलि मादाङका, हाइपालिपानु जेदोङ का नासेहेङ पिलि गोइका हिघाहि इङको परमेस्वरहेङ पिका बाचा चाका हिघा। ओदोङ भाअ्सिङ जेदोङ इङको साघाइ आमाइ आबाहेङ पालि गोइका इङको खिनिङ परमेस्वरको भाअ्सिङ हि।” ओदोङ भाअ्सिङ जेलाउ थेकापा, नाअ् उङको द्याङहेङ वाको आमाइ-आबाहेङ साघाइलि आनुमति मापिध्यास्वाना जेदोङ कि परमेस्वरको आग्याहोइ धिरपाखे। 13 कालाउ नेलाइ परमेस्वरको व्यवस्था उलङगन पासुखेना जेदोङ परमेस्वरको बचन नेलाइहेङ पिका हि, ताकि नाअ् मुन्धुमगेलाइ केम्लि दोअ्सु जेदोङ नेलाइको हारागुटियागेलाइ नेलाइहेङ सुम्पिका हि। कालाउ इसिकाङ मारेम्का कामगेलाइ पासुखेना।
14 येसु आरोङ झाराङ द्याङगेलाइहेङ ताइ दोफा काइहि कालाउ ओबालाइहेङ दोअ्हि, “नेलाइ झाराङ काङको काथा हिङसु कालाउ गिसु। 15 बाहारसो द्याङ लिता दुल्का हिदोइ बुङ काथाहोइ द्याङहेङ आसुद्द पालि मादोअ्खे। कालाउ मनसो बाहार ओल्लेका काथाहोइ कि द्याङहेङ आसुद्द पाखे। 16 नाअ् जेदोङ हिङखेना, जेदोङ नाअ् हिङना ओदोङ इङको काथाता ध्यान पितेङ हिङ।” 17 जेलाउ येसु द्याङगेलाइको जेरहेङ लाअ्तेङ साअ् लिता दुल्हि कालाउ वाको चात्यागेलाइ जेदोङ दोअ्का हिघाहि याको माने वासेहेङ हिअ्हि। 18 येसु इम्बालाइहेङ दोअ्हि, “हाइ एला बुङ नेलाइ बोगेलाइ भाइपा आबुझदोङ जेङका हिसुना? हाइ नेलाइ माबुझिसुखेना कि केलाइको नुइसो लिता दुल्का जेदोङ चानाखे इङको होइ केलाइहेङ परमेस्वरको आगाता आसुद्द माबानाइखे? 19 हाइपालिपानु इङको चाका ह्रदय मानिखे कालाउ हामुता दुल्खे कालाउ हामुसु बाहार ओल्लेखे। एसापा दोअ्का हि, येसुको आर्थ हिघाहि कि गोताङ खाल्को चाका आनेमाने परमेस्वरहेङ सुइकार हि।” 20 येसु दोअ्हि, जेदोङ द्याङगेलाइ सोचिखे, धुइखे कालाउ पाखे इङको काथागेलाइहोइ परमेस्वरको आगाता आसुद्द बानाइखे। 21 हाइपालिपानु गोताङ खाल्को खाराब मुल मन लिता सोङ ओल्लितेङ लोखे। जेसाङ: कासिबिरि, खुगिल्का, सेअ्का, उलिगिल्का, 22 दिका, दुस्ट, धाताइका, भानाइदारि, बोमिहेङ मिङ तुपाका, मन्दा माताका काथा दोअ्गिल्का, घमन्ड कालाउ मुर्खता काम पाका। 23 इदोइ गोताङ काथागेलाइ द्याङको मन लिता सोङ ओल्लेखे। कालाउ इङकोङ काथागेलाइहोइ परमेस्वरको आगाता आसुद्द पाखे।
सिरिया फोनिकिको तिरि
(मति 15:21-28)
24 कालाउ न्हुसो इन्तासो, येसु कालाउ वाको चात्यागेलाइ इङको थामेहेङ लाअ्तेङ टुरोस कालाउ सिदोन मिङ पाका सहरको कोर्पाहाङको इलाकाता हानिहि। आधिमि थाहा माग्याको दोअ्तेङ वा एमिको साअ् लिता दुल्हि। कालाउबुङ द्याङगेलाइ धेमाङ थाहा गिहि। 25 एमि भुत-आत्मा धेल्का बेजानको आमाइ येसुको बारेता हिङतेङसा वाकोता लोहि कालाउ वाको खोकोइता तुघुरहि। 26 उङको बेबाल चाहि ग्रिक हिघाहि, वा सिरिया मौजाको फोनिके दोअ्का थामेता जोलोम जेङका हिघाहि। वा एसा दोअ्तेङ येसुहेङ बिन्ति पाहि, काङको चामिन्दिसो भुत-आत्मा ओल्लिपातेङ एल्पापि। 27 कालाउ येसु दोअ्हि, “लाम्फा का ताइकोङ यहुदि द्याङगेलाइहेङ साघाइलि गोयाङ। aमाकुनुते इसिका जेनाङ चान चामिन्दिकोसो तोले घिङतेङ खियाहेङ पिलि।” 28 उङको बेबाल येसुको दोअ्का काथा बुझिहि कि वा गैर-यहुदिगेलाइहेङ खिया कालाउ यहुदिगेलाइको चान-चामिन्दिगेलाइ काङको दोअ्तेङ सम्बोधन पाका हि, ओदोङ भाअ्सिङ वा दोअ्हि, “एइ प्रभु, इङकोते थिकोङ हि! कालाउ खियागेलाइ बुङते चाङचाउकि लेता जामालाइ चालाउ होपाका, राइनाकागेलाइ हुल्का चालि निङखेते!” 29 या हिङतेङ येसु दोअ्हि, “हाइपालिपानु नाङको खाङधुरिहोइ उत्तारा पिन्हा, ओदोङ भाअ्सिङ का भुत-आत्माहेङ नाङको चामिन्दिसो बाहार ओल्लि पापिघा, एला नाअ् धुक्क जेङतेङ सिता हाने।” 30 उङको घुरितेङ सिता थुकालाउते चामिन्दि एल्तेङ चाउकिता जिम्तेङ हिघाहि। जातिङ भारि चामिन्दिसो भुत-आत्मा ओल्लिलि दोका हिघाहि।
बहिरा कालाउ लाता द्याङ
31 कालाउ न्हुसो येसु वाको चात्यागेलाइ टुरोसको इलाकासो ओल्लितेङ ओबालाइ सिदोनको सहर पाहासो डेकापोलोस इलाकाको सिमाना पाहासो हानिहि, कालाउ ओबालाइ गालिल समुन्द्रको वरिपरिको देरा भारि थुकाहि। 32 इन्ता द्याङगेलाइ एमि बहिरा कालाउ लाता द्याङहेङ येसुकोता चुमाहि, कालाउ वाको हुता खुर ताअ्पि दोअ्तेङ वासेहेङ बिन्ति पाहि ताकि वा एल्लि ड्वाको। 33 येसु उङको द्याङहेङ जेरगेलाइसो एक्लाङ खेङतेङ आसापा चुम्पुहि। कालाउ वाको न्हातोङता आङगुलि युकाइ पिहि कालाउ ताइको आङगुलिता थोअ्तेङ वाको देतोङता साइपिहि। 34 कालाउ न्हुसो येसु स्वर्ग भारि खाङतेङ ह्रिङका हुसि सितेङ वासेहेङ दोअ्हि, “इफ्फाता” जाइको आर्था हिब्रु भासाता दोअ्का चाहि, “हिनाको!” 35 एन्सालाउ दोङ उङको द्याङ रेम्फा न्हातोङ हिङलि तेङहि, कालाउ वाको देतोङ हेङगालाइन्हाहि, कालाउ वा रेम्फा नुइ धुइलि तेङहि। 36 येसु ओबालाइ झाराङहेङ दोअ्हि या काथा हासुहेङ बुङ माअ्दो कि वा हाइ पाहि। कालाउ जेथे वा दोङ माअ्दोलि दोअ्का आग्या पिहि, इङकोदोङ हेन्जा खु:सिहोइ एमिसो-भेनेङ दोफा इदोइ दोअ्लि तेङहि। 37 या काथा हिङकालाइ झाराङ हेन्जाङ आवाइतुतेङ दोअ्हि, “वा गोताङ काथा रेम्का पाहि! इता थेकापाकि बहिराहेङ हिङका कालाउ लाताहेङ नुइ धुइलि योग्य पाहि।”