नासरतको येसुहेङ खाङधुरि मापाका
(मति 13:53-58; लुक 4:16-30)
6
जेलाउ कफरनहुम सहर लाअ्तेङ येसु ताइमि हुर्किका सहर नासरतता हानिहि। वाको चात्यागेलाइ बुङ वा दोफा लोहि। 2 परमेस्वरको पबित्तरो दिनाता येसु यहुदिगेलाइको चाउघारा साअ्ता परमेस्वरको बचन सुसमाचार पालि तेङहि। वाको बचन हिङका हेन्जा द्याङगेलाइ भारभुसाइतेङ ता-ताइमिता एसापा काथा दोअ्लि तेङहि, “या द्याङ, इदोइ काथागेलाइ हिसोसो धिरहि? इसिका ग्यान कालाउ इसिका माहान सरबुङ साइका काम पाका स्यामाता वासेहेङ हासु पिका हि?” 3 ओबालाइ इसिका दोअ्तेङ वासेहेङ माअ्साहि, “हाइ या फालाको साअ् धाम्का मिस्तिरि माको रो? इदोइ द्याङ उङकोङ मरियमको चान माको रो? हाइ या याकुब, योसेफ, यहुदा, सिमोनको दादा माको रो? जाइहेङ केलाइ नाल्न्हाखे हाइ वाको बेजान ओनेगेलाइ केलाइ नासरत देरा माहिखेरो?” 4 कालाउ येसु इम्बालाइहेङ दोअ्हि, “परमेस्वरको बक्ताको गोताङ भारि मान हिखे, कालाउ ताइकोङ देराको द्याङगेलाइ चाहि वास्ता मापाखे।” 5 ओबालाइ येसुहेङ खाङधुरि पालि इन्कार पानाङ, ओबालाइ हुता खुर ताअ्तेङ आधे मासाधेकालाइहेङ एल्पालि काम बाहेक आरोङ सरबुङ कालाउ सरबुङ साइका कामगेलाइ पालि मादोहि। 6 ओबालाइको खाङधुरि मापाका तिङतेङ वासेहेङ दुख लागिहि। कालाउ न्हुसो, येसु भेरपाङको देरा-देराता हानितेङ द्याङगेलाइहेङ परमेस्वरको बचन हिङपाहि।येसु तेन्हे चात्यागेलाइहेङ सुसमाचार पालि दिङगिल्हि
(मति 10:1; 5:15; लुक 9:1-16)
7 आले सोमोइ न्हुसो वा ताइको तेन्हे झना चात्याहेङ ताइको भेरपा काइतेङ भुत-आत्मा दिगिल्का खाबारा पिहि, कालाउ वा ओबालाइहेङ न्हेमि-न्हेमिको समुह बानाइतेङ भेनेङ-भेनेङ थामेगेलाइता 8 इसिका दोअ्तेङ दिङगिल्हि, “नेलाइ ताइको दामाको भाअ्सिङ धोका लाठि चुम्पुलि दोस्वाना, कालाउ नाते तोले, नाते झोला, नाते सिपि चुम्पुसु।” 9 “सुङका जुत्ता, कालाउ आरोङ होङका लोखन बाहेक हाइदोङ माचुम्पुसु।” 10 येसु ओबालाइहेङ आरोङ दोअ्तेङ हानिहि, “जेसापा हासु बुङ नेलाइहेङ ताइको साअ्ता नेउता पिहि पानु, इङको देरासो माघुरिपा भरि ओदोङ साअ्ता हिसु। 11 कालाउ हिदोइ बुङ थामेता थुकालाउ द्याङगेलाइ नेलाइहेङ स्वागत मापानु कालाउ नेलाइको काथा हिङलि माकिनु चेताउनि पिकाताङ खोकोइको धुला इन्ताङ ह्रिपितेङ कालाउ इङको देरा लाअ्सु।” उङको द्याङगेलाइहेङ परमेस्वरदोङ पालि गोइका न्याय पावा। 12 कालाउ चात्यागेलाइ हानितेङ द्याङगेलाइहेङ दोअ्हि, “नेलाइ पाप लाअ्सु परमेस्वर भारि घुरिलि गोयाङ।” 13 ओबालाइ हेन्जा द्याङगेलाइसो भुत-आत्मागेलाइहेङ ओल्लेपाहि। कालाउ जैतुनको चुइति मोलितेङ हेन्जा मिसा लोकालाइहेङ एल्पा हि।
बप्तिस्ता पिका युहान्नाको सिका
(मति 14:1-12; लुक 9:7-9)
14 एला राजा हेरोद येसुको पाका रेम्का कामगेलाइको नावाइ चार-चाराइका हिङहि, हाइपालिपानु हेन्जा द्याङगेलाइ येसुको बारेता गिघाखे कालाउ वाको बिसोइता चार्चा पागिल्घाखे। आधिमिते येसुको बारेता इसिका दोघाखे, “या युहान्ना बप्तिस्ता पिका युहान्ना हिलि गोयाङ! वा दोङ सिकासो सिन्हुका हि! ओदोङ भाअ्सिङ वाको दोफा भारभुसाइका काम पाका परमेस्वरको सरबुङ हि!” 15 हेथेते दोअ्घाखे, “या एलिया परमेस्वरको बक्ता हि”, कालाउ हेथेते दोअ्खे, “हेन्जाङ सोमोइ लाम्फा हिका परमेस्वरको बक्तागेलाइ भाइका वा एमि परमेस्वरको बक्ता हि।” 16 जेलाउ काथा हिङतेङ राजा हेरोद दोअ्हि, “या युहान्ना बप्तिस्ता पिकादोङ हिलि गोयाङ! का स्वयमदोङ वाको पुरिङ पाल्लि आदेस पिघा, कालाउ वा सिकालाइसो सिन्हुका हि!” 17-18 राजा हेरोद ताइमिदोङ आले सोमोइ लाम्फा ताइको ओने फिलिपको बे हेरोदियास दोफा बिहु पाका हिघाहि। कालाउ युहान्ना दोङ वासेहेङ दोअ्हि, “ताइको ओनेको बेहेङ ताअ्लि रेम्का माको, जेसापा कि ओने बान्चिकाङ हि! या उचित माको मोसाको व्यवस्था आन्सार।” ओदोङ भाअ्सिङ हेरोदियासहेङ लेङचापालिको भाअ्सिङ राजा हेरोद युहान्नाहेङ रिम्पालि लागाइतेङ कालाउ धेउतेङ झ्यालखानाता ह्वाहि। 19 ओदोङ भाअ्सिङ हेरोदियास युहान्नाको बिरोधता दुस्मन हिघाहि। वा दोङ युहान्नाहेङ सेअ्लि भोअ्घाखे कालाउबुङ वा इन्सिका पालि माअ्दोहि। 20 हाइपालिपानु राजा हेरोददोङ युहान्ना धर्मि कालाउ पबित्तरो द्याङ हि दोअ्का थाहा गितेङ वाकोसो थिघाखे। ओदोङ भाअ्सिङ वा युहान्नाहेङ बान्चिपातेङ ताअ्हि। युहान्नाको बचन पाका हिङलाउ राजा हेरोद मेनाङ बिचलित जेङघाहि, कालाउबुङ वा हिङलि किपाङ हिङघाहि। 21 कालाउ एनि, राजा हेरोद ताइको जोलोम दिवस मानाइलिको भाअ्सिङ एनोङ बार्का भोज पिहि। वा ताइको बार्का आधिकारिगेलाइ कालाउ आधिकृतगेलाइ कालाउ गालिल जिल्लाको मुलि-मुलि द्याङगेलाइहेङ नेउता पिहि। कालाउ राजा हेरोद दोफा इदोइ दोङ मौका हिघाहि कि युहान्नाहेङ सेअ्पालि। 22 हाइपालिपानु जेलाउ रानि हेरोदियासको ताइकोङ चामिन्दि लिता लोतेङ न्हाहि, कालाउ वा राजा हेरोद कालाउ वाको भोजको बान्सालाइहेङ लेङचापाहि कालाउ राजा हेरोददोङ उङको बेजानहेङ दोअ्हि, “नासेहेङ जेदोङ इस्सा लागिखे इङको ह्रे, कालाउ का नासेहेङ प्याङका।” 23 राजा हेरोद वासेहेङ बाचा पातेङ दोअ्हि, का केरा चातेङ नासेहेङ दोअ्खा, “नाअ् काङको दोफा जेदोङ ह्रेकाना। जेसापा का ताइको आधा राइजि थेकापा बुङ नासेहेङ प्याङका।” 24 कालाउ वा दोङ बाहार ओल्लेतेङ ताइको आमाइहेङ हिअ्हि, “का हाइ ह्रेलि?” वा दोअ्हि, “वासेहेङ दोअ् कि युहान्ना बप्तिस्ता पिकाको पुरिङ पोतेङ नासेहेङ प्यावाको।” 25 उङको एन्सालाउ दोङ हाकाधुकु लिता राजा हेरोदकोता हानिहि, कालाउ एसापा दोअ्तेङ बिन्ति पाहि, “नादोङ एलाङ कासेहेङ बप्तिस्ता पिका युहान्नाको पुरिङ थालिता पि दोअ्का का इस्सा पाखा।” 26 राजा हेरोद मेनाङ दुखित जेङहि, कालाउ वा दोङ ताइको केरा चाका कालाउ भोजता योम्का बान्सालाइको भाअ्सिङ उङको बेजानहेङ पिका बचन नाइ दोअ्लि मादोहि। 27 राजा हेरोददोङ एन्सालाउ दोङ झ्यालखानाको एमि सिपाइहेङ आग्या पितेङ दिङगिल्हि कालाउ युहान्नाको पुरिङ पोतेङ वाको दोफा चुमालि हुकुम पाहि। 28 कालाउ वा झ्याल्खानाता हानितेङ युहान्नाको पुरिङ पोहि, कालाउ वाको पुरिङ थालिता चुमातेङ बेजानहेङ पिहि, कालाउ बेजान इङको ताइको आमाइहेङ पिहि। 29 जेलाउ बप्तिसता पिका युहान्नाहेङ सेअ्हि कालाउ वाको चात्यागेलाइ थाहा गिहि कि वासेहेङ सेअ्का हि, ओबालाइ लोतेङ कालाउ वाको सिका जिउहेङ ल्होपातेङ तोम्ता चुम्पुतेङ लिइहि।
येसु नाअ् हाजार द्याङगेलाइहेङ चापाहि
(मति 14:13-21; लुक 9:10-17; युहा 6:5-13)
30 कालाउ येसुको तेन्हे साल्का चात्यागेलाइ जाइहेङ वा दोङ दिङगिल्का हिघाहि घुरितेङ लोहि कालाउ वाको कोरपाहाङ जोम्हि, कालाउ ओबालाइ जेदोङ-जेदोङ पाका हिघाहि कालाउ धिर्पाका हिघाहि, इङको गोताङ वासेहेङ पाहि-पाहिपा दोअ्पिहि। 31 कालाउ इन्ता लोकालाइ हानिकालाइ हेन्जा हिघाहि, येसु कालाउ वाको चात्यागेलाइहेङ चालि थेकापा बुङ सोमोइ मिलिका मान्थुघाहि। येसु चात्यागेलाइहेङ दोअ्हि, “लोसु केलाइ एकोन्हा हानाइने जेता केलाइ आले सोमोइ एकालाङ हितेङ माइसा चाइने।” 32 कालाउ ओबालाइ नाउता धोल्तेङ सिकापा एनोङ एकोन्हा थामेता हानिहि जेता द्याङगेलाइ मान्थुघाहि। 33 कालाउ हेन्जा द्याङगेलाइ ओबालाइहेङ हानिकाताङ पाका तिङहि कालाउ थाहा गिहि कि इम्बालाइ हिसो हानिदोङखे। ओअ्दोङ भाअ्सिङ ओबालाइ इङको थामे भारि आस-पासता हिका गोताङ थामेगेलाइसो पाइदल तेपुहि कालाउ येसु वाको चात्यागेलाइ खान्तेङ लाम्फाङ थुकाहि। 34 जेलाउ येसु नाउसो काम्भेता खुअ्हि, वा द्याङगेलाइको एनोङ बार्का जेर तिङहि, कालाउ ओबालाइ हुता दाया तिम्पाहि। हाइपालिपानु ओबालाइ लाखुरिया माकोसिङको भेडागेलाइ भाइपा हिघाहि, ओबालाइहेङ रेम्फा सामाराइलि द्वाको दोअ्तेङ कालाउ येसु ओबालाइहेङ परमेस्वरको सासनको बारेता हेन्जाङ काथागेलाइ धिरपालि तेङहि। 35 जेलाउ सोमोइ हेन्जा हानिहि, कालाउ वाको चात्यागेलाइ वाको दोफा लोतेङ दोअ्हि, “या थामे एकोन्हा हि, कालाउ एला हेन्जा पहर हानिलि दोहोइ। 36 द्याङगेलाइहेङ बिदा पि, कालाउ इम्बालाइ वोरि-परिको थामेगेलाइ कालाउ चेम्ताङको देरा भारि हानितेङ ताइको भाअ्सिङ हाइदोङ चाका-आम्का चोल्तेङ चाको।” 37 कालाउ येसु चात्यागेलाइहेङ दोअ्हि, “नेलाइ दोङ इम्बालाइहेङ हाइदोङ चालि पिसु।” कालाउ चात्यागेलाइ वासेहेङ दोअ्हि, “हाइ केलाइ हानितेङ न्हे साइ चान्दिको थुरिसो तोले चोल्तेङ इम्बालाइहेङ चालि पिलि रो?” 38 येसु दोङ इम्बालाइहेङ हिअ्हि? “नेलाइ दोफा हेनोङ तोले हि?” कालाउ पाट्ता लागाइतेङ इम्बालाइ दोअ्हि, “नालोङ तोले कालाउ न्हेनोङ हाया।” 39 कालाउ येसु द्याङगेलाइहेङ सिङजालजालका घासिता तोम्बा-तोम्बा बानाइहि कालाउ योम्लि आग्या पिहि। 40 इम्बालाइ एसाइ-एसाइपा कालाउ पाचास-पाचासको तोम्बा-तोम्बा पातेङ योम्हि। 41 येसु इङको नालोङ तोले कालाउ न्हेनोङ हाया चुम्तेङ स्वर्ग भारि खाङतेङ परमेस्वरहेङ धन्यबाद पिहि, कालाउ इङको तोलेगेलाइ पोङहि कालाउ द्याङगेलाइको आगाता ताअ्पि दोअ्तेङ चात्यागेलाइहेङ पिहि, कालाउ इङको न्हेनोङ हाया बुङ वा झाराङहेङ बाख्राइपिहि। 42 कालाउ झाराङ द्याङ चाअ्तेङ घाइहि। 43 जेलाउ झाराङ चाअ्लि दोहि कालाउ चात्यागेलाइ तोले कालाउ हायाको दाइका पोङन्हका टुक्रागेलाइ तेन्हे दाल्हो भरि ल्होपाहि। 44 तोले चाका वाबालाइ खिनिङ नाअ् हाजार हिघाहि। कालाउ इम्बालाइ बेबालाइ कालाउ जामाललाइहेङ मागान्धिहि जाइ इन्ता हिकालाइ चाहि।
येसु चि हुता तेहि
(मति 14:22-36; युहा 6:16-21)
45 येसु ओदोङ घुरि ताइको चात्यागेलाइहेङ दोअ्हि नाउता धोल्सु कालाउ का खान्तेङ लाम्फा गालिल समुन्द्रको ओदोइ पार बेथसेदा देराता हानिसु। 46 द्याङगेलाइहेङ बिदा पितेङ न्हुसो वा तिकारता प्रार्थाना पालि हानिहि। 47 जेङफुरुफुरुलाउ नाउ गालिल समुन्द्रको माझाता हिघाहि कालाउ येसु चाहि एक्लाङ समुन्द्रसो हेन्जा दुरे तिकारता हिघाहि। 48 येसु चात्यागेलाइहेङ नाउ आगाइलि मादोअ्तेङ हिका तिङहि, हाइपालिपानु भेरमा ओबालाइको बिपरित हिघाहि। ह्रिमाको सुम बजेसो तु बजे मध्येता येसु ओबालाइको आगाता समुन्द्र हुता तेअ्काताङ लोहि, कालाउ ओबालाइ खान्तेङ आगा हानिलि तोम्लाउ 49 चात्यागेलाइ जेलाउ येसुहेङ समुन्द्र हुता तेगिल्तेङ हिका तिङहि, इम्बालाइ ह्रिकाइलि तेङहि हाइपालिपानु इम्बालाइ सोचिहि कि इङकोते भुत हि। 50 हाइपालिपानु वासेहेङ तिङतेङ झाराङ थिका हिघाहि। येसु एन्सालाउ दोङ इम्बालाइहेङ दोअ्हि, “धारस पासु, का येसु दोङ, माअ्थिसु।” 51 कालाउ वा इम्बालाइ दोफा नाउ लिता धोल्हि, कालाउ भेरमाबुङ गाङहि। कालाउ इम्बालाइ ओसारापाङ भाङभाङ हि, 52 एसापा इम्बालाइ येसुको आचाम्माको काम तिङका हिघाहि जेलाउ वा नाहाजारहेङ तोले चापाका हिघाहि, जोब कि इम्बालाइ तिङहि बास्ताबिक याको आर्था हाइ हि दोअ्तेङ माबुझिहि।
53 जेलाउ येसु कालाउ वाको चात्यागेलाइ एनोङ नाउ पाहासो गालिल समुन्द्रको आगा हानिहि, कालाउ इम्बालाइ गनेसरेतको मुलुकता थुकाहि। कालाउ इम्बालाइ नाउ काम्भेता ताअ्हि। 54 जेलाउ ओबालाइ नाउसो ओल्लेहि कालाउ ओदोङ घुरि द्याङगेलाइ येसुहेङ नाल्हि, 55 कालाउ द्यापाहाङ धाअ्गिल्हि, कालाउ जेता येसु हि दोअ्का हिङहि इन्ता मासाधेकालाइहेङ सिदाउ सुधाङ जिम्पातेङ चुमालि तेङहि। 56 देरागेलाइता कालाउ सहरगेलाइता कालाउ थामे-थामेता जेता-जेता वा दुल्हि, द्याङगेलाइ मासाधेकालाइहेङ हाते-बाजार भारि ताअ्पुहि, कालाउ वाको धाबाको आलि खिनिङ साइलि निनाको दोअ्तेङ इम्बालाइ वासेहेङ बिन्ति पाहि। कालाउ जाइ-जाइ साइहि इम्बालाइ झाराङ एल्हि।