चालाइ बिकाको निङपिका
(मति 13:1-23; लुक 8:4-15)
4
येसु आरोङ गालिल समुन्द्रको काम्भेता सुसमाचार पालि तेङहि। इन्ता वथे बार्का जेर जोम्का हिघाहि, येसु इन्ता हिका नाउता धोल्हि, कालाउ जेरगेलाइ समुन्द्रको काम्भेता योम्हि। 2 कालाउ येसु इम्बालाइहेङ निङपिकासो हेन्जाङ काथागेलाइ दोअ्पिहि। कालाउ वा ताइको सिक्स्याता इसिका दोअ्हि, 3 हिङसु, एमि किसान चालाइ बिलि ताइको मिलिङता हानिहि। 4 कालाउ चालाइ बिलाउ आतुइसा दामा भारि थाल्न्हाहि, आधे चालाइ जिहाँ-जुइलेङ लोतेङ चालाइ चुम्तेङ हानिहि। 5 आधे चालाइ उन्ठुइभारि बिन्हाहि, जेता रेम्का भोनोइ मान्थुघाहि। कालाउ जेता हेन्जा भोनोइ मान्थुनाङ, इङको धेमाङ योहि। 6 जेलाउ हेन्जा सान्हेनाङ, आतुइका चालाइको तुपा सेङहि, लिता जारि जोअ्लि मादोनाङ इङको चालाइगेलाइ चुअ्हि। 7 आधे चालाइ चुइगेलाइको भारि थालन्हाहि, चुइगेलाइ बारानाङ इङको आतुइका चालाइगेलाइहेङ बारालि मापिहि, कालाउ इङको चालाइ एरिन्हाहि, कालाउ फल मासेहि। 8 कालाउ आतुइसा चालाइ रेम्का भोनोइता बिन्हाहि, कालाउ इङको योकाताङ बाराकाताङ झाङगिहि, आधे चालाइ साइ गुना, आधे चालाइ तुते गुना कालाउ आधे चालाइ सुम्ते गुना सेहि। 9 कालाउ आरोङ येसु दोअ्हि, “नाअ् जेदोङ हिङखेना, जेदोङ नाअ् हिङना ओदोङ काथाता ध्यान पितेङ हिङ।”10 जेलाउ येसु एक्लाङ जेङहि, कालाउ तेन्हे झना चात्यागेलाइ कालाउ आरोङ वाको सानाइति येसुको दोफा ओबालाइ इङको निङपिकाको बारेता हिअ्हि। 11 येसु इम्बालाइहेङ दोअ्हि, “नासेहेङ परमेस्वरको सासनको रहस्य पिका हि, जाइ परमेस्वरको सासनको बाहार हिकालाइहेङ निङपिका पाहासो गोताङ काथा दोअ्पिहि।” 12 जेसाङ परमेस्वरको धर्मसास्तरता लेखेका हि,
“जेदोङ का पाखा इम्बालाइ खाङनुते खाङखे मातिङखे,
जेदोङ का दोअ्खा हिङनुते हिङखे, माबुझेखे।
माकुनुते इम्बालाइ पाप पालि लाअ्ताको, कालाउ परमेस्वर इम्बालाइहेङ पाप स्यामा पापिप्याको।”
चालाइ बिकाको निङपिका ब्याख्या
13 आरोङ येसु इम्बालाइहेङ दोअ्हि, “नेलाइ इदोइ निङपिका मागिसुखेना भाइसो, भेनेङ निङपिका हेसा गिस्वाना?” 14 इदोइ निङपिका को आर्थ इदोइ हि कि चालाइ बिका किसान चाहि इसिका हि जाइ परमेस्वरको बचन चारचाराइपाखे। 15 आधिमि द्याङगेलाइ दामा भाइका हि, जेता चालाइ बिन्हाहि। जेलाउ इम्बालाइ बचन हिङखे, कालाउ एन्सालाउ दोङ साइतान लोखे, हिङका बचन चुम्पुतेङ हानिखे। 16 कालाउ आधिमि द्याङगेलाइ इङको उन्ठुइ भाइका मिलिङ हि, जेता चालाइ बिन्हाका हि, या इसिका द्याङगेलाइदोङ जाइ दोङ लेङचातेङ परमेस्वरको बचन हिङखे कालाउ तुरुन्तै ग्रहन पाखे। 17 जेलाउ इम्बालाइको जारि लिता थेकापा माजोनाङ परमेस्वरको बचन ताअ्लि मादोअ्खे, ओदोङ भाअ्सिङ इम्बालाइ आले दिना थेकापा खिनिङ खाङधुरि पाखे। जेलाउ बचनको भाअ्सिङ इम्बालाइता दु:ख कालाउ सतावत लोखे, कालाउ इम्बालाइ एन्सालाउ दोङ परमेस्वरको बचन हुता खाङधुरि पालि लाअ्खे। 18 आधिमि द्याङगेलाइ चुइको झुन्जिता भाइका हि जेता चालाइ बिन्हाका, जाइ इसिका द्याङ हि वा परमेस्वरको बचन हिङखे, 19 कालाउ सुमिङको सुरताहोइ, धनको मायारुहोइ कालाउ रेम-रेम्का आनेमानेको लोभ, इदोइ वाको जिबनता लोखे कालाउ परमेस्वरको बचनता आगा बारालि मापिखे। कालाउ इन्सिका द्याङ परमेस्वरको बचनता आगा बारालि मादोअ्खे। 20 आधिमि द्याङगेलाइ रेम्का मिलिङ भाइका हि, जेता चालाइ बिन्हाका हि, जाइ इसिका द्याङ हि ओबालाइ परमेस्वरको बचन हिङतेङ ग्रहन पाखे कालाउ इन्सिका द्याङ परमेस्वरको बचनता आगा बारालि दोअ्खे। आधिमि द्याङगेलाइ साइ गुना, आधिमि द्याङगेलाइ तुते गुना, कालाउ आधिमि द्याङगेलाइ सुम्ते गुना फल सेपाखे।
ताकि हुताको गेसा
21 येसु इम्बालाइहेङ दोअ्हि, हासु बुङ गेसा जोलाइतेङ पाथि लिता माकुनु खात लिता ताअ्खे रो? झाराङ द्याङ तिनाको दोअ्तेङ टाकि हुता ताखे, 22 एसापा हाइदोङ म्होतेङ ताअ्का तिनाङ, जेदोङ म्होनाका काथा हि देखाल जेनावा। जेदोङ माम्न्हाका काथा हि इङको प्रकासता माल्वाङ। 23 “नाअ् जेदोङ हिङखेना, जेदोङ नाअ् हिङना ओदोङ इङको काथाता ध्यान पितेङ हिङ।” 24 येसु आरोङ इम्बालाइहेङ दोअ्हि, “नेलाइ हाइ हिङसुखेना इन्ता मन पिसु, जेथे हेन्जा मन पितेङ हिनाना, ओदोङ झोको हेन्जा नाअ् ग्यान aबुझियाना। 25 जाइ दोफा ग्यान हि वासेहेङ हेन्जा प्याङ, जाइ दोफा ग्यान मान्थु वाको आतुइसा हिकाबुङ चुम्पावाb।”
चालाइ बिकाको निङपिका
26 येसु आरोङ दोअ्हि, “परमेस्वरको सासन इसिका हि, जेसाङ किसान मिलिङता चालाइ बिका, 27 चालाइ बितेङ वाको बारेता निल्हि झेम्पाङ लिपाङ वा काम पातेङ हि, कालाउ वासेहेङ थाहा मानिङहि कि इङको चालाइ एसा योतेङ बाराहि।” 28 मिलिङ ताइमिङ चालाइ योपाखे हाइपालिपानु मिलिङ, लाम्फा तुपा, इन्तासो सिसा कालाउ सिसाहेङ मिङपाखे। 29 जेलाउ फल मिङखे कालाउ किसान ताइको द्याङहेङ काचिया पितेङ उम चेलि दिङगिल्खे। हाइपालिपानु उम मिङका पोहर जेङका हिखे।
पासाइको चालाइसो निङपिका
(मति 13:31-32; लुक 13:18-19)
30 येसु आरोङ दोअ्हि, केलाइ परमेस्वरको सासन इदोइ प्रकार तुलाना पालि द्वाङ। का नेलाइहेङ निङपिका पाहासो द्वाङका। 31 परमेस्वरको सासन सुमिङता हिका मध्ये झाराङ खान्तेङ म्हुइका पासाइको चालाइ भाइका हि। 32 जेलाउ पासाइको चालाइ बिखे, कालाउ बाराखे, कालाउ “गोताङ सारसिङगेलाइ खान्तेङ बार्का जेङखे, कालाउ बा-बार्का डालेङ जोखे, कालाउ आकासको जिहाँ-जुइलेङगेलाइबुङ हिलि दालेङता ताइको भाअ्सिङ भासा जोखे।” 33 कालाउ येसु दोङ ओबालाइहेङ ग्याको दोअ्तेङ इदोइ खाल-खाल्को थुपरोङ निङपितेङ बचन हिङपाहि। 34 येसु जेलाउ बुङ निङपितेङ परमेस्वरको सासनको बारेता दोअ्घाखे, कालाउ ताइको चात्यागेलाइहेङ वा दोङ सिकापा गोताङ काथाको आर्थ दोअ्पिघाहि।
येसु दुमभेर्माहेङ गाम्पाहि
(मति 8:18; 23-27; लुक 8:22-25)
35 कोकोङ दिनाको दिलिमा येसु ताइको चात्यागेलाइहेङ दोअ्हि, “लोसु केलाइ गालिल समुन्द्रको ओदोइ पार हानाइने।” 36 चात्यागेलाइ बुङ जेरहेङ लाअ्तेङ ओदोङ नाउता येसु दोफा हानिहि, जेता येसु बुङ योम्तेङ हिघाहि। इम्बालाइ येसुहेङबुङ ताइ दोफा चुम्पुहि। वाको दोफा आरु नाउबुङ हिघाहि। 37-38 येसु चाहि नाउको लेसारा भारि खिम्सुता पुरिङ ताअ्तेङ जिम्तेङ हिघाहि। आचानक बार्का दुम भेर्मा लोलि तेङहि कालाउ उल्लाउ-उल्लाउका सालगेलाइ नाउता थुन्हालि तेङहि। नाउ चिहोइ पोङघातेङ दुविलि तोम्का हिघाहि। कालाउ चत्यागेलाइ येसुहेङ ल्होपाहि कालाउ दोअ्हि, “गुरुज्यु, केलाइ झाराङ वाङलि तोम्न्हाहोइ कालाउ नासेहेङ हाइदोङ चिन्ता मान्थु?” 39 येसु ल्होतेङ भेरमाहेङ चेरहि कालाउ समुन्द्रको सालगेलाइहेङ दोअ्हि, “सिकापा गाङ” कालाउ एन्सालाउ दोङ दुम भेरमा कालाउ समुन्द्र गाङहि। 40 जेलाउ येसु चात्यागेलाइहेङ हिअ्हि, “नेलाइ हाइ पालि एसापा थिसुखेना? हाइ नेलाइहेङ एला थेकापा खाङधुरि मान्थु?” 41 इम्बालाइ मेनाङ थिहि, कालाउ ता-ताइमिता दोअ्हि, “या द्याङ हासु को? समुन्द्र कालाउ भेरमाबुङ याको काथा साअ्खे।”