मर्कुस 3

खुर सेङका द्याङ एल्हि

न्हुसो आरोङ येसु यहुदिगेलाइको चाउघारा साअ्ता हानिलाउ इन्ता एमि खुर सेङका द्याङ हिघाहि। 2 परमेस्वरको पबित्तरो दिनाता उङको द्याङहेङ एल्पाङबे दोअ्तेङ वासेहेङ दुसिलिको भाअ्सिङ द्याङगेलाइ दाउ भोतेङ हिघाहि। 3 येसु खुर सेङका द्याङहेङ दोअ्हि, “झाराङको आगाता जाअ्।” 4 जेलाउ येसु दोङ इम्बालाइहेङ दोअ्हि, हिदोइ चाहि हि, परमेस्वरको पबित्तरो दिनाता रेम्फा पालि रेम्का नाअ् मारेम्का हि? हासुकोबुङ जिउ बान्चिपालि, कि नाअ् सेअ्लि, हिदोइ चाहि रेम्का हि? कालाउ इम्बालाइ नुइ माधुइसिङ सिकापा हि। 5 येसु मेनाङ चेर ताम्पाहि जेलाउ वा द्यापाहाङ खाङहि, उङको द्याङगेलाइको राङका मनहेङ तिङतेङ वा मेनाङ दु:खित जेङहि। कालाउ उङको द्याङहेङ दोअ्हि, “नाङको खुर फेनापा।” उङको द्याङ खुर फेनापाहि, कालाउ वाको खुर एल्हि। 6 जेलाउ फारिसिगेलाइ चाउघारा साअ्सो बाहार ओल्लेतेङ धेमाङ राजा हेरोदको दलदोफा आधे द्याङगेलाइ हेसा पातेङ येसुहेङ सेअ्लि द्वाङ वाला दोअ्तेङ वाको बिरोधता ल्होहि।

जेरगेलाइ येसुहेङ पिताइका

(मति 12:15-16; लुक 6:17-19)

7-8 कालाउ द्याङको बार्का जेर येसुहेङ तिताइपुहि। इम्बालाइ गालिल जिल्लाको, यरुसेलेम सहर, यहुदिया जिल्लाको देरासो, इदुमिया जिल्लासो, कालाउ यर्दन झोराको नुहेपाहाको इलाकासो, कालाउ टुरोस कालाउ सिदोन सहर भेरपाको इलाकासो लोका हिघाहि। इदोइ गोताङ द्याङगेलाइ येसुको पाका माहान कामगेलाइको बारेता हिङतेङ लोहि। 9 येसु ताइको चात्यागेलाइहेङ दोअ्हि, “कासेहेङ योम्लिको भाअ्सिङ एनोङ नाउ चुमातेङ लोउ ताकि द्याङगेलाइको जेर कासेहेङ मायानाको।” 10 इङको दिना येसु हेन्जा द्याङगेलाइहेङ एल्पानाङ, जेथेबुङ मासाधेकालाइ हिघाहि वासेहेङ साइलि खोसु धाअ्सुघाहि। 11 जेलाउ बुङ भुत-आत्मा धेल्कालाइ वासेहेङ तिङघाहि, कालाउ येसुको आगाता साम्मान तिङपालिको भाअ्सिङ पोम्भेलेतेङ इसिका दोकाताङ ह्रिकाइघाहि, “नाअ् परमेस्वरको चान हिना।” 12 कालाउ येसु भुत-आत्माहेङ राङका आग्या पिहि, “हासुहेङ बुङ मादोअ्सु का हासु दोअ्तेङ।”

येसु तेन्हे चात्यागेलाइहेङ साल्हि

(मति 10:1-4; लुक 6:12-16)

13 कालाउ येसु तिकारता ताङलाहि कालाउ वा दोङ ताइको मन्दा ताअ्का द्याङगेलाइहेङ काइहि। ताकि इम्बालाइ वाको चात्या जेनाको दोअ्तेङ कालाउ इम्बालाइ वाकोता लोहि। 14 जेलाउ ताइ दोफा हिलिको भाअ्सिङ कालाउ सुसमाचार पालि दिङगिल्लिको भाअ्सिङ वा दोङ तेन्हे झना चात्या काम पालि साल्हि। 15 कालाउ इम्बालाइहेङ भुत-आत्मागेलाइ ओल्लापालि खाबारा बुङ पिहि। 16 उङको तेन्हे झाना प्रेरित इम्बालाइदोङ, सिमोन (जाइको मिङ पतरुस ताअ्पिहि)। 17 जब्दियाको न्हेमि चानगेलाइ याकुब कालाउ युहान्ना, कालाउ वा इम्बालाइहेङ बोआर्गनेस माकुनु (गर्जनको चानगेलाइ) दोअ्तेङ मिङ ताअ्पिहि। 18 आन्द्रियास, फिलिप, बारथोलोमाइ, मति, थोमा, आल्फायासको चान याकुब, थेदियास, कालाउ कानानि दलको सिमोन, 19 कालाउ यहुदा इस्कोरियत जाइ न्हुसो येसुहेङ बोमिको खुरता रिम्पापिका हिघाहि।

येसु कालाउ साइतान

(मति 12:22-23; लुक 11:14-22)

20 जेलाउ न्हुसो येसु कालाउ वाको चात्यागेलाइ आरोङ साअ् भारि घुरिहि। आरोङ इन्ता द्याङको जेर जोम्हि, इदोइ झोको कि वा कालाउ वाको चात्यागेलाइ उम चालिबुङ सुकापा मानिङहि। 21 जेलाउ येसुको जाहान इङको काथा हिङहि, कालाउ वासेहेङ चुम्पुलि इम्बालाइ ओल्हि, हाइपालिपानु वाको मन ठेगानाता मान्थु दोअ्तेङ इम्बालाइ दोअ्घाखे। 22 यरुसेलेम सहरसो लोका व्यवस्था धिरपाका द्याङगेलाइ दोअ्हि, “येसुकोता साइतान हि, कालाउ भुत-आत्मागेलाइको गिह्रि साइतान पाहासो दोङ, येसु भुत-आत्मागेलाइ ओल्ले पाखे।” 23 कालाउ येसु दोङ इम्बालाइहेङ ताइमिकोता काइतेङ निङपिका पाहासो दोअ्हि, “साइतान दोङ ताइको भुत-आत्मागेलाहेङ ओल्लेपालि मादोखे।” 24 जेसापा हिदोइ बुङ सारभिको द्याङ ता-ताइमिता खेङनाहि पानु इङको सारभि तिकिलि मादोखे। 25 एन्साङ पातेङ एनोङ जाहान एमिसो-भेनेङको बिरोधता हि पानु, इङको जाहान एदोफाङ हिलि माद्वावाङ। 26 जेसापा साइतान दोङ साइतानकोङ बिरोधता जाअ्तेङ इङको तिकिलि माद्वाङ, कालाउ वाको आन्तय लोलि दोका हिखे।

27 येसु दोङ इता साइतानको तुलाना एमि बलियाका द्याङ दोफा पाका हि, जाइ दोफा एनोङ साअ् हि। हिदोइ बुङ द्याङ लाम्फा बलियाका द्याङहेङ जिङलि गोइखे कालाउ खिनिङ वाको साअ्को धन-सम्पति कालाउ साअ् लुतिलि द्वावा। 28 जातिङ भारि का नेलाइहेङ दोअ्खा, परमेस्वर माकुनु हासुकोबुङ बिरोधता पाका पापगेलाइ कालाउ मन्दा माताका परमेस्वर स्यामा पाङ, 29 कालाउ पबित्तरो आत्माको बिरोधता मन्दा माताकालाइहेङ मिधुलाउबुङ परमेस्वर स्यामा मापाप्याङ, कालाउ वासेहेङ जेलाउलाउको भाअ्सिङ पापको दुसिका जेनाङ। 30 येसु दोङ इदोइ बचन दोअ्हि, हाइपालिपानु “वाकोता भुत-आत्मा धेल्का हि” दोअ्तेङ इम्बालाइ दोअ्का हिघाहि।

येसुको आमाइ कालाउ ओनेगेलाइ

(मति 12:46-50; लुक 8:19-21)

31 येसुको आमाइ कालाउ ओनेगेलाइ इन्ता लोहि। साअ्को बाहार जाअ्तेङ येसुहेङ काइगिल्हि। 32 येसुको कोर्पाहाङ द्याङगेलाइको जेर जाअ्तेङ हिघाहि। कालाउ इम्बालाइ वासेहेङ दोअ्हि, “नाङको आमाइ कालाउ नाङको ओनेगेलाइ नासेहेङ भोदोङखे, ओबालाइ बाहार ह्रुम्तेङ हि।” 33 कालाउ येसु इम्बालाइहेङ दोअ्हि, “काङको आमाइ, ओनेगेलाइ हासु?” 34 ताइको हिका कोर्पाहाङ खाङतेङ वा दोअ्हि, “खाङसु, काङको आमाइ कालाउ ओनेगेलाइ एबालाइदोङ, 35 हाइपालिपानु जाइ परमेस्वरको मन भाइपाङ पाखे, वा दोङ काङको बेजान ओनेगेलाइ, कालाउ वाजान ओनेगेलाइ काङको आमाइ।”