मत्ती 27

झेङ्काको र्-हिमाङ,येसु:हेङ सेअ्लिको भासिङ वाको बिरुदता झाराङ ओझागेलाइ (ओझा) कालाउ जनताको धर्मगुरुगेलाइ सल्लाह पाहि | 2 कालाउ ओबालाइ वासेहेङ जिङ्तेङ,चुम्पुतेङ पिलातस हाकिमहेङ जिम्मा पिहि | 3 इङ्को बेला वासेहेङ रिम्पाका यहुदा,वासेहेङ सेअ्लि खाङ्का दोअ्का काथा हिन्तेङ पास्ताइ पाहि,कालाउ मुख्य ओझागेलाइ क़ालाउ धर्मगुरुगेलाइहेङ न्हेकुरि ते चान्दिको सिक्का घुरिपालि चुमाहि | वादोङ एलोङ द्याङ ज्याइ प्रभुहेङ बिस्वासघाट पाहि ? 4 कालाउ वा दोअ्हि, का निर्दोसी द्याङ्हेङ धोका पितेङ पाप पाघा, वासेहेसेलि लागाइघा | '' कालाउ यहुदी अगुवागेलाइ दोअ्हि,''केलाइहेङ हाइ मतलब ? ना दोफा |'' केलाइहेङ इङ्को वास्ता मान्थु इङ्को नाङ्को समस्या केलाइको माको '' 5 कालाउ वा चान्दिको सिक्कागेलाइहेङ परमेस्वरको थान्ता थाल्तेङ हानिहि,कालाउ तोइतेङ ताइको जिउहेङ सेअ्हि | 6 कालाउ मुख्य धामीगेलाइ चान्दिको सिक्कागेलाइहेङ चुम्तेङ दोअ्हि,भाकारता ता:लि रेम्का माज्याङ,हाइपालीपानु याते हितिको ताका पिका | 7 इम्बालाइ ताइ ताइमिता सल्लाह पातेङ इङको ताका सो बोमिद्याङगेलाइ लिअ्लिको भासिङ कुमालेको मिलिङ चोल्हि | 8 एन्सालाउसो एला थेकापा इङको मिलिङहेङ हितिको मिलिङ दोदोङखे | 9 लाम्फाको अगमबक्ता यर्मियाको दोका काथा पुरा जेङ्हि |''इम्बालाइ चान्दिको न्हेकुरि ते सिक्का र्-हलि,इङ्को दाम रुपता,जेदोङ मुल्य एस्राएलको चान गेलाइहेङ ओबालाइ र्-हुता टोकि पिहि |'' 10 कालाउ परमप्रभु कासेहेङ आदेस पिका आन्सार कुमालेको मिलिङ्को भासिङ ओबालाइ पिहि |'' 11 येसु:हाकिमको आगाता जा:हि,कालाउ वा येसु:हेङ हि:हि ''हाइ ना यहुदि:गेलाइको राजा ?''येसु:दोअ्हि,''ना दोङ इन्साङ दोखेना |'' 12 कालाउ मुख्य ओझागेलाइ कालाउ धामीगेलाइ येसु:हेङ दोस लगाइहि, कालाउ वा हाइदोङ जवाफ मादोअ्हि | 13 कालाउ पिलातस येसु:हेङ दो:हि,नासेहेङ आरोप लागाइका काथा माहिङ्ना | ना हाइपालि जोवाफ मापिखेना ? 14 कालाउ येसु:पिलातसहेङ हाइदोङ जवाफ मापिहि | एदोइ काथा ता पिलातस भाङ भाङहि | 15 निस्तार पार्बाता द्याङ्गेलाइ दोअ्का बमोजिम हाकिम एमि कैदिहेङ ला:पिलि,गोइका मुन्धुम हिघाखे | 16 इङ्को बेला इम्बालाइको एमि एदम दुस्त मन हिका बारब्बा कैदि हिघाहि | 17 झाराङ द्याङगेलाइ पिलातसको सा:ता जोम्का हिघाहि | पिलातस इम्बालाइहेङ दोअ्हि,नेलाइको भाअ्सिङ एमि द्याङहेङ लाप्याङ्का | कालाउ हिदोइ द्याङहेङ ला:पिलि दोअ्सु बारब्बा ना ख्रिस्त येसु:हेङ ? 18 हाइपालिपानु पिलातसहेङ थाहा जेङ्का हिघाहि,इम्बालाइ मारेम्का बिचार सो येसु:हेङ वाकोता जिम्मा पिहि | 19 पिलातस न्याय पाका कुरसिता योम्तेङ हिलाउ वाको बे:वासेहेङ एलोङ बानाल पिगिल्हि | बानाल इसिका हिघाहि,उङ्को निर्दोसीको बिरोधता हाइदोङ मापा |वाको बारेता नानिको न्हिसिङ्ता का सपना तिङ्घा | इङ्को सपनासो वाको कारण का हेन्साङ दुःख भोगेघा | 20 कालाउ मुख्य ओझागेलाइ कालाउ यहुदि धर्मगुरु गेलाइ बारब्बाहेङ ला:पिलि,कालाउ येसु:हेङ से:लि दोअ्लिको भाअ्सिङ द्याङगेलाइहेङ तोङपाहि | 21 इम्बालाइहेङ आरोङ पिलातस हिअ्हि,इदोइ न्हेमिता हासुहेङ ला:पिलि ठिक जेनाङ | इम्बालाइ दोअ्हि बारब्बाहेङ | 22 पिलातसले इम्बालाइहेङ हिअ्हि,एन्सापानु ख्रिस्त दोअ्का येसु:हेङ हाइपालि गोयाङ ? झाराङ द्याङ्गेलाइ दोअ्हि,''वासेहेङ कृस्ता ताराइपि |'' 23 पिलातस इम्बालाइहेङ दोहि,''हाइपालि ? वा मारेम्का हाइपाका हि |''आरोङ झन र् काइतेङ इम्बालाइ पिलातसहेङ दोहि,''वासेहेङ क्रुस्ता ताराइ |'' 24 कालाउ पिलातुस हाइबुङ पारा मातिङ्हि आरुङ हेन्जाङ गोलमाल जेनाङबे दोअ्तेङ थिहि | कालाउ वा ताइको खुर चिहोङ झातेङ द्याङ्को आगाता हानितेङ दोअ्हि | नेलाइ ताइमिङ गिसु का या द्याङ्को से:काको दोसि मान्थुघा नेलाइहेङ्दोङ उङ्को को दोसि लाग्याको | 25 झाराङ द्याङ्गेलाइ जोअ्वाफ पितेङ दोअ्हि, वाको हिति केलाइहेङ कालाउ केलाइको सानतानता परयावा |'' 26 कालाउ पिलातस ओबालाइको भाअ्सिङ बारब्बाहेङ लाअ्पिहि | पिलातस आधिमि सिपालाइगेलाइ येसु:हेङ द्वालिहोइ म्हेलि लागाइहि | कालाउ क्रुसता ताराइलि दोअ्हि | 27 कालाउ पिलातसको सिपालाइ(लान्था) येसु:हेङ बार्का हाकिमको साता चुम्पुहि | इन्ता झाराङ सिपालाइ येसु:को कोरपाहाङ जाअ्हि | 28 इम्बालाइ वाको लोखन होपितेङ,कालाउ वासिहेङ नेल्पा धाबा होम्पा हि | 29 चुइको पुइका मुकुत वासेहेङ तुअ्पाहि | कालाउ वाको दाम्पाहा एलोङ खुरता लाठि ताअ् पिहि | कालाउ वासेहेङ हाइ हाइ दोअ्तेङ इतराइतेङ दोअ्हि,यहुदिगेलाइको राजा केलाइ नासिहेङ सेउपानाखे |'' 30 सिपालाइ येसु:हेङ थोअ्हि | कालाउ वाको लाठिहेङ वाकोङ पुरिङता दान्हाइपिहि | 31 कालाउ मारेम्का पालि दोअ्तेङ नेल्पा धावा खाइपिहि | वाको ताइकोङ धाबा होङ्पाहि | इन्तासो क्रुस्ता ताराइलि येसु:हेङ चुम्पुहि | 32 हानेकाताङ पालाउ इम्बालाइ कुरेनि सिमोनहेङ दामाहा दुसुरि | येसु:को क्रुस फातेङ हानिलि वासेहेङ दोअ्हि | 33 कालाउ इम्बालाइ गलगथा दोअ्का थामेता ठुकाहि | गलगथा दोअ्का चाहि खप्परे थामे | 34 जेलाउ इम्बालाइ गलगथा ठुकाहि कालाउ सिपाइगेलाइ येसु:हेङ दाखरस आम्पाहि इनता खाका आनेमानेता मिस्लाइका हिघाहि, कालाउ येसु: आम्लि माकिहि | 35 कालाउ येसु:हेङ इम्बालाइ क्रुस्ता तराइहि | वाको धावा हासु हाइ निनाङ् दोअ्तेङ् चित्ठा ताअ्हि | कालाउ वाको धावा इम्बालाइ बाखाराइहि | 36 कालाउ इम्बालाइ इन्ता हितेङ येसु:हेङ पहरा पिहि | 37 वाको पुरिङ हुसो ''यहुदिको राजा'' दोअ्का लेखिका दोस बानाल हिघाहि | 38 वादोफा न्हेमि दाकागेलाइहेङबुङ ताराइहि | एलोङ्हेङ येसु:को दाम्पाहा,भेनाङ्हेङ केपाहा ताराइहि | 39 इन्ता हिका द्याङ्गेलाइ वासेहेङ इसिका दोअ्तेङ दोस लगाइहि | 40 'नाङ माको थानहेङ (मन्दिरहेङ) र्-हाअ्तेङ सुम्निता धाम्लि खाङ्का,''यदि ना परमेस्वरको चान नु ताइमिहेङ सिन्हुपातेङ क्रुससो खुअ्तेङ लोउ |'' 41 मुख्य ओझागेलाइ,सास्तिरिगेलाइ कालाउ यहुदी धर्मगुरुगेलाइ इन्ताङ हिघाहि | इङ्को द्याङ्गेलाइबुङ येसु:हेङ मारेम्का दोअ्हि | 42 'इम्बालाइ दोअ्हि या वासिहेङ सिन्हुपालि दोअ्हि | कालाउ एला ताइमिहेङ सिन्हुपालि माद्वाङ | इजारायलको राजा क्रुससो खुअ्तेङ लोउ,इदोइ तिङ्नु केलाइबुङ नासेहेङ खाङ्धुरि पाङ |'' 43 वा परमेस्वरता आसा ताका हि | परमेस्वर दोङ वासिहेङ बान्चिपाको | यदि परमेस्वर वासिहेङ लापालि खाङ्नु,हाइपालि दोनु वा ताइमिदोङ दोका हि का परमेस्वरको चान | 44 कालाउ वाको दोफा तोइन्हाका इङ्को डाकाइबुङ वासेहेङ खुजालाइहि | 45 नितिमाको आधा पहरसो गोताङ सारभिता सुम बजे नितिमाङ कितिकितिहि | इन्सिका घाताना सुमिङ्भरी सुम घान्ता थेकापा जेङ्हि | 46 येसु:सुम बजेको पहर इसिका दोअ्तेङ बार्का गालाइहोइ र्-काइहि,''एलि एलि लामा सबखथानि ?''इदोइ दोअ्का चाहि हे: काङ्को परमेस्वर, ना कासेहेङ हाइपालि लाअ्न्हा ?'' 47 भेरपा जाअ्तेङ हिकालाइ इदोइ काथा हिङ्हि | ''खाङ्सु वा एलियाहेङ काइखे  ?'' 48 कालाउ एमि द्याङ घाअ्तेसाङ हानितेङ स्पन्जता(चमचिता) चि चुमातेङ येसु:हेङ मालिङ गोइता खोइनेङ चि आम्लिपिहि | 49 एलिया लोतेङ वासेहेङ बान्चेपावा बे दोअ्तेङ ओबालाइ इनता खान्तेङ हिघाहि | 50 येसु:आरोङ एखे बार्का गालाहोइ र्-हिकाहि | कालाउ वा सिहि | 51 कालाउ मन्दिरको पर्दा ताइमिङ न्हे पाना (चिरा)जेङ्तेङ थेअ्हि | इङ्को पर्दा हुता सो लेता थिकापा न्हे पाना जेङ्तेङ थेअ्हि | इङ्कोङ बेला भूइचाला लोहि कालाउ आरदाङ्गेलाइ भापाहि | 52 तोमगेलाइ चिरन्हाहि,कालाउ हेन्जाङ सि:कालाइ तोम सो सिन्हुतेङ ल्होहि | 53 कालाउ इम्बालाइ झाराङ तोम्सो बान्चितेङ बाहार उल्लिहि | कालाउ येसु:सिकासो सिन्हुतेङ न्हुसो ओबालाइ पबित्र सहरता दुल्हि कालाउ जेन्जाङ द्याङगेलाइ कोता हानिहि | 54 सिपालाइको अधिकारी कालाउ येसु:हेङ र्-हुमका सिपालाइ भुइचाल लोका,इन्ताको गोताङ जेङ्का घाटाना इम्बालाइ तिङहि,कालाउ इम्बालाइ मारेम्फाङ थिहि |''कालाउ इम्बालाइ ''एसा दोअ्हि,''याते जातिङ्को परमेस्वको चान किरो ? 55 इन्ता दुरेसोङ जाअ्तेङ खान्तेङ हिका द्याङ्ता बेबालाइबुङ हिघाहि | इङ्को बेबालाइ गालिलसो येसु:हेङ साम्हाराइलिको भाअ्सिङ येसु:दोफाङ लोका हिघाहि | 56 मरियम मग्दालिनि,याकुब:कालाउ यसेफको आमाइ मरियम कालाउ जब्दिका चान गेलाइको आमाइ इङ्को बेबालाइ गेलाइ मध्य सो हिघाहि | 57 कोकोङ दिनाको दिलिमा एमि द्याङ योसेफ यरुसलेमता लोहि | अरिमाथियाका देरा हिका वा येसु:कोङ एलोङ चात्या हिगाहि | 58 वा पिलातसकोता हानेतेङ,येसु:को सिका जिउ र्-हेहि,कालाउ येसु:को सि:का जिउ चुम्पुलि पिलातस पिहि | 59 कालाउ योसेफ मालामालाको धावा चोल्हि,मानचाउलिहोइ सि:का जिउहेङ लुन्घाहि | 60 कालाउ येसु:को सि:का जिउहेङ एलोङ नावा तोमता ता:हि | योसेफ इङ्को तोम ताइमिको भासिङ उन्ठुइको आरदाङ्ता बानाइका हिघाहि | कालाउ इङ्को तोमको खारा थुम्लिको भाअ्सिङ एलोङ बारका उन्थुइ गाम्बाराइ पातेङ तोमको खारा तुम्हि | इदोइ काम पातेङ योसेफ ताइ दामा चाहि | 61 मरियम मग्दालिनि, कालाउ मरियम मि पाका आरूङ भेनेङ बेबालबुङ तोमको भेनेङ पाहा योम्तेङ हिघाहि | 62 तियार पाकाको न्हु दिना झाराङ खान्तेङ बारका ओझागेलाइ कालाउ फारिसिगेलाइ पिलातसकोता हानेहि | 63 ओबालाइ दोअ्हि गुरुज्यु केलाइहेङ थाहा हि, या भानाइका द्याङ सुन्हुपा हिलाउ सुमनिता का आरुङ सिन्हुतेङ ल्होकाङ्का दोअ्का हिघाहि | 64 इङ्को भाअ्सिङ सुम्नि थेकापा इङ्को तोमता र्-हुम्लिको भासिङ पाले तालि खाबारा पि,माकुनुते वाको चात्यागेलाइ लोतेङ इङ्को खुटेङ चुम्पावा,कालाउ दावा वाते सिकासो सिन्हुहितेङ ल्होहि दोअ्तेङ द्याङ्गेलाइहेङ दोअ्तावा कालाउ लाम्फाको खान्तेङ एनाङ झन हेन्जा मारेम्का जेनावा | 65 कालाउ पिलातस दोअ्हि आतुइसा सिपालाइ चुम्तेङ हानेसु दोहेपानि रेम्फा तोमहेङ जोगेपातेङ तासु | 66 जेलाउ इम्बालाइ इन्ता हानिहि,कालाउ इको तोमको नुइता बारका उन्थुइहोइ थुमि कालाउ पालेगेलाइहेङ र्-हुपातेङ ताहि |