मत्ती 26

येसु:इङ्को गोताङ काथा दोअ्लि दोअ्तेङ न्हुसो ताइको चात्यागेलाइहेङ दोअ्हि, 2 'नेलाइहेङ थाहादोङ हि,न्हे दिना न्हुसो निस्तार पारबा सुरू जेनाङ | कोकोङ दिना द्याङ्को चानहेङ क्रुस्ता तोइलि सतुरगेलाइ कोता पिपुवा वा |'' 3 कालाउ मुख्य धामिगेलाइ कालाउ यहुदि प्रधान अगुवागेलाइ धामिगेलाइको थामेता जोम्हि | प्रधान धामिका मिङ कैफाया हिघाहि | 4 इङ्को सभाता येसु:हेङ रिम्लि दोतेङ दाउगेलाइ इम्बालाइ उल्लापाहि | इम्बालाइ आधिमि धाताइका निहु पातेङ येसु:रिम्लि कालाउ से:लिको भाअ्सिङ निस्चित पाहि | 5 इम्बालाइ दोअ्हि,''निस्तार पारबा् को दिना केलाइ येसु:हेङ रिम्लि माद्वाङ | केलाइ द्याङ्गेलाइ चेर ताङपाङ कालाउ भाङ-भाङ्का भारबुसाइका माकिन्हाखे | 6 येसु:बेथानिता हिघाहि,वा रोग्या खोका सिमोनको साअ्ता हिघाहि | 7 एलोङ बेजान सिसिको बोतलता हेन्जा दाम परेका अत्तरको चुइति चुम्तेङ वा कोता लोहि,कालाउ वा चालि योम्लाउ उङ्को बेजान अत्तर पुरुङ्ता हुपिहि | 8 चात्यागेलाइ उङ्को तिङ्तेङ उङ्को बेजानदोफा चेरताङ्पाहि | चात्यागेलाइ हिअ्हि,''इङ्को अत्तर हाइपालि नासा पाना ? 9 इङ्को हेन्जा दामता पितेङ गरिबगेलाइहेङ पि:लि दोधाङ |'' 10 येसु:इदोइ गोताङ काथा थाहा गितेङ,येसु:दोअ्हि,''नेलाइ वासिहेङ हाइपालिको सादेसुखेना ? वाते काङ्को भाअ्सिङ रेम्का काम पाका हि | 11 इङ्को दोअ्का द्याङ गेलाइ दिनाङ नेलाइ दोफा हि | का चाहि दिनाङ नेलाइ दोफा माह्याङ्का | 12 इङ्को बेजान काङ्को जिउदोङ भरि अत्तर लगाइपिहि | वा कासिहेङ का सिलाउ सि:का मुन्धुङको भाअ्सिङ तियार पाकाहि | 13 का नेलाइहेङ जातिङ् भारि दोअ्खा,इदोइ ये :बानाल गोताङ सुमिङ भरि बानाल पानाङ | कालाउ गोताङ थामेगेलाइता इङ्को बेजानको पाका येल्का कामगेलाइ बुङ दोपियाङ, कालाउ द्याङ्गेलाइ वासिहेङ दिनाङ फोम्पातेङ ह्यावा | 14 कालाउ न्हुसो तेन्हे चात्यागेलाइसो एमि मुख्य धामिगेलाइकोता हानेहि | उङ्को चात्याको मिङ यहुदा इसकरयोति हिघाहि | 15 यहुदा दोअ्हि,''का नेलाइको खुरता येसु:सुम्पिप्याङका | इङ्कोको भाअ्सिङ कासिहेङ हेथे ताका पिस्वाना ? ''धामिगेलाइ वासिहेङ चादिको एकुरितेलोङ सिक्का पिहि | 16 कोकोङ पहरसोङ यहुदा येसु:हेङ रिम्पालि दाउ भोगोल्हि तेङ्हि | 17 आखमिरि तोलेको लाम्फाको दिना,चात्यागेलाइ येसु:कोता लोहि | चात्यागेलाइ दोअ्हि,''निस्तार पार्बाको उम चालि केलाइ नासिहेङ तियार पाप्याङ | केलाइ हिता उम गाका ना मन्दाताखेना | 18 येसु:दोअ्हि,''सहर भारि हानेसु |काङ्को नाल्का द्याङ्कोता हानेसु | वासिहेङ दोअ्सु, गुरु एसा दोअ्लि दोअ्का हि, दोअ्तेङ दोअ्सु, काङ्को दोअ्का समय हेन्जाङ चेम्ताङ लोका हि | का निस्तार पार्बाको उम काङ्को गोताङ चात्यागेलाइ दोफा नाङ्को सा ता चाङ्का |'' 19 चात्यागेलाइ येसु:को आग्या जेसाङ गोताङ काम पापिहि | इम्बालाइ निस्तार पार्बाको उम तियार पाहि | 20 जेलाउ बेल्हाकाताङ हानिधाहि, येसु:ताइको चात्यागेलाइ दोफा उम चालि योम्का हिघाहि | 21 इम्बालाइ झाराङ उम चाकाताङ हिघाहि,येसु:दोअ्हि' 'का नेलाइहेङ जातिङ्भारि का दोअ्खा | नेलाइ मध्येसो एमि कासिहेङ रिम्पास्वाना |'' 22 चात्यागेलाइ इङ्को हिङ्तेङ मारफाङ दु:खि जेङहि, झाराङ वासिहेङ हिअ्हि,''प्रभु,हाइ इङ्को का ? काते माको वाला ? 23 येसु:जोबाफ पिहि,''ज्याइ काङ्को जामबात्तिता का दोफा खुर चोबिहि वादोङ कासिहेङ बिस्वासघात पाङ | 24 द्याङ्को चान धर्मसास्तरता जेसा लेखिएका हि इन्सिकाङ जेङ्लि गोयाङ |कालाउ द्याङ्को चानहेङ सेअ्लिको भाअ्सिङ रिम्चापावा इङ्को द्याङ मारेम्का नतिजा भोगिलि गोयाङ | इसिका जेङलि खान्तेङ ता इङको द्याङको जोलोङदोङ माजेङनु बुरु रेम्धावा | 25 कालाउ न्हुसो येसु:हेङ रिम्चापाका यहुदा येसु:हेङ दोअ्हि ''गुरुज्यु हाइ इङ्को कादोङ ? कालाउ येसु:वासिहेङ दोअ्हि,''एइ,इङ्को नादोङ |'' 26 चाकाताङ पालाउ येसु तोले खुरता तोलेहि | येसु:तोलेको भाअ्सिङ परमेस्वरहेङ धन्यबाद पिहि,कालाउ तोलेहेङ पोङ्हि |येसु:ताइको चात्यागेलाइ तोले पिहि,कालाउ दोअ्हि, ''इदोइ तोलेगेलाइ कोसु कालाउ चासु | इदोइ तोलेदोङ काङ्को जिउ |'' 27 कालाउ न्हुसो ए बाति दाखरस चुम्हि |येसु:दोअ्हि''नेलाइ झाराङ इतासो आम्सु | 28 इङ्को दाखरस काङ्को हिति | काङ्को हिति परमेस्वर पाहासो वाको द्याङ्गेलाइको भाअ्सिङ नावा कारार सुरु जेनावा | इदोइ हिति हेन्जाङ द्याङ्गेलाइ ओबालाइको पाप स्यामाको भाअ्सिङ होपावा | 29 का नेलाइहेङ दोअ्खा:का या दाखरस आरुङ हेलाउबुङ माल्वाङका जेलाउथेकापा काङ्को आबाको सारभिता केलाइ नावा भाइपाङ जेन्तेङ केलाइ एदोफाङ आमामाङ |'' 30 इम्बालाइ झाराङ एलोङ ले ,लेहि | कालाउ न्हुसो इम्बालाइ ''जैतुन:तिकारता 'हानिहि | 31 येसु:चात्यागेलाइहेङ दोअ्हि, ''नानि आधा न्हिसिनता काङ्को कारनसो नेलाइ ताइको खानघुरि लाअ्स्वाना हाइपालिदोनु इदोइ धर्मसास्तरता लेखिएकाहि:' का गोठालोहेङ प्रहार पाङ्का कालाउ बागालको भेडा मेसा गेलाइ आवाइगिलावा | 32 का सि:ते, का सि:कासो सिन्चालतेङ ल्होकाङ्का | कालाउ न्हुसो का गालिल हानाइका | नेलाइ थुकालि खान्तेङ लाम्फा का इन्ता थुकाताङका |'' 33 पतरुस दोअ्हि,''झाराङ चात्यागेलाइ नाङ्को कारनसो खान्धुरि लाअ्तावा | का काङ्को खान्धुरि हेलाउलाउबुङ मालाअ्ताङ्का |'' 34 येसु:दोअ्हि,''का नासिहेङ जातिङ्भारि दोअ्खा |नानि बेल्हालाउ धाङगाइ किया ओलि खान्तेङ लाम्फा ना, कासिहेङ सुम पतक लाअ्का ह्याना |'' 35 कालाउबुङ पतरुस जोबाफ पिहि,''का नासिहेङ हेलाउबुङ माअ्ताङका नादोफाङ सि:लि गेइलाबुङ का नासिहेङ इन्कार मापाङ्का |''कालाउ झाराङ चात्यागेलाइबुङ इदोइ काथा दोअ्हि | 36 कालाउ न्हुसो येसु:ताइको चात्यागेलाइ दोफा गेतस्मनि दोअ्का थामेता हानेहि | येसु:ओबालाइ दोअ्हि,''नेलाइ एताङ हिसु,का चाहि आसा ओसो हानितेङ दोम्चाइयाङका |'' 37 येसु:पतरुस कालाउ जब्दियाको न्हेलोङ चानगेलाइहेङ ताइको दोअ्फा चुम्पुहि | कालाउ येसु:मेनाङ दु:खि जेङ्हि,कालाउ वाको मन आउलिहि | 38 येसु:पतरुस कालाउ जब्दियाको न्हेलोङ चानगेलाइहेङ दोअ्हि,''काङ्को आत्मा मेनाङ दु:ख दु:खहोइ पोङघाका हि | काङ्को प्रान वाङ्खाराका सोकहेङ पोङ्घाकाहि | ना सिलि ना हिलि जेङ्का हि | नेलाइ इन्ता का दोफा माजिम्सिङ हिसु कालाउ र्-हुमसु |'' 39 कालाउ येसु:ओबालाइसो आसा दुरे हानेहि |येसु:भोनोइता तुघुरतेङ दोम्चाकाहि,''काङ्को आबा, जेङ्लिदोनु एदोइ कासिहेङ कस्तको या बाति आसा दुरे जेनाको | कालाउबुङ इदोइ काङ्को मनहोइ पाका भाइका माको नाङ्को मनहोइ जेनाको |'' 40 कालाउ न्हुसो येसु:ताइको चात्यागेलाइकोता लोहि | येसु:ओबालाइहेङ मस्तजिम्तेङ हिका तिङ्हि | येसु:पतरुसहेङ दोअ्हि,''ना काङको भाअ्सिङ एघान्ताङ्बुङ माजिम्सिङ हिलि मादोसुना ? 41 माजिम्सिङ हिसु कालाउ दोम्चाकाइसु, ज्याइसो ना, परिकस्याता मापरियाना | नाङ्को आत्मा तियार हि,कालाउबुङ नाङ्को जिउ चाहि सेङ्का हि |'' 42 'आरूङ न्हुसो येसु:न्हेपतक हानिहि,कालाउ दोम्चाकाइलि तेङ्हि,''काङ्को आबा,एदि का माआम्का भरि इदोइ कस्तको बाति लाअ्पालि काङ्कोसा जेङ्लि मादोनु, ना हिसिका पालि खाङ्खेना इन्सिकाङ हिलि पि |'' 43 येसु:आरोङ न्हेखेता ताइको चात्यागेलाइ हिका थामेता लोहि,एन्सालाउबुङ येसु:ओबालाइहेङ मस्त जिम्तेङ हिका तिङ्हि हाइपालिदोनु ओबालाइको मिसिया हेन्जाङ निन्घा धुलाइतेङ हिघाहि,कालाउ मिस्याबुङ ल्हितेङ हिघाहि |'' 44 ओदोङ भाअ्सिङ येसु:ओबालाइहेङ लाअ्तेङ आसा फारापा हानिहि | कालाउ येसु:आरोङ दोम्चाकाइ हि | सुम्खे लोलाउबुङ ओबालाइ लाम्फाको भाइपाङ तिङ्हि | 45 कालाउ येसु:चात्यागेलाइहेङ लोतेङ दोअ्हि ,नेलाइ एलाबुङ जिम्तेङ हिस्वाना, कालाउ माइसातेङ हिसुन्हा ? एला द्याङ्को चानहेङ पापिगेलाइको खुरता रिम्लि तोम्का पहर चेम्ताङ लोलि दोहोइ | 46 ल्होसु! केलाइ एलाङदोङ हानिलि गोयाङ | इता कासिहेङ रिम्पाका द्याङ एताङ लोखोइ | 47 येसु:काथादोकाताङ हिघाहि,उङ्को एन्सालाउदोङ यहुदा इनता लोहि,यहुदा तेन्हे चात्यागेलाइ सो एमि हिघाहि | यहुदा दोफा हेन्जा द्याङ्गेलाइ हिघाहि | उङ्को द्याङ्गेलाइहेङ मुख्य धामिगेलाइ कालाउ जनताको वाराङ प्रधानगेलाइ दिङ्गिल्का हिघाहि | यहुदाको इङ्को द्याङ्गेलाइ तरबार कालाउ भालागेलाइ चुम्तेङ लोका हिघाखे | 48 यहुदा येसु:हेङ नालपालिको भाअ्सिङ इम्बालाइहेङ इदोइ चिनापिका हिघाहि | यहुदा दोअ्हि,''का जेदोङ द्याङहेङ चुमाइ चाङ्का इङ्कोदोङ येसु:वासिहेङ रिम्पुसु |'' 49 कालाउ यहुदा सोझाङ येसुकोता हानितेङ दोअ्हि,''हे गुरुज्यु!''कालाउ यहुदा:येसु:हेङ चुमाइ चाहि | 50 येसु:दोअ्हि,''ओइ सानाइति,ना हाइपालि लोना इङ्को वा |''ओदोङघुरि द्याङगेलाइ लोहि,कालाउ येसु:हेङ रिम्लि | 51 जेलाउ इसिका जेङ्हि,कालाउ येसु:को दोफा हिका एलोङ चात्या तरबार उल्लिपाहि | वा बारका धामिको नोकरको चाकरियाको न्हातोङ पुक्कापा पाल्पिहि | 52 येसु:वासिहेङ दोअ्हि,नाङ्को तरबार वाकोङ थामेता ह्वा! ज्याइ तरबार चालाइखे वासिहेङ तरबार होइदोङ सेअ्खे | 53 नासिहेङ थाहा हि,का काङ्को भाअ्सिङ आबा दोफा साघाइलिको भाअ्सिङ सेउपानु वा स्वर्गदुतगेलाइ तेन्हे दर्जन एनाङदोङ दिल्गिल्प्यावा ? 54 इदोइ का पानु हेन्जा धर्मसास्तरता लेखेका काथा पुरा जेनावा ? धर्मसास्तर इसिकाङ जेङ्लि गोयाङ दोअ्खे |'' 55 कालाउ येसु:गोताङ द्याङ्गेलाइहेङ दोअ्हि,''नेलाइ काङ्कोता तरबार कालाउ भालागेलाइ चुम्तेङ लोसुना,हाइ का एलोङ चोर रो ? का दिनाङ दिनाङ इस्वररुको थान्ता योम्तेङ धिरपातेङ हिघाखा | कालाउ नेलाइ इन्ता कासिहेङ मारिम्सुना ? 56 इदोइ गोताङ काथागेलाइ अगमबक्तागेलाइ लेखेका अनुसार पुरा जेनाको दोअ्हि,कालाउ इसिका जेङ्हि |''कालाउ न्हुसो गोताङ चात्यागेलाइ येसु:हेङ एकलाङ बानाइतेङ लाअ्तेङ हानेहि | 57 येसु:हेङ रिम्कालाइ वासिहेङ मुख्य धामि कैयाफाको साता थुकापाहि | सास्तीरीगेलाइ कालाउ वाराङ यहुदी:गेलाइको बार् -बार्काकालाइ इन्ता जोम्तेङ हिघाहि | 58 पतरुस येसु:को न्हुअ् न्हुअ् हानेहि | जेलाउ येसु:हेङ मुख्य प्रधान धामिकोता चुम्पुदोङ्घाखे पतरुस मुख्य प्रधान धामिको साको सालेङ थेकापा हानेहि | वा इन्ता हानेतेङ पालेगेलाइको भेरपाङ योम्लि |एला हाइ जेनाउ वाला दोअ्तेङ पतरुसहे खाङ्लि खाङ्घाखे | 59 प्रधान धामिगेलाइ कालाउ यहुदि नेतागेलाइको गोताङ माहासभाउ येसु:को बिरूद्ता एलोङ ना एलोङ धाताइका गोल्ति तिङ्पालि मेनाङ कोसिस पाहि | ओदोङ पहासो इम्बालाइ येसु:से:लि खाङ्घाखे | 60 इन्ता हेन्जाङ द्याङ्गेलाइ लोहि कालाउ येसु:को बिरुद्ता धाताइका गोल्तिगेलाइ लागाइहि | कालाउबुङ महासभाउ येसु:हेङ से:लिको भाअ्सिङ इन्सिका हिदोइबुङ मारेम्का सदर निङ्लि मादोहि | कालाउ कि न्हेअ्मि द्याङ लोतेङ दोअ्लि तेङ्हि, 61 इदोइ द्याङ 'का परमेस्वरको सा र्-हालि द्वाङ्का कालाउ सुम्निको दिनाता आरोङ का इङ्को हेङ बानाइलि द्वाङका दोअ्का हि |'' 62 कालाउ मुख्य धामि ल्होतेङ येसु:हेङ दोअ्लि तेङहि,''इदोइ द्याङ्गेलाइ नाङ्को बिरुदृता माजेङ्का गोल्ति लागाइका हि | हाइ नाङ्को हुता लगाइका दोसगेलाइसो नाङ्को हाइबुङ जोबाफ मान्थु ? हाइ इम्बालाइ थिकोङ दोअ्का हि ?'' 63 येसु:सिकापाहि हाइदोङ मादोहि | कालाउ मुख्य धामि येसु:हेङ हिअ्हि,''एला बान्चिका परमेस्वरको मिङ्ता केरा चातेङ ना दोअ्,बान्चिका परमेस्वरको मिङ्ता केलाइहेङ जातिङको काथा दोअ्पि दोतेङ्का नासिहेङ आग्या पिखा | केलाइहेङ दोअ्पि हाइ ना दोङ परमेस्वरको चान ख्रिस्त हिना ? 64 येसु:दोअ्हि,''एइ काङ्दोङ | कालाउ का दोअ्खा न्हुसो भबिस्यता नेलाइ द्याङको चानहेङ परमेस्वरको दाम्पाहा भारि योम्तेङ कालाउ स्वर्गको बादेलता लोकाताङ पाका तिङ्सुवाना | 65 प्रधान धामि जेलाउ इङ्को काथा हिअ्हि वा मारफाङ चेर ताङ्पाहि | ताइकोङ धावा थेअ्तेङ वा दोअ्लि तेङ्हि,''इदोइ द्याङ परमेस्वरको निन्दा(मानकाइ) पाका हि,केलाइहेङ आरु भेनेङ काथा हाइपालि गोयाङ रो ? हाइ प्रमानको खाचो हिरो! नेलाइ झाराङ सिङ्सुना या परमेस्वरको बिरूद्को निन्दा पाका हि |'' 66 नेलाइको हाइ बिचार हि ? यहुदिगेलाइ जोबाफ पिहि,''वा दोसि हि वासिहेङ सेलिको भाअ्सिङ कालाउ दण्ड निङ्लिको भाअ्सिङ योग्य हि |'' 67 कालाउ न्हुसो द्याङ्गेलाइ येसु:को नुइ थुम्पिहि | इम्बालाइ वासिहेङ मुर्किहोइ दानाइहि | आधिमि येसु:हेङ चाउरिहि | 68 इम्बालाइ दोअ्हि,''ना अगमबक्ता ख्रिस्त हिना दोतेङ प्रमान तिङ्पा! नासिहेङ दानाइका हासु हा! ? 69 इङ्को बेला पतरुस सालेङ्ता योम्तेङ हिघाहि | एलोङ बेबाल चाकारिया लोतेङ दोअ्हि,''ना बुङ इङ्कोङ गालिल येसु:दोफा हिघाखेना |'' 70 कालाउ पतरुस इन्ता हिका झाराङ द्याङ्गेलाइको आगाता इङ्को काथा सुइकार मापाहि | वा एसा दोअ्हि नेलाइ हाइ दोअ्सुखेना का हाइदोङ माबुझिघा ?'' 71 कालाउ न्हुसो उङ्को थामे लाअ्हि | फिनु भेर्पा आरोङ बेबाल वासिहेङ तिङ्हि | कालाउ वा इन्ता हिका द्याङगेलाइहेङ दोअ्हि,''इदोइ द्याङ्बुङ नासरतको येसु:दोफा हिघाहि |'' 72 पतरस आरोङ सुइकार मापाहि | वा दोअ्हि 'परमेस्वरको मिङता केरा चातेङ दोअ्खा इङ्को द्याङ हासु का मानाल्खा |'' 73 एघुरिङ्ता,आधिमि जातेङ हिका द्याङ्गेलाइ पतरुसकोता हानिहि कालाउ दोअ्हि,''केलाइ गिन्हाखे एलोङ येसु:को चात्या मध्ये नाबुङ एअ्मि हिना | नाङ्को काथाको लिताको उङ्को मन प्रमान पिखे |'' 74 कालाउ पतरुस ताइमिहेङ धिक्कारलि तेङ्हि | कालाउ दोअ्हि,''का परमेस्वरको मिङ्ता केरा चातेङ द्वाङका कि इङ्को द्याङ हासु का नाल्काबुङ मान्थुघा |''पतरुस एन्सा दोअ्का बितिकोङ धाङगाइ किया ओहि | 75 जेलाउ पतरूस येसु:को दोअ्का काथागेलाइ फोम जेङ्हि:''धाङ्गाइ किया ओलि लाम्फाङ कासिहेङ सुमखे ना कासिहेङ मानाल्लाना |'' कालाउ न्हुसो पतरुस बाहार हानितेङ धुरु धुरु पा खारहि |