मत्ती 24

कालाउ येसु:थानसो बाहार हानिलि तेङ्लाउ वाको चात्यागेलाइ वासिहेङ (मन्दिरको सा गेलाइ ) थानको सागेलाइ तिङ्पालि लोहि | 2 येसु:चात्यागेलाइहेङ दोअ्हि,''इदोइ सा गेलाइ तिङ्दोङखेना ? का नेलाइहेङ जातिङ्को दोअ्खा, इदोइ सा गेलाइ भापा पापियाङ | हिदोइबुङ उन्थुइ भेनेङ उन्थुइ हुता धेसेतेङ माह्याङ |'' 3 इन्तासो न्हुसो येसु:जैतुन तिकारता योमतेङ हिघाहि | चात्यागेलाइ येसु:को दोफा ए कुन्हा ता,इम्बालाइ दोअ्हि,''इदोइ घाटाना हेलाउ जेनावा क्रिपायो केलाइहेङबुङ दोअ्पि | नाङ्को आगमनको कालाउ सुमिङ अन्तको संकेत चाहि हाइ ज्यावा ?'' 4 येसु:दोअ्हि,''थितेङ हिसु'',नेलाइहेङ हासुबुङ आनाइ(मुर्ख) बानाइलि मानिनाको | 5 हेन्जाङ द्याङ्गेलाइ ल्वाङ कालाउ काङ्को मिङ ल्होकावा, इम्बालाइ 'का दोङ ख्रिस्त दोअ्तावा | कालाउ इस्तुहेङ आनाइ बानायावा | 6 नेलाइ धुम(लडाइ) को बारेता हिङस्वाना, कालाउ नेलाइ एलाङ जेङ्का धुमको बारेताबुङ बानाल हिङस्वाना, कालाउ नेलाइ थिलि मागोइयाङ | इदोइ गोताङ घाटानागेलाइ जेङ्लि गोयाङ,कालाउ लास्ता एनाङदोङ माल्वाङ | 7 हाइपालिदोनु एलोङ जाति कालाउ भेनेङ जातिको बिरोध पावा कालाउ सारभि-सारभिको बिरोधता धुम जेनावा | कालाउ हेन्जा थामेता अनिकाल जेनावा,कालाउ भुइचाल हानावा | 8 इदोइ गोताङ आमेने तु निन्चाका ब्याथा जेङ्का भाइपाङ आइलाग्यावा | 9 कालाउ न्हुसो नेलाइहेङ द्याङ्गेलाइ मारेम्का ब्याबाहार पावा,द्याङ्गेलाइ नेलाइहेङ सासकगेलाइको खुरता तापियावा कालाउ साताइ यावा कालाउ सेतावा | 10 हेन्जाङ धाताइका अगमबक्ता गेलाइ उल्लिहयावा, इम्बालाइ द्याङगेलाइहेङ धाताइका काथागेलाइता खान्धुरि पापालि कोसिस पावा | 11 सुमुमिङ भरिदोङ थुपरोङ दुस्तगेलाइ तिनाङ, कालाउ एदम खान्धुराइ गेलाइबुङ प्रेम मातिङपावा | 12 सुमुमिङ भरिदोङ थुपरोङ दुस्तगेलाइ तिनाङ, कालाउ एदम खान्धुराइ गेलाइबुङ प्रेम मातिङपावा | 13 ज्याइ चाहि लास्ता थेकापादोङ द्रद हिअ्खे वादोङ बान्च्चयावा | 14 सुमुङ्भरिदोङ परमेस्वरको सारभिको बारेता ये: बानाल पानाङ, गोताङ सारभिगेलाइहेङदोङ इदोइ काथागेलाइ द्वाङ, कालाउ खिनिङ अन्त्य ल्वाङ | 15 ओदोङ भाअ्सिङ जेलाउ नेलाइ दानिएल अगमबक्तासो दोअ्का बिनासकारि कालाउ थिलि गोइका पबित्तरो थामेता जातेङ हिका तिङ्स्वाना |''इदोइ काथा पदेका द्याङ याको माने बुझिलि गोइखे | 16 'इङ्को बेला यहुदियाको द्याङ्गेलाइ लाखभारि धालि गोयाङ |'' 17 एदि हिदोइबुङ द्याङ साको चालाता हिनु सासो हाइदोङ चुमालि वा लेता माखुताको | 18 एदि हासुबुङ मिलिङ्ता हिनु वा धावा नालि धुरितेङ मान्हेसु | 19 इङ्को बेला,चानहिका बेलाइको कालाउ दुदु (चुपाका) आम्पाका जामालाइको आमाइगेलाइ हेङ बारका दु:ख जेनावा | 20 माइसाकादिना कालाउ चुनजिनको बेला एन्सा खाअ्लि मागोयाको दोअ्तेङ दोमचाकाइसु | 21 हाइपालिदोनु ? एन्सालाउ ओसारापा दु:ख जेनावा | सिरजाइका (सृष्ति) को लाम्फा सो एला थेकापा सुमिङता(संसार) इसिका खालको दुःख जेङ्का मान्थुघाखे | न्हुसो हेलाउबुङ भबिस्यता इन्सिका दु:ख माल्वाङ | 22 परमेस्वर इङ्को माहा कस्ट कालाउ दु:खको दिना आसा पोतोपाकाहि एदि वा मापोतोपानु कालाउ बाधेपानु हिदोइबुङ द्याङ सिन्चालि माढोधाङ, कालाउबुङ ताइको साल्कालाइको भाअ्सिङ इङ्को दिना घतेपाहि | 23 ओदोङ बेला आधिमि नेलाइहेङ एसा दोअ्लि द्वाङ 'खाङ्सु' ख्रिस्त इता हि,कालाउ नेलाइ इम्बालाइहेङ खान्धुरि मापासु | 24 धाताइका ख्रिस्त कालाउ धाताइका अगमबक्तागेलाइ तिन्हाङ, बारका-बारका काथागेलाइ कालाउ भारबुसाइका काम गेलाइ पावा | दोहेपानु परमेस्वरको साल्तेङ ताअ्का द्याङगेलाइ सुधाङ (धोका) धाताइलिको भाअ्सिङ एन्सा पावा | 25 खाङ्सु फोम ताअ्सु का नेलाइहेङ लाम्फासोङ दोअ्का हिघा | 26 हासुबुङ दोअ्नु ''ख्रिस्त मारालाका थामेभारि हि | कालाउबुङ नेलाइ मारालाका थामेभारि ख्रिस्तहेङ खाङ्लि मानेसु | कालाउ सालिता दोलाउबुङ खानधुरि मापासु |'' 27 जेलाउ द्याङ्को चानको आगमन जेनावा गोताङ द्याङ्गेलाइ तिङ्लि निनावा | इङ्को बेला बादेलता चिल्का-चिल्कातावा द्यापाहाङ फाइसालाका (ठाइ-ठाइ ठायावा) भाइपा जेनावा | कालाउ इङ्को ठाइ-ठाइका द्यापाहाङ तिनावा | 28 सिगुनगेलाइ जोम्तेङ हिका तिङ्तेङ नेलाइ इन्ताते सि:का गाइ पिया हि दोअ्तेङ गिस्वाना | ओदोङ भाअ्सिङ काङ्को आगमनबुङ इन्सिका इदोङ मिसियाको आगाता जेनावा | 29 इङ्को दिना संकटगेलाइको न्हुसो |सान्हे कितिकितितावा, कालाउ तालिबुङ ताइको फैसालामका माप्यावा | फुरुगेलाइ बादेलसो हुल्लावा ,कालाउ बादेलको गोताङ आनेमाने गेलाइ इसो ओसो जेनाङ | 30 इङ्को बेला (पहर) बादेलता चिना गेलाइ तिनाङ कालाउ उङ्को द्याङ्को चानको चिना जेनावा |सुमिङ भरिदोङ गोताङ द्याङ्गेलाइ खारावा | झाराङ द्याङगेलाइ द्याङ्को चानहेङ बादेलता लोदोङ्का तिनावा | द्याङ्को चान सरबुङ कालाउ माहान गौरव चुम्तेङ लावा | 31 द्यापाहाङ आकासको एनोङ थामेसो आरु भेनेङ ओटाका थामे थेकापा परमेस्वरसो साल्का द्याङ्गेलाइहेङ जोम्पावा द्याङ्को चान तुरहिको गाला दोफाङ स्वर्गदुत गेलाइ दिङगिलप्याङ | 32 कोसेको सिङ नेलाइहेङ धिरपावा जेलाउ सेकोको सिङ्को दालेङ्गेलाइ सिङ जाल जालका तिनावा कालाउ दोरका तिङ्तेङ नेलाइ गिस्वाना धाङ्का बेला भेरपाङ हि | 33 एसाङ्दोङ नेलाइबुङ जेलाउ इदोइ गोताङ काथा जेङ्का तिङ्स्वाना, कालाउ वा भेरपाङ फिनुताङ हि दोअ्तेङ गिसु | 34 जातिङ्को का नेलाइहेङ दोअ्खा कि इदोइ गोताङ काथा पुरा माजेङ्पाभरि या पुस्ता सिन्हुपा हिलाउदोङ इदोइ काथागेलाइ जेनावा | 35 स्वर्ग कालाउ पृथ्वि ध्वस्त(मोतावा) जेनावा,कालाउबुङ काङ्को बचन ध्वस्त (मामोतावा) माजेनावा | 36 इङ्को घाटाना हेलाउ जेनावा दोअ्तेङ हासुबुङ द्याङ उङ्को समय कालाउ दिना पागिखे | चान ताइमिहेङ कालाउ स्वर्गदुत गेलाइ बुङ मागिखे | कालाउ आबा खिनिङ थाहा गिखे | 37 द्याङ्को चान लोलाउ ,उङ्को बेला इन्सिकाङ स्थिति जेनाङ जेसाङ नुहाको समयता(पहर) जेङ्का हिघाखे | 38 इङ्को बेला जल-प्रलय जेङ्लि खान्तेङ लाम्फा द्याङ्गेलाइ चाखाताङ आमकाताङ पाघाखे | नुहा नाउता मादुल्पा भारि द्याङगेलाइ बिहु पाधोङघाखे कालाउ ताइको चान मान्दिगेलाइहेङ बिहु पालि पिधोङघाखे | 39 द्याङ्गेलाइ हाइ जेङ्दोङ्खे दोअ्तेङ थाहा मागिगाखे | कालाउ ओदोङ बेला जलप्रलय जेङ्हि कालाउ गोताङ होइहि | द्याङ्को चानको आगमनबुङ एसाङ जेनाङ | 40 न्हेमि द्याङ्गेलाइ मिलिङ्ता काम पाकाताङ ह्यावा | एमिहेङ तोलितेङ चुम्पावा कालाउ भेनेङ्हेङ लाअ्धियावा | 41 न्हेमि बेबालाइ जान्ताता उम सुतेङ ह्यावा,एमिहेङ चुम्पावा कालाउ भेनेङहेङ लाअ्धियावा | 42 'ओदोङ भाअ्सिङ हेलालाउबुङ तियार जेङ्तेङ हिसु | हेथे पहर नेलाइको परमप्रभु ल्वाङ दोअ्तेङ नेलाइहेङ थाहा गिलि मादोस्वाना | 43 थाहा गिसु एदि सा को माझन चोर हेथे पहर ल्वाङ दोअ्का गिनु वा तियार जेङ्तेङ हिदावा |वा सर्तक जेङ्तेङ हिदावा कालाउ चोरहेङ सा लिता दुल्लि मापिघ्यावा | 44 ओदोङ भाअ्सिङ नेलाइ बुङ तियार जेङ्तेङ हिसु | द्याङको चान इसिका पहरता लावा ज्याइको नेलाइ आसा पाका मान्थुस्वाना | 45 'खन्धुरि कालाउ बुदि्मान चाकारिया हासु हि,ज्याइहेङ वाको माझन ताइको जाहान को चाकरियागेलाइहेङ ठिक-ठिक समयता चालि आम्लि प्यावाको दोअ्तेङ काम लगाइका हिखे | 46 जेलाउ माझन लोखे कालाउ चाकारियागेलाइहेङ पिका काम पातेङ हिका निङ्नु,उङ्को नोकर धन्यको हि | 47 का नेलाइहेङ जातिङको दोअ्खा | उङ्को माझन वासिहेङ ताइको दोफा हिका गोताङ सम्पति वाको खुरता जिम्मा लगायावा कालाउ वा गोताङ आनेमाने गेलाइको खाङ्सुलि जिम्मा निनावा | 48 कालाउ नोकरदोङ दुस्त हिनु कालाउ ताइको माझन बेलोम्पा ल्वाङ दोअ्तेङ समझेपानु ओदोङ बेला हाइ ज्यावा ? 49 कालाउ न्हुसो वा आरु भेनेङ नोकर गेलाइहेङ दानाइलि तेनावा | वा ताइमिङ भाइपाङ आरु द्याङ्गेलाइ दोफा योम्तेङतेङ चालि आम्लि तेनावा | 50 उङ्को चाकारियाको माझन वा मासोचिका दिना कालाउ थाहा मागिका पहरता ल्वाङ | 51 कालाउ वाको माझन वासिहेङ सहिलि मादोका दण्ड प्यावा कालाउ वासिहेङ दिकालाइको माझाता थाइगिल्यावा | इन्ता द्याङ्गेलाइ खारसुवा-वा कालाउ तासिङ रेतावा |